Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

நாடாளுமன்ற நடவடிக்கைகளை முடக்காதீர்கள்: நாயுடு வேண்டுகோள்!

புதுடெல்லி: பட்ஜெட் கூட்டத்தொடரில் அனைத்து விவகாரங்களையும் விவாதிக்க மத்திய அரசு தயாராக உள்ளது. அதனால், நாடாளுமன்ற நடவடிக்கைகளை முடக்காதீர்கள் என்று எதிர்க்கட்சிகளுக்கு மத்திய அமைச்சர் வெங்கைய்யா நாயுடு வேண்டுகோள் விடுத்துள்ளார்.

மத்திய பட்ஜெட் கூட்டத் தொடர் இன்று (செவ்வாய்க்கிழமை) தொடங்குகிறது. இதில், பிப்ரவரி 25-ம் தேதி ரயில்வே பட்ஜெட்டும், 29-ம் தேதி பொது பட்ஜெட்டும் தாக்கல் செய்யப்பட உள்ளன. கடந்த சில நாடாளுமன்றக் கூட்டத் தொடர்கள், முழுமையாக நடைபெறாததால் பல முக்கிய மசோதாக்கள் கிடப்பில் உள்ளன.

இந்நிலையில், இந்த பட்ஜெட் கூட்டத் தொடரையாவது பிரச்னைகள் ஏதுமின்றி முழுமையாக நடத்த வேண்டும் என்ற முயற்சியை ஆளும் கட்சியான பா.ஜ.க. மேற்கொண்டுள்ளது. இதன்படி, நாடாளுமன்றத்தை சுமுகமாக நடத்துவது தொடர்பாக ஆலோசனை நடத்த, அனைத்துக் கட்சி கூட்டத்துக்கு நாடாளுமன்ற விவகாரத் துறை அமைச்சர் வெங்கைய்யா நாயுடு அழைப்பு விடுத்தார்.

இது தொடர்பாக டெல்லியில் நாடாளுமன்ற விவகாரத் துறை அமைச்சர் வெங்கைய்யா நாயுடு செய்தியாளர்களிடம் கூறும்போது, ''ஜவாஹர்லால் நேரு பல்கலைக்கழக விவகாரம், ஹைதராபாத் மத்திய பல்கலைக்கழக மாணவர் தற்கொலை விவகாரம் உள்ளிட்ட அனைத்துப் பிரச்னைகளையும் நாடாளுமன்றத்தில் விவாதிக்க மத்திய அரசு தயாராக உள்ளது. அரசு எந்தத் தவறையும் செய்யவில்லை. அதனால், அனைவரும் தங்கள் பிரச்னையைக் கூறி விவாதிக்க வாய்ப்பளிக்கப்படும். ஜே.என்.யு. விவகாரத்தில் என்ன நடந்தது என்பதை மக்களும் அறிந்துகொள்ள வேண்டும்.

நாடாளுமன்றத்தில் விவாதம் நடத்தி, ஆலோசனை செய்து அனைத்து முடிவுகளையும் எடுக்கலாம். நாடாளுமன்ற நடவடிக்கைகளை முடக்கும் நடவடிக்கைகள் வேண்டாம். காங்கிரஸ், இடதுசாரிகள் அல்லாத பிராந்தியக் கட்சிகள் நாடாளுமன்றம் சுமுமாக நடைபெறுவதையே விரும்புகின்றன. நாடாளுமன்றம் தொடர்ந்து முடங்குவதால் முக்கியப் பிரச்னைகளைப் பேச முடியவில்லை என்று அக்கட்சியைச் சேர்ந்தவர்கள் புகார் தெரிவித்துள்ளனர்.

மேலும், பட்ஜெட் கூட்டத்தொடர் என்பது மிகவும் முக்கியமானது. எதிர்க்கட்சியினர் நேர்மறையான அணுகுமுறையை மேற்கொள்ள வேண்டும். இந்த முறையாவது அவை நடவடிக்கைகள் பயனுள்ள வகையில் இருக்க வேண்டுமென்று மக்கள் எதிர்பார்க்கிறார்கள். ஜி.எஸ்.டி. உள்பட முக்கிய மசோதாக்களை நிறைவேற்றுவதில் ஒருமித்த கருத்து எட்டப்பட்டுள்ளது. ஜி.எஸ்.டி., மனை வணிக மசோதா, உள்நாட்டு நீர்வழி மசோதா, விமானக் கடத்தலுக்கு எதிரான மசோதா உள்ளிட்டவை மிகவும் முக்கியமானவை" என்றார்.

உங்கள் கருத்தைப் பதிவு செய்யுங்கள்

Advertisement
Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement
[X] Close