Vikatan.com

www.vikatan.com would like to send you push notifications.

Notifications can be turned off anytime from browser settings.

அய்யா, அம்மா வேண்டாம்... இந்த பையாவை பாருங்க! -சைடுல ஆட்டோ விடுறது யாருங்க?

விருதுநகர்: தமிழகத்தின் மோசமான நிலைக்கு தி.மு.க.வும், அ.தி.மு.க.வும் தான் காரணம். அதனால் இனி அய்யாவும், அம்மாவும் வேண்டாம் பையாவை பாருங்கள் என்று மத்திய அமைச்சர் வெங்கையா நாயுடு தேர்தல் பிரசாரத்தில் கூறினார்.

விருதுநகர் மாவட்டம் அருப்புக்கோட்டையில் பா.ஜ.க. வேட்பாளர்களை ஆதரித்து நடைபெற்ற தேர்தல் பிரசார பொதுக்கூட்டத்தில் மத்திய அமைச்சர் வெங்கையா நாயுடு பேசும்போது, ''தமிழகத்தில் காங்கிரசும், திராவிட கட்சிகளும் தொடர்ந்து இதுவரை ஆட்சி செய்துள்ளன. இவர்கள் ஆட்சி செய்து இத்தனை ஆண்டுகளாகியும், இன்றுவரை ஒவ்வொரு கிராமங்களிலும் குடிநீர் பஞ்சம் தலைவிரித்தாடுகிறது. சுகாதாரம் சீர்கெட்டு கிடக்கிறது.

கிராமங்களில் மருத்துவமனை இருந்தாலும் அதில் பணியாற்ற மருத்துவர்கள் இல்லை. மருத்துவர்கள் இருந்தால் செவிலியர் இல்லை. இவர்கள் இருந்தால் மருந்துகள் இல்லை. மின்சாரம், சுகாதாரம், மருத்துவம், பள்ளிக்கூடம், வாழ்வாதாரம், எந்த நலத்திட்ட வசதிகளும் தமிழகத்தில் இல்லை. தமிழகத்தின் இந்த மோசமான நிலைக்கு தி.மு.க., அ.தி.மு.க. தான் காரணம். இதற்கு அ.தி.மு.க.வும், தி.மு.க.வும் மக்களுக்கு பதில் சொல்லித்தான் ஆக வேண்டும். இதுவரை அய்யாவையும், அம்மாவையும் பார்த்து வந்துள்ளீர்கள். இனிமேல் தான் பையாவை (அண்ணனை, மோடி) பார்க்கப்போகிறீர்கள்.

தி.மு.க.வும். காங்கிரசும் கூட்டணி சேர்ந்துள்ளன. ஓட்டுக்காக கூட்டணி வைப்பதும், தங்களது சொத்துக்களை பெருக்குவது மட்டுமே இவர்களின் முக்கிய நோக்கம். பிரதமர் மோடி ஆட்சியில் நான்கு வழிச்சாலை 6 வழிச்சாலையாக மேம்படுத்தப்பட உள்ளது. சூரிய மின்சக்தி திட்டத்தை அதிகமாக செயல்படுத்தி வருகிறோம். தமிழகத்தில் 12 நகரங்களை ஸ்மார்ட் சிட்டியாக மோடி உருவாக்கி உள்ளார். மகளிர் சுயஉதவி குழுக்களுக்கு உதவி செய்யப்பட்டுள்ளது.

இப்படி பல்வேறு திட்டங்கள் மூலமாக இந்தியாவை உலக அளவில் உயர்த்தி காட்டியவர் நரேந்திர மோடி. மற்ற கட்சிகள் போல் கமிஷனுக்காக திட்டம் போட்டு செயல்படுபவர்கள் நாங்கள் அல்ல. தமிழகத்தில் மிகப்பெரிய மாற்றத்தை பா.ஜ.க.வால் மட்டுமே கொண்டுவர முடியும். பிரதமர் மோடியோடு இணக்கமாக, நட்புணர்வோடு, தோழமையோடு இருக்க வேண்டிய ஆட்சி தான் தமிழகத்தில் இருக்க வேண்டும். மாநிலத்தின் முன்னேற்றத்திற்கு பாடுபடக்கூடிய கட்சியாக பா.ஜ.க. உள்ளது. ஊழலற்ற, வெளிப்படையான, நேர்மையான, முன்னேற்றத்திற்கான ஆட்சி வேண்டும் என்றால் தாமரை சின்னத்தில் வாக்களியுங்கள்" என்றார்.

எடிட்டர் சாய்ஸ்

MUST READ