Vikatan.com

www.vikatan.com would like to send you push notifications.

Notifications can be turned off anytime from browser settings.

தமிழகம் கைநழுவ, தலைநகரத்தை மீண்டும் கைப்பற்றியது தி.மு.க.!

வாக்குப்பதிவுக்கு பிந்தைய கருத்துக்கணிப்பின் முடிவுகளினால், 'இந்த முறை ஆட்சியை பிடிப்பது நாம்தான்' என திடமான நம்பிக்கையில் இருந்த திமுகவுக்கு, தேர்தல் முடிவுகள் பெரும் அங்கலாய்ப்பையும் ஆதங்கத்தையும் ஏற்படுத்தி விட்டது. கொஞ்சம் கூடுதல் இடங்கள் கிடைத்திருந்தால் ஆட்சியமைத்திருக்கலாமே என்ற தவிப்பில் இருக்கும் அக்கட்சிக்கு,  வேதனையிலும் ஒரு ஆறுதலாக கடந்த தேர்தல்களில் அதிமுகவிடம் இழந்த தனது கோட்டையான சென்னையை திரும்பவும் மீட்டதுதான்.

திமுகவுக்கும் சென்னைக்குமான பந்தம்,  தாய்க்கும் பிள்ளைக்குமான தொப்புள்கொடி உறவைப்போன்றது என்றே சொல்லலாம். ஏனெனில், திமுகவின் தாய்க்கழகமான திராவிடர் கழகத்தின் மூல வேரான நீதிக்கட்சி வேரூன்றி வளர்ந்தது சென்னையில்தான். பின்னர் வந்த நாட்களில், அதாவது  செப்டம்பர் 18, 1949 ம் ஆண்டு, திராவிடர் கழகத்திலிருந்து பிரிந்து அண்ணா,  சென்னை ராபின்சன் பூங்காவில் திமுகவை தொடங்கியதிலிருந்தே சென்னைக்கும் திமுகவுக்குமான உறவு பின்னிப்பிணைந்த ஒன்றாக ஆகிவிட்டது.

தொடர்ந்து 1957 ம் ஆண்டு சட்டசபை தேர்தலில் முதன்முதலில் தேர்தல் களத்தை சந்தித்த திமுக, படிப்படியாக வளர்ந்து,  1967 ம் ஆண்டு சட்டசபை தேர்தலில்  138 இடங்களை வென்று,  முதல்முறையாக ஆட்சியைப் பிடித்தபோதிலிருந்து மாறியது சென்னை, திமுகவின் கோட்டையாக.

அதனைத் தொடர்ந்து வந்த நாடாளுமன்ற மற்றும் சட்டமன்ற தேர்தல்களில் திமுக பல ஏற்ற இறக்கங்களை சந்தித்தபோதும், சென்னை மட்டும் திமுகவின் கோட்டையாகவே திகழ்ந்தது. குறிப்பாக திமுகவை வனவாசம் அனுப்பிய எம்.ஜி. ஆர் கூட,  சென்னையை திமுகவிடமிருந்து பறிக்க என்னென்னவோ செய்து பார்த்தும் முடியாமல் போனது. பின்னர் 1991 ல் முன்னாள் பிரதமர் ராஜீவ் காந்தி படுகொலைக்கு பின்னர் நடைபெற்ற தேர்தலில் வீசிய அனுதாப அலையும், விடுதலைப்புலிகளுக்கு நெருக்கமான கட்சி திமுக என்று மக்களிடையே அப்போது ஏற்பட்ட வெறுப்பும் ஒன்று சேர்ந்து அதிமுக - காங்கிரஸ் கூட்டணியை அமோகமாக வெற்றி பெற வைத்தது.

வெறும் 2 இடங்களை மட்டுமே பெற்று அந்த தேர்தலில் தோல்வி அடைந்த திமுக, சென்னையை அதிமுக - காங்கிரஸ் கூட்டணியிடம் இழந்தது. ஆனாலும் கூட ஒட்டுமொத்தமாக அந்த தேர்தலில் திமுக ' வாஷ் அவுட்' ஆகாமல் மானம் காத்தது சென்னைதான். பரிதிஇளம்வழுதியும், கருணாநிதியும் மட்டுமே வெற்றி பெற்ற அந்த 2 தொகுதிகளுமே சென்னைக்கு உட்பட்ட தொகுதிகள்தான்.

இவற்றுக்கெல்லாம் அப்போது கூறப்பட்ட காரணங்கள், " சென்னை படித்தவர்கள் அதிகம் நிறைந்த நகரம். அவர்கள் திமுகவுக்கு ஆதரவாகத்தான் வாக்களிப்பார்கள். மேலும் அரசு ஊழியர்களிலும் பெரும்பாலானோர் திமுக ஆதரவாளர்கள்" என்பதுதான். இது ஓரளவுக்கு உண்மையாகவும் இருந்தது.

தொடர்ந்து வந்த  1996 மற்றும் 2001 தேர்தலில் சென்னை தனது கோட்டைதான் என நிரூபித்த திமுகவால், 2006 மற்றும் 2011 தேர்தல்களில் அந்த பெருமையை தக்கவைத்துக்கொள்ள முடியவில்லை. ஏனெனில் இந்த தேர்தல்களில் இருந்துதான், சிங்கிள் டீயை குடித்துக்கொண்டு கட்சியின் வெற்றிக்காக களமாடிய திமுகவின் உண்மையான தொண்டர்கள் காணாமல் போகத் தொடங்கினர்.

2006 தேர்தலில், திமுக வெற்றி பெற்று காங்கிரஸ் ஆதரவுடன் ஆட்சியமைத்தபோதிலும், சென்னையின்  14 தொகுதிகளில் 8 தொகுதிகளை அதிமுக கைப்பற்றியது. இதன் மூலம் திமுகவின் கோட்டையாக கருதப்பட்ட சென்னையில், அதிமுக ஆதிக்கம் செலுத்த தொடங்கியது.

அடுத்து வந்த 2011 தேர்தலில், சென்னையில் மொத்தம் உள்ள 16 தொகுதிகளில் அதிமுக கூட்டணிக்கு 14 தொகுதிகள் கிடைத்தன. அதில் அதிமுகவுக்கு மட்டும் 11 தொகுதிகள் கிடைத்தன. மற்ற 3 தொகுதிகளில் 2 தொகுதிகளை தேமுதிகவும், மார்க்சிஸ்ட் கம்யூனிஸ்ட் கட்சி ஒரு இடத்தையும் பிடித்தன.

திமுகவுக்கு சென்னையில் கொளத்தூர் மற்றும் சேப்பாக்கம்-திருவல்லிக்கேணி ஆகிய இரு தொகுதிகளில் மட்டுமே வெற்றி கிடைத்தது.

அதிமுக கூட்டணி சென்னையில் 1. சைதாப்பேட்டை -செந்தமிழன் (அ.தி.மு.க.) 2. மயிலாப்பூர் - ராஜலட்சுமி (அ.தி.மு.க.) 3. தியாகராய நகர் - வி.பி. கலைராஜன் (அ.தி.மு.க.) 4. ராயபுரம் - ஜெயக்குமார் (அ.தி.மு.க.) 5. துறைமுகம் - பழ. கருப்பையா (அ.தி.மு.க.) 6. திருவி.க.நகர் - நீலகண்டன் (அ.தி.மு.க.) 7. ஆயிரம் விளக்கு - பா. வளர்மதி (அ.தி.மு.க.) 8. வில்லிவாக்கம் - ஜே.சி.டி.பிரபாகரன் (அ.தி.மு.க.) 9. அண்ணாநகர் - கோகுல இந்திரா (அ.தி.மு.க.) 10. ஆர்.கே.நகர் - வெற்றிவேல் (அ.தி.மு.க.) 11. வேளச்சேரி - அசோக் (அ.தி.மு.க.) 12. விருகம்பாக்கம் - பார்த்தசாரதி (தே.தி.மு.க.) 13. எழும்பூர் - நல்லதம்பி (தே.மு.தி.க.) 14. பெரம்பூர் - ஏ.சவுந்தரராஜன் (மார்க்.கம்யூ.) ஆகிய இடங்களை கைப்பற்றியது.

இதனால் சென்னை திமுகவின் கோட்டை என்பதெல்லாம் பழங்கதையாகிவிட்டது என்றும், அது தங்கள் வசம் வந்துவிட்டது என்றும் அதிமுகவினர் சொல்லத்தொடங்கினர்.

இந்நிலையில்தான் தற்போது நடைபெற்ற சட்டமன்ற தேர்தலில், அதிமுக அதிக இடங்களில் வெற்றிபெற்று ஆட்சியமைக்கும் நிலை உருவாகி உள்ளபோதிலும், சென்னையை மீண்டும் தன்வசமாக்கிக் கொண்டுள்ளது திமுக. மொத்தம் உள்ள 16 தொகுதிகளில் 11 தொகுதிகளில் திமுக முன்னிலையில் உள்ளது.

ஆனாலும், 'தமிழகம் முழுவதும் இந்த வெற்றி கிடைக்காமல் போய்விட்டதே..!' என்று தலைநகரில் கிடைத்த இந்த வெற்றியை கொண்டாட முடியாமல் தவிக்கிறார்கள் சென்னை உடன் பிறப்புகள்!

- பா. முகிலன்

எடிட்டர் சாய்ஸ்

ஜெர்சி மாடுகள், பிரேசில் காபி, மருத்துவமனை உறுதி! ஜெயலலிதா பற்றி தோழியின் நினைவலைகள்
placeholder

அதே மாதிரி ஜெயலலிதா தன்னுடைய 10 வயதில் சிவாஜி கணேசன் முன்னிலையில் மயிலாப்பூரில் செய்த நடன அரங்கேற்றப் படங்கள் முதல் அதற்குப் பிறகான அவரது சின்ன வயசுப் படங்களை நாங்கள் தொகுத்திருந்தோம். அதை 2012 ம் ஆண்டு, எனக்கு அவரை சந்திக்கும் வாய்ப்புக் கிடைத்த போது கொடுத்தேன். அதைப் பார்த்து ரொம்ப சந்தோஷமாகிட்டாங்க. அந்தப் படத் தொகுப்பை, தன்னோட ஹேண்ட் பேக்ல வச்சுக்கிட்டாங்க. பத்திரமா வைத்துக் கொள்வதாகவும் சொன்னாங்க. சினிமாக்காரங்க என்றால் ஈஸியாக அணுகலாம் என்கிற திரையை உடைத்து, அவங்க தனி ரூட்டைப் போட்டு, அதை மத்தவங்க ஃபாலோ பண்ற அளவுக்கு வாழ்ந்து காட்டினாங்க. குறிப்பா, சினிமா விழாக்கள், நிகழ்ச்சிகளுக்கு போக மாட்டாங்க. 

அம்மாவிடமிருந்து போன் வந்தால்...!? - உருகும் வீணை காயத்ரி
placeholder

''சமீபத்தில் கொலை மிரட்டல் விட்டப் பையனால் அம்மாவை சந்திக்க வேண்டிய சூழ்நிலை ஏற்பட்டது. கடந்த ஜூலை 27-ம் தேதி சி.எம் ஆபீஸ்ல இருந்து போன் வந்தது. அம்மா உங்களை உடனே வரச்சொன்னதா சொன்னாங்க. நான் கொஞ்சமும் யோசிக்காமல் போய் நின்னேன். பொதுவாகவே நானும், அவங்களும்தான் தனியாகத்தான் பேசிப்போம். ஆனா, அன்றைக்கு, எல்லா அதிகாரிகளும், இருந்தாங்க. அவங்க முன்னாடி, 'எப்படி இருக்கீங்க' என கேட்டார். நான் பதில் சொல்லிவிட்டு, 'நவம்பர் மாதத்தோடு என்னோட டர்ன் முடியுது' என சொன்னேன். இதற்கு அவர், எல்லோருடைய முன்னிலையிலும், அடுத்த மூன்று வருஷத்துக்கும் நீங்களே துணை வேந்தரா இருங்க என சொல்லிவிட்டு, அவருக்கு பின்னால் இருக்கும் எல்லோரையும் பார்த்து மறுபடியும்  இதையே சொன்னார். அப்போதுதான் அவர்கிட்ட, 'நான் உங்களை சந்திக்க இரண்டு வருஷமாக முயற்சி செய்துட்டு இருந்தேன். இந்த கொலை மிரட்டல் காரணமாகத்தான் உங்களை சந்திக்கிற வாய்ப்பு கிடைச்சிருக்கு, நான் தனி மனுஷியாக இசை பல்கலைக்கழகத்தை நடத்தி வருகிறேன்' என சொன்னேன். உடனே, சம்பந்தப்பட்டவர்களை அழைத்து, அவங்களுக்குத் தேவையான எல்லா உதவிகளையும் செய்து கொடுங்க என சொன்னார்.  'அடுத்த முறைப் பார்க்கும்போது உங்க முகத்துல சிரிப்பை மட்டும் தான் பார்க்கணும்' என ஆறுதல் சொன்னாங்க. அந்த வார்த்தை இன்னும் என் காதில் கேட்டுட்டே இருக்கு. அதுதான் நான் அவங்களை கடைசியாகப் பார்த்தது.  அதற்குப் பிறகு அவரை பார்க்க முடியவில்லை. அவர் சொன்னது போல அதற்கான வேலைகள் நடந்து கொண்டிருக்கும்போதே அம்மா மருத்துவமனையில் அனுமதிக்கப்பட்டுட்டாங்க. நான் இப்போ அடுத்த ஆர்டருக்காக காத்திட்டு இருக்கேன். இன்னும் ஆர்டர் என் கைக்கு வரவில்லை''

MUST READ