Vikatan.com

www.vikatan.com would like to send you push notifications.

Notifications can be turned off anytime from browser settings.

மக்கள் நலக்கூட்டணி தி.மு.கவுக்கு உண்டாக்கிய சேதம்!

 

இன்னும் சில தினங்களில் அதிமுக அரசு அரியணையில் ஏற உள்ளது.  ஆனாலும் அதிமுகவின் வெற்றியை பல அரசியல் நோக்கர்கள் கணக்கிட்டுக் கொண்டே இருக்கிறார்கள். மக்கள் நலக்கூட்டணியில் அங்கம் வகித்த, தேமுதிக, விடுதலை சிறுத்தைகள், மதிமுக, தமிழ் மாநில காங்கிரஸ், இந்திய கம்யூனிஸ்ட், மார்க்சிஸ்ட் கம்யூனிஸ்ட் உள்ளிட்ட கட்சிகள் படுதோல்வியை சந்தித்திருந்தாலும், அவர்கள் குறிவைத்து திமுக ஆட்சியை பிடிக்க முடியாத வேலையை கனகட்சிதமாக முடித்துள்ளது.

நடந்து முடிந்த சட்டமன்ற தேர்தலில் தமிழகம் முழுவதும் உள்ள 234 தொகுதிகளில்  227 தொகுதிகளில் அதிமுகவும், 174 தொகுதிகளில் திமுகவும் போட்டியிட்டன. அதிமுக கூட்டணியில்  234 தொகுதிகளிலும் அதிமுக, சமத்துவ மக்கள் கட்சி, தமிழ்மாநில முஸ்லிம் லீக், புரட்சி பாரதம், முக்குலத்தோர் புலிப்படை, மனித நேய ஜனநாயக கட்சி உள்ளிட்ட கட்சிகளுடன் கூட்டணி வைத்த அதிமுக, எல்லா தொகுதிகளிலும் இரட்டை இலை சின்னத்தில் போட்டியிட்டது. திமுக தலைமையிலான  கூட்டணியில் திமுக 174 தொகுதிகளிலும்,   காங்கிரஸ் 41, இந்திய யூனியன் முஸ்லிம் லீக் 5, மனித நேய மக்கள் கட்சி 4, புதிய தமிழகம் கட்சி 4 என இவர்கள் அவரவர்களின் சின்னத்திலும், மக்கள் தேமுதிக 3, பெருந்தலைவர் மக்கள் கட்சி, சமூக சமத்துவப்படை, விவசாய தொழிலாளர் கட்சி தலா ஒரு தொகுதியிலும் என திமுகவின் சின்னமான  உதயசூரியன் சின்னத்தில் தேர்தலை சந்தித்தன. மொத்தம் தமிழகம் முழுக்க  180 தொகுதிகளில் உதயசூரியன் சின்னத்தில், அதிமுகவுடன் நேரடியாக மோதல் ஏற்பட்டது. இவற்றில்  அரவக்குறிச்சி, தஞ்சாவூர் ஆகிய 2 தொகுதிகளுக்கு தேர்தல் பணப்பட்டுவாடா காரணமாக தள்ளி வைக்கப்பட்டது.

இதில் 178 தொகுதிகளில் திமுக, அதிமுக நேரடியாக மோதின. இதில் 88 தொகுதிகளில் திமுக வெற்றி பெற்றுள்ளது. அதிமுக 90 தொகுதிகளில் மட்டுமே வெற்றி பெற்றது. இந்த இடங்களில் மொத்தம் அதிமுக 56,35,402 வாக்குகளை வாங்கியுள்ளது.  திமுக மொத்தம் 1,32,32,315 வாக்குகள் பெற்றுள்ளது.

வெற்றி வாய்ப்பை இழந்த தொகுதிகளில் தமிழகத்தில் படுதோல்விகளை சந்தித்துள்ள மதிமுக, தேமுதிக உள்ளிட்ட மக்கள் நலக்கூட்டணியில் அங்கம் வகித்த தேமுதிக,  திருவொற்றியூர், கொளத்தூர், சேப்பாக்கம் திருவல்லிக்கேணி, விருகம்பாக்கம், தியாகராய நகர், வேளச்சேரி, ஆலந்தூர், தாம்பரம், செங்கல்பட்டு, உத்திரமேரூர், காஞ்சிபுரம், ராணிப்பேட்டை, கே.வி.குப்பம், ஜோலார்பேட்டை, உளுந்தூர் பேட்டை, உடுமலைபேட்டை, நிலக்கோட்டை, நத்தம், குளித்தலை, திருச்சி மேற்கு, திருவெறும்பூர், மண்ணச்சநல்லூர், அரியலூர், திட்டக்குடி, விருத்தாச்சலம், குறிஞ்சிப்பாடி, சீர்காழி, மயிலாடுதுறை, ராதாபுரம், கன்னியாகுமரி, பத்மநாபபுரம் உள்ளிட்ட தொகுதிகளில் தேமுதிகவும், ஆர்.கே.நகர், சோழிங்கநல்லூர், திருவள்ளூர், வேலூர், மைலம், சேலம் தெற்கு, குன்னம், புவனகிரி, பொன்னேரி, ஸ்ரீபெரும்புதூர், செய்யூர், வானூர், திண்டிவனம் காட்டுமன்னார்கோவில், துறையூர், மானாமதுரை, பரமக்குடி, சோழவந்தான், வந்தவாசி, அரக்கோணம், ஊத்தங்கரை, ஆத்தூர் (சேலம்), திருவிடை மருதூர், ராசிபுரம் உள்ளிட்ட இடங்களில் விசிகவும், மற்ற இடங்களில் மதிமுக, சிபிஎம், சிபிஐ உள்ளிட்ட கட்சிகள் திமுக, அதிமுக உள்ளிட்ட கட்சிகளுடன் மோதியது. இந்த கூட்டணி மொத்தத்தில் 22,44,537 வாக்குகள் வாங்கியுள்ளன. மிக குறைவான வாக்கு சதவிகிதம் தான் மக்கள் நலக்கூட்டணி வாங்கியுள்ளது.

ஏற்கனவே இருந்த தேமுதிகவின் வாக்கு வங்கி குறைந்துவிட்டது என்றெல்லாம் பேச்சு இருக்கிறது. ஆனால் இவர்கள் வாங்கிய வாக்குகள்,  திமுக- அதிமுக வெற்றியை பெரிதும் பாதித்து இருந்தாலும் குறிப்பாக திமுகவின் வெற்றி வாய்ப்பை காலி செய்தது குறிப்பிடத்தக்கது. அரியலூரரில் தேமுதிக 13599 வாக்குகள் பெற்றுள்ளது. ஆனால் அங்கு திமுக 2083 வாக்குகளில் தோல்வியுற்றது. விருகம்பாக்கத்தில் 9730 வாக்குகள் வாங்கியது விஜயகாந்த் கட்சி. ஆனால் அங்கு திமுகவின் வெற்றியை பறித்தது 2 ஆயிரம் வாக்குகளே, ராதாபுரம் தொகுதியில் திமுக வேட்பாளர் அய்யாவு 43 வாக்குகளில் தோல்வி அடைந்தார். அங்கு மக்கள் நலக்கூட்டணி பெற்றது 8362 வாக்குகள். இதே கதைதான் பெரம்பலூரில் 11,482 வாக்குகளும், ஒட்டப்பிடாரத்தில் தேமுதிக 14,127 வாக்குகளும், வாங்கி திமுக கூட்டணியின் வெற்றியை பாதித்துள்ளது. அதேபோல் வானூரில் விடுதலை சிறுத்தைகள் கட்சி 23,873 வாக்குகள் வாங்கி திமுகவின் வெற்றியை பாதித்துள்ளது.  வாணியம்பாடியில் தமாகா 21,090 வாக்குகள் வாங்கியும்,  ஆத்தூரில் தேமுதிக 7,114 வாக்குகளும்  வடமாவட்டங்களிலும் கோவை, ஈரோடு, தருமபுரி, மதுரை என தமிழகத்தின் பல பகுதிகளில்  திமுகவின் வெற்றியை பெரிதும் பறித்துள்ளது மக்கள் நலக்கூட்டணி.

சி.ய.ஆனந்தகுமார்

எடிட்டர் சாய்ஸ்

MUST READ