Vikatan.com

www.vikatan.com would like to send you push notifications.

Notifications can be turned off anytime from browser settings.

மீண்டும் களத்தில் சச்சின், ஷேவாக், கங்குலி: அனல் தெறிக்கும் ஆல்ஸ்டார்ஸ் கிரிக்கெட்!

ச்சின் டெண்டுல்கரை கிரிக்கெட்டின் கடவுள் என புகழ்கிறார்கள் கிரிக்கெட் ரசிகர்கள். ஆனால் அவர் கடவுள் அல்ல. கிரிக்கெட் விளையாட்டை உலகம் முழுவதும் பிரபலபடுத்த அனுப்பப்பட்ட கடவுளின் தூதுவர். இந்தியாவில் அலைஅலையாய் மக்கள் கிரிக்கெட் காண ஆரம்பித்ததற்கு காரணம் சச்சின். சச்சின் டெண்டுல்கரின் வருகைக்கு பிறகுதான் கிரிக்கெட் இந்தியாவில் அதிவேகமாக பிரபலமடைந்தது. "சச்சின் மாதிரி விளையாடணும்" என வேண்டி விரும்பி கிரிக்கெட் கற்றுக் கொண்டவர்களில் பலர் இப்போது இந்திய அணியில் இருக்கிறார்கள்.

24 ஆண்டுகள் இந்தியாவுக்காக கிரிக்கெட் விளையாடிய சச்சின், தற்போது உலகம் முழுவதும் கிரிக்கெட் விளையாட்டை பிரபலபடுத்த களமிறங்கிவிட்டார். அதன் முதற்கட்டமாக  உலகின் தலை சிறந்த சுழற்பந்து வீச்சாளரான வார்னேவுடன் இணைந்து 'கிரிக்கெட் ஆல் ஸ்டார்ஸ்' என்ற அமைப்பை தோற்றுவித்திருக்கிறார். இந்த அமைப்பில் ஓய்வு பெற்ற உலகின் தலை சிறந்த வீரர்கள் உள்ளனர். ஒவ்வோர் ஆண்டும் 3 போட்டிகள் கொண்ட டி-20 தொடரை இந்த அமைப்பு சார்பில் விளையாடுவார்கள், இந்த ஆண்டு அமெரிக்காவிலும், அடுத்தடுத்த ஆண்டுகளில் அரபு நாடுகள் மற்றும் கனடாவிலும் இந்த தொடர் நடக்கவுள்ளன.

அமெரிக்காவில் இன்று (நவம்பர் 7) முதல் இந்தத் தொடர் ஆரம்பிக்கிறது. இந்திய நேரப்படி இரவு 11.30 மணிக்கு ஆரம்பிக்கும் போட்டி, டி.வி.யிலும் ஒளிபரப்பப்படுகிறது.

அணிகள்:

சச்சின் பிளாஸ்டர்ஸ்:

சச்சின் டெண்டுல்கர் , ஷேவாக், வி.வி,எஸ்.லட்சுமண், பிரையன் லாரா, கங்குலி, ஜெயவர்த்தனே, ஹூப்பர், மொயின் கான், முரளிதரன், ஸ்வான், அம்புரோஸ், பொல்லாக், மெக்ராத், குளுஸ்னர், அக்தர்.

வார்னே வாரியர்ஸ்:

ஷேன் வார்னே, மேத்யூ ஹைடன், மைக்கேல் வாகன், ரிக்கி பாண்டிங், ஜாண்டி ரோட்ஸ், காலீஸ், சைமண்ட்ஸ், சங்கக்கரா, சக்லைன் முஷ்டாக், வெட்டோரி, வால்ஷ், வாசிம் அகரம், ஆலன் டொனால்ட், அஜித் அகர்கர்.

எப்படி வந்தது ஐடியா?

பல நாடுகளிலும் கிரிக்கெட் விளையாடுபவர்கள் நிறையவே இருக்கிறார்கள். ஆனால், கிரிக்கெட் பிரபலமாகாததால் அவர்களின் திறமை வெளிப்படுவதே இல்லை. கடந்த நாற்பது ஆண்டுகளாக நடக்கும் உலகக்கோப்பை கிரிக்கெட் போட்டிகளில் அதிகபட்சம் 10-16 அணிகள் வரை மட்டுமே பங்கேற்கின்றன. நிறைய அணிகளை இணைக்க வேண்டும் என ஐ.சி.சி.க்கு வெளிப்படையாகவே கோரிக்கை விடுத்தவர் சச்சின். அதே சமயம் ஓய்வு பெற்ற கிரிக்கெட் வீரர்களுக்கு இன்றும் பெரிய மவுசு இருப்பது சமூக வலைத்தளங்கள் மூலம் தெரிகிறது  என்பதால் ஓய்வு பெற்ற வீரர்களை ஒன்றிணைக்க வேண்டும் என்ற எண்ணமும் சச்சினுக்கு இருந்துள்ளது.

ஆஸ்திரேலியாவின் வார்னேவுக்கு, "ஓய்வு பெற்ற வீரர்களை வைத்து உலகம் முழுவதும் சுற்றுப்பயணம் மேற்கொள்ள செய்து, கிரிக்கெட்டை மற்ற நாடுகளில் வளர்த்தெடுக்கலாமே" என எண்ணம் தோன்ற, உடனே சச்சினை தொடர்பு கொண்டிருக்கிறார். சச்சினும் 'எஸ்' சொல்ல,  உடனடியாக செயல்முறை வடிவம் கொடுக்க குழு அமைத்து ஐ.சி.சி. ஆதரவும் கோரப்பட,  ஐ.சி.சி. சம்மத்தித்து விட்டது.

முதல்கட்டமாக பத்தாயிரத்துக்கும் அதிகமான கிரிக்கெட் வீரர்களும், பெண்கள் கிரிக்கெட்டும் உள்ள அமெரிக்காவில் இந்த தொடரை ஆரம்பித்தால் அமெரிக்கா மட்டுமின்றி உலகம் முழுவதும் கவன ஈர்ப்பு ஏற்படும் என்பதால் அமெரிக்காவில் கிரிக்கெட் போட்டிகள் நடத்தலாம் என முடிவு செய்யப்பட்டது. அமெரிக்காவில் அனுமதி உள்ளிட்ட விஷயங்களை தான் பார்த்துக்கொள்வதாக ஷேன் வார்னே சொல்ல, வீரர்கள் ஒன்றிணைப்பை ஏற்படுத்தும் பொறுப்புக்கு சச்சின் முன்வந்தார். தடதடவென பேஸ்பால் மைதானங்கள் கிரிக்கெட் போட்டிகளுக்கு  புக் செய்யப்பட்டன. சச்சின் டெண்டுல்கர் மெயில் மூலமும், தொலைபேசி மூலமும், நேரடியாகவும் தொடர்பு கொண்டு பேசி  ஒவ்வொரு வீரர்களாக அணியில் சேர்த்துள்ளார்.

இந்தியா, இங்கிலாந்து, பாகிஸ்தான், இலங்கை, தென்னாபிரிக்கா, வெஸ்ட் இண்டீஸ், நியூசிலாந்து, ஆஸ்திரேலியா ஆகிய நாடுகளில் உள்ள ஜாம்பவான் வீரர்கள் அணியில் சேர்க்கப்பட்டனர். இந்த தொடரில் விளையாடுவதற்காகவே, அணியில் இடம் கிடைக்காத நிலையில் ஷேவாக் ஓய்வு அறிவித்துவிட்டு அணியில் இணைந்தார். ஆரம்பத்தில் சச்சின் தலைமையிலும், வார்னே தலைமையிலும் பெயருக்கு ஒரு அணி அறிவிக்கப்பட்டது. அதில் கங்குலி, ஷேவாக் எல்லாம் சச்சின் பக்கம்தான்.

இந்நிலையில் கங்குலி ஒரு பேட்டியில் விளையாட்டாக,  'எனக்கு சச்சின் ஓபனிங் பேட்ஸ்மேனாக இடம் கொடுக்க வில்லையெனில் அடுத்த பிளைட்டிலேயே கொல்கத்தாவுக்கு திரும்பிவிடுவேன்' என கூற, சச்சின்-கங்குலிக்கு சண்டை என சோஷியல் மீடியா பதற, சச்சின் டெண்டுல்கர் நகைச்சுவையாக,  'உங்கள் அப்ளிகேஷன் பரிசீலிக்கப்பட்டு கொண்டிருக்கிறது'   என ட்வீட் தட்டி,  சர்ச்சைகளுக்கு முற்றுப்புள்ளி வைத்தார்.

சோயிப் அக்தரோ "சச்சின் டெண்டுல்கர் கண்டிப்பாக எனக்கு வாய்ப்பளிக்க வேண்டும். அவருக்கு எதிராக பலமுறை பந்து வீசிவிட்டேன். இந்தியர்களும் அவருக்கு எதிராக நான் பந்துவீச வேண்டும் என எதிர்ப்பார்ப்பார்கள். ஆனால், எனக்கு சச்சினுடன் இணைந்து விளையாட வேண்டுமென்ற ஆசை இருக்கிறது. எனவே, தயவு செய்து சச்சின் அவரது டீமில் என்னை சேர்த்துக்கொள்ள வேண்டும்" என பேட்டியளித்தார்.

அணியில் வீரர்கள் சேர்ப்பதில் குழப்பம் ஏற்படவே, அமெரிக்காவில் உள்ள டைம் ஸ்கொயரில் அணி தேர்வு செய்ய புது முடிவு எடுக்கப்பட்டது. ஒரு கோப்பைக்குள் இரண்டு சீட்டுகள் போடப்படும், அதில் கேப்டன்கள் சச்சின், வார்னே ஆகியோரில் யாரவது ஒருவர் ஒரு சீட்டை தேர்வு செய்ய வேண்டும். யார் சீட் எடுக்கிறார்களோ அவர்களது அணியில்தான் சீட்டில் உள்ள வீரர் விளையாட வேண்டும். மீதமிருக்கும் சீட்டில் இருப்பவர் மற்றொரு அணியில் விளையாட வேண்டும்.

நவம்பர் 5-ம் தேதி அணி தேர்வு செய்யப்பட்டது. அணி எவ்வாறு தேர்வு செய்யப்படுகிறது என்பது இணையதளத்தில் நேரலையாகவே ஒளிபரப்பப்பட்டது. ஷேவாக் மற்றும் ஹைடன் பெயர்கள் சீட்டில் எழுதி போடப்பட்டது. வார்னே சீட்டை எடுக்க ஹைடன் பெயர் இருந்தது. ஷேவாக், சச்சின் அணிக்கு வந்தார். சச்சின் அணியில் ஷேவாக் என்றதுமே அரங்கம்  கைதட்டுகளால் அதிர்ந்தது. அதன் பின்னர் வாகன், வி.வி.எஸ்.லக்ஷ்மன், ரிக்கி பாண்டிங், பிரையன் லாரா, ஜாண்டி ரோட்ஸ், கங்குலி ஆகியோருக்கான தேர்வுகளில் சச்சின் அணிக்கே அதிர்ஷ்டவசமாக லட்சுமண், லாரா, கங்குலி தேர்வாயினர்.

இந்திய வீரர்கள் எல்லாரும் சச்சின் பக்கமே செல்ல, வார்னே கோப்பையை கவிழ்த்து நாங்கள் எந்த முறைகேடும் செய்யவில்லை, அதிர்ஷ்டம்தான் என நகைச்சுவையாக கூறினார். 26 வீரர்களில் 13 பேர் அணி பிரிக்கப்பட்டனர். கடைசியாக ஷோயிப் அக்தர் எந்த அணிக்கு செல்வது என டாஸ் போடப்பட, அக்தர் விரும்பியபடியே அவருக்கு சச்சின் அணியில் இடம் கிடைத்தது.

சரிசமம் வாய்ந்த ஜாம்பவான் வீரர்கள் மட்டுமே பங்கேற்கும் இந்த டி-20 தொடர், அதிரடி ஆக்ஷன் தொடராக கிரிக்கெட் ரசிகர்களுக்கு செம விருந்து படைக்கும் என்பதில் சந்தேகமில்லை!

- பு.விவேக் ஆனந்த்

எடிட்டர் சாய்ஸ்

MUST READ