Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

சர்வதேச ரெஸ்லிங் வீரரை கதாயுதத்துடன் எதிர்கொண்ட இந்திய வீரர் !

ரெஸ்லிங் எனப்படும் பொழுதுபோக்கு மல்யுத்தப் போட்டிகள் இளைஞர்கள், சிறுவர்கள் மத்தியில் வெகு பிரபலம். ஆக்ரோஷமாக மோதிக்கொள்ளும் மல்யுத்தப் போட்டி  இந்தியாவில்  சுமார் 13 ஆண்டுகளுக்குப்  பிறகு டெல்லியில் கடந்த இரு நாட்கள் அரங்கேறின.

ஜான் சீனா இல்லை


ரோமன் ரெயின்ஸ், பிக் ஷோ, கேன் போன்ற நட்சத்திர வீரர்களோடு இரண்டு இந்திய வீரர்களும் இப்போட்டியில் பங்கேற்று இந்திய ரசிகர்களுக்கு உற்சாகம் அளித்தனர். இந்தியாவில் இந்த போட்டி நடைபெறுவதாக அறிவிக்கப்பட்டதும் உலக அளவில் கோடிக்கணக்கான ரசிகர்களைக் கவர்ந்த ஜான் சீனா  பங்கேற்பார் என்று கூறப்பட்டது. தனது தனித்துவமான ஆட்டத்தால் ஆண்களை மட்டுமல்லாது, தனது உடல்வாகுவால் பெண்களையும் கவர்ந்தவர்தான் இந்த ஜான் சீனா. ஆனால் கடைசி கட்டத்தில் ஏற்பட்ட காயத்தால் அவர் விலகிக்கொள்ள, அவருக்குப் பதில் ‘உலக ஹெவிவெயிட் சாம்பியன்’ ரோமன் ரெயின்ஸ் பங்கேற்றார். நடப்பு சாம்பியன் பங்கேற்றிருந்த போதும், தங்களது ஆதர்சன நாயகன் வராததால் ரசிகர்கள் பலரும் ஏமாற்றம் அடைந்தனர்.

கதாயுதத்தோடு வந்த சதேந்தர்

நேற்று நடந்த ஒரு போட்டியில் இந்திய வீரர் சதேந்தர், ‘ஜீத் ராமா’ என்ற பெயரில் இந்த  தொடரில் அறிமுகமானார். அரங்கில் நுழையும்போது அவர் கதாயுதத்தை கையில் எடுத்துவர மொத்த அரங்கமும் அதிர்ந்தது. ஒரு தலைசிறந்த வீரருக்கு எந்த வகையான வரவேற்பு கிடைக்குமே வரவேற்பை இந்திய ரசிகர்கள் சதேந்தருக்கு அளித்தனர். சாட் காபிள் என்ற வீரருக்கு எதிராக தனது முதல் போட்டியில் மோதிய சதேந்தர் எளிதில் வெற்றி பெற்று தனது சர்வதேச ரெஸ்லிங் பயணத்தை இனிப்புடன் தொடங்கினார்.

 

சதேந்தர் தேசிய அளவிலான குஸ்தி போட்டிகளில் இரண்டு முறை சாம்பியன் பட்டம் வென்றவர் என்பது குறிப்பிடத்தக்கது. மற்றொரு இந்தியரான லவ்பிரீத் சிங்கும் தனது முதல் போட்டியில் வெற்றிவாகை சூடினார். ‘ரஃப்தார் கிஷன் என்ற பெயரில் களமிறங்கிய அவர் ஜேசன் ஜோர்டானை பந்தாடினார். அடிப்படையில் கபடி வீரரான லவ்பிரீத் ஆடிய விதம் அனைவரையும் ஆச்சரிப்படுத்தியது. மிகவும் நேர்த்தியாக விளையாடிய அவர், பல சாதனைகள் படைப்பார் .


கிரிக்கெட்டில் கவர் டிரைவ், ஸ்கொயர் கட் என்று விதவிதமான ஷாட்கள் இருப்பது போல், இதிலும் ஒவ்வொரு வீரர்களுக்கும் பிரசித்தி பெற்ற ஒரு ஷாட் உண்டு. கெயினுக்கு ‘ சோக் ஸ்லாம்’, ரான்டி ஆர்டனுக்கு ‘ஆர்கேஓ’ என ஒவ்வொருவருக்கும் ஒரு சிறப்பு. அவ்வகையில் லவ்பிரீத் ‘ஜெய்
ஹிந்த்’ என்ற தனது பிரத்யேக ஷாட்டால் எதிராளியை சாய்த்தார்.

கேன், ரோமன் ரெயின்ஸ் வெற்றி

பிற போட்டிகளில்  கேன், ரோமன் ரெயின்ஸ், டால்ஃப் சிக்லர் ஆகியோர் வெற்றி பெற்றனர். மாமிச மலையான பிக் ஷோவுடன் நடந்த போட்டியில் ‘ஹெவி வெயிட் சாம்பியன்’ ரோமன் ரெயின்ஸ் வெற்றி பெற்றார். முரட்டுக் குணம் கொண்ட ‘டெமான்’ கேன் பிரே வாட்சை வீழ்த்தினார்.

பெண்கள் சாம்பியன் சார்லட், சம்மர் ரேவை வீழ்த்தி பட்டத்தை தக்கவைத்துக் கொண்டார். ஆனால் ரசிகர்களுக்கு அதிர்ச்சியளிக்கும் வகையில் பிரபல வீரர் ரைபேக் தோல்வியடைந்தார். கட்டாயம் வெற்றி பெறுவார் என்று எதிர்பார்க்கப்பட்ட ரைபேக்கை ருசேவ் வீழ்த்தி ஆச்சரியமளித்தார்.

கிரிக்கெட், ஷாப்பிங், தாஜ் மகால்‘

டெல்லி வந்த சர்வதேச ரெஸ்லிங்  வீரர்கள் தங்கள் நேரத்தை ஷாப்பிங் செய்தும், சுற்றுலாத் தலங்களை சென்றும் கழித்தனர். கிரிக்கெட் வீரர் ஷேவாக், கேனை சந்தித்துப் பேசினார். மேலும் சில வீரர்கள் ஷேவாக்கோடு இணைந்து கிரிக்கெட் விளையாடினர். பெண்கள் சாம்பியன் சார்லட் இந்தியா வந்ததை
நினைவு கொள்ளும் பொருட்டு சேலைகளையும், நகைகளையும் வாங்கினார். மேலும் சில வீரர்கள் தாஜ் மஹால், ஹுமாயுன் சமாதி போன்ற வரலாற்றுச் சிறப்புமிக்க இடங்களையும் கண்டு களித்தனர்.

இந்திய ரசிகர்கள் பலரும் சர்வதேச வீரர்களின் டெல்லி  வருகையால் மகிழ்ச்சியடைந்தனர். தங்களுக்குப் பிடித்த மல்யுத்த வீரர்களோடு இணைந்து புகைப்படமும் எடுத்துக்கொண்டனர். கிரேட் காளிக்குப் பிறகு சர்வதேச ரெஸ்லிங்கில் இரு இந்திய வீரர்கள் வெற்றி பெற்றிருப்பது இந்திய ரசிகர்களுக்கும் நம்பிக்கையை ஏற்படுத்தியுள்ளது.

மு.பிரதீப் கிருஷ்ணா

(மாணவ செய்தியாளர்)

Advertisement
Advertisement
Advertisement
Advertisement
Advertisement

எடிட்டர் சாய்ஸ்

Advertisement
Advertisement
[X] Close