Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

ஷேவாக்கின் ருத்ரதாண்டவம்..! - இத...இதத்தானே எதிர்பார்த்தோம்

சமீபத்தில் ஷேவாக் சர்வதேச போட்டியில் இருந்து ஓய்வு பெற்றாலும், ஷேவாக்கின் அதிரடி தொடர்கிறது. சச்சின்-வார்னே கோப்பையில் அதிரடியாக விளையாடி ஜாம்பவான் பவுலர்களை  மிரள வைத்த ஷேவாக் இம்முறை எம்சிஎல்லில் ருத்ரதாண்டவம் ஆடிகொண்டிருக்கிறார்.

ஓய்வு பெற்ற நட்சத்திர வீரர்களை மட்டும் வைத்து பிரத்யேக டி20 லீக் போட்டி சமீபத்தில் ஆரம்பிக்கப்பட்டது. துபாயில் நடந்துவரும் இந்த டி-20 தொடரில் சங்கக்காரா உள்ளிட்ட நட்சத்திர வீரர்கள் உள்ள ஜெமினி அரேபியன்ஸ் என்ற அணியை ஷேவாக் கேப்டனாக வழிநடத்துகிறார். இதுவரை லீக் போட்டியில் விளையாடிய மூன்று போட்டியிலும் ஷேவாக் அணி வெற்றி பெற்று சாதனை படைத்து வருகிறது.



எம்.சி.எல் லீக் போட்டியில் முதல் பந்தை எதிர்கொண்டதே ஷேவாக் தான். முதல் பந்தை வழக்கம் போல சிக்ஸருக்கு விரட்டினார் ஷேவாக். முதல் இரண்டு போட்டியில் 21 மற்றும் 12 ரன்கள் மட்டுமே குவித்திருந்த ஷேவாக் கடந்த புதன்கிழமை நடந்த போட்டியில் பிரபல வீரர் காலிங்வுட் தலைமையிலான காப்ரிகான் கமாண்டர்ஸ் அணியை நையப்  புடைத்தார். முதல் பந்தில் பவுண்டரியில் ஆரம்பித்த ஷேவாக் 27 பந்துகளில் அதிரடியாக 59 ரன்களை குவிக்க, ஜெமினி அரேபியன்ஸ் எளிதில் வெற்றி பெற்றது.

இந்நிலையில் கில்கிறிஸ்ட் தலைமையிலான சகிட்டரியஸ் ஸ்டிரைக்கர்ஸ் அணியுடன் ஷேவாக் தலைமையிலான ஜெமினி அரேபியன்ஸ் மோதியது. முதலில் பேட்டிங் பிடித்தது ஜெமினி அரேபியன்ஸ். உலகின் அபாயகர வேகபந்து வீச்சாளர் ஷேன் பாண்ட் முதல் ஓவரை வீசினார். இரண்டாவது பந்தையே சிக்சருக்கு விரட்டினார் ஷேவாக். டேனியல் வெட்டோரி, சண்டொகி, ஷேன் பாண்ட் என  பிரபல டி20 ஸ்பெஷலிஸ்ட் பவுலர்கள் அத்தனை பேரின் பந்துவீச்சையும் நொறுக்கித்தள்ளினார்  ஷேவாக். 63 பந்துகளை சந்தித்து பத்து பவுண்டரியையும் பதினோரு சிக்ஸர்களையும் விளாசித்தள்ளினார். எதிரணி கேப்டன் கில்கிறிஸ்ட் ஷேவாக்கின் அதிரடியில் மிரண்டு போனார். ஷேவாக்குடன் இணைந்த சங்கக்காராவும் 33 பந்துகளில் 51 ரன்கள் எடுத்து அவுட்டானார். ஷேவாக் போலவே இந்த போட்டியில் பவுலிங்கில் மிகப்பெரிய சாதனைபடைத்திருக்கிறார் சண்டொகி. ஷேவாக், சங்கக்காரா, கெம்ப் ஆகியோரை வீழ்த்தி ஹாட்ரிக் சாதனை புரிந்தது மட்டுமின்றி, நான்காவது பந்திலும் நவேத் உல் ஹசனை வீழ்த்தி டி20 போட்டியில்  நான்கு பந்துகளில் நான்கு விக்கெட்  வீழ்த்திய ஒரே வீரர் என்ற சாதனைக்கு சொந்தக்காரர் ஆனார் சண்டொகி.  சண்டோகியின் கடைசி ஓவரில் மட்டும் ஐந்து விக்கெட்டுகள் வீழ்ந்தன. ஐந்தாவது விக்கெட் ரன் அவுட்டாக அமைந்தது. நான்கு ஓவர் பந்துவீசி ஒரு மெய்டனுடன் 29 ரன்கள்

விட்டுக்கொடுத்து ஐந்து விக்கெட்டுகள் அள்ளினார் சண்டொகி.


 

வயசானாலும் ஷேவாக் ஸ்டைல் இன்னும் அப்படியேத்தான் இருக்கிறது. பீல்டிங்கில் ஷேவாக் கொஞ்சம் சொதப்பினாலும் பேட்டிங்கில் பழைய ஷேவாக் அப்படியே இருக்கிறார். அப்போதும், இப்போதும் எந்த பவுலராக இருந்தாலும் முதல் பந்தில் இருந்தே நொறுக்க ஆரம்பித்துவிடுகிறார் ஷேவாக். ஷேவாக் மட்டும் இருபது ரன்களை தாண்டிவிட்டால் எதிரணி பந்துவீச்சாளர்களுக்கு சிம்ம சொப்பனம் தான் என்பதை மீண்டும் நிரூபித்து இருக்கிறார்.  இன்றைய அதிரடி சதம் மூலம் சமூக வலைதளங்களில் மீண்டும் வைரலாகியிருக்கிறார் ஷேவாக்.

சிங்கங்கள் வயதானாலும் கம்பீரமாக உறுமத்தானே செய்யும்.

- பு.விவேக் ஆனந்த்

Advertisement
Advertisement
Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement
[X] Close