Vikatan.com

www.vikatan.com would like to send you push notifications.

Notifications can be turned off anytime from browser settings.

ஆசிய கோப்பை கிரிக்கெட்: இந்தியாவிற்கு முதல் தெறி வெற்றி

5 நாடுகள் பங்கேற்கும் 20 ஓவர் ஆசிய கோப்பை கிரிக்கெட் போட்டியின் முதல் ஆட்டத்தில் இந்திய அணி 45 ரன்கள் வித்தியாசத்தில் வெற்றி பெற்றது. 55 பந்தில் 83 ரன்கள் விளாசிய ரோகி சர்மா ஆட்டநாயகன் விருது பெற்றார்.

ஆசிய கோப்பை கிரிக்கெட் போட்டி 1984ம் ஆண்டு அறிமுகம் ஆனது. அதில் இருந்து இரண்டு ஆண்டுகளுக்கு ஒருமுறை இந்த போட்டி நடத்தப்பட்டு வருகிறது. இந்தியாவில் அடுத்த மாதம் 20 ஓவர் உலக கோப்பை கிரிக்கெட் போட்டி நடக்க இருப்பதால் அதற்கு தயாராகும் வகையில் ஆசிய கோப்பையை இந்த முறை 20 ஓவர் வடிவில் நடத்த தீர்மானிக்கப்பட்டது.
 

இதன்படி இந்த தொடரின் முதல் போட்டி இன்று மிர்பூரில் நடைபெற்றது. முதல் போட்டியில் இந்திய அணி, வங்கதேசத்தை எதிர்கொண்டது. டாஸ் வென்ற வங்கதேச அணி கேப்டன் மஸ்ரபி மோர்தசா, முதலில் பந்து வீச்சை தேர்வு செய்தார். இதைத் தொடர்ந்து இந்திய அணி முதலில் பேட்டிங் செய்தது.

இந்திய அணி ஆரம்பத்தில் சற்று தடுமாற்றம் கண்டது. ரோகித் சர்மா ஒரு புறம் நங்கூரம் போல் நின்றாலும், மறுமுனையில் தவான் (2), பெரிதும் எதிர்பார்க்கப்பட்ட விராட் கோலி (8), சுரேஷ் ரெய்னா (13), யுவராஜ் சிங்(15) ஆகியோர் குறைந்து ரன்கள் எடுத்து சீரான இடைவெளியில் ஆட்டமிழந்தனர்.

இந்திய அணி 14.5 ஓவர்களில் 4 விக்கெட் இழப்புக்கு 97 ரன்கள் சேர்த்து இருந்த போது ரோகித் சர்மாவுடன், ஹர்திக் பாண்டையா ஜோடி சேர்ந்தார். அதுவரை ரன்ரேட் ஏறக்குறைய 6 என்ற அளவிலேயே சென்று கொண்டிருந்தது. இதனால், இந்திய அணி 150 அடிக்கலாம் என்று எதிர்பார்க்கப்பட்ட நிலையில், பாண்டயா ருத்ர தாண்டவத்தால் ரன் எதிர்பார்க்கப்பட்டதைவிட அதிகமானது. கடைசி 4.2 ஓவர்களில் 61 ரன்கள் சேர்த்த ரோகித் சர்மா- பாண்டையா ஜோடி பிரிந்தது.

அற்புதமான ஆட்டத்தை வெளிப்படுத்திய ரோகித் சர்மா 55 பந்துகளில் 83 ரன்கள் அடித்து ஆட்டமிழந்தார். 18 பந்துகளில் 31 ரன்கள் சேர்த்த பாண்டையாவும் ஒரு பந்து இடைவெளியில் ஆட்டமிழந்தார்.  இந்திய அணி கடைசி 5 ஓவர்களில் 69 ரன்களை சேர்த்தது. இறுதியில் 20 ஓவர்கள் முடிவில் 6 விக்கெட் இழப்புக்கு 166  ரன்கள் சேர்த்தது.

இதையடுத்து எடுத்தால் 167 வெற்றி என்ற இலக்குடன் வங்கதேச அணி களம் இறங்கியது. இந்திய வீரர்களின் பந்துவீச்சை தாக்கு பிடிக்க முடியாமல் வங்க தேச அணி வீரர்கள் அடுத்தடுத்து ஆட்டம் இழந்தனர். அந்த அணியில் அதிகபட்சமாக ரஹ்மான் 44 ரன்கள் எடுத்தார். முடிவில் வங்கதேச அணி 7 விக்கெட்டுகளை இழந்து 121 ரன்கள் மட்டுமே எடுத்து தோல்வியை தழுவியது. இதனால் இந்திய அணி 45 ரன்கள் வித்தியாசத்தில் முதல் வெற்றியை ருசித்தது. 55 பந்தில் 83 ஆட்டநாயகனாக ரோகித் சர்மா தேர்ந்தெடுக்கப்பட்டார்.

இந்தியா தரப்பில் நெக்ரா அபாரமாக பந்துவீசி 3 விக்கெட்டுகளை வீழ்த்தினார். பும்ரா, பாண்டையா, அஸ்வின் தலா ஒரு விக்கெட் கைப்பற்றினர்.

இலங்கை- ஐக்கிய அரபு அமீரகம் அணிகள் நாளை மோதுகின்றன.

 

எடிட்டர் சாய்ஸ்