Vikatan.com

www.vikatan.com would like to send you push notifications.

Notifications can be turned off anytime from browser settings.

ரிலேவில் ஓடிய எம்.எல்.ஏக்கள்... கயிறு இழுத்த காமராஜர்!

தை தெரியுமா உங்களுக்கு...? தமிழகத்தின் முதல்வராக காமராஜர் இருந்த காலம். ஒருமுறை, சட்டமன்றத்தில் பட்ஜெட் கூட்டத் தொடர் நீண்ட நாட்கள் நடைபெற்றது. உறுப்பினர்களின் ஆரோக்யமான விவாதங்களும், பதில்களுமாக நீண்ட அந்தக் கூட்டத் தொடரின்போது, சட்டமன்ற உறுப்பினர்களுக்கு புத்துணர்வு ஏற்படுத்த முடிவு செய்து, 'சட்டமன்ற உறுப்பினர் நாள்' என்று ஒரு நாளை தேர்ந்தெடுத்து, அந்த நாளில் விளையாட்டுப் போட்டிகள் நடத்த முடிவு செய்தது அன்றைய தமிழக அரசு.

இந்தத் திட்டம் சட்டமன்ற உறுப்பினர்களிடையே பெரும் வரவேற்பை பெற்றது. அனைத்து உறுப்பினர்களும் இந்த விளையாட்டுகளில் கலந்துகொள்ள ஆர்வம் காட்டினார். 1957-ம் ஆண்டு, ராஜாஜி ஹாலின் வெளிப்புற இடத்தில், எம்.எல்.ஏக்களுக்கான விளையாட்டு போட்டிகள் நடத்தப்பட்டன.

அந்த மைதானத்தில் அரசு உயர் அதிகாரிகள் மற்றும் விருந்தினர்கள் அமர்ந்து  விளையாட்டு போட்டிகளைக் கண்டுகளிக்கும் வகையில், சாமியானா பந்தல் முதற்கொண்டு பல சிறப்பு ஏற்பாடுகள் செய்யப்பட்டு இருந்தன. 100 மீட்டர் ஓட்டம் , ரிலே ஓட்டம், கயிறு இழுத்தல் போட்டி, குண்டு எறிதல், சாக்குப்பை ஓட்டப்போட்டி போன்றவையும், பெண் உறுப்பினர்கள் பங்குபெறும் வகையில் மாறுவேடப் போட்டி, மியூசிக்கல் போட்டி போன்றவையும் அந்த நாளில் நடத்தப்பட்டன. சில போட்டிகள் மட்டும் குழு போட்டிகளாக நடைபெற்றன.

ஒவ்வொரு மாவட்டத்திலும் உள்ள சட்டமன்ற உறுப்பினர்கள், அந்த மாவட்டத்தின் பெயரில் குழுவாகவும் விளையாட்டில் பங்கேற்றனர். குழுப் போட்டியில் வெற்றிபெறும் மாவட்டத்துக்கு சுழற் கோப்பையும் வழங்கப்பட்டது. அந்த சுழற் கோப்பை, அன்றைய சட்டமன்ற உறுப்பினராக இருந்த முத்தையா செட்டியார் சார்பில் “செட்டிநாட்டு அரசர் சுழற்கோப்பை” என்ற பெயரில், வெற்றி பெற்ற அணிகளுக்கு வழங்கப்பட்டன. பெண் உறுப்பினர்கள், ஆண் உறுப்பினர்களோடு சரிநிகராக மாறுவேடப் போட்டி, கயிறு இழுத்தல் போட்டி போன்றவற்றில் பங்கெடுத்து அசத்தினார்கள். கயிறு இழுத்தல் போட்டியில் முதல் ஆளாக நின்று முதல்வராக இருந்த காமராஜரும் கயிறு இழுத்தார். அன்றைக்கு பிரபல அமைச்சரகள் பலரும் இந்த விளையாட்டுகளில் கலந்து கொண்டு அசத்தினார்கள்.

ஆண்டுதோறும் நடைபெற்ற இந்தப் போட்டியில், 1958 ம் ஆண்டு கோவை மாவட்ட எம்.எல்.ஏக்கள் அணியும், 1959 ம் ஆண்டு சென்னை மாவட்ட எம்.எல்.ஏக்கள் அணியும், 1960 ம் ஆண்டு தஞ்சாவூர் மாவட்ட எம்.எல்.ஏக்கள் அணியும் வெற்றி பெற்றன. 

1959 ம் ஆண்டு இந்த போட்டிகளோடு கிரிக்கெட் போட்டியும் கூடுதலாக சேர்க்கப்பட்டது அனைவரையும் ஆச்சர்யப்படுத்தியது. கவர்னர் லெவன் அணி, முதல்வர் லெவன் அணி என இரண்டு அணிகளாக எம்.எல்.ஏக்கள் அணி பிரிக்கப்பட்டு,  சேப்பாக்கம் மைதானத்தில் கிரிக்கெட் போட்டி நடைபெற்றது. முதல்வராக இருந்த காமராஜர், வேஷ்டி சட்டையோடு இந்த போட்டியில் கலந்து கொண்டார். இதில் வெற்றி பெற்றவர்களுக்கான கோப்பையை, அன்றைய சட்டமன்ற உறுப்பினராக இருந்த தொழில் அதிபர் என்.மகாலிங்கம் வழங்கினார்.

காலை முதல் மாலை வரை விளையாட்டு போட்டிகள் நடைபெற்ற பிறகு, அன்று இரவு முதல்வர் சார்பில் அனைவருக்கும்  இரவு விருந்து வழங்கப்பட்டு, அந்த விருந்தில் வெற்றிவீரர்களாக இருந்த எம்.எல்.ஏக்கள் மற்றும் அமைச்சர்களுக்கு பரிசுகள் வழங்கபட்டன. இந்த விளையாட்டுகள் அனைத்திலும், எதிர்க்கட்சி ஆளுங்கட்சி என்ற பாரபட்சம் காட்டாமல் அனைத்து கட்சி உறுப்பினர்களும் கலந்து கொண்டு கலக்கினார்கள் என்பதுதான் ஹைலைட்.

இன்றைய சட்டமன்றம் படும் பாட்டை நினைக்கும் பொழுது, அன்றைய காலம் பொற்காலமாகத்தான் இருந்துள்ளது .

- அ.சையது அபுதாஹிர்

எடிட்டர் சாய்ஸ்

MUST READ