Vikatan.com

www.vikatan.com would like to send you push notifications.

Notifications can be turned off anytime from browser settings.

உலகின் 7 ஆபத்தான விளையாட்டுகள் இவை...!

விளையாட்டு என்பது விளையாட்டான விஷயமா என்றால், இல்லை என்றே சொல்லவேண்டும். தேக ஆரோக்கியம் பேணுவது, அனுதினமும் கடினப் பயிற்சி, கடும் போட்டிகளைச் சமாளிக்கும் பக்குவம், விடாமுயற்சி, இலக்கை நோக்கிய பயணங்கள், உழைப்பு என பல அம்சங்களைக்  கொண்டது அது என்று அனைவருக்கும் தெரியும். உலகில் இன்னும் சில விளையாட்டுகள் உள்ளன. கரணம் தப்பினால் மரணத்தை பரிசாக அளிக்கும் மிக அபாயகரமான விளையாட்டுகள் அவை.

இந்த விளையாட்டுகளில் முறையான பயிற்சி, அதற்கு அனுமதி போன்ற பல கட்ட சோதனைகளுக்குப் பிறகே வீரர்கள்  விளையாட அனுமதிக்கப்படுகின்றார்கள். அப்படி உயிராபத்து விளைவிக்கக் காத்திருக்கும் சில டேஞ்சரஸ் விளையாட்டுகள் குறித்த பதிவு இங்கே....


1)-குதிக்கும் விளையாட்டு - Base jumping
  
இன்றைய உலகில் அதி ஆபத்து நிறைந்த விளையாட்டில் முதல் இடம் பிடித்துள்ளது. இந்த விளையாட்டு விளையாடும் வீரர்கள் ஏதாவது உயரமான கட்டடங்களை கண்டால் போதும், பரவசம் அடைந்து விடுவார்கள். உயரமான கட்டடத்தின் உச்சிக்கு சென்று உலகைக் காண நாம் ஆசைப்படுவோம்.  ஆனால் இந்த வீரர்கள் உலகின் அதி உயர கட்டடங்களில் இருந்து குதிக்க ஆசைப்படுவார்கள். கட்டடங்கள், ஆன்டெனாக்கள், பாலங்கள், தரை விளிம்புகள் என நான்கு வகை உயரமான இடங்களிலிருந்து ஹெல்மெட் மற்றும் காற்றுப்பை பாதுகாப்போடு குதிக்கிறார்கள். இந்த நான்கு இடங்களை சுருக்கியே ‘பேஸ் ஜம்பிங்’ (BASE - buildings, antennas, spans (bridges) and earth (cliffs)) என பெயர் வந்தது. உயரமான இடத்தில் இருந்து குதிக்கும்போது பலர் தவறாக விழுந்தும், காற்றுப்பை பழுதாகியும், முறைதவறி குதித்ததாலும் பரிதாபமாக உயிரைவிட்டிருக்கிறார்கள். 'பேஸ் ஜம்பிங் எனப்படுவது ஸ்கை டைவிங்கைவிட ஆபத்து நிறைந்த சாகச விளையாட்டு' என்று நார்வே நாட்டு ஆய்வு ஒன்று தெரிவித்துள்ளது. வயதும், பயிற்சியும் இந்த விளையாட்டிற்கு மிக முக்கியம்.


 
2) ஹெலி பனிச்சறுக்கு-  Heli skiing

பல திரைப்படங்களில் பனிமலையில் கையில் இரண்டு குச்சிகளை வைத்து சறுக்கிக்கொண்டே வரும் காட்சிகளை பார்த்து இருப்பீர்கள். காட்சிகளில் பரவசமூட்டும் அந்த விளையாட்டு மிக ஆபத்துடையது. அந்த விளையாட்டுக்கு பெயர் ஹெலி பனிச்சறுக்கு. உலக அளவில் கனடாவிலும், அதற்கு அடுத்து காஷ்மீரிலும்தான் இந்த விளையாட்டு பனிக்காலத்தில் விளையாடப்படுகிறது.  பனி மலையின் உச்சிக்கு ஹெலிகாப்டரில் சென்று அங்கிருந்து, மலையின் உச்சியில் இருந்து உபகரணங்களை பயன்படுத்தி சறுக்கி கொண்டே அடித்தளத்துக்கு வருவதுதான் இந்த விளையாட்டு. சறுக்கிக் கொண்டு வரும் வீரர்களுக்கு பின்னால் ஹெலிகாப்டரில்  கண்காணித்து கொண்டே வருவார்கள். இந்த விளையாட்டில் கொஞ்சம் தடுமாறினாலும், பல ஆயிரம் மீட்டர் உயரத்தில் இருந்து கீழே விழும் அபாயம் உள்ளது. இந்த விளையாட்டும் பல உயிர்களை சத்தம் இல்லாமல் காவு வாங்கியுள்ளது.


  
3)ஸ்கூபா டைவிங் - Scuba diving


இன்றைய இளைய தலைமுறையிடையே அதிக பரவசத்தை ஏற்படுத்தும் விளையாட்டாக இது பார்க்கப்பட்டாலும், இந்த விளையாட்டும் ஆபத்து அதிகம்தான் என்கின்றனர். இயந்திர உதவியால் மூச்சு வாங்குவதில் பல்வேறு சிக்கல்களும், கடலுக்கு அடியில் மாறுபடும் அழுத்தம், குதிக்கும்போது, முதுகுத்தண்டில் பிரச்னைகள் என்று பல சிக்கல்கள் உள்ளன. அதீத அழுத்தம் காரணமாக மூச்சுத் திணறலும், பலருக்கு மூளையிலும்கூட பாதிப்பு ஏற்படுகிறது. இந்த விளையாட்டிற்கு லைசென்ஸ் கட்டாயம். முறையான பயிற்சியாளர் இல்லாமல் இந்த விளையாட்டில் ஈடுபடக் கூடாது என்று பல கட்டுப்பாடுகள்  உள்ளன.
 
4) குகைக்குள் குதிப்பது- Cave diving
        
கடலுக்கு அடியிலோ அல்லது குகைகள் அதிகம் உள்ள இடங்களிலோ இந்த விளையாட்டு விளையாடப்படுகிறது. நீருக்கு அடியில், குகைகள் போன்ற பகுதிகளில் குதித்து விளையாடும் விளையாட்டு இது. இந்தியாவில் தற்போது வடகிழக்கு மாநிலங்களில் இது விளையாடப்படுகிறது. சிறு தவறு நடந்தாலும் இந்த விளையாட்டில் உயிருக்கு ஆபத்து நிகழ்ந்துவிடும் என்பதால் இந்த விளையாட்டை அதிகம் பிரபலப்படுத்தாமல் உள்ளார்கள். ஆனால் இளைஞர்கள் அதிக அளவில் இந்த விளையாட்டில் ஈர்க்கப்படுகிறார்கள்.

 

5) காளை ஏற்றம்- Bull riding
    
'காளை ஏற்றம்' என்ற இந்த விளையாட்டு,  ஐரோப்பாவில் சில நாடுகளில் விளையாடப்படுகிறது. பெரிய எருது ஒன்றில் விளையாட்டு வீரர் ஏறி அமர்ந்து கொண்டு, அந்த காளையின் வேகத்துக்கு ஈடுகொடுத்து காளையில் அமர்ந்திருக்க வேண்டும். காளையின் மீது இருந்து விழுந்தால் உயிருக்கே ஆபத்து என்ற நிலையில், சில நாடுகளில் இந்த விளையாட்டை இளைஞர்கள் வீரதீர விளையாட்டாக விளையாடி வருகின்றனர். இந்த விளையாட்டிற்கு சில நாடுகள் தடையும் விதித்துள்ளன என்பது குறிப்பிடத்தக்கது.

6) பெரு அலைச் சறுக்கு - Big wave surfing

அலைச் சறுக்கு விளையாட்டு மீது அதீத ஆர்வம் இன்றைய இளைஞர்களுக்கு உண்டு என்றாலும், அதன் ஆபத்தை பெரும்பாலானவர்கள் அறியாமல் இருக்கின்றனர். துடுப்பு மற்றும் சிறு படகுகளைக் கொண்டு அதிதீவிர அலைகளில் மீது சறுக்கி விளையாடும் இந்த விளையாட்டில் பல நேரங்களில், நீரில் மூழ்கி உயிர் இழக்கும் அபாயம் உள்ளது.

7) மலைஏற்றம்-  Mountain Climbing

பார்ப்பவர்களையும் அச்சமுறச் செய்யும் விளையாட்டு மலையேற்றம். ஒழுங்கற்ற, செங்குத்தான பாறைகளில் கிளிப்களை போட்டு ஏறுவது அசாத்திய திறமை என்றாலும், பல மலைகளில் நீர்க்கசிவின் காரணமாக பிடியில்லாத நிலை,  திடீரென ஏற்படும் மண் அல்லது பனிச்சரிவு, ஒழுங்கற்ற காலநிலை என்று பலகூறுகளும் மலையேற்ற வீரர்களுக்கு பெரும் அச்சுறுத்தலாகத் திகழும். தசைப்பிடிப்பு ஏற்பட்டு தவறி விழுவது, தலைச்சுற்றல் போன்ற திடீர் உடல் உபாதைகளாலும் பலர் மரணத்தைத் தழுவி உள்ளனர். பயிற்சியும், கட்டுக்கோப்பான உடல் போன்ற பல முன்தகுதிகள் இருந்தாலும், திடீர் மரணங்கள் இந்த விளையாட்டில்தான் அதிகமாக உள்ளன. 

இந்த விளையாட்டுகள் மட்டும் இல்லாமல் நீர்வீழ்ச்சி சறுக்கு, ஸ்டிரிட் லீக், பி.எம்.எக்ஸ் என்று சொல்லப்படும் தடை தாண்டும் சைக்கிள் பந்தயம் போன்றவையும் இந்த பட்டியலில் உள்ளன.

எனவே  இனி 'விளையாட்டுக்கு என்று' சொல்லும்போது, சற்று யோசித்து சொல்லுங்கள்.. 

- அ.சையது அபுதாஹிர்.

எடிட்டர் சாய்ஸ்

MUST READ