Vikatan.com

www.vikatan.com would like to send you push notifications.

Notifications can be turned off anytime from browser settings.

கிரிக்கெட்டில் ஜெயலலிதா யார் ரசிகை தெரியுமா...? - தலைவர்களுக்கு பிடித்த விளையாட்டுகள்!

ரசியல் விளையாட்டில் ஈடுபடும் தலைவர்களில் பலர், நிஜத்திலும் விளையாட்டு வீரர்களாக இருந்தவர்கள் என்றால் நம்ப முடிகிறதா?. ஆம்! மேடைகளில்  முழக்கமிடும் தமிழக அரசியல் தலைவர்களில் பலர், விளையாட்டு மைதானத்தில் ஜொலி்த்தவர்கள்தான்.

தமிழகத்தின் இன்றைய அரசியல் தலைவர்களின் விளையாட்டு ரிப்போர்ட் இது....

ஜெயலலிதா

தமிழகத்தின் முதல்வராக இருக்கும் ஜெயலலிதாவிற்கு நடனம் கைவந்த கலை என்பது அனைவரும் அறிந்தது. ஆனால் அவர் இறகுப் பந்து விளையாட்டிலும் கலக்கியவர் என்று தெரியுமா?. " பள்ளி காலங்களில் இறகுப் பந்து விளையாட்டும், டேபிள் டென்னிஸ் விளையாட்டும் எனக்கு மிகவும் பிடித்த விளையாட்டுகள். நான் பள்ளி நாட்களில் இந்த விளையாட்டுகளைதான் விரும்பி விளையாடுவேன்" என்று  ஜெயலலிதாவே ஒருமுறை குறிப்பிட்டுள்ளார். பள்ளி படிப்பு முடிந்த பிறகு கிரிக்கெட் மீது அவருக்கு அதீத விருப்பம் இருந்ததாம். 'பட்டோடியின் தீவிர ரசிகை நான்' என்று அவரே ஒருமுறை சொல்லியுள்ளார்.

கருணாநிதி

விளையாட்டு பருவத்திலேயே அரசியலுக்கு வந்தவர். தமிழக 'அரசியல் சதுரங்க' விளையாட்டில் கைதேர்ந்தவர். இவர் இளம் வயதில் அரிதாக விளையாட்டில் ஈடுபட்டுள்ளார். இவர் டேபிள் டென்னிஸ் விளையாடுவது போன்ற புகைப்படம் ஒன்று வெளியானபோதுதான் விளையாட்டின் மீது அவருக்கு உள்ள ஈடுபாடு தெரியவந்தது.

 

ஸ்டாலின்

அறுபது வயதை கடந்தவர். இன்னும் தன்னை இளைஞராக முன்னிறுத்துபவர். அதற்கு தன்னுடைய உடற் பயிற்சியும் விளையாட்டும்தான் காரணம் என்கின்றார். கிரிக்கெட் மீது தீவிர காதல் கொண்டவர். துணை முதல்வராக இருந்தபோது, அமைச்சர்களுடன் இவரது தலைமையிலான அணிக்கும், தென் ஆஸ்திரேலியா அணிக்கும் இடையே நடைபெற்ற நட்பு போட்டியில் இவர் அணி வெற்றி பெற்றது. அதே போல் இன்றும் இவர் இறகுப் பந்து விளையாட்டை தினமும் விளையாடி வருகிறார்.

 

விஜயகாந்த்

" தூக்கி அடிப்பேன்” என்று சொல்லும்போதே அவர் விளையாட்டு வீரர் என்று தெரியவேண்டாமா?. விஜயகாந்த் பள்ளி காலத்திலேயே கால்பந்து விளையாட்டு வீரர். இன்று வரை கால்பந்து விளையாட்டு மீது ஆர்வம் உடைவர். இன்றும் கால்பந்தை கண்டால் உதைக்க ஆரம்பித்துவிடுவார். பந்தை மட்டுமா..!


வைகோ

தான் மட்டும் விளையாட்டு வீரராக இல்லாமல், தனது கட்சித் தொண்டர்களையும் விளையாடச் சொல்லி ஊக்கபடுத்துபவர். கல்லூரியின் விளையாட்டு அணியில் முக்கிய இடம் வகித்தவர். அறுபதை கடந்த பிறகும் தனது ஊரில் நடைபெற்ற கைப்பந்து விளையாட்டுப் போட்டியில், இளைஞர்களுடன் இவரும் களத்தில் இறங்கி வெற்றியும் கண்டவர். 'நான் இன்னும் கைப்பந்து விளையாட்டு வீரர் ' என்று உற்சாகமாக சொல்பவர்.


அன்புமணி ராமதாஸ்

ஹைடெக் பிரசாரத்தை கடந்த தேர்தலில் புகுத்திய இவர், ஹைடெக் விளையாட்டிலும் கலக்குபவர். ஸ்கூபா டைவிங் பிரியர். பள்ளிகாலத்தில் இருந்தே விளையாட்டுக்காக பல்வேறு பரிசுகளைப் பெற்றவர். மூன்று விளையாட்டுகளின் அணியில் இடம் பிடித்தவர். கால்பந்து விளையாட்டு, பிடித்த விளையாட்டு. கபடியும் ஆடிப் பார்த்தவர். நாள்தோறும் மாலையில் இறகுப்பந்து விளையாட்டுக் களத்தில் இவரை  பார்க்கலாம்.

சீமான்

விளையாட்டிலும் இவருக்கு தமிழர்களின் பாரம்பர்ய விளையாட்டுகள்தான் பிடித்தவை. சிலம்பம் சுற்றுவது இவருக்கு மிகவும் பிடித்த விஷயம். விளையாட்டுப் போட்டிகள் நடத்த வேண்டும் என்று இவரிடம் கேட்டால், “ நம்ம மண்ணோட விளையாட்டு, கபடி.. அதை நடத்துங்க” என்று கபடி விளையாட்டுக்கு முக்கியதுவம் கொடுப்பவர். பள்ளி காலத்திலேயே  கபடி களத்தில் கலக்கியவர். மாவட்ட அளவிலான அணியிலும் இடம்பெற்று இருந்தார். ஓய்வு நேரத்தில சிலம்பம் அவருடைய சாய்ஸ்.

-   அ.சையது அபுதாஹிர்.

எடிட்டர் சாய்ஸ்

MUST READ