Vikatan.com

www.vikatan.com would like to send you push notifications.

Notifications can be turned off anytime from browser settings.

ஒலிம்பிக்: புத்த பிட்சு போடியம் ஏறுவாரா?

ரியோ ஒலிம்பிக்கில், கே - 1 என்று அழைக்கப்படும் அதிவேக படகு ஓட்டும் போட்டியில் மூன்றாவது முறையாக போட்டியிடும் ஜப்பானிய புத்த பிட்சு கசூகி யாசுவா, பதக்கம் வெல்லும் நம்பிக்கையில் இருப்பதாக தெரிவித்துள்ளார்.

ஜப்பானின் நாகோனா நகரில், 'செங்கோஜி தைகாஜின்' என்ற புகழ்பெற்ற புத்த மடாலயம் உள்ளது. இங்கு ஏராளமான புத்த பிட்சுகள் பணிபுரிகின்றனர். இந்த மடாலயத்தில் இருக்கும் இளம் துறவி கசூகி யாசுவாவுக்கு, மாலை 3 மணியாகி விட்டால் இருப்புக் கொள்ளாது. கையில் துடுப்புடன் படகை எடுத்துக் கொண்டு அருகில் உள்ள சாய்கவா நதிக்கு புறப்பட்டு விடுவார். அப்போது கசூகியின் உடலில் துறவிக்கான எந்த அடையாளமும் இருக்காது. ஸ்போர்ட்ஸ் உடைக்கு மாறி விடும் கசூகி, இரவு வரை தீவிர பயிற்சியில் ஈடுபடுவார். வாரத்தில் ஆறுநாட்களும் இதுதான் கசூகியின் வழக்கமான நடைமுறை.

கடந்த 2008 ம் ஆண்டு பெய்ஜிங் ஒலிம்பிக்கில், முதல் சுற்றிலேயே தோல்வி கண்டார் கசூகி. லண்டன் ஒலிம்பிக்கிலும் ஜப்பான் சார்பாக பங்கேற்றார். இந்த முறை சற்று முன்னேற்றம் கிடைத்தது. அதாவது 9 வது இடத்தை பிடித்தார். ஆனால் ஜப்பானை பொறுத்தவரை இது ஒரு புதிய  சாதனைதான். ஒலிம்பிக் வரலாற்றில், இந்தப் பிரிவில் எந்த ஒரு ஜப்பானிய வீரரும் 9 வது இடம் வரை முன்னேறியது இல்லை. தற்போது கசூகிக்கு 27 வயதாகிறது. மூன்றாவது முறையாக ஜப்பான் அணிக்காக ஒலிம்பிக்கில் பங்கேற்கிறார்.

ரியோவில் போடியம் ஏறும் ஆசையில் இருக்கும் கசூகி யாசூவா , '' புத்த பிட்சுவாக மாற முடிவெடுத்த பின், கடவுளுக்கு சேவை புரியும் நேரத்தை தவிர்த்து மற்ற நேரங்களில் சாய்கவா நதியில்தான் கிடப்பேன். கடந்த ஆண்டு ஜப்பானின் தேசிய சாம்பியன் ஆனேன். எனக்கு இப்போது பதக்கம் வெல்ல முடியும் என்ற நம்பிகை அதிகரித்திருக்கிறது. வெற்றியோ தோல்வியோ இந்த விளையாட்டை நான் விரும்பி விளையாடுகிறேன் '' என்கிறார்.




 

எடிட்டர் சாய்ஸ்

ஜெயலலிதா வாழ்வின் சில ‘கடைசி’கள்!

MUST READ