Vikatan.com

www.vikatan.com would like to send you push notifications.

Notifications can be turned off anytime from browser settings.

பறக்கும் குடும்பத்தலைவி! - ஒலிம்பிக் டைரி குறிப்புகள் (அத்தியாயம்-12)

 

அன்பு வாசகர்களே, 

ஒலிம்பிக் டைரி குறிப்புகள்... முதல் 11 அத்தியாயங்களின் இணைப்புகள் கீழே... 

முதல் அத்தியாயம் - ஹிட்லர் அணிந்த முகமூடி!

இரண்டாம் அத்தியாயம் - ’அமைதியின் கடவுள்’ ஹிட்லர்!

மூன்றாம் அத்தியாயம் - ஹிட்லரை கிடுகிடுக்கச் செய்த தியான் சந்த்!

நான்காம் அத்தியாயம் - தங்கப்பதக்கம் இல்லாத ஒலிம்பிக்!

ஐந்தாம் அத்தியாயம் -  ஒரு பெண் - ஓர் ஆண் - மாரத்தான்!

ஆறாம் அத்தியாயம்- ஒலிம்பிக்கில் கிரிக்கெட்டும் இருந்தது!

ஏழாம் அத்தியாயம் - அமெரிக்கா Vs அமெரிக்கா!

எட்டாம் அத்தியாயம் - ஒரு தபால்காரரின் கதை!

ஒன்பதாம் அத்தியாயம் - 'தனி ஒருவன்' ஓடிய ஓட்டப்பந்தயம்!

பத்தாவது அத்தியாயம் - ஊக்க மருந்து பரிசோதனைக்கு வித்திட்ட மரணம்!

பதினோராவது அத்தியாயம் - ஒலிம்பிக்கின் ரத்தச் சரித்திரம்

‘அந்த அம்மையாருக்கு வயசாகிவிட்டதல்லவா. பேசாமல் வீட்டில் இருக்கச் சொல்லுங்கள்’ என்று பலரும் விமர்சித்தார்கள். ‘இரண்டு பிள்ளைகளைப் பெற்ற தாய். அவருக்கு எதற்கு விளையாட்டெல்லாம்?’ - நெதர்லாந்து மக்களே தங்கள் நாட்டின் நட்சத்திர வீராங்கனையைப் புறந்தள்ளினார்கள். எதையும் அந்த 30 வயது நெதர்லாந்து வீராங்கனை காதில் போட்டுக் கொள்ளவில்லை. முழு முனைப்புடன் 1948-ல் லண்டன் ஒலிம்பிக்குக்காகத் தயாராகிக் கொண்டிருந்தார்.

ஃபேனி பிளாங்கர்ஸ் கூன்

ஃபேனி பிளாங்கர்ஸ் கூன். 1918-ல் பிறந்தவர். விளையாட்டில் ஆர்வம் கொண்ட குடும்பம். ஃபேனியும் பிறவி விளையாட்டு வீராங்கனையாகவே வளர்ந்தாள். பருவ வயதில் டென்னிஸ், நீச்சல், ஐஸ் ஸ்கேட்டிங், வாள் சண்டை, தடகளம், ஜிம்னாஸ்டிக்ஸ் என பல்வேறு விளையாட்டுகளை ஆர்வமுடன் விளையாடினாள். அதில் நீச்சலில் மட்டும் கூடுதல் ஆர்வம் இருந்தது. அவளது நீச்சல் பயிற்சியாளர் ஒருசமயம்,  ஃபேனியிடம் தெளிவாக எடுத்துச் சொன்னார். " நீச்சலில் போட்டி அதிகம். நெதர்லாந்தில் ஏகப்பட்ட திறமையான நீச்சல் வீராங்கனைகள் இருக்கிறார்கள். ஆனால், தடகளத்தில் சாதிக்க ஆளில்லை. உன் உயரத்துக்கும், உடல் அமைப்புக்கும் தடகளத்தில் கவனம் செலுத்தினால் ஒலிம்பிக்கில் சாதிக்கலாம்.’

அப்போது முதல் ஃபேனி, தடகளத்தில் பல்வேறு பிரிவு விளையாட்டுகளில் கவனம் செலுத்த ஆரம்பித்தார். ஜேன் பிளாங்கர்ஸ், நெதர்லாந்தின் டிரிபிள் ஜம்ப் வீரர். 1928 ஒலிம்பிக்கில் சாதிக்கத் தவறியவர். ஆனால், அவர் ஃபேனியின் திறமையை அடையாளம் கண்டுகொண்டார். முறையாகப் பயிற்சியளித்து, 1936 பெர்லின் ஒலிம்பிக்ஸில் ஃபேனியை கலந்து கொள்ளச் செய்தார். உயரம் தாண்டுதல் மற்றும் 4 X 100 மீட்டர் ரிலே போட்டியில் பங்குபெற்ற ஃபேனியால், இரண்டிலுமே பிரகாசிக்க முடியவில்லை. அதற்குப் பிறகு நடந்த சில சர்வதேசப் போட்டிகளில் ஃபேனி வெல்ல ஆரம்பித்தார். அதுவும் புதிய சாதனைகளுடன். '1940-ல் நெதர்லாந்துக்கு தங்கம் அள்ளித்தரப்போகும் வீராங்கனை ஃபேனிதான்' என்று எதிர்பார்ப்பு கூடியது. இரண்டாம் உலகப் போர். ஒலிம்பிக்கின் ஓய்வு காலம்.

1940ல் ஃபேனியும் ஜேன் பிளாங்கர்ஸும் திருமணம் செய்து கொண்டனர். 1941ல் அவர்களுக்கு முதல் குழந்தை பிறந்தது. இனி ஃபேனியை களத்தில் காண முடியாது என்றே அனைவரும் நினைத்தனர். ஆனால், குழந்தை பிறந்த சில வாரங்களிலேயே, ஜேனின் துணையுடன் பயிற்சிகளைத் தொடர்ந்தார் ஃபேனி. உள்நாட்டுப் போட்டிகளில், தடகளத்தில் அவரது புதிய சாதனைகள் தொடர்ந்தன. 1944 ஒலிம்பிக்கும் நடைபெறவில்லை. அடுத்த இரண்டு ஆண்டுகளில் இரண்டாவது குழந்தை. அது பிறந்த சில வாரங்களிலேயே ஐரோப்பிய சாம்பியன்ஷிப் போட்டிகளில் ஃபேனி கலந்து கொண்டார்.

இரண்டு குழந்தைகளின் தாயான ஃபேனிதான், 1948 லண்டன் ஒலிம்பிக்கில், பல்வேறு விமர்சனங்களுக்கு மத்தியில், எதையும் மனதில் ஏற்றிக் கொள்ளாமல் தீர்க்கமான நம்பிக்கையுடன் களமிறங்கினார், ஜேனின் உறுதுணையுடன். 1936 ஒலிம்பிக்கில் சாதிக்க முடியவில்லை. அடுத்து இரண்டு ஒலிம்பிக்குகள் நடைபெறவே இல்லை. 'இத்தனையையும் தாண்டி, இந்த ஒலிம்பிக்கில் பங்கேற்கக் கிடைத்திருக்கும் வாய்ப்பைத் தவறவிடவேக் கூடாது. இதில் மட்டும் நான் சாதிக்காவிட்டால், என்னை விமரிசிப்பவர்களது வார்த்தைகள் உண்மையாகிவிடும். ம்ஹூம். அது நடக்கக்கூடாது. நான் சாதித்தே தீர வேண்டும்.' என ஃபேனி மனதிற்குள் சபதம் எடுத்தார்.

100 மீட்டர் ஓட்டத்தில் எளிதாக அரை இறுதிக்கு தகுதிப் பெற்று, அதில் முதலாவது வந்த ஃபேனி, அன்றே (ஆகஸ்ட் 2) நடந்த இறுதிப் போட்டியில் ஓடினார். முதலிடம். ஃபேனிக்கு. முதல் தங்கப்பதக்கம், 11.9 விநாடிகள் என புதிய ஒலிம்பிக் சாதனை. அந்த நொடியிலிருந்து தடகளத்தில் அத்தனைக் கண்களும் ஆச்சர்யமாக அந்தத் தாயின் மீதே குவிய ஆரம்பித்தன. மறுநாள் 80 மீ தடை ஓட்டத்தில் இறுதிப் போட்டிக்கு எளிதாகத் தகுதிபெற்றார் ஃபேனி. ஆகஸ்ட் 4 அன்று நடந்த இறுதிப் போட்டியில் ஃபேனி சற்றே பிசகலான ஆரம்பத்தையே கொடுத்தார். கார்ட்னெர் என்ற இங்கிலாந்து வீராங்கனை ஃபேனிக்கு பெரும் சவாலாக இருந்தார். (கார்ட்னெருக்கும் ஃபேனியின் கணவர் ஜேன்தான் பயிற்சியாளர்.) முதலில் சொதப்பினாலும் அடுத்தடுத்த மீட்டர்களில் மீண்டு, தாண்டு தாண்டு எனத் தாண்டி எல்லைக் கோட்டைத் தொட்டார் ஃபேனி. கார்ட்னெரும் ஃபேனியும் 11.2 நொடியில் (புதிய ஒலிம்பிக் சாதனை) எல்லைக் கோட்டைத் தொட யாருக்குத் தங்கம் என்பதில் குழப்பம். பின் அந்த நொடியில் எடுத்த புகைப்படத்தில் ஃபேனியே முதலில் கோட்டைத் தொட்டது உறுதி செய்யப்பட, அவரது கழுத்தில் இரண்டாவது தங்கம் ஜொலித்தது.

 

ஆகஸ்ட் 6 அன்று 200 மீ ஓட்டம் இறுதிப் போட்டி. ஃபேனி, தன் குழந்தைகளின் நினைவால் சோர்ந்து போயிருந்தார். ஜேன், அவரைத் தேற்றினார். உற்சாகப்படுத்தினார். உத்வேகத்துடன் களத்தில் இறக்கினார். அன்று பெய்த மழையால் ஓட்டப்பாதை எல்லாம் சேறாக இருந்தாலும் 24.4 நொடியில் (புதிய ஒலிம்பிக் சாதனை) மூன்றாவது தங்கம் வென்றார். ஆட்ரே பேட்டர்சன் என்ற அமெரிக்க வீராங்கனை, வெண்கலம் வென்றார். ஒலிம்பிக்கில் பதக்கம் வென்ற முதல் ஆப்பிரிக்க-அமெரிக்க வீராங்கனை ஆட்ரே. ஆகஸ்ட் 7 அன்று 4X100 மீ ரிலே இறுதிப்போட்டி நடந்தது. போட்டி ஆரம்பமாவதற்குச் சில நிமிடங்கள் முன்பு ஃபேனியைக் காணவில்லை என்று பரபரப்பு. வேகவேகமாக மைதானத்துக்குள் வந்தார் ஃபேனி. ‘ரெயின் கோட் வாங்கப் போயிருந்தேன்’ என்று சிரித்தபடியே போட்டிக்குத் தயாரானார். ஜெனியா, நெட்டி, ஜெர்டா, ஃபேனி என்ற நால்வர் அணி. ஃபேனிதான் இறுதியாகக் கோலினை வாங்கிக் கொண்டு ஓட வேண்டும். மூன்றாவதாக ஓடி வந்த ஜெர்டா, ஃபேனியிடம் கோலை ஒப்படைக்கும்போது, நெதர்லாந்து மூன்றாவது இடத்தில் இருந்தது. ஆஸ்திரேலியா, கனடா வீராங்கனைகள் முதல் இரண்டு இடங்களில் ஓடிக் கொண்டிருந்தனர். இறுதி 100 மீட்டரில் இறக்கை விரித்த ஃபேனி, பார்வையாளர்களின் இதயங்கள் படபடக்க, எல்லைக் கோட்டை முதலாவதாகத் தொட்டார். நான்காவது தங்கம்.

1948 ஒலிம்பிக் ஆரம்பமாவதற்கு முன்பு ஏளனமாகப் பேசப்பட்ட ஃபேனி, அந்த லண்டன் ஒலிம்பிக்கின் கதாநாயகியாகக் கொண்டாடப்பட்டார். ஒலிம்பிக்கில் 4 தங்கங்கள் வென்ற முதல் பெண் ஃபேனியே. ஒரு வீராங்கனை, மூன்று தனி நபர் போட்டிக்கு மேல் பங்கேற்கக் கூடாது என்ற விதி இருந்ததால், ஃபேனி நீளம் தாண்டுதல், உயரம் தாண்டுதலில் பங்கேற்க இயலவில்லை. இல்லையேல் நான்கு ஆறாக மாறியிருக்கலாம்.

ஃபேனியின் நான்கு தங்கத் தருணங்கள் வீடியோ...

 

 

‘பறக்கும் குடும்பத்தலைவி’ என்ற செல்லப்பெயர் ஃபேனிக்கு ஒட்டிக் கொண்டது. அதற்குப் பிறகும் சர்வதேசப் போட்டிகளில் பல உலக சாதனைகளை நிகழ்த்திய ஃபேனிக்கு, ‘இருபதாம் நூற்றாண்டின் தலைசிறந்த தடகள வீராங்கனை’ என்ற சிறப்பை சர்வதேச தடகள சம்மேளனம் வழங்கியது.

ஐம்பத்து மூன்று வயது பெண் ஒருத்தியால், கண்களுக்கருகே கையில் ஊசியை பிடித்தபடி, அதில் சரியாக நூலைக் கோர்ப்பதுகூட சவாலான விஷயம்தான். ஆனால், குயினி நேவால், தனது ஐம்பத்து மூன்றாவது வயதில் கையில் வில் அம்புடன் இலக்கை நோக்கிக் குறிபார்த்துக் கொண்டிருந்தார். குயினி, இங்கிலாந்தில் பிறந்தவரே. இலக்கின்றி சென்று கொண்டிருந்த வாழ்க்கையில் தன் 50வது வயதில்தான் இலக்கைக் கண்டுகொண்டார்.

ஆம், அப்போதுதான் தன் சகோதரியுடன் வில் வித்தைப் பயிற்சியில் சேர்ந்தார். 1908 லண்டன் ஒலிம்பிக்ஸில் பெண்கள் வில்வித்தைப் போட்டியில் கலந்து கொண்டார். உடன் கலந்து கொண்ட அனைத்து வீராங்கனைகளும் இங்கிலாந்தைச் சேர்ந்தவர்களே. சிறிய வயதுப் பெண்கள் சிலர் மீதுதான் பார்வையாளர்களின் கவனம் குவிந்திருந்தது. அவர்களே ஜெயிப்பார்கள் என்று ஆர்வத்துடன் காத்திருந்தனர். ஆனால், 53 வருடம், 275 நாட்கள் வயது கொண்ட குயினி, தங்கம் வென்றார். ஒலிம்பிக் வரலாற்றில் தங்கப்பதக்கம் வென்ற அதிக வயதுள்ள பெண்மணி என்ற சாதனை இன்றுவரை குயினி வசமே இருக்கிறது.

 

கர்ணம் மல்லேஸ்வரி, 2000 சிட்னி ஒலிம்பிக் களத்தில் வந்து நின்றபோது அவர் முன் கிடந்தது வெறும் 100+ கிலோ எடை அல்ல. நவீன ஒலிம்பிக்கின் 104 ஆண்டு கால வரலாற்றில் இதுவரை எந்த இந்தியப் பெண்ணும் பதக்கம் வாங்கியதில்லை என்ற சோகமும். ‘இந்தியா பதக்கம் வாங்குவதே பெரியது. அதிலும் இந்தியப் பெண்கள் எல்லாம் ஒருபோதும் போடியம் ஏறப்போவதே இல்லை’ என்பது பொதுவான விமர்சனமாக இருந்தது. 1984 லாஸ் ஏஞ்சல்ஸ் ஒலிம்பிக் தடகளத்தில், 400 மீ தடை ஓட்டத்தின் இறுதிப் போட்டியில், பி.டி. உஷா, 1/100 நொடி வித்தியாசத்தில் வெண்கலப் பதக்கத்தைத் தவறவிட்டபோது புலம்பாத இந்தியர்களே இல்லை.

2000 சிட்னி ஒலிம்பிக்கில்தான் பெண்களுக்கான பளுதூக்கும் போட்டி முதல்முறையாக அனுமதிக்கப்பட்டது. அந்த செப்டெம்பர் 19 அன்று நடந்த போட்டியில், ஸ்நாட்ச் என்ற முறையில் 110 கிலோவும், க்ளீன் & ஜெர்க் முறையில் 130 கிலோவும் வெற்றிகரமாகத் தூக்கிய மல்லேஸ்வரி, வெண்கலப்பதக்கம் வென்றார். இந்தியப் பெண் ஒருத்தி ஒலிம்பிக்கில் பதக்கம் வென்றது அதுவே முதல்முறை.  தங்கம், வெள்ளி வென்ற சீன, ஹங்கேரி வீராங்கனைகள் மொத்தமாகத் தூக்கியது 242.5 கிலோ. ஆனால், மல்லேஸ்வரி மொத்தமாகச் சுமந்து தூக்கியது வெறும் 240 கிலோ மட்டுமல்ல. ஒலிம்பிக்கில் ஒட்டுமொத்த இந்தியர்களின் ஒரு நூற்றாண்டு கால ஏக்கத்தையும் எதிர்பார்ப்பையும் தவிப்பையும் கனவையும் சேர்த்துதான்.

 

(டைரி புரளும்)

அடுத்த அத்தியாயம் : மூன்று பேர் மூன்று கனவு!

- முகில்

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP

எடிட்டர் சாய்ஸ்

திருப்பதியிலிருந்து திருமலைக்கு நடந்து செல்பவர்களின் கவனத்துக்கு..! 

MUST READ