Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

அந்த 300 உயிர்களுக்கு அஞ்சலி! - ஒலிம்பிக் டைரி குறிப்புகள்( அத்தியாயம் - 15)

அன்பு வாசகர்களே, 


முந்தைய அத்தியாயங்களைப் படிக்க : 1  2  3  4  5  6  7  8  9  10  11  12  13  14 


15. அந்த 300 உயிர்களுக்கு அஞ்சலி!

ளு தூக்குவதற்காக அந்த வீரர்கள் அங்கே வந்து நின்றார்கள். போட்டிக்கான விதிகளை நடுவர் அறிவித்தார். ‘ஒவ்வொருவராக பளு தூக்க வேண்டும். ஒருமுறை வெற்றிகரமாக பளு தூக்கியவர் மற்ற வீரர்கள் பளு தூக்கியபின் மீண்டும் வந்து எடை அதிகரிக்கப்பட்ட பளுவைத் தூக்க முயற்சி செய்ய வேண்டும். யார் அதிக முறை வெற்றிகரமாக பளு தூக்குகிறார்களோ அவர்களே வெற்றியாளர்கள்.’
‘அதான் எங்களுக்கே தெரியுமே’ என்று முதலில் ஒருவர் பளுவைத் தூக்கக் களமிறங்கினார். இரு கைகளால் அல்ல; ஒரு கையால். ஆம், 1896ல் ஆரம்பிக்கப்பட்ட உலகின் முதல் நவீன ஒலிம்பிக் போட்டியில் ஒற்றைக் கையால் பளுதூக்கும் போட்டியும் இருந்தது. அதிலும் நான்கு பேர் ஆர்வமாக கலந்து கொண்டனர். இங்கிலாந்தைச் சேர்ந்த லான்செஸ்டன் எலியாட் என்ற வீரர், 75 கிலோ வரை ஒரே கையால் தூக்கி தங்கமும் வென்றார்.

ஒற்றைக் கையால் பளுதூக்கும் போட்டி

அதற்குப் பிறகு ஒரு சில ஒலிம்பிக் போட்டிகளில் ஒரு கை பளு தூக்கும் போட்டி இடம்பெற்றிருந்தது. 1928 முதல் அது ஒலிம்பிக்கிலிருந்து நீக்கப்பட்டது. ஒரு கை பளுதூக்கும் போட்டி இருந்ததுபோல, 1912 ஸ்டாக்ஹோம் ஒலிம்பிக்ஸில் இரண்டு கைகளால் ஈட்டி எறியும் போட்டி, இரண்டு கைகளால் வட்டு எறியும் போட்டி, இரண்டு கைகளால் குண்டு எறியும் போட்டி போன்றவை இடம்பெற்றிருந்தன. அனைத்துமே ஆண்களுக்கானவை.

இந்தப் போட்டிகளில் ஈட்டியையோ, வட்டையோ, குண்டையோ இரண்டு கைகளாலும் பிடித்து வீசி எறிய வேண்டும் என்று தவறாகப் புரிந்து கொள்ளக்கூடாது. ஈட்டி எறியும் போட்டியை எடுத்துக் கொள்வோம். முதலில் ஒரு வீரர் ஈட்டியை வலது கையில் ஏந்திவந்து எறிய வேண்டும். அடுத்து இடது கையில் ஏந்தி வந்து எறிய வேண்டும். ஒவ்வொரு கைக்கும் மூன்று வாய்ப்புகள் உண்டு. அதில் ஒவ்வொரு கையாலும் எறிந்த அதிகபட்சத் தொலைவை எடுத்துக் கொள்வார்கள். அந்த இரண்டு தொலைவுகளின் சராசரிப்படி எந்த வீரர் அதிக தொலைவு எறிந்திருக்கிறாரோ அவரே வெற்றியாளர். குண்டுக்கும் வட்டுக்கும் இதே விதிகளே.

இதில் இரண்டு கைகளால் ஈட்டி எறியும் போட்டி தகுதிச் சுற்றில் மொத்தம் நான்கு தேசங்களைச் சேர்ந்த 12 போட்டியாளர்கள் கலந்து கொண்டனர். அதன் முடிவுகளின்படி ஜூலியஸ், வைனோ, உர்கோ என்ற மூன்று வீரர்கள் முதல் மூன்று இடங்களைப் பிடித்து இறுதிச் சுற்றுக்குத் தகுதி பெற்றனர். மூவருமே பின்லாந்தைச் சேர்ந்தவர்கள்.

ஜூலியஸ்

ஆகவே, இனியும் எதற்கு அநாவசியமாக மாய்ந்து மாய்ந்து ஈட்டி எறிய வேண்டும். அதுவும் இரண்டு கைகளால். இறுதிச் சுற்றெல்லாம் வேண்டாம் என்று முடிவெடுத்தனர். நடுவர்கள் ஒப்புக்கொண்டு, அந்தப் புள்ளிகளின்படியே மூவருக்கும் தங்கம் - வெள்ளி - வெண்கலப் பதக்கங்களை வழங்கினர்.

* ரே எவ்ரி. 1873ல் அமெரிக்காவில் பிறந்தவர். சிறுவயதில் போலியோ அவரைத் தாக்கியது. வீல் சேரில்தான் வாழ்க்கை சில காலம் உருண்டோடியது. இப்படியே தன் வாழ்க்கை கழிந்துவிடுமோ என்ற பயம் சூழ்ந்த பொழுதில், அனைத்தையும் உடைத்து நம்பிக்கையுடன் எழுந்து நின்றார். மருத்துவத்தாலும் உடற்பயிற்சிகளாலும் மீண்டு வந்தார். விளையாட்டுகளில் அதிகக் கவனம் செலுத்த ஆரம்பித்தார். குறிப்பாகத் தடகளத்தில்.

நீளம் தாண்டுதல், உயரம் தாண்டுதல், மும்முறை தாண்டுதல் - இவற்றை எல்லாம் வீரர்கள் ஓடிவந்து தாண்டுவதைப் பார்த்திருப்போம். ஆனால், ஆரம்ப கால ஒலிம்பிக் போட்டிகளில் ஓடி வராமல் நின்ற இடத்திலிருந்தே நீளம் தாண்டுவது - உயரம் தாண்டுவது - மும்முறை தாண்டுவது போன்ற விநோதப் போட்டிகள் புழக்கத்தில் இருந்தன.

1900, 1904, 1908 ஒலிம்பிக்குகளில் ரே எவ்ரி, இந்த நின்று கொண்டே நீளம், உயரம், மும்முறை தாண்டும் போட்டிகளில் ‘நானே ராஜா’ என்று நிரூபித்துக் காட்டினார். மூன்று ஒலிம்பிக்குகளிலும் சேர்த்து எட்டு தங்கப் பதக்கங்கள் வாங்கி சாதனை படைத்தார் ரே. ஒலிம்பிக்கில் தனி நபர் போட்டிகளில் ஒருவர் 8 தங்கங்கள் வாங்கியது அசுர சாதனை. (அது 100 ஆண்டுகளுக்குப் பிறகே, 2008ல் நீச்சல் வீரர் மைக்கேல் பெல்ப்ஸால் முறியடிக்கப்பட்டது.)

ரே எவ்ரி

மனிதர்களுக்கு நீளம் தாண்டுதல், உயரம் தாண்டுதல் போட்டி என்பது வழக்கமானது. ஆனால், 1900 பாரிஸ் ஒலிம்பிக்கில் குதிரைகளுக்கும் நீளம் தாண்டுதல், உயரம் தாண்டுதல் போன்ற போட்டிகளை நடத்தியிருக்கிறார்கள். மொத்தம் 17 குதிரைகள் நீளம் தாண்டியிருக்கின்றன. அதில் சில குதிரைகள் சுமார் 15 அடியும், சில சுமார் 16 அடியும் தாண்டியிருக்கின்றன. எக்ஸ்ட்ரா-டிரை என்ற திருநாமம் கொண்ட பெல்ஜியக் குதிரை ஒன்று 20 அடி நீளம் தாண்டியது. ‘ஆனா, இந்தக் குதிரை தாண்டுனது ஒண்ணும் அவ்வளவு அழகா இல்லையே?’ என்று சில நடுவர்கள் தாடையைச் சொறிந்திருக்கிறார்கள். ‘நேத்து மழை பெஞ்சதுல மைதானமெல்லாம் சகதி. அதுல இவ்வளவு தூரம் தாண்டுனதே பெரிய சங்கதி’ என்று மற்றவர்கள் வாதம் செய்ய, எக்ஸ்ட்ரா-டிரை குதிரைக்கு முதல் பரிசு வழங்கப்பட்டது.

உயரம் தாண்டும் குதிரைப் போட்டியில், கேன்லா என்ற பிரெஞ்சுக் குதிரையும், ஒரெஸ்டே என்ற இத்தாலியக் குதிரையும் ஒரேபோல 1.85 மீ உயரம் தாண்டின. விவரம் தெரியாத அந்தக் குதிரைகள், 'என் தங்கம் என் உரிமை' என மோதிக் கொள்ளவில்லை. இரு குதிரைக்காரர்களும் கைகுலுக்கி முதல் பரிசைப் பகிர்ந்து கொண்டார்கள்.

உயரம் தாண்டும் குதிரைப் போட்டி

இந்த விநோத குதிரை விளையாட்டுகளில் இன்றுவரை தொடர்ந்து கொண்டிருப்பது டிரெஸ்ஸேஜ். குதிரையின் நடனம் என்று சொல்லலாம். ஐரோப்பிய ராஜாக்கள், ராணிகள் குதிரை மேல் அமர்ந்திருக்க, அந்தக் குதிரை அவர்களது கட்டளைக்கேற்ப கால்களால் துள்ளியும், உடலை அசைத்தும் நடனமாடும். 1912ல் ஒலிம்பிக்கில் அறிமுகமான இந்த குதிரை நடனம் இன்றும் தொடர்கிறது. ஒலிம்பிக் போட்டிகளிலேயே பார்ப்பதற்கு அழகான போட்டி இதுவே. ஆனால், இது பெரும் பணக்காரர்களுக்கான விளையாட்டு. டிரெஸ்ஸேஜுக்கான குதிரையைத் தேர்ந்தெடுத்து வாங்குவது, அதற்குப் பயிற்சியளிப்பது, பராமரிப்பது என்று ஒவ்வொன்றும் பெரும் செலவு வைப்பவை. இந்த டிரெஸ்ஸேஜில் தனி நபர், குழு என இரு பிரிவுகள் உள்ளன. இதுவரையிலான ஒலிம்பிக்குகளில் டிரெஸ்ஸேஜில் அதிகப் பதக்கங்கள் வாங்கி முதலிடத்தில் இருக்கும் நாடு ஜெர்மனி. ஸ்வீடன், பிரான்ஸ் அடுத்தடுத்த இடங்களில் உள்ளன.

* 1904 அமெரிக்க ஒலிம்பிக்கில் ஒரு விநோத நீச்சல் போட்டியும் சேர்க்கப்பட்டிருந்தது. உயரத்திலிருந்து நீருக்குள் குதிக்க வேண்டும். கை, கால்களை எல்லாம் அசைக்காமல் நீரின் ஆழத்தை நோக்கிச் செல்ல வேண்டும். 60 நொடிகள் வரை தாக்குப்பிடிக்கவேண்டும். அப்படியாக நீரில் கடந்த தொலைவு கணக்கிடப்படும். அதில் அதிகத் தொலைவு கடந்தவரே வெற்றியாளர். Plunge for Distance என்றழைக்கப்பட்ட இந்தப் போட்டியில் வில்லியம் டிக்கே என்ற அமெரிக்க வீரர் 19.05 மீ தூரம் நீருக்கடியில் கடந்து தங்கம் வென்றார்.

112 ஆண்டுகள் ஆகிவிட்டன. இன்றுவரை வில்லியம் டிக்கேவின் சாதனையை எந்தக் கொம்பனாலும் முறியடிக்க முடியவில்லை; முறியடிக்கவும் முடியாது. ஆம், 1904 ஒலிம்பிக் போட்டியோடு இந்த முங்கு நீச்சல் போட்டிக்கு முழுக்கு போட்டுவிட்டார்கள். பிறகு இந்த போட்டியை யாரும் ஒலிம்பிக்கில் சேர்த்துக் கொள்ளவில்லை.

* லியான் டி லுண்டன் என்ற பெல்ஜிய வேட்டைக்காரர், துப்பாக்கியுடன் 1900 ஒலிம்பிக் போட்டிகளுக்காக பாரிஸ் நோக்கி உற்சாகமாகக் கிளம்பினார். துப்பாக்கிச் சுடும் போட்டிக்காகத்தான். அங்கே களமிறங்கிய லியான், டொப்பு டொப்பு என்று சராமாரியாகச் சுட ஆரம்பித்தார். மைதானமெங்கும் ரத்தம் தெறித்தது.


போட்டி அமைப்பாளர்கள் ஜீவ காருண்யம் என்ற வார்த்தையை எல்லாம் அறியாதவர்கள்போல. துப்பாக்கியால் சுடுவதற்கு அவர்கள் இலக்காக நிர்ணயித்த விஷயம் - உயிருள்ள புறாக்கள்.

புறா சுடுதல் போட்டி

சுமார் 300 புறாக்கள் அன்று கொல்லப்பட்டன. 21 புறாக்களைக் கொன்ற லியான் முதலிடம் பிடித்தார். அவருக்குப் பரிசுத் தொகையாக 5000 பிராங்குகள் வழங்கப்பட்டன.

ஒலிம்பிக் வரலாற்றில் அதிக உயிர்கள் பலியான போட்டி இதுமட்டுமே. பிறகு துப்பாக்கி சுடுவதற்கு அஃறிணைப் பொருள்களை இலக்காக நிர்ணயிக்கும் வழக்கம் கொண்டு வரப்பட்டது.

(டைரி புரளும்.)

- முகில்

உங்கள் கருத்தைப் பதிவு செய்யுங்கள்

Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement
[X] Close