Vikatan.com

www.vikatan.com would like to send you push notifications.

Notifications can be turned off anytime from browser settings.

500-வது டெஸ்ட்டில் இந்தியா... 10 பெருமித தருணங்கள்!

வரவுள்ள  வியாழக்கிழமை நியூசிலாந்து அணிக்கு எதிராக இந்தியா ஆடப்போகும் டெஸ்ட், இந்திய அணியை பொருத்தவரை ஐநூறாவது டெஸ்ட் ஆகும். 1932 லிருந்து சுமார் 84 ஆண்டுகாலம் இந்திய அணி டெஸ்ட் கிரிக்கெட்டில்  பயணப்பட்டிருக்கிறது. இதில் வெற்றிகள், தோல்விகள் எக்கச்சக்கம். பல காலகட்டங்களில் பல வீரர்கள் இந்திய அணியை தோளில் சுமந்திருக்கிறார்கள். ஒவ்வொரு இந்திய ஜாம்பாவான்களின்  பெருஞ் சாதனைகளின் தொகுப்பே இந்திய அணிக்கு டெஸ்ட் அரங்கில் மகுடம் சூட்டியிருக்கிறது.  பத்து முக்கியமான  சாதனைகள் இங்கே :-

இந்திய அணியின் டெஸ்ட் பயணம் : - 

இதுவரை 499 டெஸ்ட் போட்டி விளையாடியிருக்கிறது இந்திய அணி. இதில் 129 போட்டியில் வெற்றியும், 157 போட்டியில் தோல்வியும், ஒரு போட்டி டையிலும், 212 போட்டிகள் டிராவிலும் முடிந்திருக்கிறது. டெஸ்ட் போட்டிகளில் இந்திய அணியின் வெற்றி சதவிகிதம் 25.95. 

தொடர் சாதனைகள் : -

டெஸ்ட் விளையாடும் அத்தனை நாடுகளுக்கு எதிராகவும் டெஸ்ட் தொடரை வென்றுள்ள  பெருமை இந்தியாவுக்கு உண்டு. பாகிஸ்தான் அணிக்கு எதிராகத்தான் இந்திய அணி முதன் முறையாக டெஸ்ட் தொடரை வென்றது. இது நடந்தது 1952 ஆம் ஆண்டு.  அயல் மண்ணை பொறுத்தவரை இதுவரை ஆஸ்திரேலிய மண்ணிலும், தென்னாபிரிக்கா மண்ணிலும் இந்தியா டெஸ்ட் தொடரை வென்றதே கிடையாது என்பது சோகமான  விஷயம். 

ச்சின் அபாரம் : -

இந்தியா இதுவரை 499 டெஸ்ட் போட்டிகள் விளையாடியுள்ளது. இந்திய வீரர்கள் தரப்பில் அதிக டெஸ்ட் போட்டி விளையாடியுள்ளது சச்சின் தான். அதிக ஆண்டுகள் இந்தியாவுக்காக டெஸ்ட் விளையாடிய வீரரும் சச்சின் டெண்டுல்கர் தான்.  84 வருடங்கள் இந்தியா டெஸ்ட் போட்டிகள் ஆடியதில் சுமார் 40% போட்டிகளில் சச்சினும் விளையாடியிருக்கிறார். 

இந்தியா vs மற்ற அணிகள் : -

இங்கிலாந்து அணியுடன்  தான் இதுவரை அதிக டெஸ்ட் போட்டிகள் விளையாடியிருக்கிறது இந்திய அணி. பாகிஸ்தானுடன் ஆடிய டெஸ்ட் போட்டிகளில் தான் இந்திய அணியின் வெற்றி சதவிகிதம் மிகவும் குறைவு. ஒவ்வொரு அணிக்கும்  எதிராக இந்திய அணி ஆடிய டெஸ்ட் போட்டிகள் மற்றும் அவற்றின் வெற்றி சதவிகித விவரம் இங்கே... 

யார் யார்  எவ்வளவு சதம்

டெஸ்ட் போட்டிகளை பொறுத்தவரை இந்திய அணிக்குள் நுழைவது சாதாரண விஷயமில்லை. இந்தியாவில் இதுவரை 285 வீரர்கள் டெஸ்ட் கிரிக்கெட் ஆடியிருக்கின்றனர். ஆனால் இதில் வெறும் இருவர் மட்டும் தான் முப்பது சதங்கள் அடித்திருக்கின்றனர். இந்திய அணி சார்பாக விளையாடி சதம் எடுத்தவர்கள் எண்ணிக்கை மிகவும் குறைவு என்பதை கீழ்கண்ட பட்டியல் காட்டுகிறது. ஆனால் இதில் எளிதில் முறியடிக்கவே முடியாத அளவுக்கு ஐம்பது சத்தங்களும் அதிகமாக அடித்து உச்சத்தில் இருக்கிறார் சச்சின் டெண்டுல்கர். உலகளவில் அதிக சதம் அடித்தவர் என்ற பெருமையும் சச்சினையே சேரும். 

அபார வெற்றிகள் : -

கடந்த ஆண்டு தென்னாபிரிக்கா அணிக்கு எதிராக டில்லி டெஸ்ட் போட்டியில் இந்தியா வென்றது. மாபெரும் பிளக்கத்தான் இன்னிங்ஸ் விளையாடி ஹாசிம் அம்லாவும், டிவில்லியர்ஸும் பிரம்மிக்க வைத்த போட்டி இது. இந்த போட்டியில் இந்தியா 337 ரன்கள் வித்தியாசத்தில் வென்றது. ரன்கள் வித்தியாசத்தில் வெல்வதில் இது தான் அதிக பட்சம். இன்னிங்ஸ் வெற்றிகளை பொறுத்தவரை வங்கதேச அணியை 2007 ஆம் ஆண்டு இன்னிங்ஸ் மற்றும் 239 ரன்கள் வித்தியாசத்தில் வீழ்த்தியது இந்தியா. அது தான் அதிகபட்ச இன்னிங்ஸ் வெற்றி. 

கும்ப்ளே சாதனை : -

உலக அளவில் அதிக விக்கெட்டுகள் வீழ்த்தியவர்கள் வரிசையில் மூன்றாவது இடத்தில் இருக்கும் கும்ப்ளே தான் இந்திய அணி சார்பாக அதிக விக்கெட்டுகள் வீழ்த்தியவர் வரிசையில் முதலிடத்தில் இருக்கிறார். முதல் பத்து இடத்துக்குள்  இருப்பவர்களில் இஷாந்த் ஷர்மாவும், ரவிச்சந்திர அஷ்வினும் மட்டுமே தற்போது டெஸ்ட் விளையாடி வருகின்றனர் என்பது குறிப்பிடத்தக்கது. 

'வீரு' மேஜிக் : - 

டெஸ்ட் கிரிக்கெட்டுக்கு உரிய இலக்கணத்தை உடைத்து விளையாடியவர் வீரேந்திர ஷேவாக். இந்திய அணி சார்பாக முச்சதம் அடித்த ஒரே வீரர் ஷேவாக் மட்டுமே. அதே சமயம் இரண்டு முச்சதம் அடித்து ஷேவாக் பிரம்மிக்க வைத்திருக்கிறார். சென்னையில் தென்னாபிரிக்காவுக்கு எதிராக  ஷேவாக் எடுத்த 319 ரன்கள் தான் இந்திய வீரர்  ஒருவர்  டெஸ்ட் போட்டியில் ஒரு இன்னிங்சில் எடுத்த அதிகபட்ச  ரன்னாகும். 

அதிக  ரன்கள் :- 

இந்த பட்டியலிலும் சச்சின், டிராவிட் தான் முன்னிலை வகிக்கின்றனர். இதுவரை மூன்று வீரர்கள் இந்தியா சார்பாக விளையாடி பத்தாயிரம் ரன்களை கடந்துள்ளனர். வீரேந்திர ஷேவாக் தான் இந்தியா சார்பாக அதிக ரன்களை குவித்தவர் பட்டியலில் ஐந்தாவது இடத்தில் உள்ளார். இது எல்லோருக்குமே சர்ப்பரைஸ் தான். 

நான்காவது இன்னிங்ஸ் நாயகர்கள் : -

டெஸ்ட் போட்டியில் நான்காவது இன்னிங்ஸ் ஆடுவது என்பது மிக மிக கஷ்டமான காரியம். இந்தியாவை பொறுத்தவரை சச்சின் டெண்டுல்கர்  தான்   இதுவரை அதிக முறை நான்காவது இன்னிங்ஸ் விளையாடியிருக்கிறார். நான்காவது இன்னிங்ஸில் அதிக ரன்கள் எடுத்தவர் என்ற பெருமையும் சச்சினுக்கே உண்டு. கவாஸ்கர் தான் இந்திய அணி சார்பாக விளையாடியவர்களில் நான்காவது இன்னிங்சில் அதிக சராசரியை வைத்திருக்கிறார். கவாஸ்கரை தொடர்ந்து டிராவிட், வி.வி.எஸ். லட்சுமணன் ஆகியோர் நான்காவது இன்னிங்ஸில் அதிக சராசரி வைத்திருக்கிறார்கள். 

சிறந்த பந்துவீச்சு : -

1999 ஆம் ஆண்டு டில்லி பெரோஷா கோட்லா மைதானத்தில் ஒரு இன்னிங்ஸில் பத்து விக்கெட்டுகளையும் வீழ்த்தினார் கும்ளே. இதுவே இந்திய வீரர் ஒருவரின் சிறந்த பந்துவீச்சு.  ஒரு இன்னிங்ஸில் ஐந்து அல்லது அதற்கு மேற்பட்ட விக்கெட் வீழ்த்தியவர்கள் லிஸ்டிலும் முதல் இடத்தில் இருப்பது கும்ளே தான். சுமார் 35 முறை இந்தச் சாதனை செய்திருக்கிறார். கும்ளேவைத் தொடர்ந்து ஹர்பஜன் சிங், கபில்தேவ், ரவிச்சந்திர அஷ்வின் இருக்கின்றனர். 

- பு.விவேக் ஆனந்த் 

 

 

எடிட்டர் சாய்ஸ்

MUST READ