Vikatan.com

www.vikatan.com would like to send you push notifications.

Notifications can be turned off anytime from browser settings.

500வது டெஸ்ட்... 130வது வெற்றி... வாவ் இந்தியா! #MatchReport

கான்பூரில் நடந்த நியூஸிலாந்துக்கு எதிரான முதல் டெஸ்ட் போட்டியில் இந்தியா 197 ரன்கள் வித்தியாசத்தில் வெற்றி பெற்றது. வரலாற்று சிறப்பு மிக்க இந்த போட்டியில், இந்திய அணி தரப்பில் யாரும் சதம் அடிக்கவில்லை என்றாலும், அணியின் கூட்டு முயற்சிக்கு வெற்றி பரிசாகக் கிடைத்துள்ளது. அஸ்வின் சுழலில் அசத்தி 200 விக்கெட்கள் என்ற புதிய மைல்கல்லை எட்ட, ரவீந்திர ஜடேஜா ஆல் ரவுண்டராக ஜொலித்து தன் தேர்வை நியாயப்படுத்தி, விமர்சனங்களுக்கு முற்றுப்புள்ளி வைத்துள்ளார். 

இந்தியா வந்துள்ள நியூஸிலாந்து அணி மூன்று போட்டிகள் கொண்ட டெஸ்ட் தொடரில் விளையாடி வருகிறது. கான்பூரில் முதல் டெஸ்ட் நடந்தது. இது இந்தியா பங்கேற்கும் 500வது டெஸ்ட் என்பதால், முதல் நாளில் முன்னாள் ஜாம்பவான்கள் பிசிசிஐ சார்பில் கவுரவிக்கப்பட்டனர். கடைசி நாளில் அசத்தல் வெற்றி பெற்று, 500வது டெஸ்ட் போட்டியை மறக்க முடியாத போட்டியாக மாற்றினர் விராட் கோஹ்லி படையினர். 

முதல் இன்னிங்சில் புஜாரா 62, முரளி விஜய் 65 ரன்கள் எடுத்து உதவ, இந்தியா 318 ரன்கள் எடுத்தது. நியூஸிலாந்து தரப்பில் டிரென்ட் போல்ட், சான்ட்னர் தலா 3 விக்கெட்டுகளை வீழ்த்தினர். கேன் வில்லியம்சன் 75 ரன்கள் அடிக்க, நியூஸிலாந்து அணி முதல் இன்னிங்சில் 262 ரன்களில் ஆல் அவுட்டானது. சுழல் ஜாம்பவான்கள் அஸ்வின் 4, ரவீந்திர ஜடேஜா 5 விக்கெட்டுகளை சாய்த்திருந்தனர்.

இரண்டாவது இன்னிங்சில் மீண்டும் முரளி விஜய், புஜாரா அபாரமாக ஆடினர். முரளி விஜய் 76, புஜாரா 78 ரன்கள் விளாசி வலுவான அடித்தளம் அமைத்துக் கொடுக்க, மிடில் ஆர்டரில் ரஹானே 40, ரோகித் சர்மா 68, ரவீந்திர ஜடேஜா 50 ரன்கள் விளாச, இந்தியா 377/5 ரன்களில் டிக்ளேர் செய்தது. இதனால் நியூஸிலாந்தின் வெற்றி இலக்காக 434 ரன்கள் நிர்ணயிக்கப்பட்டது

நான்காம் நாள் முடிவில் நியூஸிலாந்து 4 விக்கெட்டுகளை இழந்து 93 ரன்கள் மட்டுமே எடுத்திருந்தது. லூக் ரோஞ்சி 38, சான்ட்னர் 8 ரன்களுடன் கடைசி நாள் ஆட்டத்தைத் தொடர்ந்தனர். பொறுப்புடன் ஆடிய ரோஞ்சி அரைசதம் கடந்தார். முதல் ஒரு மணி நேரம் விக்கெட் விழவே இல்லை. 5வது விக்கெட்டுக்கு இந்த ஜோடி 102 ரன்கள் சேர்த்திருந்தபோது, ஜடேஜா பந்தில் அஸ்வினிடம் கேட்ச் கொடுத்து ரோஞ்சி 80 ரன்களில் வெளியேறினார். 


அடுத்து வந்த வாட்லிங் 18 ரன்களிலும், மார்க் கிரேக் 1 ரன்னிலும் ஆட்டமிந்தனர். நீண்ட நேரம் இடைஞ்சல் கொடுத்துக் கொண்டிருந்த சான்ட்னர் 71 ரன்கள் எடுத்திருந்தபோது அஸ்வின் பந்தில் சிக்கினார். டெயில் எண்டர்களான சோதி (17 ரன்), நீல் வக்னர் (டக் அவுட்) ஆகியோரை அஸ்வின் எவ்வித சிரமம் இன்றி பெவிலியன் அனுப்பி வைத்தார்.  நியூஸிலாந்து அணி இரண்டாவது இன்னிங்சில் அனைத்து விக்கெட்டுகளையும் இழந்து 236 ரன்கள் மட்டுமே எடுத்தது. இதனால், இந்தியா 197 ரன்கள் வித்தியாசத்தில் தனது 130வது வெற்றியை பெற்றது. 

ஜட்டு அசத்தல்:

முதல் இன்னிங்ஸில் 5 விக்கெட் வீழ்த்தி, இரண்டாவது இன்னிங்ஸில் அட்டகாசமாக 50 ரன்கள் விளாசிய ஜடேஜா, ஆட்ட நாயகனாக தேர்ந்தெடுக்கப்பட்டார். ‘‘500வது டெஸ்ட் போட்டியில் ஆட்ட நாயகன் விருது பெறுவதில் மகிழ்ச்சி. துலீப் டிராபி ஃபைனலில் விளையாடிய அனுபவம் கை கொடுத்தது. இதுபோன்ற பிட்ச்சில் என்னால் விக்கெட் வீழ்த்த முடியும் என்ற நம்பிக்கை இருந்தது. அஸ்வின் சிறந்த பவுலர். 200 விக்கெட் வீழ்த்திய அவருக்கு வாழ்த்துகள். அவருடன் இணைந்து பவுலிங் செய்வது மகிழ்ச்சியான விஷயம். விக்கெட் விழாத நேரங்களில் நாங்கள் இருவரும், அடுத்து என்ன செய்யலாம் என்பது குறித்து ஆலோசிப்போம்’’ என்றார் ஜடேஜா. 

அடடே அஸ்வின்: 

இரு இன்னிங்சிலும் சேர்த்து அஸ்வின் 10 விக்கெட்டுகளை சாய்த்தார். அதோடு, டெஸ்ட் அரங்கில் அதி வேகமாக 200 விக்கெட்டுகள் வீழ்த்திய இந்தியர் என்ற பெருமை பெற்றார்.  இதுவரை 37 போட்டிகளில் விளையாடியுள்ள அஸ்வின் ஒரே டெஸ்டில் 5வது முறையாக 10 விக்கெட்டுகளையும், 19வது முறை 5 விக்கெட்டுகளையும்  வீழ்த்தியிருப்பது கூடுதல் போனஸ். 

-தா.ரமேஷ்
 

எடிட்டர் சாய்ஸ்

MUST READ