Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

இந்தியாவை ஜெயிக்க இந்த 5 விஷயங்களைச் செய்யுமா இங்கிலாந்து? #IndVsEng

இங்கிலாந்து

சொந்த மண்ணில் எந்த அணியாக இருந்தாலும் வெறித்தன வெற்றியைச் சுவைத்து வருகிறது இந்தியா. தென்னாபிரிக்கா, நியூசிலாந்துக்கு அடுத்தபடியாக தற்போது இங்கிலாந்து வந்திருக்கிறது. சென்ற முறை இங்கிலாந்து இங்கே வந்தபோது தொடரை ஜெயித்து அமர்க்களப்படுத்தியது. ஆனால் அது போன்றதொரு நிலை இம்முறை இங்கிலாந்துக்கு இல்லை. சீனியர் வீரர்கள் பலர் இல்லாமல் இளம் படையுடன் இந்தியாவில் கால்வைத்திருக்கிறது. சுழற்பந்துக்கு சாதகமான இந்திய மைதானங்களில் இங்கிலாந்தின் இளம் படை எப்படி விளையாடப் போகிறது என்பது மிகப்பெரிய எதிர்பார்ப்பாக உள்ளது. 

கோலியின் தலைமையில் தொடர்ந்து நான்கு தொடர்களை இந்தியா ஜெயித்து வந்துள்ளது. தவிர, கடைசி 13 டெஸ்ட் போட்டிகளில் ஒன்றில் கூட இந்தியா தோற்கவில்லை என்பது குறிப்பிடத்தக்கது. தென்னாப்ரிக்காவும், நியூசிலாந்தும் இந்திய மண்ணில் அல்லோலப்பட்டடன. இந்நிலையில் வங்கதேசத்திடம் டெஸ்ட் போட்டியில் தோல்வியடைந்த கையோடு இந்தியாவுக்கு வந்திருக்கிறது இங்கிலாந்து. கொஞ்சம் அசந்தாலும் இந்தியாவிடம் 5-0 என வாஷ் அவுட்டாகி,  வரலாற்றில் மிக மோசமான தோல்வியை அடையவேண்டியதிருக்கும் என இங்கிலாந்து அணிக்கு பல முன்னாள் கிரிக்கெட் வீரர்கள் எச்சரிக்கை விடுத்திருக்கிறார்கள். 

இங்கிலாந்து

சுழற்பந்தை எப்படி எதிர்கொள்வது என்ற புரிதல் இல்லாமல் விளையாடுவதாலேயே இந்தியாவில் நடக்கும் டெஸ்ட் போட்டிகள் எப்போதும் ஒரு பக்க சார்பான போட்டிகளாக அமைந்து விடுகின்றன. சொந்த மண்ணில் இந்தியா, சவாலான டெஸ்ட் போட்டியை ஆடி பல ஆண்டுகள் ஆகிறது. இந்த முறை அப்படி நடக்காமல் இந்தியாவுக்கு சவால் தர வேண்டும்  எனில் இந்த ஐந்து  விஷயங்களைச் செய்யவேண்டும் இங்கிலாந்து.

1. டாஸ் முக்கியம்: -

இந்திய மண்ணில் எதிரணியினர் 250 ரன்களை சேஸ் செய்வது என்பதே மிக கடினமான காரியம். எனவே டாஸ் ஜெயித்து முதல் பேட்டிங் செய்வது இங்கிலாந்துக்கு நல்லது. டாஸ் தோற்றால் போட்டியை டிரா செய்ய வேண்டுமென்றால் கூட இங்கிலாந்து மிகவும் கஷ்டப்பட வேண்டியதிருக்கும்.

2. வலது - இடது பேட்டிங் ஆர்டர்: -

இங்கிலாந்து அணியில் ஐந்து இடது கை பேட்ஸ்மேன்கள் இருக்கின்றனர். அஷ்வினுக்கு இது அல்வா சாப்பிடும் விஷயம். எனவே கூடுமானவரை ஆர்டர் மாறினாலும் பரவாயில்லை என்ற நோக்கில் வலது - இடது காம்பினேஷனை இங்கிலாந்து முயற்சிக்க வேண்டும். 

3. சீரான ரன்கள் தேவை :-

மொஹாலி மட்டுமே இங்கிலாந்துக்கு ஓரளவு சாதகமான சூழ்நிலையில் இருக்கும். விசாகப்பட்டினம் ஸ்லோ பிட்ச், மும்பையும், சென்னையும் சுழல் சொர்க்கபுரி, கான்பூர் பிட்ச்  இரண்டாவது நாளின் பிற்பாதிக்கு  பிறகு சுழலுக்கு சாதகமாக இருக்கும். எனவே இந்த  டெஸ்ட் தொடரில் இங்கிலாந்து முற்றிலுமாக தனது ஆட்டபாணியை மாற்ற வேண்டியதிருக்கும். மெய்டன் ஓவர்களை வீச விடாமல், ஓவருக்கு குறைந்தபட்சம் இரண்டு மூன்று ரன்களாவது ஓடி ஓடிச் சேர்க்க வேண்டும். பவுண்டரிகளை விட இப்படி ஓடிச் சேர்ப்பது முக்கியம். இல்லையெனில் சுழல் வலை அமைத்து காலி செய்து விடுவார் கோலி.

4. இன்ஸ்விங் பலம் :-

முரளி விஜய், ரஹானே தவிர இந்திய அணியில் ஸ்விங் ஆகும் பந்துகளை சிறப்பாக விளையாடும் பேட்ஸ்மேன்கள் யாரும் இல்லை. எனவே ஒருவேளை இந்தியா  முதலில் பேட்டிங் செய்தால், முதல் நாளின் உணவு இடைவெளிக்குள் நான்கு விக்கெட்டுகளை கைப்பற்றுவதற்கு இங்கிலாந்து முயற்சிக்க வேண்டும், இல்லையெனில் இந்தியா எளிதாக 300 ரன்களை தாண்டிவிடும். மிதவேகப்பந்து வீசும் ஸ்டோக்ஸ் இங்கிலாந்துக்கு முக்கிய பலம். ஸ்டோக்ஸை சரியான இடத்தில் குக் பயன்படுத்த வேண்டும்.

இங்கிலாந்து

5.  குக் - ரூட் இணை :- 

சுழல் மண்ணில் சிறப்பாக விளையாடும் திறன் படைத்தவர் குக். இந்திய மண்ணில் சிறப்பாக விளையாடிய அயல்நாட்டு பேட்ஸ்மேன்களில் குக் முக்கியமானவர். இந்திய மண்ணில் ஏற்கெனவே இரண்டு  டெஸ்ட் தொடர் ஆடிய அனுபவம் குக்குக்கு உண்டு.  தட்டையான மைதானங்களில் சுழல் பந்தை திறம்பட எதிர்கொள்ள கூடியவர் ரூட், ஆனால் சுழல் மண்ணில் டெஸ்ட் போட்டிகளில் இன்னும் தன்னை நிரூபிக்க வேண்டிய கட்டாயம் ரூட்டுக்கு இருக்கிறது. இங்கிலாந்தில் போதிய பேட்ஸ்மேன்கள் இல்லை என்பதால், குக் - ரூட் இருவரில் யாராவது ஒருவர் ஒவ்வொரு இன்னிங்ஸிலும்  ஆங்கர் பேட்ஸ்மேனாக ஆட வேண்டும். ரூட்- குக் இணை விரைவில் அவுட்டானால் இங்கிலாந்தின் நிலைமை மோசமாகிவிடும். எனவே கூடுதல் பொறுப்போடு குக்கும் ரூட்டும் ஆட வேண்டியது அவசியம். 

 இந்த கட்டுரை வாயிலாக சொல்லப்பட்டுள்ளது இந்தியாவின் பலவீனங்கள். இதைச் சரி செய்யாமல் போனால் இந்தியாவுக்கு இந்த டெஸ்ட் தொடர்  சவாலானதாக மாறலாம்.

-  பு.விவேக் ஆனந்த்.

Advertisement
Advertisement
Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement
[X] Close