Vikatan.com

www.vikatan.com would like to send you push notifications.

Notifications can be turned off anytime from browser settings.

ஆஸ்திரேலியாவை அடக்கிய தென்னாப்பிரிக்கா... 85 ரன்களில் சுருண்ட கதை!

85

தென்னாப்பிரிக்கா - ஆஸ்திரேலியா இடையேயான இரண்டாவது டெஸ்ட் போட்டி ஹோபர்ட் மைதானத்தில் நடந்து வருகிறது. முதல் டெஸ்ட் போட்டியை வென்ற தெம்புடன் களமிறங்கியது தென் ஆப்பிரிக்கா. மழை அச்சுறுத்தல் இருந்த நிலையில், போட்டி நடக்குமா என்ற சந்தேகம் இருந்தது.  இயற்கை கருணை காட்ட ஆஸி பேட்டிங் பிடித்துது. ஆனால் தென்னாப்பிரிக்கா கருணையே இன்றி ஆஸி இன்னிங்க்ஸை வெறும் 32.5 ஓவருக்குள், 85  ரன்னில் முடித்து அதிர்ச்சி வைத்தியம் அளித்தது. 

முன்னதாக, டாஸ் வென்ற தென்னாப்பிரிக்க அணியின் கேப்டன் டு பிளஸிஸ், பீல்டிங் செய்வதாக அறிவித்தார். இதையடுத்து வார்னரும், பர்ன்ஸூம் ஆட்டத்தை தொடக்க ஆட்டக்காரர்களாக களமிறங்கினர். தென் ஆப்பிரிக்க அணியில் ஸ்டெயின் காயம் காரணமாக போட்டியில் ஆட முடியாத சூழ்நிலை ஏற்பட்டதால் கைல் அபாட் களமிறங்கினார். 

முதல் ஓவரில் இருந்தே வார்னர் அடித்து ஆட முயன்றார். அதனை கணித்த வேகப்பந்து வீச்சாளர் பிலாந்தர், ஓவரின் கடைசி பந்தை  வைடு லைனில் பந்தை வீச, அதனை வார்னர் விளாச முயல, பந்தோ எட்ஜ் ஆகி விக்கெட் கீப்பர் டீகாக் கையில் தஞ்சமடைந்தது. முதல் ஓவரில் விக்கெட் வீழ்ந்த அதிர்ச்சியில் ஆஸி மீள்வதற்குள் அடுத்த அதிர்ச்சி தந்தார் கைல் அபாட். இரண்டாவது ஒவரின் கடைசி பந்தில் எல்பி ஆகி வெளியறினார் பர்ன்ஸ். 

அதன் பின்னர் ஆக்ரோஷமாக இந்த இரண்டு பவுலர்களும் வீச, எட்டாவது ஒவர் முடிவில் 8/2 என இருந்த்து ஆஸி. ஒன்பதாவது ஓவரில் அடுத்தடுத்த பந்துகளில் கவாஜா, வோக்ஸ் இருவரையும் பெவிலியனுக்கு அனுப்பினார் பிலாந்தர். அப்போது ஆஸியின் ஸ்கோர் 8/4. ஸ்மித் ஒரு பக்கம் போராடிக்கொண்டிருக்க எப்படி பேட்டிங் செய்ய வேண்டுமென்ற ஐடியாவே இல்லாமல் பிட்ச்க்கு வருவதும் தென்னாப்பிரிக்க பவுலர்களிடம் விக்கெட்டை தாரை வார்ப்பதுவமாக இருந்தனர் ஆஸி பேட்ஸ்மேன்கள். 

தென்னாப்பிரிக்க பவுலர்கள் தவறே செய்யாமல் தொடர்ச்சியாக நல்ல லைன் & லென்த்தில் பந்து வீசி வந்தனர். இது போன்ற களங்களில் சேவாக் பாணி ஆட்டம் எடுபடாது, டிராவிட் போன்ற அமைதியான அணுகுமுறை வேண்டும். களத்தில் நீண்ட நேரம், நின்று தவறான பந்துகள் வரும் வரை காத்திருக்க வேண்டும். ஆஸி வீரர்களிடம் அத்தகைய பொறுமை இல்லை. இதனால் 32.5 ஓவரில் 85 ரன்னுக்கு ஆல் அவுட்டானது ஆஸி. மென்னி பத்து ரன்கள் எடுத்தார். அவுட்டான பத்து பேரில் மீதி ஒன்பது பேரும் ஒற்றை இலக்க ரன்களில் அவுட்டாகினர். சிறப்பாக விளையாடிய கேப்டன் ஸ்மித் 80 பந்துகளில் ஐந்து பவுண்டரியுடன் 48 ரன்கள் எடுத்தார். ஸ்மித் மட்டும் விரைவில் அவுட்டாகியிருந் தால் 40 ரன்களையாவது ஆஸி எடுத்திருக்குமா என்பது சந்தேகம் தான். 

பிலாந்தர் ஐந்து விக்கெட்டும், ரபாடா ஒரு விக்கெட்டும், அபாட் மூன்று விக்கெட்டும் எடுத்தனர். இதையடுத்து தென் ஆப்ரிக்கா களமிறங்கியது. எல்கரும், குக்கும் மிக கவனமாக இன்னிங்ஸை ஆரம்பித்தனர். 18 வது ஓவர் வரை விக்கெட் இழப்பின்றி 43 ரன்கள் எடுத்திருந்த்து. 19 வது ஓவரில் ஃபுல் லெந்தில் ஒரு பந்து வீசி எல்கரை எல்பிடபிள்யூ ஆக்கினார் ஸ்டார்க். அதே ஓவரில் குக்கும் அவுட்டானார். 21 வது ஓவரை வீச வந்த ஸ்டார்க் டுமினியை காலி செய்தார். 46/3 என தடுமாறியது தென்னாபிரிக்கா. ஆம்லா அபாரபாக ஆஸியின் பந்துவீச்சை விளாசினார்.டுபிளஸிஸ் ஏழு ரன்னிலும், ஆம்லா 47 ரன்னிலும் அவுட்டாயினர். எனினும் அதன் பின்னர் தெம்பா பவுமாவும், டீகாக்கும் லாவகமாக ஆஸியின் பந்துவீச்சை எதிர்கொண்டனர். முதல் நாள் முடிவில் தென்னாப்பிரிக்கா 171/5 என்ற நிலையில் 86 ரன்கள் முன்னிலையோடு இருக்கிறது. டீகாக் 28, பவுமா 38 ஆகிய ரன்களோடு களத்தில் உள்ளனர். நாளை சற்று பொறுமையாக விளையாடி இன்னும் 100 - 150 ரன்களை சேர்க்கும் பட்சத்தில் தென்னாப்பிரிக்காவுக்கு போட்டியையும், தொனரையும் வெல்லும் அரிய வாய்ப்பு கிடைக்கும். 

- பு.விவேக் ஆனந்த்.

எடிட்டர் சாய்ஸ்

MUST READ