Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

மீண்டும் ஒயிட் வாஷ் ஆகுமா ஆஸ்திரேலியா? #AUSvsSA

ஆஸ்திரேலியா

கடந்த ஆகஸ்ட் மாதம் இலங்கையில்  ஒயிட்வாஷ் ஆனது ஆஸ்திரேலியா. தற்போது மீண்டும் அத்தகைய சூழ்நிலையை சந்திக்கும்  மோசமான  நிலைமையில்  இருக்கிறது. ஆஸ்திரேலிய  நாட்டில் தென்னாபிரிக்க அணி சுற்றுப்பயணம் மேற்கொண்டு வருகிறது. முதல் டெஸ்ட் போட்டி கடந்த நவம்பர் மூன்றாம் தேதி பெர்த் மைதானத்தில் நடந்தது.  முதல் இன்னிங்ஸில்  தென்னாப்பிரிக்காவை விட இரண்டு ரன்கள் கூடுதலாக எடுத்திருந்தது ஆஸ்திரேலியா. தென்னாபிரிக்க அணி தன்னுடைய இரண்டாவது இன்னிங்ஸில் டுமினி,  எல்கர்  சதங்கள்  உதவியால் 540 ரன்கள் எனும் மெகா இலக்கை எட்டியது. சாதனை இலக்கை நோக்கி பயணித்த ஆஸ்திரேலியாவை அடியோடு சாய்த்தார் ககிஸோ ரபாடா. இதையடுத்து 177  ரன்கள் வித்தியாசத்தில்  வெற்றி பெற்றது தென்னாபிரிக்கா. ரபாடா ஆட்டநாயகன் விருது பெற்றார்.

சொந்த மண்ணில் முதல் டெஸ்ட் போட்டியே தோல்வியடைந்ததால், அதிர்ச்சி அடைந்தது ஆஸ்திரேலிய அணி, இரண்டாவது டெஸ்டில் சில வீரர்கள் நீக்கப்பட்டு அணியில் பர்ன்ஸ் உள்ளிட்ட வீரர்களுக்கு வாய்ப்பு வழங்கப்பட்டது.   ஹோபர்ட்டில் கடந்த நவம்பர்  பன்னிரெண்டாம் தேதி தொடங்கிய  டெஸ்ட் போட்டியில் டாஸ் வென்று முதலில் பேட்டிங் பிடிக்க முடிவெடுத்தது ஆஸ்திரேலியா. தென்னாபிரிக்காவின் பந்துவீச்சாளர்கள் அபாட், பிலாந்தர் இருவரையும் சமாளிக்க முடியாமல் சரசரவென சீட்டுக்கட்டுகள் போல ஆஸ்திரேலிய அணியின் விக்கெட்டுகள் சரிந்தன. இதையடுத்து ஆஸ்திரேலிய அணியின் முதல் இன்னிங்ஸ் வெறும் 85  ரன்களுக்கு முடிவுக்கு வந்தது. குவிண்டன் டீ காக்கின் அதிரடி சதத்தால் முதல் இன்னிங்ஸில் 326 ரன்கள் குவித்தது  தென்னாபிரிக்கா  ஒரு மிகப்பெரிய இன்னிங்ஸ் ஆடியே ஆக வேண்டும் என்ற கட்டாயத்தில் களமிறங்கிய ஆஸ்திரேலிய அணி, கடைசியில் வெறும் 161 ரன்களுக்கு ஆல் அவுட்டானது. இதையடுத்து இன்னிங்ஸ் மற்றும் 80 ரன்கள் வித்தியாசத்தில் வெற்றியைச் சுவைத்தது தென்னாபிரிக்க அணி. 

ஆஸ்திரேலியா

இந்த நிலையில் தான் மூன்றாவது மற்றும் தொடரின் இறுதி டெஸ்ட் கிரிக்கெட் போட்டி அடிலெய்டில் வரும் வியாழக்கிழமை துவங்குகிறது. இந்த டெஸ்ட் போட்டி பகலிரவாக நடக்கிறது. டெஸ்ட் கிரிக்கெட்டில் பொதுவாக சிவப்பு நிற பந்துகள் பயன்படுத்தப்படும். ஆனால் பகலிரவு போட்டியாக நடத்தப்படுவதால், இந்த போட்டியில் பிங்க் நிற பந்துகள் பயன்படுத்தப்படும். ஆஸ்திரேலியாவுக்கு  பிங்க் பந்தில் விளையாடிய அனுபவம் இருக்கிறது. நியூஸிலாந்துடன் கடைசியாக விளையாடிய பகலிரவு டெஸ்ட் போட்டியில் வெற்றியைச் சுவைத்தது. ஆஸ்திரேலியாவுக்கும் சரி, அடிலெய்டு மைதானத்துக்கு சரி, தற்போது நடக்கவிருப்பது இரண்டாவது பிங்க் பந்து டெஸ்ட் போட்டி. ஆனால், தென்னாபிரிக்க அணிக்கு இதுவரை பிங்க் பந்தில் டெஸ்ட் கிரிக்கெட் ஆடி பழக்கமில்லை, இது தான் சர்வதேச அரங்கில் அந்த அணி ஆடும் முதல் பகலிரவு போட்டி ஆகும். எனவே இந்த போட்டியை வெல்ல வேண்டும், அதோடு ஆஸ்திரேலிய அணியை  ஒயிட் வாஷ் ஆக்க வேண்டும் என்ற உற்சாகத்துடன் களமிறங்கியிருக்கிறது தென்னாபிரிக்க அணி.

கேப்டன் டூ பிளசிஸ் தலைமையில்  புது உத்வேகம் பெற்று ஆடும் தென்னாப்ரிக்காவிற்கே மூன்றாவது டெஸ்ட் போட்டியை வெல்லும் வாய்ப்பு இருப்பதாக நிபுணர்கள் சொல்லியிருக்கிறார்கள். கடும் மனச்சோர்வில் இருக்கும்  ஆஸ்திரேலிய அணி, இந்த போட்டியை வென்றே ஆக வேண்டும் என்ற கட்டாயத்தில் களமிறங்குகிறது. ஒருவேளை  இந்த போட்டியில் சொதப்பினால் ஆஸ்திரேலிய டெஸ்ட் கிரிக்கெட் அணியில் மிகப்பெரிய அளவில் மாற்றங்கள் வரும் என  எதிர்பார்க்கப்படுகிறது. ஏற்கனவே ஐந்து வீரர்கள் இந்த போட்டியில் கழட்டிவிடப் பட்டுள்ளனர். தனது கேப்டன் பதவிக்கும் கத்தி தொங்கும் சூழ்நிலை இருப்பதால் கேப்டன் ஸ்மித் இந்த போட்டியில் தென்னாபிரிக்காவை  ஜெயிக்க என்ன திட்டங்கள் வைத்திருக்கிறார் என பொறுத்திருந்து  தான் பார்க்க வேண்டும். ஏற்கனவே இலங்கையுடன்  ஒயிட் வாஷ் ஆன நிலையில், தொடர்ச்சியாக அதுவும் சொந்த மண்ணில் ஆஸ்திரேலியா ஒயிட் வாஷ் ஆகுமா என்பதை உலகின் அத்தனை கிரிக்கெட் ரசிகர்களும் உற்றுநோக்கி இருக்கிறார்கள். 

தென்னாபிரிக்க அணியை பொறுத்தவரை ஸ்டெயின், டிவில்லியர்ஸ் என இரண்டு முக்கியமான  வீரர்கள் இல்லாத போதும், பேட்டிங்,பவுலிங் இரண்டிலும் வலுவாக இருக்கிறது. அம்லா, டுபிளசிஸ் ஆகிய அனுபவ வீரர்கள் இன்னும் முழு பார்மில் ஆட வில்லை. எனினும் எல்கர், டுமினி, தெம்பா பவுமா ஆகியோர் நம்பிக்கையளிக்கும் விதமாக பேட்டிங் செய்கின்றனர். ஆறாவது ஆட்டக்காரராக களமிறங்கும் டீ காக், ஷேவாக் ஸ்டைலில் அதிரடியாக டீல் செய்கிறார். பவுலிங்கில் ரபடா ஆஸ்திரேலிய அணியை அச்சுறுத்துகிறார். பிலாந்தரும், அபாட்டும் விக்கெட் வீழ்த்தும் பவுலராக திகழ்கின்றனர். எனவே ஆஸ்திரேலியா புது உத்தியை யோசிக்க வேண்டிய கட்டாயத்தில் இருக்கிறது.

இந்த ஆண்டு ஏற்கனவே சொந்த மண்ணில் இந்திய அணியிடம் டி20 தொடரில் ஒயிட் வாஷ் ஆனது ஆஸ்திரேலியா. இதையடுத்து இலங்கையில் டெஸ்ட் தொடரிலும், தென்னாபிரிக்க  மண்ணில் ஒருநாள் தொடரிலும் ஆஸ்திரேலியா ஒயிட் வாஷ் ஆகியிருந்தது. தற்போது இந்த தொடரிலும் ஒயிட் வாஷ் ஆனால், வரலாற்றில் ஆஸ்திரேலிய அணியின் மிக மோசமான பெர்ஃபார்மென்ஸ் இந்த ஆண்டு தான் என்ற அவப்பெயருக்கு ஆளாக நேரிடும். ஆஸ்திரேலியா என்ன செய்யப்போகிறது? 

- பு.விவேக் ஆனந்த்

 

 

Advertisement
Advertisement
Advertisement

எடிட்டர் சாய்ஸ்

“மாட்டின் மீதான அக்கறை, சிசுக்கள் மீது கிடையாதா?!” நெஞ்சு பொறுக்குதில்லையே #GorakhpurTragedy
Advertisement

MUST READ

Advertisement
[X] Close