Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

மூன்றே ஓவரில் 50 ரன்... கம்பீருக்கு ஷாக் தந்த ராணா - பாண்டியா!

மும்பை இந்தியன்ஸ் அணியும், கொல்கத்தா நைட் ரைடர்ஸ் அணியும் நேற்று  இரவு எட்டு மணிக்கு நடந்த ஐபிஎல் போட்டியில் மோதின. இதில் கொல்கத்தா நைட் ரைடர்ஸ் அணி நம்பமுடியாத வகையில் தோல்வி அடைந்தது. 

ரோஹித் ஷர்மா தலைமையிலான மும்பை இந்தியன்ஸ் அணி, இந்த ஐபிஎல் தொடரில் இரண்டாவது  ஆட்டத்தில் கொல்கத்தாவை எதிர்கொண்டது. முதல் ஆட்டத்தில் குஜராத் லயன்ஸை புரட்டி எடுத்து 10 விக்கெட்டுகள் வித்தியாசத்தில் மெகா வெற்றி ருசித்த கையோடு மும்பைக்கு வந்தது கம்பீர் அணி. புனேவிடம் அடைந்த தோல்வியால் உற்சாகம் இழந்து காணப்பட்டது மும்பை அணி. நேற்று டாஸ் வென்ற ரோஹித்  சேஸிங் செய்வதாக அறிவித்தார். கம்பீரும், கிறிஸ் லின்னும் கொல்கத்தா அணியின் தொடக்க வீரர்களாக களமிறங்கினார்கள். நான்கு ஓவரில் 44 ரன்னுக்கு விர்ரென் ஸ்கோர் பறந்தது. இந்த இருவரையும் நிலைக்கவிட்டால் ஸ்கோர் 250 சென்றாலும் ஆச்சரியப்படுவதற்கு இல்லை என்ற நிலையில், ஐந்தாவது ஓவரில் அதிரடியாக க்ரூனால் பாண்டியாவை அறிமுகப்பத்தினார்  ரோகித் ஷர்மா. இதற்கு உடனடியாக பலன் கிடைத்தது. அந்த ஓவரின் இரண்டாவது பந்திலேயே மெக்லகனிடம் கேட்ச் கொடுத்து அவுட் ஆனார் கவுதம் கம்பீர். 

மனிஷ் பாண்டே

உத்தப்பா வந்த வேகத்தில் ஒரு பவுண்டரி விளாசினார். அடுத்த பந்தையும் பெரிய  ஷாட் ஆட முயன்று ஹர்டிக் பாண்டியாவிடம் கேட்ச் கொடுத்து தோற்றுப்போன விரக்தியுடன் நடையைக் காட்டினார் உத்தப்பா. முதல் ஓவரிலேயே கம்பீர், உத்தப்பா என இரண்டு அதிரடி வீரர்களை பெவிலியனுக்கு அனுப்பிய கெத்துடன் ஓவரை முடித்தார் க்ரூனால் பாண்டியா. எட்டாவது ஓவரில்  வலது கை 'கிறிஸ் கெயில்' என செல்லமாக அழைக்கப்படும் கிறிஸ் லின் பும்ராவின் வீச்சில் எல்பி ஆனார். அப்போது ரன் ரேட் சுணங்கியது. ஹர்பஜன், ஹர்டிக் பாண்டியா பந்துகளில் பவுண்டரி அடிக்கவே திணறினர் யூசுப் பதானும், மனிஷ் பாண்டேவும்.

17 ஓவர் முடிவில் 136 ரன்கள் மட்டுமே எடுத்திருந்தது கொல்கத்தா. கடைசி கட்ட ஓவர்களில் மனிஷ் பாண்டே வாணவேடிக்கை காட்டினார். கடைசி ஓவரில் மட்டும் 23 ரன்களைக் குவித்தது கொல்கத்தா நைட் ரைடர்ஸ். இதையடுத்து மும்பை அணிக்கு வெற்றி இலக்காக 179 ரன்கள் நிர்ணயிக்கப்பட்டது. 

மும்பை அணி கவனமுடன் இன்னிங்ஸை தொடங்கியது. ஓவருக்கு எட்டு ரன்கள் வீதத்தில் ஆடிக்கொண்டிருந்த மும்பைக்கு முதல் விக்கெட்டாக பார்த்தீவ் வீழ்ந்தார். அதற்கடுத்த ஓவரிலேயே ராஜ்புட் பந்துவீச்சில் நன்றாக ஆடிக்கொண்டிருந்த பட்லர் எல்பி முறையில் அவுட் ஆனார். அம்பயர் அவுட் கொடுத்த பிறகு ரீப்ளேயில் அது நாட் அவுட் என்பது தெளிவாக  தெரிந்தது. முதல் மேட்ச் போலவே, இதிலும் அம்பயரின் தவறான முடிவால் அவுட் ஆனா விரக்தியுடன் நடையைக் காட்டினார் பட்லர். அதற்கடுத்த ஓவரில் சுனில் நரேன் பந்துவீச்சில் ரோஹித் ஷர்மா எல்பி ஆனார். இந்த அவுட்டும் தவறாகவே தரப்பட்டது. அம்பயரிடம் கோபமாக விரக்தியை வெளிப்படுத்தி விட்டு வெளியேறினார் கேப்டன் ரோஹித் ஷர்மா. 

நிதிஷ் ராணா

இரண்டு அதிரடி வீரர்களுக்கு அடுத்தடுத்த ஓவர்களில் தவறான முறையில் அவுட் தரப்பட்டதால் அதிர்ச்சி அடைந்தனர் மும்பை அணியும் அதன் ரசிகர்களும். அதன் பிறகு க்ரூனால் பாண்டியா, பொல்லார்டு ஆகியோரும் பெரிய இன்னிங்ஸ் ஆடாமல் அவுட் ஆயினர். 17 ஓவரில் 130/5 என இருந்தது மும்பை ஸ்கோர். களத்தில் நிதிஷ் ராணாவும், ஹர்திக் பாண்டியாவும் இருந்தனர்.  இருவரும் இளம் வீரர்கள். கொல்கத்தா அணியைச் சேர்ந்த சிறந்த  ஃபீல்டர் கிறிஸ் லின் அப்போது காயம் காரணமாக பெவிலியனில் இருந்தார். கம்பீரும் சிறு உடல்நல பிரச்னையால் பெவிலியன் திரும்பினார். 

கேப்டனும் இல்லாமல் சிறந்த ஃபீல்டரும் இல்லாமல் மேட்ச்சைத் தொடர்ந்தது  கொல்கத்தா. பொறுப்பு கேப்டனாக சூர்ய குமார் யாதவ் செயல்பட்டார். அந்த ஓவரில் இருந்து தான் மேட்ச் தலைகீழாக மாறியது. வெற்றி தேவதை மும்பை பக்கம் நகரத் தொடங்கினாள். 18-வது ஓவரை உலகின் சிறந்த வேகப்பந்து வீச்சாளர்களில் ஒருவரான  டிரென்ட் போல்ட் வீசினார். அந்த ஓவரில் ராணா ஒரு பவுண்டரி மற்றும் சிக்ஸர் விளாசினார். ஹர்திக் பாண்டியாவும் தன் பங்குக்கு ஒரு சிக்ஸர் அடித்தார். அந்த ஓவரில் மட்டும் 19 ரன்கள் வந்தது. 

இரண்டு ஓவரில் 30 ரன் அடிக்க வேண்டும் என்பது இப்போது மும்பைக்கு இலக்கு. 23 வயது அங்கித் ராஜ்புட் 19 வது ஓவரை வீசினார். முதல் பந்தை பார்வையாளர்களிடம் அனுப்பினார் ராணா.  இரண்டாவது பந்தை எக்ஸ்ட்ரா கவர் திசையில் ஒரு அட்டகாசமான பவுண்டரி அடித்தார். ஆனால் மூன்றாவது பந்தில் நரேனிடம் கேட்ச் கொடுத்து அவுட் ஆனார். வலுவான கொல்கத்தா பவுலிங்குக்கு எதிராக, அணிக்கு அவசியம் தேவைப்பட்ட சூழ்நிலையில் 29 பந்தில் 50  ரன்கள் எடுத்து அதிரடித்தார் ராணா. அவர் பெவிலியன் திரும்பியபோது ‛WHAT A PLAYER’ என கரகோஷம் தந்தனர் ரசிகர்கள். ராணா விட்ட இடத்தில் பாண்டியா தொடர, அந்த ஓவரில் ஐந்தாவது பந்து ஸ்கொயர் லெக் திசையில் இருந்த ரசிகர்களிடம் தஞ்சம் அடைந்தது. 

பாண்டியா சகோதரர்கள்

இறுதி ஓவரில் 11 ரன்கள் எடுத்தால் வெற்றி. முதல் பந்தில் இரண்டு ரன்கள் வந்தது. இரண்டாவது  பந்தை அற்புதமாக வீசினார் போல்ட். பாண்டியா விளாசிய அந்த பந்தை, கோட்டை விட்டார் பொறுப்பு கேப்டன் சூர்ய குமார் யாதவ். பந்தைத் தவறவிட்டது மட்டுமின்றி, பந்து பவுண்டரிக்கு  செல்வதை தடுக்கவும் செய்யாமல் தெனாவெட்டாக இருந்தார். அவரின் அலட்சியப் போக்கால், ஒரு ரன்னுக்கு பதிலாக நான்கு ரன்கள் கிடைத்தது மும்பைக்கு. மூன்றாவது பந்தில் ரன் இல்லை. நான்காவது பந்தை ஷார்ட் பாலாக வீசினார் போல்ட். எளிதான கேட்சை கோட்டை விட்டார் ரிஷி தவான். ஆகவே, இரண்டு ரன்கள் கிடைத்தது. ஐந்தாவது பந்தை பாண்டியா விளாச, சற்றே கடினமான கேட்சை அங்கித் ராஜ்புட் கோட்டை விட, பந்து எல்லைக்கோட்டைத் தொட்டது. அப்போது வெற்றிக்குத் தேவையான ரன்னையும் மும்பை தொட்டுவிட, ஸ்டேடியம் அதிர்ந்தது ரசிகர்களின் கோஷத்தால்! 

மூன்றே ஓவரில் 50 ரன் விளாசி மேஜிக் வெற்றியைச் சுவைத்தது மும்பை அணி. டெண்டுல்கர் உற்சாகமடைய, கம்பீர் கன்னத்தில் கை வைக்க, சில நிமிடங்களில் அத்தனை காட்சிகளும் மாறின. மும்பை வான்கடே தனது கோட்டை என மீண்டும் நிரூபித்தது ரோஹித் அணி. மும்பையுடன் இதுவரை ஆடிய 19 போட்டிகளில், நேற்று 14 வது முறையாக  தோற்றது கொல்கத்தா. வான்கடேவில் கடைசி ஏழு போட்டிகளில் இது ஆறாவது தோல்வி கொல்கத்தாவுக்கு! 

ஐபிஎல் சூடு பிடிக்க ஆரம்பித்திருக்கிறது. 

- பு.விவேக் ஆனந்த்

Photo Courtesy : BCCI

Advertisement
Advertisement
Advertisement
Advertisement
Advertisement

எடிட்டர் சாய்ஸ்

வெறும் ஆறே ரன்கள்.. போட்டியில் தோல்வி! ஆனாலும் அனைவரின் மனதையும் நெகிழவைத்த அந்த கிரிக்கெட் மேட்ச்! #MustRead #MondayMotivation
Advertisement

MUST READ

Advertisement
[X] Close