Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

10 போட்டிகளுக்குப் பின் ஃபார்முக்குத் திரும்பிய கொம்பன் கெய்ல்! - 'அட்ரா சக்க' சாதனை

டி-20 போட்டிகளில் கிறிஸ் கெய்ல் 10 ஆயிரம் ரன்களைக் கடந்து இமாலய சாதனை படைத்துள்ளார்.

டி20 போட்டியில் 10 ஆயிரம் ரன்கள் அடித்த கெய்ல்

ஒருநாள் போட்டிகள், டெஸ்ட் போட்டிகளில் 10 ஆயிரம் ரன்கள் எடுப்பதே கடினம் என்ற நிலையில், டி-20 கிரிக்கெட்டில் இந்த ரன்களை அநாயசமாகக் கடந்திருக்கிறார் கிறிஸ் கெய்ல். நடப்பு ஐபிஎல் தொடரில் குஜராத் லயன்ஸ் அணிக்கு எதிரான நேற்றைய ஆட்டத்தில், ராயல் சேலஞ்சர்ஸ் வீரர் கிறிஸ் கெய்ல் 38 பந்துகளில் 77 ரன்களை எடுத்தார். இதில் 7 சிக்ஸர்களும் 5 பவுண்டரிகளும் அடங்கும். இந்தப் போட்டியில் 3 ரன்களை எடுத்த போது கெய்ல் டி-20 போட்டியில் 10 ஆயிரம் ரன்களை கடந்த முதல் வீரர் என்ற பெருமையைப் பெற்றார். இந்த ஐபிஎல் சீசன் தொடங்குவதற்கு முன்னதாக 10 ஆயிரம் ரன்களை எட்டுவதற்கு கெய்லுக்கு 63 ரன்கள் தேவைப்பட்டது. முன்னதாக நடந்த ஆட்டங்களில் அவர் முறையே  32, 6, 22 ரன்களே எடுத்திருந்தார். 

தற்போதையை நிலையில், டி-20 போட்டியைப் பொறுத்த வரை, வேறு எந்த வீரரும் 8 ஆயிரம் ரன்களைக் கூட எட்டவில்லை. கெய்லுக்கு அடுத்ததாக நியூசிலாந்து வீரர் பிரண்ன்ட மெக்கலம் அதிகபட்சமாக 7,596 ரன்களை அடித்துள்ளார். மெக்கல்லம் சர்வதேச போட்டிகளில் இருந்து ஓய்வு பெற்று விட்டார். இந்த ஐபிஎல் சீசனில் குஜராத் லயன்ஸுக்காக ஆடிவருகிறார். ஆஸ்திரேலிய வீரர் பிராட் ஹட்ஜ் 7,338 ரன்களையும், சன்ரைசர்ஸ் அணி கேப்டனான ஆஸ்திரேலிய வீரர் டேவிட் வார்னர் 7,156 ரன்களையும்  எடுத்துள்ளனர். 

கிரிக்கெட்டைப் பொறுத்த வரை முதன்முதலில் 10 ஆயிரம் ரன்களை எட்டிய இரு வீரர்கள் இந்தியாவைச் சேர்ந்தவர்கள். 1987ம் ஆண்டு அகமதாபாத்தில் கவாஸ்கர் டெஸ்ட் போட்டியில் முதல் வீரராக 10 ஆயிரம் ரன்களைக் கடந்தார். சர்வதேசக் கிரிக்கெட்டில் 10 ஆயிரம் ரன்கள் என்ற மைல்கல்லை எட்டிய முதல் வீரர் இவர். இந்தூரில் சச்சின் ஒருநாள் போட்டியில் 10 ஆயிரம் ரன்களைக் கடந்தார். தற்போது டி-20 போட்டியில் 10,000 ரன்கள் என்ற மைல்கல்லை எட்டியுள்ளார் கெய்ல். 

கங்கணம் ஸ்டைல் நடனமாடும் கெயில்

தற்போது 37 வயதான கெய்ல் வெஸ்ட் இன்டீஸ் ஒருநாள் அணியில் 2015-ம் ஆண்டு உலகக் கோப்பைக்கு பின்னரும் டி-20 அணியில் 2016-ம் ஆண்டுக்கு பிறகும் இடம்பெறவில்லை. வெஸ்ட் இன்டீஸ் கிரிக்கெட் போர்டுடன் ஏற்பட்ட கருத்து வேறுபாடு காரணமாக அவர் ஒதுக்கி வைக்கப்பட்டுள்ளார். ஆனால், இதையெல்லாம் பற்றி கவலைப்படாத கெய்ல் உலகம் முழுக்க பயணித்து டி-20 போட்டிகளில் அசத்துகிறார். கடந்த மார்ச் மாதத்தில் பாகிஸ்தான் சூப்பர் லீக் போட்டியில் கராச்சி கிங்ஸ் அணிக்காக விளையாடினார். ஆஸ்திரேலியாவின் பிக் பாஷ், வங்கதேச பிரீமியர் லீக், இலங்கை பிரீமியர் லீக், கரீபியன் பிரீமியர் லீக் போட்டிகளில் விளையாடி வந்தார்.

சொல்லப் போனால் கெய்ல் எந்த ஒரு டி20 தொடரையும் விட்டு வைப்பதில்லை. டி-20 போட்டிகளில் கெய்லுக்கு அப்படி ஒரு மவுசு. கெய்லை அணிகள் விரும்புவதற்கு பல காரணங்கள் இருக்கின்றன. ஜாலியான மனிதர், கங்னம் ஸ்டைல் டான்ஸில் கில்லி என இவர் ரொம்பவே ஃப்ரெண்ட்லி.  களத்தில் நின்று விட்டால் எதிர் அணியின் பந்துவீச்சாளர்களுக்கு சிக்கல்தான். தேசிய அணிக்காக கிளப்பில் இருந்து பாதியிலேயே வெளியேறுவதே இல்லை. அதனால் கிளப் அணிகளைப் பொறுத்தவரை கெய்ல் ஒரு டார்லிங்.

ஐபிஎல் தொடரில் மட்டும் 5 சதங்களை அடித்துள்ளார். இதில் 30 பந்துகளில் 100 அடித்த சாதனையும் இருக்கிறது. பிக் பாஷ் தொடரில் 12 பந்துகளில் அரை சதம் விளாசியுள்ளார். தற்போது கிறிஸ் கெய்ல் டி-20 போட்டிகளில் 10,074 ரன்களை அடித்திருக்கிறார். அதில்,18 சதங்களும் 743 சிக்ஸர்களும் அடங்கும்.  நேற்றைய ஆட்டத்துக்கு முன்னதாக 10 ஆட்டங்களில் கெய்ல் சோபிக்கவில்லை. கடைசியாக கராச்சி கிங்ஸ் அணிக்காக 44 ரன்கள் அடித்ததே அதிகபட்சமாக இருந்தது. தற்போது குஜராத் அணிக்கு எதிராக 77 ரன்களை விளாசி மீண்டும் ஃபார்முக்கு திரும்பியுள்ளார் இந்த டி-20 கிங்!

-எம்.குமரேசன்

Advertisement
Advertisement
Advertisement
Advertisement
Advertisement

எடிட்டர் சாய்ஸ்

வெறும் ஆறே ரன்கள்.. போட்டியில் தோல்வி! ஆனாலும் அனைவரின் மனதையும் நெகிழவைத்த அந்த கிரிக்கெட் மேட்ச்! #MustRead #MondayMotivation
Advertisement

MUST READ

Advertisement
[X] Close