Vikatan.com

www.vikatan.com would like to send you push notifications.

Notifications can be turned off anytime from browser settings.

'அ.தி.மு.க டெபாசிட் வாங்காததற்கு நானா பொறுப்பு?! -கொந்தளிக்கும் விஜயதரணி எம்.எல்.ஏ.

" விளவங்கோடு தொகுதியில் அ.தி.மு.க வேட்பாளர் தோற்றதன் பின்னணியிலேயே என் மீது பிடிவாரன்ட் பிறப்பிக்கப்பட்டது" எனக் கொந்தளிக்கிறார் காங்கிரஸ் எம்.எல்.ஏ விஜயதரணி. இதுதொடர்பாக, நேற்று நாகர்கோவில் நீதிமன்றத்திற்கு வந்தவரால், நீதிபதியை சந்திக்க முடியவில்லை.

கன்னியாகுமரி மாவட்டம், கருங்கல் சந்தைத் திடலில் 2015 செப்டம்பர் 27-ம் தேதி நடைபெற்ற காங்கிரஸ் பொதுக்கூட்டத்தில், தமிழக முதல்வர் ஜெயலலிதாவை அவதூறாகப் பேசியதாக, தமிழக காங்கிரஸ் தலைவர் ஈ.வி.கே.எஸ்.இளங்கோவன் மற்றும் விஜயதரணி எம்.எல்.ஏ. ஆகியோர் மீது அரசு குற்றவியல் வழக்கறிஞர் ஞானசேகரன், நாகர்கோவில், மாவட்ட தலைமை குற்றவியல் நீதிமன்றத்தில் வழக்கு தொடர்ந்தார். இந்த வழக்கில், கடந்த ஜூன் 15ம் தேதி விஜயதரணி ஆஜராகவில்லை. அவர் சார்பில் வழக்கறிஞர்களும் ஆஜராகவில்லை. இதையடுத்து, விஜயதரணிக்கு பிடிவாரன்ட் பிறப்பித்து, தலைமை குற்றவியல் நீதிபதி சசிகுமார் உத்தரவிட்டார். இது அரசியல் அரங்கில் அதிர்வலையை ஏற்படுத்தியது.

இதுபற்றி சட்டமன்றத்தில் பேசிய விஜயதரணி, ' இந்த வழக்கில் பிடிவாரன்ட் பிறப்பிக்கப்படுவதற்கு அரசு வழக்கறிஞர் கொடுத்த அழுத்தம்தான் காரணம். தமிழ்நாட்டில் கொலை, கொள்ளை, பெண்களுக்கு எதிரான கொடுமைகள், செயின் பறிப்பு என நாள்தோறும் எவ்வளவோ விஷயங்கள் நடந்து வருகின்றன. அதில் தொடர்புடையவர்களையெல்லாம் கண்டுபிடிக்க, எந்த பிடிவாரன்ட்டும் பிறப்பிக்கப்படுவதில்லை. நான் ஒரு சட்டமன்ற உறுப்பினர். எங்கும் ஓடி ஒளியப் போவதில்லை. அவதூறு வழக்கு ஒன்றிற்காக என் மீது பிடிவாரன்ட் பிறப்பிக்கப்பட்டுள்ளது. மிகவும் முக்கியத்துவம் வாய்ந்த நபர்களுக்கு சம்மன் மட்டும் அனுப்பினால் போதும் என உச்சநீதிமன்றத்தின் பல தீர்ப்புகள் இருக்கின்றன' எனக் குறிப்பிட, இடைமறித்த சபாநாயகர் தனபால், ' நீதித்துறை தொடர்பான விஷயங்களை இங்கு பேச வேண்டாம்' என முடித்துக் கொண்டார்.

இதுபற்றி நம்மிடம் பேசிய விளவங்கோடு தொகுதி காங்கிரஸ் நிர்வாகி ஒருவர், " சட்டமன்றத் தேர்தலில் 33 ஆயிரம் ஓட்டு வித்தியாசத்தில் விஜயதரணி வென்றார். இங்கு போட்டியிட்ட அ.தி.மு.க வேட்பாளர் நாஞ்சில் டோம்னிக் சேவியோ ஜார்ஜ் டெபாசிட் வாங்கவில்லை. அவர் வாங்கிய ஓட்டுக்கள் 24,801. விஜயதரணி வாங்கியது 68,789 வாக்குகள். இதில் பா.ஜ.கவின் தர்மராஜ் இரண்டாவது இடத்திற்கும் சி.பி.எம்மின் செல்லச்சாமி மூன்றாவது இடத்திற்கும் தள்ளப்பட்டார். தமிழ்நாட்டின் எல்லையில் இப்படியொரு படுதோல்வியை அ.தி.மு.க சந்தித்ததை, கட்சித் தலைமை விரும்பவில்லை. அதற்காகத்தான் என்றைக்கோ விஜயதரணி பேசிய வழக்கில், சட்டசபை கூடும் நேரத்தில் பிடிவாரண்ட் பிறப்பிக்கப்பட்டுள்ளது. அ.தி.மு.க டெபாசிட் வாங்காததற்கு அவரா பொறுப்பு? சட்டரீதியாகவே இந்த வழக்கை அவர் சந்திப்பார்" என்றார்.

இதுகுறித்து நம்மிடம் பேசிய விஜயதரணி, " நான் எங்கும் ஓடி ஒளிய வேண்டிய அவசியம் இல்லை. மிகச் சாதாரண வழக்கை நெருக்கடி மிகுந்த ஒன்றாகக் காட்டிவிட்டனர். வழக்கில் ஆஜராக அவசரம் அவசரமாக நேற்று நாகர்கோவில் கோர்ட்டுக்கு வந்தேன். போக்குவரத்து செலவே பத்தாயிரம் ரூபாயைத் தாண்டிவிட்டது. வக்கீல்களின் கோர்ட் புறக்கணிப்பால், நீதிபதி யாரிடமும் மனு வாங்கவில்லை. மக்கள் பணிகளைச் செய்வதற்கே எனக்கு நேரம் சரியாக இருக்கிறது. இதுபோன்ற வழக்குகளால் நேர விரயம்தான் ஏற்படுகிறது" என வேதனைப்பட்டார்.

ஆ.விஜயானந்த்
 

எடிட்டர் சாய்ஸ்

ஜெர்சி மாடுகள், பிரேசில் காபி, மருத்துவமனை உறுதி! ஜெயலலிதா பற்றி தோழியின் நினைவலைகள்
placeholder

அதே மாதிரி ஜெயலலிதா தன்னுடைய 10 வயதில் சிவாஜி கணேசன் முன்னிலையில் மயிலாப்பூரில் செய்த நடன அரங்கேற்றப் படங்கள் முதல் அதற்குப் பிறகான அவரது சின்ன வயசுப் படங்களை நாங்கள் தொகுத்திருந்தோம். அதை 2012 ம் ஆண்டு, எனக்கு அவரை சந்திக்கும் வாய்ப்புக் கிடைத்த போது கொடுத்தேன். அதைப் பார்த்து ரொம்ப சந்தோஷமாகிட்டாங்க. அந்தப் படத் தொகுப்பை, தன்னோட ஹேண்ட் பேக்ல வச்சுக்கிட்டாங்க. பத்திரமா வைத்துக் கொள்வதாகவும் சொன்னாங்க. சினிமாக்காரங்க என்றால் ஈஸியாக அணுகலாம் என்கிற திரையை உடைத்து, அவங்க தனி ரூட்டைப் போட்டு, அதை மத்தவங்க ஃபாலோ பண்ற அளவுக்கு வாழ்ந்து காட்டினாங்க. குறிப்பா, சினிமா விழாக்கள், நிகழ்ச்சிகளுக்கு போக மாட்டாங்க. 

அம்மாவிடமிருந்து போன் வந்தால்...!? - உருகும் வீணை காயத்ரி
placeholder

''சமீபத்தில் கொலை மிரட்டல் விட்டப் பையனால் அம்மாவை சந்திக்க வேண்டிய சூழ்நிலை ஏற்பட்டது. கடந்த ஜூலை 27-ம் தேதி சி.எம் ஆபீஸ்ல இருந்து போன் வந்தது. அம்மா உங்களை உடனே வரச்சொன்னதா சொன்னாங்க. நான் கொஞ்சமும் யோசிக்காமல் போய் நின்னேன். பொதுவாகவே நானும், அவங்களும்தான் தனியாகத்தான் பேசிப்போம். ஆனா, அன்றைக்கு, எல்லா அதிகாரிகளும், இருந்தாங்க. அவங்க முன்னாடி, 'எப்படி இருக்கீங்க' என கேட்டார். நான் பதில் சொல்லிவிட்டு, 'நவம்பர் மாதத்தோடு என்னோட டர்ன் முடியுது' என சொன்னேன். இதற்கு அவர், எல்லோருடைய முன்னிலையிலும், அடுத்த மூன்று வருஷத்துக்கும் நீங்களே துணை வேந்தரா இருங்க என சொல்லிவிட்டு, அவருக்கு பின்னால் இருக்கும் எல்லோரையும் பார்த்து மறுபடியும்  இதையே சொன்னார். அப்போதுதான் அவர்கிட்ட, 'நான் உங்களை சந்திக்க இரண்டு வருஷமாக முயற்சி செய்துட்டு இருந்தேன். இந்த கொலை மிரட்டல் காரணமாகத்தான் உங்களை சந்திக்கிற வாய்ப்பு கிடைச்சிருக்கு, நான் தனி மனுஷியாக இசை பல்கலைக்கழகத்தை நடத்தி வருகிறேன்' என சொன்னேன். உடனே, சம்பந்தப்பட்டவர்களை அழைத்து, அவங்களுக்குத் தேவையான எல்லா உதவிகளையும் செய்து கொடுங்க என சொன்னார்.  'அடுத்த முறைப் பார்க்கும்போது உங்க முகத்துல சிரிப்பை மட்டும் தான் பார்க்கணும்' என ஆறுதல் சொன்னாங்க. அந்த வார்த்தை இன்னும் என் காதில் கேட்டுட்டே இருக்கு. அதுதான் நான் அவங்களை கடைசியாகப் பார்த்தது.  அதற்குப் பிறகு அவரை பார்க்க முடியவில்லை. அவர் சொன்னது போல அதற்கான வேலைகள் நடந்து கொண்டிருக்கும்போதே அம்மா மருத்துவமனையில் அனுமதிக்கப்பட்டுட்டாங்க. நான் இப்போ அடுத்த ஆர்டருக்காக காத்திட்டு இருக்கேன். இன்னும் ஆர்டர் என் கைக்கு வரவில்லை''

MUST READ