Vikatan.com

www.vikatan.com would like to send you push notifications.

Notifications can be turned off anytime from browser settings.

கல்விக் கொள்கையை கலாய்க்கும் ராமதாஸின் 6 ஐடியாக்கள்!


மத்திய அரசு கொண்டு வர உள்ள புதிய கல்விக்கொள்கையை விமர்சித்துள்ள பாமக நிறுவனர் ராமதாஸ், இந்தியாவில் கல்வி வாழ்க்கைக்கும், வேலைவாய்ப்புக்கும் உதவும் வகையில் 6 ஐடியாக்களை முன்வைத்துள்ளார்.

இது தொடர்பாக அவர் இன்று வெளியிட்டுள்ள அறிக்கையில், "மத்திய அமைச்சரவையின் முன்னாள் செயலாளர் டி.எஸ்.ஆர். சுப்பிரமணியன் தலைமையிலான வல்லுனர் குழு தயாரித்துள்ள புதிய கல்விக் கொள்கையை மக்களின் கருத்தை அறியும் நோக்குடன் மத்திய அரசு வெளியிட்டுள்ளது.  புதியக் கல்விக் கொள்கையில் சில சாதகமான அம்சங்கள் உள்ள போதிலும், அதைவிட ஏழைகளின் கல்விக்கு பாதகமான அம்சங்கள்தான் ஏராளமான இருக்கின்றன. புதியக் கல்விக் கொள்கையை உருவாக்குவதற்காக மத்திய அரசு கடைபிடித்த வழிமுறையிலேயே குறைகள் உள்ளன. புதிய கல்விக் கொள்கையை உருவாக்குவதற்கான குழு கல்வியாளர் தலைமையில்தான் அமைக்கப்பட்டிருக்க வேண்டும்.

1964 ம் ஆண்டில் அமைக்கப்பட்ட இந்தியக் கல்விக் குழு,  பல்கலைக்கழக மானியக்குழுவின் தலைவராக இருந்த கோத்தாரி தலைமையிலும், 1993 ம் ஆண்டில் அமைக்கப்பட்ட கல்விக்கான தேசிய ஆலோசனைக்குழு கல்வியாளரும், விஞ்ஞானியுமான யஷ்பால் தலைமையிலும் தான் அமைக்கப்பட்டன. புகழ்பெற்ற கோத்தாரி குழுவுக்கு முன் 1948 ம் ஆண்டில் அமைக்கப்பட்ட இந்திய பல்கலைக்கழக ஆணையத்தின் தலைவராக நியமிக்கப்பட்ட சர்வபள்ளி இராதாகிருஷ்ணனும், 1952 ம் ஆண்டில் அமைக்கப்பட்ட அனைத்திந்திய இடைநிலைக் கல்வி ஆணையத்தின் தலைவராக நியமிக்கப்பட்ட ஆற்காடு லட்சுமண முதலியாரும் கல்வியாளர்கள்தான். ஆனால், புதிய கல்விக் கொள்கையை உருவாக்க அமைக்கப்பட்ட குழுவில் இடம்பெற்றுள்ள ஐவரில்  4 பேர் இந்திய ஆட்சிப்பணி அதிகாரிகள் ஆவர்; ஒருவர் மட்டுமே கல்வியாளர் ஆவார். அதனால்தானோ என்னவோ இக்கொள்கையில் கல்வியை விட நிர்வாகத்திற்கே முக்கியத்துவம் தரப்பட்டுள்ளது.

ஒட்டுமொத்த உற்பத்தி மதிப்பில் கல்விக்கு 6% நிதி ஒதுக்கப்பட வேண்டும் என்ற கோத்தாரி குழு பரிந்துரை செயல்படுத்தப்பட வேண்டும் என்ற அம்சம் பாராட்டத்தக்கது. அங்கன்வாடிகள் மழலையர் பள்ளிகளாக மாற்றப்படும், மாணவ, மாணவியரிடையே பாலின பாகுபாடு நீக்கப்படும், மாணவர்களுக்கு பிரம்படி போன்ற தண்டனைகள் முற்றிலுமாக நீக்கப்படும், குழந்தைகளை அவர்கள் வழியிலேயே பழக்கி பாடம் கற்றுத்தர நடவடிக்கை எடுக்கப்படும் என்பன உள்ளிட்ட பல பரிந்துரைகள் வரவேற்கத்தக்கவை. அதேபோல், சிறுபான்மையினர் பள்ளிகளிலும் கல்வி உரிமைச் சட்டத்தின்படி 25% இட ஒதுக்கீடு வழங்க வகை செய்ய வேண்டும் என்ற பரிந்துரையும் பாராட்டப்பட வேண்டியதே. ஆனால், சிறுபான்மை கல்வி நிறுவனங்களுக்கு உச்ச நீதிமன்றம் சில விதி விலக்குகளை அளித்துள்ள நிலையில், தனியார் பள்ளிகளிலும் கல்வி பெறும் உரிமைச் சட்டத்தை நடைமுறைப்படுத்த முடியுமா என்பதை புதியக் கொள்கை நடைமுறைப்படுத்தப்படும் வரை பொறுத்திருந்து தான் பார்க்க வேண்டும்.

அதேநேரத்தில் டி.எஸ்.ஆர். சுப்பிரமணியன் குழுவின் பெரும்பாலான பரிந்துரைகள் ஏற்க முடியாதவை. உயர் கல்விக்கு தேசிய அளவில் பொது நுழைவுத் தேர்வு நடைமுறைப்படுத்தப்படுவதால், அதற்கேற்ப மாணவர்களை தயார்படுத்தும் வகையில் நாடு முழுவதும் ஒரே மாதிரியான பாடத்திட்டம் அறிமுகம் செய்யப்பட வேண்டும் என்பதை ஏற்க முடியாது. இது காலணிக்கு ஏற்ப கால்களை வெட்டுவதற்கு ஒப்பானதாகும். நாடு முழுவதும் ஒரேமாதிரியான தரம் கொண்ட பாடத்திட்டம் இருக்கலாம்; ஒரே பாடத்திட்டம் இருக்கக்கூடாது. அது தேவையற்ற கலாச்சார, மொழித் திணிப்புக்கு வழி வகுக்கும். அதேபோல், ஐந்தாம் வகுப்பு வரை மட்டுமே கட்டாயத் தேர்ச்சி, அதற்குப் பிறகு தகுதி அடிப்படையில் தேர்ச்சி என்பதையும் ஏற்க முடியாது. இதனால் ஆறாம் வகுப்புக்கு பிறகு குழந்தைகள் தேர்ச்சி அடையாவிட்டால் அவர்கள் படிப்பை பாதியில் நிறுத்தி விடுவார்கள். அனைவருக்கும் கல்வி என்ற நோக்கத்தையே இது சிதைத்து விடும். எட்டாம் வகுப்பு வரை கட்டாயத் தேர்ச்சி வழங்குவதால் எந்த பாதிப்பும் ஏற்பட்டுவிடாது. பின்லாந்து நாட்டில் ஏழாவது வயதில் தொடங்கி 16வது வயது வரை நீடிக்கும் 9 ஆண்டு பள்ளிக்கல்வியில் ஒரு தேர்வும் நடத்தப்படுவதில்லை; அனைவருக்கும் தேர்ச்சி அளிக்கப்படுகிறது. இதனால் அங்குள்ள மாணவர்களின் தகுதி குறையவில்லை. மாறாக மனிதவளக் குறியீட்டில் உலகில் முதலிடத்தில் இருப்பது அந்த நாடுதான் என்பதை மத்திய அரசு உணர வேண்டும்.

கல்வி நிறுவனங்களில் அரசு உதவித் தொகை நிறுத்தப்படும் என்ற பரிந்துரை மோசமான விளைவை ஏற்படுத்தும். உதவித்தொகை கிடைக்காவிட்டால் ஏழைக் குழந்தைகள் படிக்க முடியாத நிலை ஏற்படும். உயர்கல்வி நிறுவனங்களுக்கு நிதி சுதந்திரம் அளிக்க வேண்டும், வெளிநாட்டு பல்கலைக்கழகங்கள் இந்தியாவில் கிளைகளை தொடங்க அனுமதிக்க வேண்டும் என்பதும் உயர்கல்விக் கட்டணங்கள் அதிகரிக்கவும், அவை ஏழைகளுக்கு எட்டாக்கனியாக மாறவுமே வகை செய்யும். படிப்பு சரியாக வராத மாணவர்களுக்கு தொழில்பயிற்சி வழங்கப்பட வேண்டும் என்பது நமது சமுதாயத்தை மீண்டும் குலக்கல்வி முறைக்கே அழைத்துச் சென்று விடும் ஆபத்து உள்ளது. இதற்கு மாறாக அனைத்து மானவர்களுக்கும் வேலைவாய்ப்பை உறுதி செய்யும் வகையில் தொழில் பயிற்சி வழங்கப்பட வேண்டும். இந்தியாவில் கல்வி வாழ்க்கைக்கும், வேலைவாய்ப்புக்கும் உதவும் வகையில் அமைய வேண்டும் என்றால்.....

* புதிய கல்விக் கொள்கையை முழுக்க முழுக்க கல்வியாளர்கள் குழுவை அமைத்து ஆய்வு செய்து, அதன்பின் நடைமுறைப்படுத்த வேண்டும்.

* கோத்தாரிக் குழு, யஷ்பால் குழு ஆகியவற்றின் பரிந்துரைகளை நடைமுறைப்படுத்த வேண்டும்.
* அனைவருக்கும் தரமான கல்வி இலவசமாக வழங்கப்பட வேண்டும்.

* பள்ளிகள் மற்றும் கல்லூரிகளில் திறன் சார் கல்வி   (Skill Based Education), அறிவுசார் கல்வி (Knowledge Based Education), தொழிற்கல்வி (Vocatioanal Education)  ஆகியவற்றை வழங்கி, மாணவர்களின் வேலைவாய்ப்பை உறுதி செய்ய வேண்டும்.

* கல்வியை மாநிலப்பட்டியலுக்கு மாற்ற வேண்டும்.

* பொதுப்பள்ளி மற்றும் அருகமைப் பள்ளி முறையை கட்டாயமாக்க வேண்டும். அனைத்து நிலைகளிலும் தாய்மொழி வழி கல்விக்கு முக்கியத்துவம் அளிக்க வேண்டும் என்று கோருகிறேன்" என்று தெரிவித்துள்ளார்.

எடிட்டர் சாய்ஸ்

அப்போலோ டூ எம்.ஜி.ஆர் சமாதி... ஜெயலலிதாவுக்கு அரண் அமைத்த மன்னார்குடி!

MUST READ