Vikatan.com

www.vikatan.com would like to send you push notifications.

Notifications can be turned off anytime from browser settings.

சரவணன் மரணம்... சி.பி.ஐ. விசாரிக்க வேண்டும்! - ராமதாஸ்

சென்னை: மருத்துவர் சரவணன் மரணம் குறித்த வழக்கை கொலை வழக்காக மாற்றி, சி.பி.ஐ விசாரணைக்கு மத்திய அரசு உத்தரவிட வேண்டும் என்று ராமதாஸ் வலியுறுத்தி உள்ளார்.

இது தொடர்பாக இன்று அவர் வெளியிட்ட அறிக்கையில், ''மதுரை அரசு மருத்துவக் கல்லூரியில் மருத்துவப் படிப்பை முடித்த சரவணன், நுழைவுத்தேர்வு எழுதி, டெல்லி எய்ம்ஸ் மருத்துவக் கல்லூரியில் தாம் விரும்பிய பொது மருத்துவப் படிப்பில் சேர்ந்தார். எய்ம்ஸ் மருத்துவமனையில் பயிற்சி மருத்துவராகவும் பணியாற்றி வந்த நிலையில், கடந்த 10-ம் தேதி அவரது விடுதி அறையில் மர்மமான முறையில் இறந்து கிடந்தார். சரவணன் உயிரிழந்து கிடந்த விதம் பல்வேறு சர்ச்சைகளை ஏற்படுத்திய நிலையில், அவர் கொலை செய்யப்பட்டிருக்கலாம் என்றும், இது குறித்து நியாயமான விசாரணை நடத்தப்பட வேண்டும் என்றும் அவருடன் படித்த மருத்துவர்கள் வலியுறுத்தினர். ஆனால், மருத்துவர் சரவணன் தற்கொலை செய்து கொண்டதாகக் கூறி வழக்கை முடிக்க டெல்லி மாநிலக் காவல்துறை அதிகாரிகள் தீவிரம் காட்டினர்.

மருத்துவர் சரவணனின் மர்ம மரணம் தொடர்பாக மதுரையைச் சேர்ந்த சில மருத்துவர்கள் கடந்த சில நாட்களுக்கு முன் அன்புமணி ராமதாஸை சந்தித்து, கொலையை தற்கொலையாக மாற்ற முயற்சி நடப்பதாக முறையிட்டதைத்தொடர்ந்து டெல்லி எய்ம்ஸ் மூத்த மருத்துவர்களை தொடர்பு கொண்டு உடற்கூறு ஆய்வு நியாயமாக நடத்தப்பட வேண்டும் என்று அன்புமணி ராமதாஸ் வலியுறுத்தினார். அதன்படியே உடற்கூறு ஆய்வு நியாயமாக நடத்தப்பட்டு, சரவணன் தற்கொலை செய்து கொள்ளவில்லை என்பது உறுதி செய்யப்பட்டிருக்கிறது.

ஆனாலும், சரவணனை கொலை செய்தவர்களை அடையாளம் கண்டு தண்டனை பெற்றுத் தர இன்னும் நீண்ட தூரம் பயணிக்க வேண்டியிருக்கிறது. மருத்துவர் சரவணனின் வலது கை நரம்பில் ஊசி மூலம் மருந்து செலுத்துவதற்கான சாதனம் பொருத்தப்பட்டு, அதன் வழியாக உயிரைக் குடிக்கும் மருந்து செலுத்தப்பட்டுள்ளது. வழக்கமாக வலது கை பழக்கம் உள்ளவர்களால் வலது கையில் இந்த சாதனத்தை பொருத்த முடியாது. அதுமட்டுமின்றி, சரவணனின் அறைக் கதவு திறந்தே இருந்ததுடன், அவரது உடலில் செலுத்தப்பட்ட மருந்தின் காலி குப்பியையும் காணவில்லை.

இதனால் வெளியிலிருந்து வந்த எவரேனும் சரவணனின் உடலில் மருந்தை செலுத்தி கொலை செய்திருக்கலாம் என்று அவரது சக மாணவர்கள் ஐயம் தெரிவித்திருந்த நிலையில், அந்த கோணத்தில் டெல்லி காவல்துறை விசாரணை நடத்தியிருந்தால் குற்றவாளியை பல நாட்களுக்கு முன்பே கைது செய்திருக்க முடியும். மருத்துவர் சரவணன் தங்கியிருந்த விடுதியில் கண்காணிப்பு காமிரா பொருத்தப்பட்டிருக்கக் கூடும் என்பதால் கொலையாளியை அடையாளம் கண்டு கைது செய்வது மிகவும் எளிதானதாகவே இருந்திருக்கும்.

ஆனால், டெல்லி காவல்துறை அதிகாரிகள் அவ்வாறு செய்யாமல் சரவணனின் இறப்பை தற்கொலை என்று பதிவு செய்வதில்தான் குறியாக இருந்தனர்.

“சரவணன் தற்கொலை செய்து கொண்டதாகவே கருதுகிறோம். ஏனெனில், அவரது இறப்பில் இதுவரை சந்தேகத்துக்கு இடமளிக்கும் வகையில் எங்களுக்கு எதுவும் கிடைக்கவில்லை. உடற்கூறு பரிசோதனையின் தொடக்க கட்டத்திலும் எந்த சந்தேகமும் எழவில்லை” என்பதையே டெல்லி காவல்துறை துணை ஆணையர் ராஜேந்தர்சிங் பட்டானியா திரும்பத் திரும்ப கூறினார். மருத்துவர் சரவணன் கொலை வழக்கில் யாரையோ காப்பாற்ற டெல்லி காவல்துறை முயல்கிறது என்பதையே அதன் அணுகுமுறைகள் காட்டுகின்றன. இவ்வழக்கை டெல்லி காவல்துறை தொடர்ந்து விசாரித்தால் மருத்துவர் சரவணன் கொலைக்கு நிச்சயமாக நீதி கிடைக்காது.

எனவே, மருத்துவர் சரவணன் மரணம் குறித்த வழக்கை கொலை வழக்காக மாற்றி மத்தியப் புலனாய்வுப் பிரிவின் (சி.பி.ஐ) விசாரணைக்கு மத்திய அரசு ஆணையிட வேண்டும். இதுதொடர்பாக மத்திய அரசுக்கு தமிழக அரசு முறைப்படி கோரிக்கை விடுக்க வேண்டும் என்று வலியுறுத்துகிறேன்" என்று கூறி உள்ளார்.

எடிட்டர் சாய்ஸ்

ஜெர்சி மாடுகள், பிரேசில் காபி, மருத்துவமனை உறுதி! ஜெயலலிதா பற்றி தோழியின் நினைவலைகள்
placeholder

அதே மாதிரி ஜெயலலிதா தன்னுடைய 10 வயதில் சிவாஜி கணேசன் முன்னிலையில் மயிலாப்பூரில் செய்த நடன அரங்கேற்றப் படங்கள் முதல் அதற்குப் பிறகான அவரது சின்ன வயசுப் படங்களை நாங்கள் தொகுத்திருந்தோம். அதை 2012 ம் ஆண்டு, எனக்கு அவரை சந்திக்கும் வாய்ப்புக் கிடைத்த போது கொடுத்தேன். அதைப் பார்த்து ரொம்ப சந்தோஷமாகிட்டாங்க. அந்தப் படத் தொகுப்பை, தன்னோட ஹேண்ட் பேக்ல வச்சுக்கிட்டாங்க. பத்திரமா வைத்துக் கொள்வதாகவும் சொன்னாங்க. சினிமாக்காரங்க என்றால் ஈஸியாக அணுகலாம் என்கிற திரையை உடைத்து, அவங்க தனி ரூட்டைப் போட்டு, அதை மத்தவங்க ஃபாலோ பண்ற அளவுக்கு வாழ்ந்து காட்டினாங்க. குறிப்பா, சினிமா விழாக்கள், நிகழ்ச்சிகளுக்கு போக மாட்டாங்க. 

அம்மாவிடமிருந்து போன் வந்தால்...!? - உருகும் வீணை காயத்ரி
placeholder

''சமீபத்தில் கொலை மிரட்டல் விட்டப் பையனால் அம்மாவை சந்திக்க வேண்டிய சூழ்நிலை ஏற்பட்டது. கடந்த ஜூலை 27-ம் தேதி சி.எம் ஆபீஸ்ல இருந்து போன் வந்தது. அம்மா உங்களை உடனே வரச்சொன்னதா சொன்னாங்க. நான் கொஞ்சமும் யோசிக்காமல் போய் நின்னேன். பொதுவாகவே நானும், அவங்களும்தான் தனியாகத்தான் பேசிப்போம். ஆனா, அன்றைக்கு, எல்லா அதிகாரிகளும், இருந்தாங்க. அவங்க முன்னாடி, 'எப்படி இருக்கீங்க' என கேட்டார். நான் பதில் சொல்லிவிட்டு, 'நவம்பர் மாதத்தோடு என்னோட டர்ன் முடியுது' என சொன்னேன். இதற்கு அவர், எல்லோருடைய முன்னிலையிலும், அடுத்த மூன்று வருஷத்துக்கும் நீங்களே துணை வேந்தரா இருங்க என சொல்லிவிட்டு, அவருக்கு பின்னால் இருக்கும் எல்லோரையும் பார்த்து மறுபடியும்  இதையே சொன்னார். அப்போதுதான் அவர்கிட்ட, 'நான் உங்களை சந்திக்க இரண்டு வருஷமாக முயற்சி செய்துட்டு இருந்தேன். இந்த கொலை மிரட்டல் காரணமாகத்தான் உங்களை சந்திக்கிற வாய்ப்பு கிடைச்சிருக்கு, நான் தனி மனுஷியாக இசை பல்கலைக்கழகத்தை நடத்தி வருகிறேன்' என சொன்னேன். உடனே, சம்பந்தப்பட்டவர்களை அழைத்து, அவங்களுக்குத் தேவையான எல்லா உதவிகளையும் செய்து கொடுங்க என சொன்னார்.  'அடுத்த முறைப் பார்க்கும்போது உங்க முகத்துல சிரிப்பை மட்டும் தான் பார்க்கணும்' என ஆறுதல் சொன்னாங்க. அந்த வார்த்தை இன்னும் என் காதில் கேட்டுட்டே இருக்கு. அதுதான் நான் அவங்களை கடைசியாகப் பார்த்தது.  அதற்குப் பிறகு அவரை பார்க்க முடியவில்லை. அவர் சொன்னது போல அதற்கான வேலைகள் நடந்து கொண்டிருக்கும்போதே அம்மா மருத்துவமனையில் அனுமதிக்கப்பட்டுட்டாங்க. நான் இப்போ அடுத்த ஆர்டருக்காக காத்திட்டு இருக்கேன். இன்னும் ஆர்டர் என் கைக்கு வரவில்லை''

MUST READ