Vikatan.com

www.vikatan.com would like to send you push notifications.

Notifications can be turned off anytime from browser settings.

தேர்ச்சி விகிதத்தை அதிகரிக்க மதிப்பெண்களை அள்ளி வழங்கும் அரசு!- ராமதாஸ்

சென்னை: தங்களின் ஆட்சியில்தான் மாணவர் தேர்ச்சி விகிதம் அதிகரித்தது என்று காட்டிக் கொள்வதற்காக இரு கட்சிகளின் அரசுகளும் மதிப்பெண் வழங்குவதில் தாராளம் காட்டுவதன் விளைவாக 90% மதிப்பெண் பெற்றவர்கள் கூட மருத்துவம், பொறியியல் படிப்பில் சாதிக்க முடியாமல் திணறுவதாக ராமதாஸ் குற்றஞ்சாட்டியுள்ளார்.

இதுதொடர்பாக இன்று அவர் வெளியிட்ட அறிக்கையில், "இந்தியாவில் பத்தாம் வகுப்பு பயிலும் மாணவர்களின் கற்கும் திறன், மாநில வாரியான கல்வித்தரம் ஆகியவற்றை அறிய தேசிய கல்வி ஆராய்ச்சி மற்றும் பயிற்சிக் குழு அண்மையில் நடத்திய தேசிய சாதனை கணக்கெடுப்பின் முடிவுகள் வெளியிடப்பட்டுள்ளன. தமிழக மாணவர்களின் கற்றல் திறன், தமிழ்நாடு மாநிலப் பாடத்திட்டத்தின் தரம் ஆகியவை பெரும் அதிர்ச்சியும், கவலையும் அளிக்கின்றன. தேசிய கல்வி ஆராய்ச்சி மற்றும் பயிற்சிக் குழுவின் தேசிய சாதனை கணக்கெடுப்புக்கான தேர்வு 7216 பள்ளிகளைச் சேர்ந்த 2,77,416 மாணவர்களிடம் கடந்த ஆண்டு நடத்தப்பட்டது.

தமிழகத்தில் 353 பள்ளிகளைச் சேர்ந்த 15,121 மாணவ, மாணவிகள் இத்தேர்வில் கலந்து கொண்டனர். அனைத்து மாணவர்களுக்கும் மாநில மொழிப்பாடம், ஆங்கிலம், கணிதம், அறிவியல், சமூக அறிவியல் ஆகிய பாடங்களில் தேர்வுகள் நடத்தப்பட்டன. இத்தேர்வுகளில் மாணவ, மாணவிகள் பெற்ற மதிப்பெண்களின் அடிப்படையில், எல்லாப் பாடங்களிலும் கடைசி 5 இடங்களைத்தான் தமிழகத்தால் பிடிக்க முடிந்துள்ளது.

மாநில மொழிப் பாடத் தேர்வில் 21 மாநிலங்கள் பங்கேற்ற நிலையில், தமிழகத்திற்கு 18 வது இடம்
கிடைத்துள்ளது. மற்ற பாடங்களில் 24 மாநிலங்கள் கலந்து கொண்ட நிலையில் கணிதத் தேர்வில்
கடைசி 24 வது இடத்தையும், ஆங்கிலம், சமூக அறிவியல் ஆகிய பாடங்களில் கடைசிக்கும்
முந்தைய இடமான 23 வது இடத்தையும் தமிழகம் பிடித்துள்ளது. அறிவியலில் மட்டும்தான் ஓரளவு
முன்னேறி 20 வது இடத்தை எட்டிப் பிடிக்க முடிந்திருக்கிறது. இது மிக மிக மோசமான நிலையாகும்.

அண்டை மாநிலங்களான கேரளமும், கர்நாடகமும் அனைத்துப் பாடங்களிலும் தேசிய சராசரியை
விட அதிக மதிப்பெண்களை பெற்றுள்ளன. கணிதம், சமூக அறிவியல் ஆகிய பாடங்களில் தேசிய
சராசரியை விட அதிகமாகவும், ஆங்கிலம், அறிவியலில் சராசரி அளவுக்கும் தெலுங்கானா மதிப்பெண்
பெற்றுள்ளது. ஆந்திர மாநிலம் கூட கணிதம், சமூக அறிவியல் ஆகிய பாடங்களில் தேசிய சராசரி
மதிப்பெண்களை பெற்றுள்ளது. தமிழகம் மட்டும்தான் அனைத்துப் பாடங்களிலும் தேசிய சராசரியை
விட குறைவான மதிப்பெண்களை பெற்றிருக்கிறது. தமிழ்நாடு மாநிலப் பாடத்திட்டத்தை பின்பற்றும்
புதுச்சேரி மாநிலம் அனைத்து பாடங்களிலும் தமிழகத்தை விட குறைந்த மதிப்பெண் பெற்று, யூனியன்
பிரதேசங்களுக்கான தரவரிசைப் பட்டியலிலும், மொத்தப் பட்டியலிலும் கடைசி இடத்தைப் பெற்றுள்ளது.

மாணவர்களின் கற்றல் திறனும், மாநில பாடத்திட்டத்தின் கல்வித் தரமும் இந்த நிலையில் இருந்தால்,
தேர்வுகளில் விடைத்தாள் திருத்தப்படும் விதமும், தமிழகத்தில் மிக மோசமான நிலையில் இருப்பது
இந்த ஆய்வில் தெரியவந்துள்ளது. உதாரணமாக தேசிய சாதனை கணக்கெடுப்புக்கானத் தேர்வில்
பெற்ற மதிப்பெண்களின் அடிப்படையில் பார்த்தால், தமிழகப் பாடத்திட்டத்தை பின்பற்றும் பள்ளிகளில்
பயிலும் மாணவர்களில் 75 விழுக்காட்டினர் ஆங்கிலத்திலும், 69 விழுக்காட்டினர் கணிதப் பாடத்திலும்,
67 விழுக்காட்டினர் அறிவியலிலும், 60 விழுக்காட்டினர் சமூக அறிவியலிலும் தேர்ச்சி பெற்றிருக்க
முடியாது. ஆனால், 93.6% மாணவர்கள் தேர்ச்சி பெற்றுள்ளனர். அதேபோல், தேசிய சாதனை தேர்வில்
ஆங்கிலத்தில் இருவரும் (0.013%), கணிதத்தில் நால்வரும் (0.026%), அறிவியல், சமூக அறிவியல்
பாடங்களில் தலா 14 பேரும் (0.093%) மட் ́மே 50 விழுக்காட்டுக்கும் அதிகமான மதிப்பெண்களை
பெற்றுள்ளனர். ஆனால், கடந்த ஆண்டு பத்தாம் வகுப்புத் தேர்வில் அனைத்துப் பாடங்களிலும் 60
விழுக்காட்டுக்கும் அதிக மதிப்பெண் பெற்ற மாணவர்களின் எண்ணிக்கை 7,33,637 (68%) ஆகும்.

தமிழ்நாட்டில் விடைத்தாள்கள் திருத்தப்படும் போது மாணவர்களுக்கு மதிப்பெண்கள் தாராளமாக
வாரி வழங்கப்படுவதையே இது காட்டுகிறது. தங்களின் ஆட்சியில் தான் மாணவர் தேர்ச்சி விகிதம்
அதிகரித்தது என்று காட்டிக் கொள்வதற்காக இரு கட்சிகளின் அரசுகளும் மதிப்பெண் வழங்குவதில்
தாராளம் காட்டுகின்றன. அதன்விளைவுதான் 10 மற்றும் 12 ஆம் வகுப்புத் தேர்வுகளில் 90%
மதிப்பெண் பெற்றவர்கள் கூட மருத்துவம் & பொறியியல் படிப்பில் சாதிக்க முடியாமல் திணறுகின்றனர்.

தமிழகத்தில் கற்பித்தல் முறை, பாடத்திட்டம் ஆகியவற்றை அடியோடு மாற்ற வேண்டிய அவசியம்
ஏற்பட்டிருப்பதையே தேசிய சாதனைத் தேர்வு முடிவுகள் காட்டுகின்றன. தனியார் பள்ளிகளை விட
அரசுப்பள்ளி மாணவர்களின் கல்வித் தரம் குறைவாக இருப்பதும் இந்த ஆய்வில் தெரியவந்திருக்கிறது.

அரசு பள்ளிகளில் போதிய எண்ணிகையில் ஆசிரியர்கள் இல்லாமல், ஒவ்வொரு பாடத்திற்கு சிறப்பு
ஆசிரியர்களை நியமிக்காமல் அறிவியல், கணித ஆசிரியர்களையே மொழிப்பாடங்களையும் நடத்த
வைப்பது, பல பள்ளிகளில் வகுப்பறைகளே இல்லாமல் ஒரே அறையில் ஒன்றுக்கும் மேற்பட்ட வகுப்பு
மாணவர்களுக்கு பாடம் நடத்துவது ஆகியவை தான் கல்வித்திறன் குறைவதற்கு காரணம் ஆகும்.
இந்த நிலை இனியும் தொடர தமிழக அரசு அனுமதிக்கக்கூடாது. தேசிய சாதனைக் கணக்கெடுப்பில் தெரியவந்துள்ள முடிவுகளை படிப்பினையாகக் கொண்டு, மாநிலப் பாடத்திட்டத்தை மாற்றியமைத்தல், கல்வித் தரத்தை உயர்த்துதல் ஆகியவை குறித்து பரிந்துரை அளிக்க கல்வியாளர்கள் குழுவை அமைக்க வேண்டும். அக்குழுவின் பரிந்துரைகளை எந்தவித சமரசம் செய்து கொள்ளாமல் நடைமுறைப்படுத்தி கல்வித்தரத்தை உயர்த்த அரசு முன்வர வேண்டும்," இவ்வாறு ராமதாஸ் தெரிவித்துள்ளார்.
 

எடிட்டர் சாய்ஸ்

MUST READ