Vikatan.com

www.vikatan.com would like to send you push notifications.

Notifications can be turned off anytime from browser settings.

பேரவையில் மக்கள் பிரச்னையை பேசினால் வெளியேற்றுகிறார்கள்! - துரைமுருகன் வேதனை

விழுப்புரம்: தமிழக சட்டப்பேரவையில் மக்கள் பிரச்னையை பேசினால் வெளியேற்றுகிறார்கள் என்று துரைமுருகன் வேதனை தெரிவித்து உள்ளார்.

தமிழக சட்டமன்றத்தில் இருந்து எதிர்க்கட்சித் தலைவரான மு.க.ஸ்டாலின் உள்ளிட்ட 79 தி.மு.க. உறுப்பினர்களை சட்டமன்றத் தலைவர் தனபால் சஸ்பெண்ட் செய்துள்ளார். இதை தொடர்ந்து, விழுப்புரம் மத்திய மாவட்ட தி.மு.க. சார்பில் ‘தமிழக சட்டமன்றத்தில் ஜனநாயகம் படும்பாடு’ என்ற தலைப்பில் கண்டன பொதுக்கூட்டம் விழுப்புரம் பெரியார் சிலை அருகில் நடைபெற்றது.

இதில், தி.மு.க. தலைமை கழக முதன்மை செயலாளரும், சட்டமன்ற எதிர்கட்சி துணைத் தலைவருமான துரைமுருகன் கலந்து கொண்டு பேசும்போது, ''தமிழகத்திலேயே அதிகமாக கரும்பு விளையும் மாவட்டம் விழுப்புரம் மாவட்டமாகும்.

இங்கு 28.3 சதவீதம் கரும்பு விளைகிறது. ஆனால் கடந்த முறை பயிர் செய்த கரும்புக்கே உரிய பணம் கொடுக்காமல் பாக்கி வைத்துள்ளனர். இதுபற்றித்தான் சட்டசபையில் பொன்முடி கேட்டார். அதற்கு சபாநாயகர் கரும்பு பற்றி நீங்கள் பேசக்கூடாது என்று சொல்கிறார்.

எதிர்கட்சி என்கிறவன் கேள்வி என்ற வாளை ஏந்தி வருவான். அதை ஆளும் கட்சியினர் கேடயம் என்கிற பதிலால் தாங்க வேண்டும். ஆனால் சட்டசபையில் அப்படி நடப்பதில்லை. நாங்கள் தவறு செய்து வெளியேறவில்லை. மக்கள் பிரச்னைக்காக, அவர்களின் கோரிக்கைகளை நியாயமாகதான் சட்டசபையில் கேட்கிறோம். ஆனால், எங்களை அவையில் இருந்து வெளியேற்றுகிறார்கள். இதற்கு சபாநாயகர் உடந்தையாக இருக்கிறார்.

தற்போதைய சபாநாயகருக்கு, சபாநாயகருக்கான அனுபவம் 1½ வருடம் தான். ஆனால், எனக்கு 44 வருடம் அனுபவமாகும். நான் 40 பட்ஜெட்டில், 34 போலீஸ் மானிய கோரிக்கையில் பேசி இருக்கிறேன். எதிர்கட்சி தலைவர் என்பவர் அமைச்சர் அந்தஸ்துக்கு உள்ளவர் ஆவார். ஆனால், இங்கு எதிர்கட்சி தலைவரை குண்டு கட்டாக தூக்கி சபையில் இருந்து வெளியேற்றுகிறார்கள். இதுதான் ஜனநாயகமா? நீங்களா ஜனநாயகத்தை காப்பாற்ற போகிறீர்கள்?.

சட்டசபையில் நான் தனியாக பேசினேன் என்கிறார் ஜெயலலிதா. மேலும், கருணாநிதி சட்டசபைக்கு வரமுடியுமா? என்று கேட்கிறார். தற்போது எங்கள் தலைவர் கருணாநிதிக்கு 94 வயதாகிறது. அப்படியே அவர் வந்து பேசினாலும், அவரை கண்ணியமாக நடத்தி வெளியே அனுப்ப மாட்டீர்கள். நாங்கள் யாரையும் புண்படுத்தவில்லை, கேலி செய்யவில்லை. மக்கள் பிரச்னைக்காக தான் போராடி வருகிறோம். ஜனநாயகத்துக்காக தான் பேசி வருகிறோம்.

நாம் எப்படி ஆண்டாலும் மக்கள் நம்மை ஆட்சிக்கு கொண்டு வருவார்கள் என்கிற முடிவுக்கு அ.தி.மு.க.வினர் வந்து விட்டனர். சட்டசபை என்பது மரியாதைக்குரிய பொருளாக காட்டப்பட வில்லை. எதிர்க்கட்சி என்று ஒன்று இருந்தால் தான் ஜனநாயகமாகும். அது இல்லாவிட்டால் சர்வாதிகாரமாகும். எதிர்கட்சியே இருக்க கூடாது என்று ஆளுங்கட்சியினர் கருதுகிறார்கள்" என்றார்.

 

எடிட்டர் சாய்ஸ்

MUST READ