Vikatan.com

www.vikatan.com would like to send you push notifications.

Notifications can be turned off anytime from browser settings.

மோனோ ரயிலுக்கு பதில் அதிவிரைவுப் பேருந்து! - அன்புமணியின் அட்வைஸ்

சென்னை: சென்னையில் மோனோ ரயில் திட்டத்திற்கு பதிலாக அதிவிரைவுப் பேருந்து திட்டத்தை செயல்படுத்த தமிழக அரசு முன்வர வேண்டும் என்று அன்புமணி ராமதாஸ் கூறி உள்ளார்.

இது குறித்து பா.ம.க. இளைஞரணித் தலைவர் அன்புமணி ராமதாஸ் இன்று வெளியிட்டுள்ள அறிக்கையில், ''சென்னையில், பூந்தமல்லி-கத்திப்பாரா சந்திப்பு இணைப்புடன் போரூர் முதல் வடபழனி வரை 20.68 கி.மீ தொலைவுக்கு ரூ.3,267 கோடியிலும், வேளச்சேரி முதல் வண்டலூர் வரை 20.80 கி.மீ தொலைவுக்கு ரூ.3,135 கோடியிலும் மோனோ ரயில் திட்டம் செயல்படுத்தப்படும் என்று தமிழக அரசு அறிவித்திருக்கிறது.

இந்தத் திட்டம் முழு அளவில் செயல்பாட்டுக்கு வந்தால், மோனோ ரயில்களில் தினமும் 64,000 பேர் மட்டுமே பயணம் செய்ய முடியும். இது சென்னையின் போக்குவரத்து நெரிசலை எந்த வகையிலும் குறைக்காது. அதுமட்டுமின்றி, போரூர்-வடபழனி சாலை தான் சென்னையில் மிகவும் குறுகலான நெடுஞ்சாலை ஆகும். அந்த சாலையின் மத்தியில் மோனோ ரயில் திட்டத்திற்காக தூண்கள் அமைக்கப்பட்டால், பேருந்து போக்குவரத்து மிகவும் கடுமையாக பாதிக்கப்படும். மோனோ ரயிலால் ஏற்படும் சாதகங்களைவிட, அதனால் பேருந்து போக்குவரத்துக்கு ஏற்படும் பாதகம் அதிகம்.

இதற்கெல்லாம் மேலாக மோனோ ரயில் திட்டம் உலகம் முழுவதும் தோல்வியடைந்த திட்டமாகும். இத்திட்டத்தை செயல்படுத்த கடந்த 2011-ம் ஆண்டில் ஒப்பந்தப்புள்ளிகள் கோரப்பட்டன. ஆனால், ஒப்பந்தம் கோர சிலர் மட்டுமே முன்வந்ததால் அரசே அந்த நடைமுறையை ரத்து செய்தது. 2013-ம் ஆண்டில் இரண்டாவது முறையாக ஒப்பந்தப்புள்ளிகள் கோரப்பட்ட நிலையில், ஒப்பந்தம் எடுக்க எவருமே முன்வரவில்லை. 2015-ம் ஆண்டு பிப்ரவரி மாதத்தில் சட்டப்பேரவையில் பேசிய அப்போதைய போக்குவரத்துத்துறை அமைச்சர் செந்தில் பாலாஜி இன்னும் சில நாட்களில் மோனோ ரயில் திட்டத்திற்கு ஒப்பந்தம் இறுதி செய்யப்படும் என்றார். ஆனால், ஒப்பந்தம் கோரப்படவில்லை.

43 கி.மீ. நீள மோனோ ரயில் திட்டத்திற்காக செலவிடப்படவிருக்கும் ரூ.6,402 கோடியில் நான்கில் ஒருபங்கு தொகையில், அதாவது ரூ.1,500 கோடியில் சென்னையில் 96.70 கி.மீ தொலைவுக்கு அதிவிரைவுப் பேருந்துத் திட்டத்தை (பி.ஆர்.டி.எஸ்.) செயல்படுத்தி போக்குவரத்து நெரிசலை தீர்க்க முடியும். இதற்கான சாத்தியக் கூறு ஆய்வுகள் கடந்த 2013-ம் ஆண்டில் போக்குவரத்து மற்றும் மேம்பாட்டு கொள்கை நிறுவனம் என்ற அமைப்பின் மூலம் மேற்கொள்ளப்பட்டு விட்டன.

அதன்படி சென்னையில் கோயம்பேடு-பூந்தமல்லி (14 கி.மீ), கோயம்பேடு-அம்பத்தூர் (7 கி.மீ), கோயம்பேடு-மாதவரம் (12.40 கி.மீ), சைதாப்பேட்டை-சிறுசேரி (24.80 கி.மீ), சைதாப்பேட்டை-தாம்பரம் (18.20 கி.மீ), துரைப்பாக்கம்-குரோம்பேட்டை (10.60 கி.மீ), கோயம்பேடு-சைதாப்பேட்டை (9 கி.மீ) என 7 பாதைகளில் முதல்கட்டமாக அதிவிரைவுப் பேருந்து திட்டத்தை செயல்படுத்த முடியும். மோனோ ரயில் மூலம் ஒரு நாளைக்கு 60,000 பேர் மட்டுமே பயணிக்க முடியும். ஆனால், அதிவிரைவுப் பேருந்து திட்டத்தில் ஒரு மணி நேரத்திற்கு 1.68 லட்சம் பேர் வீதம் ஒரு நாளைக்கு சராசரியாக 25 லட்சம் பேர் எளிதாக பயணம் செய்ய முடியும்.

இந்த திட்டத்தை 18 மாதங்களில் செயல்படுத்த முடியும் என்பதுடன், மூன்றரை ஆண்டுகளில் இத்திட்டத்திற்காக செய்யப்பட்ட முதலீட்டை திரும்பப் பெற முடியும். எனவே, மோனோ ரயில் பாதை அமைக்கும் திட்டத்தைக் கைவிட்டு, குறைந்த செலவில் அதிக பயனும், வேலைவாய்ப்பும் அளிக்கக் கூடிய அதிவிரைவுப் பேருந்துத் திட்டத்தை (பி.ஆர்.டி.எஸ்.) செயல்படுத்த அரசு முன்வர வேண்டும்" என்று கூறி உள்ளார்.

 

எடிட்டர் சாய்ஸ்

ஜெர்சி மாடுகள், பிரேசில் காபி, மருத்துவமனை உறுதி! ஜெயலலிதா பற்றி தோழியின் நினைவலைகள்
placeholder

அதே மாதிரி ஜெயலலிதா தன்னுடைய 10 வயதில் சிவாஜி கணேசன் முன்னிலையில் மயிலாப்பூரில் செய்த நடன அரங்கேற்றப் படங்கள் முதல் அதற்குப் பிறகான அவரது சின்ன வயசுப் படங்களை நாங்கள் தொகுத்திருந்தோம். அதை 2012 ம் ஆண்டு, எனக்கு அவரை சந்திக்கும் வாய்ப்புக் கிடைத்த போது கொடுத்தேன். அதைப் பார்த்து ரொம்ப சந்தோஷமாகிட்டாங்க. அந்தப் படத் தொகுப்பை, தன்னோட ஹேண்ட் பேக்ல வச்சுக்கிட்டாங்க. பத்திரமா வைத்துக் கொள்வதாகவும் சொன்னாங்க. சினிமாக்காரங்க என்றால் ஈஸியாக அணுகலாம் என்கிற திரையை உடைத்து, அவங்க தனி ரூட்டைப் போட்டு, அதை மத்தவங்க ஃபாலோ பண்ற அளவுக்கு வாழ்ந்து காட்டினாங்க. குறிப்பா, சினிமா விழாக்கள், நிகழ்ச்சிகளுக்கு போக மாட்டாங்க. 

அம்மாவிடமிருந்து போன் வந்தால்...!? - உருகும் வீணை காயத்ரி
placeholder

''சமீபத்தில் கொலை மிரட்டல் விட்டப் பையனால் அம்மாவை சந்திக்க வேண்டிய சூழ்நிலை ஏற்பட்டது. கடந்த ஜூலை 27-ம் தேதி சி.எம் ஆபீஸ்ல இருந்து போன் வந்தது. அம்மா உங்களை உடனே வரச்சொன்னதா சொன்னாங்க. நான் கொஞ்சமும் யோசிக்காமல் போய் நின்னேன். பொதுவாகவே நானும், அவங்களும்தான் தனியாகத்தான் பேசிப்போம். ஆனா, அன்றைக்கு, எல்லா அதிகாரிகளும், இருந்தாங்க. அவங்க முன்னாடி, 'எப்படி இருக்கீங்க' என கேட்டார். நான் பதில் சொல்லிவிட்டு, 'நவம்பர் மாதத்தோடு என்னோட டர்ன் முடியுது' என சொன்னேன். இதற்கு அவர், எல்லோருடைய முன்னிலையிலும், அடுத்த மூன்று வருஷத்துக்கும் நீங்களே துணை வேந்தரா இருங்க என சொல்லிவிட்டு, அவருக்கு பின்னால் இருக்கும் எல்லோரையும் பார்த்து மறுபடியும்  இதையே சொன்னார். அப்போதுதான் அவர்கிட்ட, 'நான் உங்களை சந்திக்க இரண்டு வருஷமாக முயற்சி செய்துட்டு இருந்தேன். இந்த கொலை மிரட்டல் காரணமாகத்தான் உங்களை சந்திக்கிற வாய்ப்பு கிடைச்சிருக்கு, நான் தனி மனுஷியாக இசை பல்கலைக்கழகத்தை நடத்தி வருகிறேன்' என சொன்னேன். உடனே, சம்பந்தப்பட்டவர்களை அழைத்து, அவங்களுக்குத் தேவையான எல்லா உதவிகளையும் செய்து கொடுங்க என சொன்னார்.  'அடுத்த முறைப் பார்க்கும்போது உங்க முகத்துல சிரிப்பை மட்டும் தான் பார்க்கணும்' என ஆறுதல் சொன்னாங்க. அந்த வார்த்தை இன்னும் என் காதில் கேட்டுட்டே இருக்கு. அதுதான் நான் அவங்களை கடைசியாகப் பார்த்தது.  அதற்குப் பிறகு அவரை பார்க்க முடியவில்லை. அவர் சொன்னது போல அதற்கான வேலைகள் நடந்து கொண்டிருக்கும்போதே அம்மா மருத்துவமனையில் அனுமதிக்கப்பட்டுட்டாங்க. நான் இப்போ அடுத்த ஆர்டருக்காக காத்திட்டு இருக்கேன். இன்னும் ஆர்டர் என் கைக்கு வரவில்லை''

MUST READ