Vikatan.com

www.vikatan.com would like to send you push notifications.

Notifications can be turned off anytime from browser settings.

கோட்டையில் தீக்குளிக்க வந்த பெண் இன்ஸ்பெக்டர்! அதிகாரிகளின் அழுத்தம் காரணமா?

தமிழக சட்டப்பேரவை கூட்டம் நடந்து கொண்டிருக்கும்போது தலைமைச் செயலகத்தில் பெண் இன்ஸ்பெக்டர் ஒருவர் தீக்குளித்து தற்கொலையில் ஈடுபட்டுள்ள சம்பவம் கோட்டையில் பரபரப்பை ஏற்படுத்தியுள்ளது. உயரதிகாரிகளின் அழுத்தம் காரணமாக அவர் தற்கொலை முயற்சியில் ஈடுபட முயன்றதாக காவல்துறை வட்டாரங்கள் கூறுகின்றன.

திருவொற்றியூர் மகளிர் காவல் நிலையத்தில் இன்ஸ்பெக்டராக பணியாற்றி வருபவர் காஞ்னா. இவர் 1999ம் ஆண்டு பேட்ஜ். தடகள வீராங்கனையாக இருந்ததோடு, பல பதக்கங்களை பெற்றிருக்கிறார். சென்னை எம்.கே.பி. நகர் உள்பட வடசென்னையில் பல இடங்களில்  சப்-இன்ஸ்பெக்டராக பணியாற்றிய காஞ்சனா, பதவி உயர்வு பெற்று தற்போது திருவொற்றியூர் காவல் நிலையத்தில் இன்ஸ்பெக்டராக பணியாற்றி வருகிறார். இவருக்கு இன்று தலைமைச் செயலகத்தில் பணி வழங்கப்பட்டு இருந்தது. தலைமைச் செயலக 4வது நுழைவு வாயிலில் பாதுகாப்பு பணியில் காஞ்சனா ஈடுபட்டிருந்தார்.

இந்த நிலையில், சட்டப்பேரவையில் சிறுவாணியில் தடுப்பணை கட்டு விவகாரம் தொடர்பாக தீர்மானம் நிறைவேற்றப்பட்ட நேரத்தில் மண்எண்ணெய் ஊற்றியவாறு, "எனக்கு இந்த வேலை பிடிக்கவில்லை. என்னை விட்டு விடுங்கள்" என்று கூறியபடியே காஞ்சனா வந்தார். அப்போது உடலிருந்து இருந்து மண்எண்ணெய் வாசனை வீசியது. இதை பார்த்த சக போலீஸார்  சுதாரித்துக் கொண்டு தற்கொலை முயற்சியை தடுத்தனர். இந்த சம்பவம் கோட்டையில் பெரும் பரபரப்பை ஏற்படுத்தியது.

இதுகுறித்து போலீஸ் வட்டாரங்கள் கூறுகையில், "இன்ஸ்பெக்டர் காஞ்சனாவுக்கு கடந்த சில மாதங்களாக உயரதிகாரிகளின் அழுத்தம் இருந்து வந்தது. இதனால் அவர் மனஉளைச்சலில் இருந்தார். இன்று கூட பாதுகாப்பு பணிக்கு வந்த அவர் யாரிடமும் பேசாமல் அமைதியாகவே இருந்தார். இந்த சமயத்தில் யாரும் எதிர்பார்க்காத நேரத்தில் மண்எண்ணெய் ஊற்றி தீக்குளிக்க முயன்றார். அவர் மீது தற்கொலைக்கு முயன்றதாக வழக்குப்பதிவு செய்யப்படும். தொடர்ந்து விசாரணை நடந்து வருகிறது" என்றனர். 

எஸ்.மகேஷ்

எடிட்டர் சாய்ஸ்

MUST READ