Vikatan.com

www.vikatan.com would like to send you push notifications.

Notifications can be turned off anytime from browser settings.

வாரிசு சான்றிதழால் தடைபட்ட தங்கை திருமணம்...! அண்ணனின் அதிர்ச்சி முடிவு

தூத்துக்குடி : வாரிசு சான்றிதழ் தராமல் இழுத்தடித்ததால் தனது தங்கையின் திருமணம் நின்று விட்டதாக கூறி கோட்டாட்சியர் அலுவலகம் முன்பு வாலிபர் தீக்குளிக்க முயன்ற சம்பவம் பரபரப்பை ஏற்படுத்தியுள்ளது.

தூத்துக்குடி மாவட்டம் எட்டையபுரம் தாலுகா பிதாபுரத்தைச் சேர்ந்தவர் மாரிமுத்து. இவரது தந்தை கருப்பசாமி கடந்த இரு மாதங்களுக்கு முன்னர் இறந்தார். மாரிமுத்துவின் தங்கையின் திருமணத்துக்காக வாங்கிய நகைகள், தந்தை கருப்பசாமியின் பெயரில் அடகு வைத்திருந்ததாக தெரிகிறது. இந்நிலையில் நகையை மீட்க வாரிசு சான்றிதழ் அவசியம் என்பதால் எட்டையபுரம் தாசில்தார் அலுவலகத்தில் வாரிசு சான்றிதழ் கோரி மனுத்தாக்கல் செய்தார். ஆனால் சான்றிதழ் வழங்காமல் அலைக்கழித்ததாக தெரிகிறது. இந்நிலையில் இன்று கோவில்பட்டி கோட்டாட்சியர் அலுவலகம் முன்பு மாரிமுத்து தீக்குளிக்க முயன்றார். இதனால் அங்கு பரபரப்பு ஏற்பட்டது.

இது தொடர்பாக தீக்குளிக்க முயன்ற மாரிமுத்துவிடம் பேசினோம், ‘’எட்டையபுரம் பக்கத்துல இருக்குற பிதாபுரம்தான் என் ஊரு. போன வருஷம் ஜூலை மாதம் 13ம் தேதி என்னோட அப்பா கருப்பசாமி உடல்நலம் சரியில்லாம இறந்துட்டாங்க. குடும்பக் கஷ்டத்துல எட்டையபுரத்துல உள்ள ஒரு வங்கியில என் தங்கச்சியோட நகை 20 பவுனை அப்பா பேருலயே அடகு வச்சிருந்தாங்க. அப்பா இறந்த கொஞ்ச நாளிலேயே அந்த நகையை மீட்க அடகு வச்ச நகைக்கான பணம், அப்பாவோட இறப்புச்சான்றிதழோட வங்கிக்கு போனேன். ’’இறப்புச்சான்றிதழோட வாரிசு சான்றிதழும் வேணும்’’னு  வங்கியில சொல்லிட்டாங்க. உடனே எட்டையபுரம் தாலுகா அலுவலகத்துல வாரிசு சான்றிதழ் கேட்டு மனு கொடுத்தேன்.

ஆனா, 'உன் அப்பாவோட இறப்புச்சான்றிதழ் மட்டும் போதுமா? கருப்பசாமிக்கு நீதான் மகன்னு எப்படி நம்ப முடியும்'னு தாசில்தார் பரமேஸ்வரி கேட்டாங்க. கருப்பசாமி மகன்தான் மாரிமுத்துன்னு ஊருல உள்ள 10 பேர் கிட்ட கையெழுத்தும், நோட்டரி பப்ளிக் வக்கீல் கிட்ட சான்றிதழும் வாங்கி கொடுத்தேன். ’’இதையெல்லாம் ஏத்துக்க முடியாது, உங்க தாத்தா பாட்டியோட இறப்பு சான்றிதழ், உங்க அப்பாவோட வாரிசுச்சான்றிதழ் வேணும்’’னு கேட்குறாங்க. நான் பிறக்குறதுக்கு முன்னாலயே தாத்தா, பாட்டி இறந்துட்டாங்க. எங்க அப்பா இறக்கும் போது வயசு 65. அப்படி இருக்கும் போது இப்போ தாத்தா, பாட்டி உயிரோட இருந்தா 100 வயசுக்கு மேல இருக்கும். 40 வருசத்துக்கு முன்னால இறந்த தாத்தா, பாட்டியோட இறப்புச்சான்றிதழ் கேட்டா நான் எங்க போவேன்?. மாவட்ட ஆட்சியரிடம் மக்கள் குறை தீர்க்கும் கூட்டத்துலயும் மனு கொடுத்தேன். ஆட்சியர் வாரிசு சான்றிதழ் கொடுக்கச் சொல்லி தாசில்தாருக்கு உத்தரவு போட்டாங்க.

ஆனா, ‘’யாரு உத்தரவு போட்டாலும், தாத்தா, பாட்டி இறப்புச்சான்றிதழ், உன் அப்பாவோட வாரிசுச்சான்றிதழ் இல்லாம உனக்கு நான் வாரிசுச்சான்றிதழ் கொடுக்க மாட்டேன். நீ முதல்வருக்கே மனு கொடுத்தாலும் இதுதான். என்னை டிரான்ஸ்பர் பண்ணுனா பண்ணிக்கட்டும்.’’னு கறாரா சொல்றாங்க.
மாவட்ட ஆட்சியர் உத்தரவு போட்டும் இந்த அம்மா இப்படி பண்றாங்க. அடகு வச்ச நகையை மீட்டா என் தங்கச்சி கல்யாணத்தை நடத்தி முடிச்சிடுவேன். இந்த வாரிசு சான்றிதழ் தராம இழுத்து அடிச்சதுனால இரண்டு தடவை தங்கச்சியோட கல்யாணம் நிச்சயம் வரை வந்து நின்னு போச்சு. மன விரக்தியிலதான் உடம்புல மண்ணென்ணெய ஊத்திட்டேன். ஒரு வாரத்துல வாரிசு சான்றிதழ் கிடைக்க நடவடிக்கை எடுக்குறேன்னு கோவில்பட்டி கோட்டாச்சியர் கண்ணபிரான் உறுதியளிச்சிருக்காங்க. எனக்கு மட்டும் இல்ல வாரிசு சான்றிதழ் பிரச்சினையால 200 மனு வரைக்கும் நிலுவையிலயே இருக்குது ‘’ என்றார்.

- இ.கார்த்திகேயன்  

 

எடிட்டர் சாய்ஸ்

ஜெர்சி மாடுகள், பிரேசில் காபி, மருத்துவமனை உறுதி! ஜெயலலிதா பற்றி தோழியின் நினைவலைகள்
placeholder

அதே மாதிரி ஜெயலலிதா தன்னுடைய 10 வயதில் சிவாஜி கணேசன் முன்னிலையில் மயிலாப்பூரில் செய்த நடன அரங்கேற்றப் படங்கள் முதல் அதற்குப் பிறகான அவரது சின்ன வயசுப் படங்களை நாங்கள் தொகுத்திருந்தோம். அதை 2012 ம் ஆண்டு, எனக்கு அவரை சந்திக்கும் வாய்ப்புக் கிடைத்த போது கொடுத்தேன். அதைப் பார்த்து ரொம்ப சந்தோஷமாகிட்டாங்க. அந்தப் படத் தொகுப்பை, தன்னோட ஹேண்ட் பேக்ல வச்சுக்கிட்டாங்க. பத்திரமா வைத்துக் கொள்வதாகவும் சொன்னாங்க. சினிமாக்காரங்க என்றால் ஈஸியாக அணுகலாம் என்கிற திரையை உடைத்து, அவங்க தனி ரூட்டைப் போட்டு, அதை மத்தவங்க ஃபாலோ பண்ற அளவுக்கு வாழ்ந்து காட்டினாங்க. குறிப்பா, சினிமா விழாக்கள், நிகழ்ச்சிகளுக்கு போக மாட்டாங்க. 

அம்மாவிடமிருந்து போன் வந்தால்...!? - உருகும் வீணை காயத்ரி
placeholder

''சமீபத்தில் கொலை மிரட்டல் விட்டப் பையனால் அம்மாவை சந்திக்க வேண்டிய சூழ்நிலை ஏற்பட்டது. கடந்த ஜூலை 27-ம் தேதி சி.எம் ஆபீஸ்ல இருந்து போன் வந்தது. அம்மா உங்களை உடனே வரச்சொன்னதா சொன்னாங்க. நான் கொஞ்சமும் யோசிக்காமல் போய் நின்னேன். பொதுவாகவே நானும், அவங்களும்தான் தனியாகத்தான் பேசிப்போம். ஆனா, அன்றைக்கு, எல்லா அதிகாரிகளும், இருந்தாங்க. அவங்க முன்னாடி, 'எப்படி இருக்கீங்க' என கேட்டார். நான் பதில் சொல்லிவிட்டு, 'நவம்பர் மாதத்தோடு என்னோட டர்ன் முடியுது' என சொன்னேன். இதற்கு அவர், எல்லோருடைய முன்னிலையிலும், அடுத்த மூன்று வருஷத்துக்கும் நீங்களே துணை வேந்தரா இருங்க என சொல்லிவிட்டு, அவருக்கு பின்னால் இருக்கும் எல்லோரையும் பார்த்து மறுபடியும்  இதையே சொன்னார். அப்போதுதான் அவர்கிட்ட, 'நான் உங்களை சந்திக்க இரண்டு வருஷமாக முயற்சி செய்துட்டு இருந்தேன். இந்த கொலை மிரட்டல் காரணமாகத்தான் உங்களை சந்திக்கிற வாய்ப்பு கிடைச்சிருக்கு, நான் தனி மனுஷியாக இசை பல்கலைக்கழகத்தை நடத்தி வருகிறேன்' என சொன்னேன். உடனே, சம்பந்தப்பட்டவர்களை அழைத்து, அவங்களுக்குத் தேவையான எல்லா உதவிகளையும் செய்து கொடுங்க என சொன்னார்.  'அடுத்த முறைப் பார்க்கும்போது உங்க முகத்துல சிரிப்பை மட்டும் தான் பார்க்கணும்' என ஆறுதல் சொன்னாங்க. அந்த வார்த்தை இன்னும் என் காதில் கேட்டுட்டே இருக்கு. அதுதான் நான் அவங்களை கடைசியாகப் பார்த்தது.  அதற்குப் பிறகு அவரை பார்க்க முடியவில்லை. அவர் சொன்னது போல அதற்கான வேலைகள் நடந்து கொண்டிருக்கும்போதே அம்மா மருத்துவமனையில் அனுமதிக்கப்பட்டுட்டாங்க. நான் இப்போ அடுத்த ஆர்டருக்காக காத்திட்டு இருக்கேன். இன்னும் ஆர்டர் என் கைக்கு வரவில்லை''

MUST READ