Vikatan.com

www.vikatan.com would like to send you push notifications.

Notifications can be turned off anytime from browser settings.

அரசு பேருந்து இயக்கம்... ஆட்டோ, லாரிகள் ஓடவில்லை! - பந்த் நிலவரம்!

சென்னை: தமிழகத்தில் இன்று நடைபெற்று வரும் முழு அடைப்பு போராட்டம் காரணமாக ஆட்டோ, தனியார் பேருந்துகள், லாரிகள் ஓடவில்லை, அரசு பேருந்துகள் வழக்கம்போல் இயக்கப்பட்டு வருகின்றது. இதனால் சாலைகள் வெறிச்சோடி காணப்படுகின்றன.

காவிரி பிரச்னையில் நிரந்தர தீர்வு காண மத்திய அரசை வலியுறுத்தியும், கர்நாடக மாநிலத்தில் தமிழர்களுக்கு எதிராக நடைபெறும் வன்முறை போராட்டங்களுக்கு கண்டனம் தெரிவித்தும் தமிழகம்-புதுச்சேரியில் இன்று முழு அடைப்பு போராட்டம் நடைபெறுகிறது. காலை 6 மணி முதல் மாலை 6 மணிவரை இந்த போராட்டம் நடைபெறுகிறது. இந்த முழு அடைப்பு போராட்டத்துக்கு தி.மு.க., ம.தி.மு.க., பா.ம.க., தே.மு.தி.க., இந்திய கம்யூனிஸ்டு, மார்க்சிஸ்டு கம்யூனிஸ்டு, விடுதலை சிறுத்தைகள் கட்சி உள்பட பல்வேறு அரசியல் கட்சிகளும், அமைப்புகளும் ஆதரவு அளித்துள்ளன.

மேலும், வியாபாரிகள் கடை அடைப்பு நடத்தப்படும் என்று அறிவித்துள்ளனர். தமிழகம் முழுவதும் 4½ லட்சம் லாரிகளும், 4½ லட்சம் மினிவேன்கள் மற்றும் சரக்கு வாகனங்கள் என 11½ லட்சம் வாகனங்களும் காலை 6 மணி முதல் மாலை 6 மணி வரை ஓடாது என்று தமிழ்நாடு லாரி உரிமையாளர்கள் சம்மேளனம் தெரிவித்துள்ளது. 50 ஆயிரத்துக்கும் மேற்பட்ட மணல் லாரிகள் ஓடாது என்று தமிழ்நாடு மணல் லாரி உரிமையாளர்கள் கூட்டமைப்பு அறிவித்துள்ளது. ஆம்னி பஸ்களும் பகலில் இயக்கப்படாது என்று அறிவித்து உள்ளனர். தமிழகம், புதுச்சேரியில் 4 ஆயிரத்து 800 பெட்ரோல்- டீசல் நிலையங்கள் மூடப்படும் என்று தமிழ்நாடு பெட்ரோலிய விற்பனையாளர்கள் சங்கம் தெரிவித்துள்ளது.

ஆட்டோ-டாக்சி ஓட்டுனர்கள் சங்கம் முழுஅடைப்பு போராட்டத்துக்கு ஆதரவு தெரிவித்துள்ளன. ஆட்டோக்கள் ஓடாது என்று சில சங்கத்தினர் அறிவித்து உள்ளனர். ஆட்டோக்கள், தனியார் வேன்கள் போராட்டத்தில் பங்கேற்பதால் தனியார் பள்ளிகள் செயல்படாது என்று தனியார் பள்ளிகள் சங்கம் அறிவித்து உள்ளது. ஆனால் அரசு பள்ளிகள், கல்லூரிகள், பொறியியல் கல்லூரிகள் வழக்கம் போல செயல்படும் என்று கல்வித்துறை அறிவித்து உள்ளது.

கடை அடைப்பு போராட்டத்தின்போது தமிழகத்தில் எந்தவித அசம்பாவித சம்பவங்களும் நடக்காமல், அமைதியான முறையில் நடைபெறுவதற்காக முன்னெச்சரிக்கை பாதுகாப்பு நடவடிக்கைகளை தமிழக டி.ஜி.பி. தலைமையிலான போலீசார் எடுத்து வருகின்றனர். தமிழகம் முழுவதும் சுமார் 1 லட்சம் போலீசார் பாதுகாப்பு பணியில் ஈடுபடுத்தப்பட்டு உள்ளனர். சென்னையில் மட்டும் சுமார் 20 ஆயிரம் போலீசார் மற்றும் அதிரடிப்படை போலீசார் பாதுகாப்பு பணியில் ஈடுபடுத்தப்பட்டு உள்ளனர்.

மேலும், தடையை மீறி ஆர்ப்பாட்டத்தில் ஈடுபடுபவர்களை கைது செய்வதற்கு தயாராக ஏராளமான போலீஸ் வேன்களும், மாநகர பேருந்துகளும் தயார்நிலையில் வைக்கப்பட்டுள்ளன. போராட்டத்தின் போர்வையில் கலவரத்தில் ஈடுபட்டால் கடுமையான சட்டப்பிரிவுகளின் கீழ் நடவடிக்கை எடுக்கப்படும் என்று போலீசார் எச்சரித்து உள்ளனர்.

அனைத்து முக்கிய ரயில் நிலையங்களிலும், குறிப்பாக சென்னை சென்டிரல், எழும்பூர், பெரம்பூர், தாம்பரம் போன்ற ரயில் நிலையங்களில் கூடுதல் போலீசார் பாதுகாப்பு பணியில் ஈடுபடுத்தப்பட்டு உள்ளனர். முன்னெச்சரிக்கை நடவடிக்கையாக துப்பாக்கி ஏந்திய போலீசாரும் பாதுகாப்பு பணியில் ஈடுபட்டு வருகின்றனர். பயணிகளுக்கோ, ரயில்வேக்கு சொந்தமான பொருட்களுக்கோ சேதம் விளைவித்தால் கடும் நடவடிக்கை எடுக்கப்படும் என்றும் போலீசார் எச்சரித்து உள்ளனர்.

இந்த முழு அடைப்பு போராட்டம் காரணமாக சென்னை உள்ளிட்ட தமிழகத்தின் பிர பகுதிகளில் இன்று காலை முதல் கடைகள், வணிக நிறுவனங்கள் அடைக்கப்பட்டு உள்ளன. ஆட்டோக்கள், தனியார் பேருந்து, லாரிகள் இயக்கப்படவில்லை. கடை அடைப்பு போராட்டத்துக்கு எதிராக உச்ச நீதிமன்ற உத்தரவு இருப்பதால் மத்திய, மாநில அரசு அலுவலகங்கள் வழக்கம் போல செயல்படுகின்றன. தொ.மு.ச., சி.ஐ.டி.யூ., உள்பட தொழிற்சங்கங்கள் போராட்டத்துக்கு ஆதரவு தெரிவித்துபோதும், அரசு பேருந்துகள் வழக்கம் போல் இயக்கப்படுகின்றன.

மின்சார ரயில்களும், எக்ஸ்பிரஸ் ரயில்களும் வழக்கம் போல் இயக்கப்படுகின்றன. அரசு பேருந்துகள் மட்டும் இயக்கப்பட்டுவதால் அனைத்து சாலைகளிலும் போக்குவரத்து குறைந்து வெறிச்சோடி காணப்படுகின்றனர். மாநிலத்தில் சட்டம்-ஒழுங்கை காப்பாற்ற போலீசாரின் ரோந்துப்பணி தீவிரப்படுத்தப்பட்டு உள்ளது. மேலும், சாலையில் செல்லும் அனைத்து வாகனங்கள், திறந்திருக்கும் கடைகள், தனியார் நிறுவனங்கள், ஓட்டல்கள், செயல்படும். மத்திய-மாநில அரசு அலுவலகங்கள் போலீஸ் பாதுகாப்பு வளையத்திற்குள் கொண்டுவரப்பட்டு உள்ளது.

புதுச்சேரி...

புதுச்சேரியில் முழுஅடைப்பு போராட்டம் காரணமாக தனியார் பேருந்துகள், ஆட்டோக்கள் ஓடவில்லை. அரியாங்குப்பத்தில், புதுச்சேரி-கடலூர் சாலையில் போராட்டக்காரர்கள் டயர்களை எரித்ததால் பரபரப்பு ஏற்பட்டது. தீயை அணைக்க முயன்ற காவலர் அய்யனார் என்பவருக்கு காயம் ஏற்பட்டது.

தூத்துக்குடி, ஈரோடு, திண்டுக்கல்...

தூத்துக்குடி மற்றும் ஈரோட்டில் கடைகள் அடைக்கப்பட்டு உள்ளன. ஆனால், அரசு மற்றும் தனியார் பேருந்துகள் இயக்கப்பட்டு வருகின்றனர். இதேபோல், திண்டுக்கல்லில் அரசு, தனியார் பேருந்துகள் வழக்கம் போல இயங்குகின்றன. பள்ளிகளும் திறந்திருக்கின்றன.

திருச்சி...

முழு கடையடைப்பையொட்டி திருச்சி தில்லைநகர், மெயின்கார்டுகேட் பகுதிகளில் டீக்கடைகள் உள்ளிட்ட 99% கடைகள் அடைக்கப்பட்டுள்ளன. சில பேருந்துகள் மட்டும் இயக்கப்படுகின்றன. தனியார் பள்ளிகளின் கூட்டமைப்பு மற்றும் தமிழக அரசின் பள்ளிக்கல்வித் துறையின் முரணான அறிவிப்பால் பள்ளி செல்லும் குழந்தைகளும் அவர்களின் பெற்றோர்களும் பெரும் குழப்பத்தில் உள்ளனர்.

காவிரி விவகாரம்; கர்நாடக அரசை கண்டித்து தமிழகம் முழுவதும் நடைபெற்ற போராட்டக் காட்சிகள்! (ஆல்பம்)

 

கடலூர்...

கடலூர் மாவட்டத்தில் தனியார் மற்றும் அரசு பள்ளிகள் திறக்கப்பட்டு உள்ளன. தனியார் பேருந்துகள் இயக்கப்பட்டவில்லை. பண்ருட்டியில் அரசு பேருந்துகள் இயங்குகின்றன. டீக்கடைகள் மற்றும் பெட்டிக்கடைகள் மட்டும் ஒருசில இடங்களில் திறந்துள்ளன. ஆட்டோக்கள், வாடகைக்கார்கள், லாரிகள் மற்றும் தனியார் பேருந்துகள் இயக்கப்படவில்லை.

வேலூர்...

வேலூர் மாவட்டத்தில், அனைத்து கடைகளும் அடைக்கப்பட்டுள்ளன. தனியார் பேருந்துகள், ஆட்டோக்கள், ஒருசில தனியார் பள்ளிகள் மற்றும் சில நிறுவனங்கள் இயங்குகின்றன.

 

 

திருப்பூர்...

திருப்பூரில் 100 சதவிகிதம் கடைகள் மற்றும் பின்னலாடை நிறுவனங்கள் அடைக்கப்பட்டுள்ளன. தனியார் பேருந்துகள் இயக்கப்படவில்லை, ஓரிரு அரசு பேருந்துகள் மட்டுமே இயக்கப்படுகிறது. அதுவும் அதிகம் பயணிகள் இல்லாமல் இயக்கப்படுகின்றன. உடுமலைப்பேட்டை, பல்லடம், தாராபுரம், காங்கேயம் போன்ற நகரங்களிலும் வியாபாரிகளே விரும்பி கடை அடைப்பு செய்து முழு அடைப்புக்கு ஆதரவு அளித்து வருகின்றனர்.

திருவண்ணாமலை...

பவுர்ணமி என்பதால் திருவண்ணாமலையில் பெரும அளவு ஆட்டோக்கள் ஓடிகொண்டு இருக்கின்றன, கடைகள் மட்டுமே முழுவதுமாக அடைக்கப்பட்டுள்ளது. ஓட்டல்கள் மூடப்பட்டுள்ளதால் பக்தர்கள் பெரும் அவதிக்குள்ளாகி உள்ளனர்..

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP

எடிட்டர் சாய்ஸ்

திருப்பதியிலிருந்து திருமலைக்கு நடந்து செல்பவர்களின் கவனத்துக்கு..! 

MUST READ