Vikatan.com

www.vikatan.com would like to send you push notifications.

Notifications can be turned off anytime from browser settings.

' தேவேகவுடாவும் மோடியும் ஒண்ணுதான்!'  -காவிரிக்காக கொந்தளிக்கும் தி.மு.க.

ச்ச நீதிமன்றத்தின் உத்தரவு அடிப்படையில் காவிரி மேலாண்மை வாரியம் அமைக்க முடியாது என மத்திய அரசு தெரிவித்துவிட்டது. ' காவிரி விவகாரத்தில் தேவேகவுடா பின்பற்றிய வழியையே மோடியும் பின்பற்றுகிறார். இந்தியாவுக்குள்தான் தமிழ்நாடு இருக்கிறதா?' எனக் கொந்தளிக்கிறார் வழக்கறிஞர்.கே.எஸ்.ராதாகிருஷ்ணன். 

காவிரி நதிநீர்ப் பங்கீடு தொடர்பாக, தமிழக அரசு தாக்கல் செய்த இடைக்கால மனு உச்ச நீதிமன்றத்தில் நீதிபதிகள் தீபக் மிஸ்ரா, யூ.யூ. லலித் அடங்கிய அமர்வு முன்னிலையில் கடந்த செப்டம்பர் மாதம் 30-ம் தேதி விசாரணைக்கு வந்தது. அப்போது நீதிபதிகள், ' அக்டோபர் 4-ம் தேதிக்குள் மத்திய அரசு காவிரி மேலாண்மை வாரியத்தை அமைக்க வேண்டும்' என உத்தரவிட்டனர். இந்நிலையில், மத்திய அரசின் சார்பில் ஆஜரான அட்டர்னி ஜெனரல் முகுல் ரகோத்கி, நேற்று உச்ச நீதிமன்றத்தில் மனு ஒன்றைத் தாக்கல் செய்தார். அதில், 'காவிரி மேலாண்மை வாரியத்தை நாடாளுமன்ற சட்டத்தின் வாயிலாகவே அமைக்க முடியும். மத்திய அரசு மேலாண்மை வாரியத்தை அமைக்க நீதிமன்றம் நிர்பந்திக்க முடியாது' எனத் தெரிவித்திருந்தார். மத்திய அரசின் இந்த 'திடீர்' முடிவால், தமிழகத்தில் உள்ள அரசியல் கட்சிகள் அதிர்ந்து போய் உள்ளன. 

" கர்நாடகாவில் ஆட்சி அமைக்க வேண்டிய அவசியத்தில் மத்தியில் ஆளும் பா.ஜ.க இருக்கிறது. தமிழ்நாட்டில் அவர்கள் ஆட்சியமைக்கப் போவதில்லை. காவிரி மேலாண்மை வாரியம் தொடர்பான, திட்டத்தை உருவாக்கும் அதிகாரம் மத்திய அரசுக்குத்தான் உண்டு. அதை திருத்தங்களுடன்  நிறைவேற்றலாமா என்றெல்லாம் அவர்கள்தான் முடிவெடுக்க வேண்டும். அரசிதழில் வெளியிட்டாலும், நாடாளுமன்றம் ஏற்பதில்தான் அனைத்தும் இருக்கிறது" என்கிறார் மூத்த வழக்கறிஞர் கே.எஸ்.ராதாகிருஷ்ணன். நதிநீர் தொடர்பாக, கடந்த 35 ஆண்டுகளுக்கும் மேலாக உச்ச நீதிமன்றத்தில் சட்டப் போராட்டம் நடத்தி வருபவர். தி.மு.கவின் செய்தித் தொடர்பு செயலாளராகவும் இருக்கிறார். அவர் தொடர்ந்து நம்மிடம், 

" காவேரி நடுவர் மன்ற தீர்ப்பை நிறைவேற்றி,காவேரி மேலாண்மை வாரியம் மற்றும் காவேரி நீர் முறைப்படுத்தும் குழு ஆகியவற்றை உருவாக்கி, நாடாளுமன்றத்தின் இரு அவைகளிலும் ஒப்புதல் பெற வேண்டும் என்று நதிநீர் தாவா சட்டம் 1956-ன் பிரிவு 6A உட்பிரிவு (7) கூறுகிறது. கிருஷ்ணராஜ சாகர் அணையில் இருந்து 6,856 கனஅடியும் கபினியில் இருந்து 3,500 கனஅடி தண்ணீரை காவிரியில் திறந்துவிட்டிருப்பதாகக் கர்நாடகம் கூறுகிறது. ' மொத்தத்தில் நான்கு அணைகளிலும் 26 டி.எம்.சி தண்ணீர்தான் உள்ளது. அது எங்களது குடிநீர் தேவைக்குப் போதவில்லை' எனக் கூறிவந்த கர்நாடகாவுக்கு, இப்போது மட்டும் எங்கிருந்து தண்ணீர் வந்தது? இந்த விவகாரத்தில், நாம் அறிந்து கொள்ள வேண்டிய முக்கிய வரலாற்றுப் பாடம் ஒன்றும் உள்ளது.

கர்நாடக எம்.பிக்கள் தயவில் ஆட்சி செய்து வந்த பிரதமர் வி.பி.சிங்தான், காவிரி நடுவர் மன்றம் அமைத்தார். ராமகிருஷ்ண ஹெக்டே, எஸ்.ஆர்.பொம்மை, குருபாதசாமி உள்ளிட்ட அவரது அமைச்சரவை சகாக்களின் எதிர்ப்பையும் மீறி, நடுவர் மன்றம் அமைத்தார். அப்போது அவருடைய அரசுக்கு ஆதரவாக தமிழகத்தில் ஒரு எம்.பியும் இல்லை. காவிரியில் தமிழகத்தின் உரிமைக்கு சட்டப்பூர்வ பிடியை வழங்கிய முன்னோடி நடவடிக்கை இது. இதற்கு நன்றிக் கடனாக அடுத்து வந்த தேர்தலில் வி.பி.சிங் தலைமைக்கு, தமிழக மக்கள் வழங்கிய ஆதரவு பூஜ்ஜியம்தான். 

காவிரிப் பிரச்சினையில் தமிழகத்துக்கு எதிரான நடவடிக்கைகளில் இறங்குகிறார் முன்னாள் பிரதமர் தேவேகவுடா. உச்ச நீதிமன்றத் தீர்ப்பை எதிர்த்து உண்ணாவிரதம் இருக்கிறார். முன்னாள் பிரதமருக்கான சலுகைகளை அனுபவித்துக் கொண்டு கூட்டாட்சி அமைப்புக்கு விரோதமாக அவர் நடந்து கொள்கிறார். அவர் பிரதமராக பதவியேற்பதற்கு முன்பு, ' காவிரி நடுவர் மன்றத் தலைவர் பதவியில் நீதிபதி சித்தோகோஷ் முகர்ஜி தொடரக் கூடாது' என பெங்களூரு உயர் நீதிமன்றத்தில் வழக்கு தொடர்ந்திருந்தார். இந்த வழக்கு நிலுவையில் இருக்கும்போது 1996-ம் ஆண்டு அவர் பிரதமராக தேர்வு செய்யப்பட்டார். ' இந்தியாவின் மாநிலங்களை எதிரியாக நினைத்து வழக்கு தொடர்ந்தவர், கூட்டாட்சியில் எப்படி பிரதமராக இருக்க முடியும்' என சென்னை உயர் நீதிமன்றத்தில், நான் ரிட் மனுவை தாக்கல் செய்தேன். 

இது தொடர்பாக மத்திய அரசுக்கு உயர் நீதிமன்றம் நோட்டீஸ் அனுப்பியது. அதனைத் தொடர்ந்து அந்த வழக்கை தேவேகவுடா திரும்பப் பெற்றார். அதன்பிறகே அவர் பிரதமராக பதவியேற்றார். முன்னாள் பிரதமர் என்ற கண்ணியத்தை காக்காமல் குழப்பமான சூழ்நிலையை தேவேகவுடா உருவாக்கி வருகிறார். இதுகுறித்து இதுவரை யாரும் வினா எழுப்பவில்லை என்பது வேதனையைத் தருகிறது. தேவேகவுடாவுக்கும் மோடிக்கும் எந்த வித்தியாசமும் இல்லை. ஒருமைப்பாடு, இறையாண்மை, தேச நலன், வேற்றுமையில் ஒற்றுமை என்று கண்துடைப்பு கோஷங்களை ஒருபுறம் விதைத்துக்கொண்டே, தமிழர்களின் நலன்களை அனைத்துவிதத்திலும் புறக்கணிக்கிறது மத்திய அரசு" எனக் குமுறலோடு பேசி முடித்தார் கே.எஸ்.ராதாகிருஷ்ணன். 

- ஆ.விஜயானந்த் 

எடிட்டர் சாய்ஸ்

ஜெர்சி மாடுகள், பிரேசில் காபி, மருத்துவமனை உறுதி! ஜெயலலிதா பற்றி தோழியின் நினைவலைகள்
placeholder

அதே மாதிரி ஜெயலலிதா தன்னுடைய 10 வயதில் சிவாஜி கணேசன் முன்னிலையில் மயிலாப்பூரில் செய்த நடன அரங்கேற்றப் படங்கள் முதல் அதற்குப் பிறகான அவரது சின்ன வயசுப் படங்களை நாங்கள் தொகுத்திருந்தோம். அதை 2012 ம் ஆண்டு, எனக்கு அவரை சந்திக்கும் வாய்ப்புக் கிடைத்த போது கொடுத்தேன். அதைப் பார்த்து ரொம்ப சந்தோஷமாகிட்டாங்க. அந்தப் படத் தொகுப்பை, தன்னோட ஹேண்ட் பேக்ல வச்சுக்கிட்டாங்க. பத்திரமா வைத்துக் கொள்வதாகவும் சொன்னாங்க. சினிமாக்காரங்க என்றால் ஈஸியாக அணுகலாம் என்கிற திரையை உடைத்து, அவங்க தனி ரூட்டைப் போட்டு, அதை மத்தவங்க ஃபாலோ பண்ற அளவுக்கு வாழ்ந்து காட்டினாங்க. குறிப்பா, சினிமா விழாக்கள், நிகழ்ச்சிகளுக்கு போக மாட்டாங்க. 

அம்மாவிடமிருந்து போன் வந்தால்...!? - உருகும் வீணை காயத்ரி
placeholder

''சமீபத்தில் கொலை மிரட்டல் விட்டப் பையனால் அம்மாவை சந்திக்க வேண்டிய சூழ்நிலை ஏற்பட்டது. கடந்த ஜூலை 27-ம் தேதி சி.எம் ஆபீஸ்ல இருந்து போன் வந்தது. அம்மா உங்களை உடனே வரச்சொன்னதா சொன்னாங்க. நான் கொஞ்சமும் யோசிக்காமல் போய் நின்னேன். பொதுவாகவே நானும், அவங்களும்தான் தனியாகத்தான் பேசிப்போம். ஆனா, அன்றைக்கு, எல்லா அதிகாரிகளும், இருந்தாங்க. அவங்க முன்னாடி, 'எப்படி இருக்கீங்க' என கேட்டார். நான் பதில் சொல்லிவிட்டு, 'நவம்பர் மாதத்தோடு என்னோட டர்ன் முடியுது' என சொன்னேன். இதற்கு அவர், எல்லோருடைய முன்னிலையிலும், அடுத்த மூன்று வருஷத்துக்கும் நீங்களே துணை வேந்தரா இருங்க என சொல்லிவிட்டு, அவருக்கு பின்னால் இருக்கும் எல்லோரையும் பார்த்து மறுபடியும்  இதையே சொன்னார். அப்போதுதான் அவர்கிட்ட, 'நான் உங்களை சந்திக்க இரண்டு வருஷமாக முயற்சி செய்துட்டு இருந்தேன். இந்த கொலை மிரட்டல் காரணமாகத்தான் உங்களை சந்திக்கிற வாய்ப்பு கிடைச்சிருக்கு, நான் தனி மனுஷியாக இசை பல்கலைக்கழகத்தை நடத்தி வருகிறேன்' என சொன்னேன். உடனே, சம்பந்தப்பட்டவர்களை அழைத்து, அவங்களுக்குத் தேவையான எல்லா உதவிகளையும் செய்து கொடுங்க என சொன்னார்.  'அடுத்த முறைப் பார்க்கும்போது உங்க முகத்துல சிரிப்பை மட்டும் தான் பார்க்கணும்' என ஆறுதல் சொன்னாங்க. அந்த வார்த்தை இன்னும் என் காதில் கேட்டுட்டே இருக்கு. அதுதான் நான் அவங்களை கடைசியாகப் பார்த்தது.  அதற்குப் பிறகு அவரை பார்க்க முடியவில்லை. அவர் சொன்னது போல அதற்கான வேலைகள் நடந்து கொண்டிருக்கும்போதே அம்மா மருத்துவமனையில் அனுமதிக்கப்பட்டுட்டாங்க. நான் இப்போ அடுத்த ஆர்டருக்காக காத்திட்டு இருக்கேன். இன்னும் ஆர்டர் என் கைக்கு வரவில்லை''

MUST READ