Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

மாயமான மரகத லிங்கம் வழக்கு: பழைய குற்றவாளிகளின் கைரேகைகள் ஆய்வு

 

திருக்குவளையில் பலகோடி ரூபாய் மதிப்பில் காணாமல்போன மரகதலிங்கம் வழக்கில், பழைய குற்றவாளிகள் கண்காணிப்பட்டு வந்த நிலையில் அவர்களின் கைரேகையை போலீசார் ஆய்வு செய்யத் தொடங்கி உள்ளனர்.

நாகை மாவட்டத்தில் பழம்பெருமை வாய்ந்த 7 கோயில்களில் ஏற்கெனவே இரண்டு மரகதலிங்கம் களவு போன நிலையில், மூன்றாவது முறையாக திமுக தலைவர் கருணாநிதி பிறந்த ஊரான திருக்குவளையில், கருணாநிதி வீட்டின் எதிர்புறத்தில் உள்ள கோயிலிலேயே மரகதலிங்கம் திருடப்பட்டிருப்பது ஆன்மீக வட்டாரத்தில், அரசியல் வட்டாரத்திலும் பெரும் அதிர்ச்சியை ஏற்படுத்தி உள்ளது.

நாகை மாவட்டம் திருக்குவளையில் தருமபுரம் ஆதீன கட்டுப்பாட்டில் தியாகராஜர் சுவாமி திருக்கோயில் உள்ளது. இங்கு, 'உளி கொண்டு செதுக்கப்படாத இறைவன் அருளியதாகச் சொல்லப்படும்' புராதான பொக்கிஷமான மரகதலிங்கம் இருக்கிறது. அதற்கு தினமும் காலை, மாலை அபிஷேக பூஜை நடப்பது வழக்கம். இந்நிலையில் கடந்த 9-ம் தேதி காலை பூஜை செய்துவிட்டு சென்ற அர்ச்சகர் கணேச குருக்கள், அன்று மாலை 6 மணிக்கு மெய்காவலர் ரவிச்சந்திரனுடன் மீண்டும் பூஜை செய்ய வந்தபோது மரகதலிங்கம் இருந்த பாதுகாப்பு பெட்டகம் திறந்து கிடந்திருக்கிறது. மேலும், பூட்டு உடைக்கப்பட்டு தொங்கிய நிலையில் இருந்தது. உள்ளே சென்று பார்த்தபோது, பல கோடி ரூபாய் மதிப்பிலான மரகதலிங்கம் காணாமல்போனது தெரியவந்தது.

"இந்த வழக்கில் மூன்று தனிப்படைகள் அமைக்கப்பட்டு விசாரணைகள் நடைபெற்று வந்தன. இந்நிலையில், இப்பகுதியில் உள்ள கோயில்களில் ஏற்கெனவே காணாமல்போன சாமி சிலைகள் வழக்கில் உள்ள பழைய குற்றவாளிகளின் பெயர்களை வைத்து, அவர்களுடைய கைரேகையுடன் தடயவியல் நிபுணர்கள் ஆய்வு செய்து வருகின்றனர். மேலும், தற்போது நவீன முறையில் திருடும் குற்றவாளிகளின் பெயர்கள் ஒரு பக்கம் திரட்டப்பட்டு வருவதாகவும், இன்னொரு பக்கம் சாமி சிலை குற்ற வழக்கில் ஏற்கெனவே சிறைக்கு சென்றுவிட்டுத் திரும்பி உள்ளவர்களில் குறிப்பிட்ட சிலரின் நடவடிக்கைகள் கண்காணிக்கப்படுகின்றன. கூடிய விரைவில், குற்றவாளிகள் கைதுசெய்யப்பட்டு மரகதலிங்கம் மீட்கப்படும்" என்று நாகை மாவட்ட துணை கண்காணிப்பாளர் அன்பு தெரிவித்துள்ளார்.

சுவாமி சிலை கொள்ளைச் சம்பவம் குறித்து தஞ்சாவூரில் உள்ள இந்துசமய அறநிலையைத் துறை இணை ஆணையர் குமரகுருவிடம் கேட்டபோது;“பாதுகாப்பு அம்சங்கள் குறித்து தருமபுர ஆதீன மடத்துக்குப் பலமுறை நோட்டீஸ் கொடுத்திருக்கிறோம். அவர்கள் எதையும் பின்பற்றவில்லை. அவர்கள் கட்டுப்பாட்டில் உள்ள கோயில் உடைமைகளை அவர்கள்தான் பாதுகாத்துக்கொள்ள வேண்டும்” என்றார் தடாலடியாக.

தருமபுர ஆதீன மடத்தின் மேலாளர் மோகனிடம் இதுதொடர்பாக பேசியபோது, “எல்லாம் கண்காணிப்பாளரிடம் கேட்டுக்கொள்ளுங்கள். இவ்வளவு பெரிய கோயிலில் திருட்டுப்பய எங்க, எப்படி பதுங்கி இருப்பான்னு யாருக்குத் தெரியும். காணாப்போச்சு கம்ப்லைன்ட் கொடுத்திருக்கிறோம், போலீஸ் விசாரிச்சிகிட்டு இருக்கு” என்றார்.

"பாதுகாப்பு பெட்டியின் லாக்கர் பழுதாகி ஒரு வருடம் ஆகிவிட்டது. அதனை பழுது நீக்கனும், இல்லைன்னா புதுசா வாங்கனும் என்று சூப்பிரண்ட்கிட்ட சொல்லிட்டேன். ஏதே தெய்வ குற்றத்தில இப்படி நடந்து போச்சு” என்று அப்பாவியாகச் சொன்னார் கோயிலின் மெய்க்காவலரான ரவிச்சந்திரன்.

கோயில் சுவரில் நந்தவன மரங்கள் படர்ந்துள்ளன. திருடர்கள் இதன் வழியாக கோயிலுக்குள் எளிதாக நுழைய முடியும். கோயிலுக்கு பெரும்பாலும் பக்தர்கள் வருகை குறைவு என்பதும் விசாரணையில் தெரியவந்துள்ளது.

சாதாரண மார்வாடி கடையில்கூட பொருத்தப்பட்டிருக்கும் சி.சி.டி.வி. கேமரா வசதி பல கோடி ரூபாய் மதிப்புள்ள சுவாமி சிலைகள் உள்ள கோயில்கள் பொருத்தப்படாமல் இருப்பது வருத்தம் அளிக்கிறது. முக்கியமாக, பலகோடி ரூபாய் மதிப்பலான மரகதலிங்கம் வைத்து பாதுகாக்கப்பட்ட பெட்டிக்கு, வெறும் 15 ரூபாய் மதிப்பிலான பூட்டு போடப்பட்டிருந்தாக வெளியான செய்தி, முற்றிலும் அதிர்ச்சியையும், மன வருத்தத்தையும் தருவதாக இருக்கிறது. 

- ரா.வளன், மு. இராகவன் படங்கள் : சதீஷ்குமார்

Advertisement
Advertisement
Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement
[X] Close