Vikatan.com

www.vikatan.com would like to send you push notifications.

Notifications can be turned off anytime from browser settings.

' அம்மா நலம் விரும்புகிறவர்களுக்கு...!'  - எம்.நடராஜனின் ’நல்ல காலம்’ புத்தகம்

மிழக முதல்வர் ஜெயலலிதாவின் உடல்நலம் குறித்து புத்தகம் ஒன்றை வெளியிட்டிருக்கிறார் ம.நடராஜன். ' முதல்வரின் உடல்நிலை குறித்து தி.மு.க தலைவர் கருணாநிதி வெளியிட்ட கருத்துக்களுக்கு எதிர்வினையாகவே இந்தப் புத்தகத்தை வெளியிட்டிருக்கிறார் நடராஜன்' என்கின்றனர் அவரது ஆதரவாளர்கள். 

அப்போலோ மருத்துவமனையின் தீவிர சிகிச்சைப் பிரிவில், கடந்த 47 நாட்களாக அனுமதிக்கப்பட்டிருக்கிறார் முதல்வர் ஜெயலலிதா. அவரது உடல்நிலை குறித்து அறிக்கைகளை வெளியிட்டு வந்த அப்போலோ நிர்வாகமும், கடந்த பத்து நாட்களாக எந்தவித கருத்தையும் வெளியிடவில்லை. ' எப்போது வீடு திரும்ப வேண்டும் என்பது, முதல்வர் கையில்தான் உள்ளது' என மருத்துவமனை நிர்வாகி உறுதிபடத் தெரிவித்துவிட்டார். தினம்தோறும் மருத்துவமனை வாயிலில் நடக்கும் சிறப்பு பூஜைகள், வி.ஐ.பிக்களின் வருகை என அப்போலோ பரபரப்பு இன்னமும் ஓயவில்லை. இந்நிலையில், ' திருக்குவளையே திரும்பிப் பார்' என்ற தலைப்பில் புத்தகம் வெளியிட்டிருக்கிறது ம.நடராஜனின் தமிழரசி அச்சகம். ' அம்மா நலம்...அம்மா நலம் விரும்புகிறவர்களுக்கு' என்ற உள்ளடக்கத்தோடு அந்த புத்தகம் வெளியாகியிருக்கிறது. 

அந்தப் புத்தகத்தில், ' முன்னாள் முதல்வர் கருணாநிதியை குறிவைத்தே பல கட்டுரைகள் எழுதப்பட்டுள்ளன. குறிப்பாக, ' 2009-ம் ஆண்டு போரூர் ராமச்சந்திரா மருத்துவமனையில் கருணாநிதி அனுமதிக்கப்பட்டபோது, அவரது உடல்நிலை குறித்து அரசு சார்பில் அறிக்கை வந்ததா? என்னவிதமான உண்மை நிலை அப்போது தெரிவிக்கப்பட்டது? 11.2.2009 அன்று வெளியான ஆங்கில ஏட்டில், ' மருத்துவமனையே தலைமைச் செயலகமாக மாறிவிட்டது' என விவரிக்கப்பட்டிருந்ததே...அதேபோல், 2002 முதல் 2003 நவம்பர் வரையில் சிகிச்சையில் இருந்த முரசொலி மாறன் குறித்து என்ன தகவல்கள் வெளியில் சொல்லப்பட்டன? மாறனின் இறுதி நாட்களில் அவருடைய கைரேகைகள் பெறப்பட்டதாக செய்திகள் வெளியானதே? அதுகுறித்து சம்பந்தப்பட்டவர்கள் யாரும் மறுக்கவில்லையே...? தற்போது எதிர்க்கட்சித் தலைவராக இருக்கும் ஸ்டாலின் வெளிநாட்டில் பெறும் சிகிச்சைகள் குறித்து எப்போதாவது தெரியப்படுத்தியதுண்டா?' என விரிவாகவே விமர்சனம் செய்யப்பட்டுள்ளது. 

மேலும், ' 1984-ம் ஆண்டு முதல்வர் எம்.ஜி.ஆர் தீவிர சிகிச்சையில் இருந்தபோது, அவருடைய உடல்நிலை குறித்து அவதூறாகப் பேசியவர்தான் கருணாநிதி. அப்போது கழகத்தின் கொள்கைப் பரப்புச் செயலாளராக இருந்த ஜெயலலிதா, மாநிலம் முழுவதும் தீவிரமாக சுற்றுப் பயணம் செய்தார். அந்த தேர்தலில் 133 தொகுதிகளில் வென்று, 37 சதவீத வாக்குகளைப் பெற்று மீண்டும் எம்.ஜி.ஆர் பதவியில் அமர்ந்தார். அப்போதும், ' சரியாக பேச முடியாத ஒருவர், எப்படி உறுதிமொழி ஏற்றுக் கொண்டார்' என கருணாநிதி விமர்சனம் செய்தார். இதையடுத்து, ஆளுநர் குரானா முன்னிலையில் மீண்டும் உறுதிமொழி எடுத்துக் கொண்டார் எம்.ஜி.ஆர். அடுத்தவரின் உடல்நலக் குறைவை எப்படியெல்லாம் கருணாநிதி கேலி செய்வார் என்பதற்கான உதாரணங்கள் இவை' என பழைய சம்பவங்களும் தொகுத்து எழுதப்பட்டிருக்கிறது. கட்டுரையின் தொடக்கத்தில், ' வருந்தாதே ஏழை மனமே...வரும் காலம் நல்ல காலம்' என்ற ஜெயலலிதாவின் வரிகளும் மேற்கோள் காட்டப்பட்டுள்ளன.

நடராஜனின் புத்தகம் குறித்து, நம்மிடம் பேசிய அ.தி.மு.க நிர்வாகி ஒருவர், "முதல்வரின் கோபப் பார்வையில் இன்றளவும் நடராஜன் இருக்கிறார். கடந்த 16 ஆண்டுகளுக்கும் மேலாக, கார்டன் வட்டாரத்தில் இருந்து ஒதுக்கியே வைக்கப்பட்டிருக்கிறார். அவருடைய அனைத்து நடவடிக்கைகளும் கண்காணிப்பில் உள்ளன. முதல்வரின் குட்புக்கில் இடம்பெறுவதற்காக அவர் எடுத்த முயற்சிகள் அனைத்தும் தோல்வியில் முடிந்துவிட்டன. தற்போது மருத்துவமனையில் முதல்வர் இருக்கிறார்.

இந்த நேரத்தில் அரசியல்ரீதியான காய் நகர்த்தல்களை அவர்தான் செய்து வருகிறார் என்ற பேச்சும் உள்ளது. சின்னம்மாவின் ஆதரவில்தான் இத்தனையும் செய்கிறாரா என்று தெரியவில்லை. அதிகாரத்துக்குள் வருவதைவிடவும், பின்னால் இருந்து இயக்குவதையே அவர் விரும்புகிறார். முதல்வர் பூரண நலம் பெற்று கார்டன் திரும்பும்போது, ' தன் மீதான கோபம் குறையும்' என உறுதியாக அவர் நம்புகிறார். இதுபோன்ற சிறு புத்தகங்கள் மூலம், 'முதல்வர் நலனில் தமக்கு மிகவும் அக்கறையுண்டு' என்ற தோற்றத்தை வெளிப்படையாகவே காட்டுகிறார். இந்தப் புத்தகம் தற்போது இரண்டாம் பதிப்புக்காக தயாராகி வருகிறது" என்றார். 

முதல்வரின் மனதைக் கவர அமைச்சர்களின் யாகம் ஒருபுறம் இருந்தாலும், கருணாநிதி எதிர்ப்பு அரசியலையே புத்தகமாக்கி முதல்வரின் பார்வைக்காக காத்திருக்கிறார் ம.நடராஜன். 

- ஆ.விஜயானந்த் 
 

எடிட்டர் சாய்ஸ்

ஜெர்சி மாடுகள், பிரேசில் காபி, மருத்துவமனை உறுதி! ஜெயலலிதா பற்றி தோழியின் நினைவலைகள்
placeholder

அதே மாதிரி ஜெயலலிதா தன்னுடைய 10 வயதில் சிவாஜி கணேசன் முன்னிலையில் மயிலாப்பூரில் செய்த நடன அரங்கேற்றப் படங்கள் முதல் அதற்குப் பிறகான அவரது சின்ன வயசுப் படங்களை நாங்கள் தொகுத்திருந்தோம். அதை 2012 ம் ஆண்டு, எனக்கு அவரை சந்திக்கும் வாய்ப்புக் கிடைத்த போது கொடுத்தேன். அதைப் பார்த்து ரொம்ப சந்தோஷமாகிட்டாங்க. அந்தப் படத் தொகுப்பை, தன்னோட ஹேண்ட் பேக்ல வச்சுக்கிட்டாங்க. பத்திரமா வைத்துக் கொள்வதாகவும் சொன்னாங்க. சினிமாக்காரங்க என்றால் ஈஸியாக அணுகலாம் என்கிற திரையை உடைத்து, அவங்க தனி ரூட்டைப் போட்டு, அதை மத்தவங்க ஃபாலோ பண்ற அளவுக்கு வாழ்ந்து காட்டினாங்க. குறிப்பா, சினிமா விழாக்கள், நிகழ்ச்சிகளுக்கு போக மாட்டாங்க. 

அம்மாவிடமிருந்து போன் வந்தால்...!? - உருகும் வீணை காயத்ரி
placeholder

''சமீபத்தில் கொலை மிரட்டல் விட்டப் பையனால் அம்மாவை சந்திக்க வேண்டிய சூழ்நிலை ஏற்பட்டது. கடந்த ஜூலை 27-ம் தேதி சி.எம் ஆபீஸ்ல இருந்து போன் வந்தது. அம்மா உங்களை உடனே வரச்சொன்னதா சொன்னாங்க. நான் கொஞ்சமும் யோசிக்காமல் போய் நின்னேன். பொதுவாகவே நானும், அவங்களும்தான் தனியாகத்தான் பேசிப்போம். ஆனா, அன்றைக்கு, எல்லா அதிகாரிகளும், இருந்தாங்க. அவங்க முன்னாடி, 'எப்படி இருக்கீங்க' என கேட்டார். நான் பதில் சொல்லிவிட்டு, 'நவம்பர் மாதத்தோடு என்னோட டர்ன் முடியுது' என சொன்னேன். இதற்கு அவர், எல்லோருடைய முன்னிலையிலும், அடுத்த மூன்று வருஷத்துக்கும் நீங்களே துணை வேந்தரா இருங்க என சொல்லிவிட்டு, அவருக்கு பின்னால் இருக்கும் எல்லோரையும் பார்த்து மறுபடியும்  இதையே சொன்னார். அப்போதுதான் அவர்கிட்ட, 'நான் உங்களை சந்திக்க இரண்டு வருஷமாக முயற்சி செய்துட்டு இருந்தேன். இந்த கொலை மிரட்டல் காரணமாகத்தான் உங்களை சந்திக்கிற வாய்ப்பு கிடைச்சிருக்கு, நான் தனி மனுஷியாக இசை பல்கலைக்கழகத்தை நடத்தி வருகிறேன்' என சொன்னேன். உடனே, சம்பந்தப்பட்டவர்களை அழைத்து, அவங்களுக்குத் தேவையான எல்லா உதவிகளையும் செய்து கொடுங்க என சொன்னார்.  'அடுத்த முறைப் பார்க்கும்போது உங்க முகத்துல சிரிப்பை மட்டும் தான் பார்க்கணும்' என ஆறுதல் சொன்னாங்க. அந்த வார்த்தை இன்னும் என் காதில் கேட்டுட்டே இருக்கு. அதுதான் நான் அவங்களை கடைசியாகப் பார்த்தது.  அதற்குப் பிறகு அவரை பார்க்க முடியவில்லை. அவர் சொன்னது போல அதற்கான வேலைகள் நடந்து கொண்டிருக்கும்போதே அம்மா மருத்துவமனையில் அனுமதிக்கப்பட்டுட்டாங்க. நான் இப்போ அடுத்த ஆர்டருக்காக காத்திட்டு இருக்கேன். இன்னும் ஆர்டர் என் கைக்கு வரவில்லை''

MUST READ