Vikatan.com

www.vikatan.com would like to send you push notifications.

Notifications can be turned off anytime from browser settings.

‘அப்போலோவில் ஜெயலலிதா... ஆதாயம் எடுக்கும் பி.ஜே.பி.!’ ஸ்டாலினின் விமர்சனம்

கரூர் : "கடந்த 5 ஆண்டுகளாக காணொளி காட்சியில் நடந்து வந்த ஆட்சி, ஜெயலலிதா மருத்துவமனையில் அனுமதிக்கப்பட்டுள்ளதால், இப்போது காணாத ஆட்சியாக மாறியுள்ளது. இதை பயன்படுத்திக்கொண்டு, தமிழக அரசை பி.ஜே.பி. தலைமையிலான மத்திய அரசு மிரட்டி பணிய வைக்கிறது," என அரவக்குறிச்சி தேர்தல் பிரசாரத்தில் தி.மு.க. பொருளாளர் மு.க.ஸ்டாலின் பேசினார்.

தமிழகத்தில் தள்ளி வைக்கப்பட்ட அரவக்குறிச்சி, தஞ்சாவூர் தொகுதிகளுக்கான தேர்தலும், திருப்பரங்குன்றம் தொகுதிக்கான இடைத்தேர்தலும் வரும் 19ம் தேதி நடக்கவிருக்கிறது. தேர்தலுக்கு இன்னும் ஒரு வார காலமே இருக்க, தேர்தல் பரபரப்பு உச்சத்தை எட்டியுள்ளது.

அ.தி.மு.க. வேட்பாளர்களை ஆதரித்து, பொறுப்பு முதல்வர் ஓ.பன்னீர்செல்வம் தலைமையில் அனைத்து அமைச்சர்கள், ஸ்டார் பேச்சாளர்களும், தே.மு.தி.க. வேட்பாளர்களை ஆதரித்து பிரேமலதாவும், பி.ஜே.பி. வேட்பாளர்களை ஆதரித்து தமிழிசை சவுந்திரராஜன் உள்ளிட்ட தலைவர்களூம் பிரசாரத்தை துவக்கி நடத்தி வரும் நிலையில், தி.மு.க. பொருளாளர் மு.க.ஸ்டாலின் தனது தேர்தல் பிரசாரத்தை அரவக்குறிச்சியில் துவக்கினார். அரவக்குறிச்சி தி.மு.க. வேட்பாளர் கே.சி.பழனிச்சாமிக்கு ஆதரவாக அவர் வாக்கு சேகரிப்பில் ஈடுபட்டார்.

அப்போது பேசிய ஸ்டாலின், "அ.தி.மு.க. சார்பில் போட்டியிடும் வேட்பாளர் (செந்தில்பாலாஜி) பெயரைச் சொல்லி எனது தகுதியை குறைத்துக்கொள்ள விரும்பவில்லை. கடந்த தேர்தலில் கரூர் தொகுதியில் நின்று ஜெயித்து அமைச்சரானார். ஆனால், அவர் மீது சென்னை,மதுரை உயர் நீதிமன்றங்களில் பத்துக்கும் மேற்பட்ட பணமோசடி, நிலமோசடி, ஆள்கடத்தல் வழக்குகள், டிரைவர், கான்ட்ராக்டர்களிடம் வேலை வாங்கித் தருவதாக சொல்லி ஏமாற்றிய வழக்குகள் என்று ஏகப்பட்ட வழக்குகள் நிலுவையில் உள்ளன. அரசுத் துறைகளில் சரியாக செயல்படாத அதிகாரிகளை,ஊழல் செய்த அலுவலகர்களை வேறு இடங்களுக்கு பனிஷ்மென்டுகளுக்காக டிரான்ஸ்ஃபர் செய்வார்கள். அப்படி,கரூரில் அவர் அடித்த கொட்டத்தை பார்த்துட்டு,அவங்க கட்சித் தலைமையே அவரை பனிஷ்மென்டாக அரவக்குறிச்சி தொகுதிக்கு மாற்றி போட்டிருக்கிறது. அங்க நின்னா ஜெயிக்க முடியாதுன்னு இந்த தொகுதிக்கு வந்தவர்தான் அவர்.

இந்த தேர்தலே அவரால்தான் தள்ளி போடப்பட்டு, இப்போது நடத்தப்படுகிறது. அ.தி.மு.க அமைச்சர்களின் பினாமியாக கருதப்படும் அன்புநாதன் வீட்டில் ரெய்டு செய்து கோடி கோடியாக பணமும், நூற்றுக்கும் மேற்பட்ட பணம் கணக்கிடும் இயந்திரங்களையும் பறிமுதல் செய்தும், 108 ஆம்புலன்ஸ்களை பணம் கடத்த தவறாக பயன்படுத்தியதை கண்டறிந்தும்தான் தேர்தல் ஆணையம் அரவக்குறிச்சி தேர்தலை தள்ளிப்போட்டது. ஆனால்,அ.தி.மு.க வேட்பாளர் இந்த தேர்தலிலும் அதே வேலையை செய்கிறார்.

இப்ப தமிழ்நாட்டில் ஒரு ஆட்சி நடக்குது. ஸாரி. உட்கார்ந்து இருக்கு. அதைவிட,படுத்துக் கிடக்குன்னு சொல்றதுதான் சரியா இருக்கும். நான் உடல்நிலை முடியாமல் இருக்கும் தமிழக முதல்வரை விமர்சிக்கவில்லை. கடந்த 5 ஆண்டுகளாக காணொளி காட்சியில் நடந்து வந்த ஆட்சி, இப்போது காணாத ஆட்சியாக நடக்கிறது. அதைத்தான் சொல்கிறேன்.

இதை பயன்படுத்தி,மத்திய அரசு குறுக்குசால் ஓட்டுகிறது. முதலமைச்சர் கடிதம் மூலமும்,நேரடியாக போய் மோடியை சந்தித்தும் எதிர்த்த தேசிய உணவு பாதுகாப்பு திட்டம், ஜி.எஸ்.டி மசோதா, உதய் திட்டத்தை எல்லாம்,இப்போது மத்திய அரசு மாநில அரசை மிரட்டி செயல்படுத்த பார்க்கிறது.

நாங்க ஆட்சியில் இருந்தப்ப,கர்நாடகாவிடம் ராஜதந்திரத்தோடு நட்புறவு கொண்டு,தண்ணீர் பெற்றுத் தந்தோம். ஆனால், இந்த அரசு அப்படி செயல்படுகிறதா?. அங்க தண்ணீர் தர வேண்டிய இடத்தில் இருப்பவனே,ஒற்றுமையாக அனைத்துக் கட்சிக் கூட்டத்தை கூட்டி,'தமிழகத்துக்கு தண்ணீர் இல்லை'ங்கிறான். உச்ச நீதிமன்ற தீர்ப்பை எதிர்க்கிறான். ஆனால்,இங்க ஆளுங்கட்சி அப்படி அனைத்து கட்சிக் கூட்டத்தை கூட்டுகிறதா?. நாங்கள்தான் கூட்டினோம்.

அதனால், இந்த ஆட்சியை மக்கள் வெறுக்கிறார்கள். எங்களை எதிர்க்கட்சி என்றுகூட சொல்ல வேண்டியதில்லை. ஒரு சதவிகிதத்தில் அவர்கள் இந்தமுறை ஆட்சி அமைத்தார்கள். ஆனால்,இந்த மூன்று தேர்தல்களின் வெற்றி மூலம்,எம்.எல்.ஏக்கள் எண்ணிக்கையில் செஞ்சுரி போடப்போறோம்.
இந்த பகுதியில் காவிரியில் சட்டவிரோதமாக மணல் அள்ளுவதாக மக்கள் தவிக்கிறார்கள். நல்லக்கண்ணு வந்து போராடியே,அவரை கைது செய்த காவல்துறை, மணல் கொள்ளையர்களை கைது பண்ணவில்லை.

நான் இப்போ சொல்கிறேன். எங்க கட்சியின் இந்த தொகுதி வேட்பாளர் வென்று சட்டமன்றத்தில் எழுப்பும் முதல் கேள்வி,  மணல் கொள்ளை பற்றிதான். அப்படியும் பிரச்னை தீரவில்லை என்றால்,என் தலைமையில் இங்கே மணல் கொள்ளைக்கு எதிராக மிகப்பெரிய போராட்டம் நடக்கும். அந்த உறுதியை உங்களுக்கு நான் தருகிறேன்" என்றார்.

- துரை.வேம்பையன்,

படங்கள்: தே.தீட்ஷித்.

 

எடிட்டர் சாய்ஸ்

ஜெர்சி மாடுகள், பிரேசில் காபி, மருத்துவமனை உறுதி! ஜெயலலிதா பற்றி தோழியின் நினைவலைகள்
placeholder

அதே மாதிரி ஜெயலலிதா தன்னுடைய 10 வயதில் சிவாஜி கணேசன் முன்னிலையில் மயிலாப்பூரில் செய்த நடன அரங்கேற்றப் படங்கள் முதல் அதற்குப் பிறகான அவரது சின்ன வயசுப் படங்களை நாங்கள் தொகுத்திருந்தோம். அதை 2012 ம் ஆண்டு, எனக்கு அவரை சந்திக்கும் வாய்ப்புக் கிடைத்த போது கொடுத்தேன். அதைப் பார்த்து ரொம்ப சந்தோஷமாகிட்டாங்க. அந்தப் படத் தொகுப்பை, தன்னோட ஹேண்ட் பேக்ல வச்சுக்கிட்டாங்க. பத்திரமா வைத்துக் கொள்வதாகவும் சொன்னாங்க. சினிமாக்காரங்க என்றால் ஈஸியாக அணுகலாம் என்கிற திரையை உடைத்து, அவங்க தனி ரூட்டைப் போட்டு, அதை மத்தவங்க ஃபாலோ பண்ற அளவுக்கு வாழ்ந்து காட்டினாங்க. குறிப்பா, சினிமா விழாக்கள், நிகழ்ச்சிகளுக்கு போக மாட்டாங்க. 

அம்மாவிடமிருந்து போன் வந்தால்...!? - உருகும் வீணை காயத்ரி
placeholder

''சமீபத்தில் கொலை மிரட்டல் விட்டப் பையனால் அம்மாவை சந்திக்க வேண்டிய சூழ்நிலை ஏற்பட்டது. கடந்த ஜூலை 27-ம் தேதி சி.எம் ஆபீஸ்ல இருந்து போன் வந்தது. அம்மா உங்களை உடனே வரச்சொன்னதா சொன்னாங்க. நான் கொஞ்சமும் யோசிக்காமல் போய் நின்னேன். பொதுவாகவே நானும், அவங்களும்தான் தனியாகத்தான் பேசிப்போம். ஆனா, அன்றைக்கு, எல்லா அதிகாரிகளும், இருந்தாங்க. அவங்க முன்னாடி, 'எப்படி இருக்கீங்க' என கேட்டார். நான் பதில் சொல்லிவிட்டு, 'நவம்பர் மாதத்தோடு என்னோட டர்ன் முடியுது' என சொன்னேன். இதற்கு அவர், எல்லோருடைய முன்னிலையிலும், அடுத்த மூன்று வருஷத்துக்கும் நீங்களே துணை வேந்தரா இருங்க என சொல்லிவிட்டு, அவருக்கு பின்னால் இருக்கும் எல்லோரையும் பார்த்து மறுபடியும்  இதையே சொன்னார். அப்போதுதான் அவர்கிட்ட, 'நான் உங்களை சந்திக்க இரண்டு வருஷமாக முயற்சி செய்துட்டு இருந்தேன். இந்த கொலை மிரட்டல் காரணமாகத்தான் உங்களை சந்திக்கிற வாய்ப்பு கிடைச்சிருக்கு, நான் தனி மனுஷியாக இசை பல்கலைக்கழகத்தை நடத்தி வருகிறேன்' என சொன்னேன். உடனே, சம்பந்தப்பட்டவர்களை அழைத்து, அவங்களுக்குத் தேவையான எல்லா உதவிகளையும் செய்து கொடுங்க என சொன்னார்.  'அடுத்த முறைப் பார்க்கும்போது உங்க முகத்துல சிரிப்பை மட்டும் தான் பார்க்கணும்' என ஆறுதல் சொன்னாங்க. அந்த வார்த்தை இன்னும் என் காதில் கேட்டுட்டே இருக்கு. அதுதான் நான் அவங்களை கடைசியாகப் பார்த்தது.  அதற்குப் பிறகு அவரை பார்க்க முடியவில்லை. அவர் சொன்னது போல அதற்கான வேலைகள் நடந்து கொண்டிருக்கும்போதே அம்மா மருத்துவமனையில் அனுமதிக்கப்பட்டுட்டாங்க. நான் இப்போ அடுத்த ஆர்டருக்காக காத்திட்டு இருக்கேன். இன்னும் ஆர்டர் என் கைக்கு வரவில்லை''

MUST READ