Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

‘துப்பாக்கிச் சூட்டிற்கு மத்திய அரசே காரணம்!’  -கொதிக்கும் மீனவர்கள்

மிழக மீனவர்கள் மீது இலங்கைக் கடற்படை நடத்திய துப்பாக்கிச் சூட்டால் கொந்தளித்துப் போயுள்ளனர் மீனவர்கள். ‘ மீனவர்கள் மீதான கைது நடவடிக்கை தொடரும் என இலங்கை அமைச்சர் கூறியபோது, மத்திய அரசு எதிர்ப்பு தெரிவிக்காததே காரணம்’ எனவும் வேதனைப்படுகின்றனர். 

நாகை மாவட்டம், கோடியக்கரைக்கு அருகே, கிளிஞ்சல்மேடு கிராமத்தைச் சேர்ந்த மீனவர்கள் மீன்பிடித்துக் கொண்டிருந்தனர். அப்போது அங்கு விரைந்து வந்த இலங்கை கடற்படையினர் மீனவர்களின் விசைப்படகு மீது துப்பாக்கி சூடு நடத்தினர். இந்த சம்பவத்தில், மீனவர்கள் பாலமுருகன், அரவிந்த் ஆகியோருக்கு பலத்த காயம் ஏற்பட்டது. காயமடைந்த இருவரும் புதுச்சேரி மருத்துவமனையில் அனுமதிக்கப்பட்டுள்ளனர். இதுகுறித்து நம்மிடம் பேசிய ராமநாதபுரம் தொகுதி முன்னாள் எம்.எல்.ஏவும் மனிதநேய மக்கள் கட்சித் தலைவருமான பேராசிரியர் ஜவாஹிருல்லா, “ கடந்த 30 ஆண்டுகளாக தமிழக மீனவர்கள் மீது இலங்கை கடற்படை நடத்திய தாக்குதல்களில் சுமார் 800 பேர் உயிரிழந்து உள்ளனர். அண்மையில், டெல்லியில்  நடைபெற்ற மீனவர் பேச்சுவார்த்தையின் போது இலங்கை மீன்வளத் துறை அமைச்சர் மகிந்த அமரவீரா பேசும்போது, ‘ தமிழக மீனவர்களைக் கைது செய்யும் எங்கள் நடவடிக்கை தொடரும்’ என்று அறிவித்தார். அதற்கு மத்திய அரசு வலுவான எதிர்ப்பைப் பதிவு செய்யவில்லை. பேச்சுவார்த்தையின்போது, 

‘ மத்திய அமைச்சர்களும் அதிகாரிகளும் தமிழக மீனவர்களின் நலன் காக்கும் வகையில் கருத்துகளை தெரிவிக்கவில்லை’ என்று தமிழக மற்றும் புதுவை மாநில மீனவர்களின் பிரதிநிதிகள் விமர்சித்துள்ளனர். மத்திய அரசின் மௌனத்தை சாதகமாக பயன்படுத்திக் கொண்டு, நமது மீனவர்கள் மீது துப்பாக்கி சூடு நடத்தியுள்ளது. இதற்கு பிரதமர் மோடியே பொறுப்பேற்க வேண்டும். மத்திய அரசு இனியும் தாமதிக்காமல், இந்தியாவில் உள்ள இலங்கை தூதரை அழைத்து துப்பாக்கி சூட்டிற்கு தனது கண்டனத்தை தெரிவிக்க வேண்டும். துப்பாக்கி சூட்டில் படுகாயமடைந்த மீனவர்களுக்கு உரிய நிவாரணத் தொகையை வழங்க வேண்டும். இது போன்ற சம்பவங்கள் எதிர்காலத்தில் நடப்பதை தடுக்க உறுதியான நடவடிக்கைகளை மத்திய அரசு எடுக்க வேண்டும்” எனக் கொந்தளித்தார். 

அகில இந்திய பாரம்பரிய மீனவர் சங்கத்தின் தலைவர் சே.சின்னத்தம்பி நம்மிடம், “ காரைக்கால், நாகை மாவட்ட மீனவர்கள் மீது துப்பாக்கிச் சூடு நடத்தப்பட்ட சம்பவத்தால், மீனவ சமூகத்து மக்கள் கொந்தளிப்பில் உள்ளனர். ராணுவத்தின் மீது துப்பாக்கிச் சூடு நடத்தும்போது, கொந்தளிக்கிறார் பிரதமர் மோடி. ஆனால், தமிழக மீனவர்கள் துப்பாக்கிச் சூட்டுக்கு ஆளாகும்போது மத்திய அரசு கண்டுகொள்வதில்லை. கடல் எல்லையைக் காப்பது மீனவ மக்கள்தான்.

ராஜீவ்காந்தி பிரதமராக இருந்த காலத்தில், மீனவர்களைத் தாக்கியதற்காக, இலங்கை கடற்படையை சிறைபிடித்து வந்தார். அப்படியொரு நடவடிக்கையில் ஈடுபட்டால் மட்டுமே, நமது அரசின் மீது இலங்கை அரசுக்கு அச்சத்தை உருவாக்க முடியும். டெல்லியில் நடைபெற்ற பேச்சுவார்த்தையில், தமிழக மீனவர்கள் மீது தாக்குதல் நடத்தப்படாது என உறுதியளிக்கப்பட்டிருந்தது. அந்த உறுதிமொழியை மீறிவிட்டது இலங்கை கடற்படை. இதற்கு என்ன பதில் சொல்லப் போகிறது மத்திய அரசு” என்றார் குமுறலோடு. 

- ஆ.விஜயானந்த்

Advertisement
Advertisement
Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement
[X] Close