Vikatan.com

www.vikatan.com would like to send you push notifications.

Notifications can be turned off anytime from browser settings.

இலங்கையை இந்தியா கண்டிக்க வேண்டும்!

 

தமிழக மீனவர்கள் மீது துப்பாக்கிச் சூடு நடத்தப்பட்ட விவகாரத்தில் இலங்கையை இந்தியா கண்டிக்க வேண்டும் என்று பா.ம.க. இளைஞரணித் தலைவர் அன்புமணி  வலியுறுத்தி உள்ளார்.

இது தொடர்பாக அவர் வெளியிட்டுள்ள அறிக்கையில், "வங்கக்கடலில் கோடியக்கரை அருகில் இந்திய கடல் எல்லைக்குள் மீன் பிடித்துக் கொண்டிருந்த தமிழகம் மற்றும் புதுவை மீனவர்கள் மீது சிங்களப்படை தாக்குதல் நடத்தியிருக்கிறது. இத்தாக்குதலில் இரு மீனவர்கள் படுகாயமடைந்து மருத்துவமனையில் அனுமதிக்கப்பட்டிருக்கின்றனர். மீனவர்கள் மீது அத்துமீறி துப்பாக்கிச் சூடு நடத்திய சிங்களப்படையினரின் நடவடிக்கை கண்டிக்கத்தக்கதாகும்.

நாகப்பட்டினம், காரைக்கால் ஆகிய பகுதிகளைச் சேர்ந்த மீனவர்கள் நேற்று வங்கக்கடலுக்கு மீன் பிடிக்கச் சென்றனர். கோடியக்கரை அருகில் இந்திய எல்லைக்குள் அவர்கள் மீன்பிடித்துக் கொண்டிருந்தபோது அத்துமீறி நுழைந்த சிங்களப்படை சரமாரியாக துப்பாக்கிச்சூடு நடத்தியுள்ளது. தமிழக மீனவர்கள் எல்லை தாண்டி செல்லாத நிலையில், எந்தவிதமான ஆத்திரமூட்டும் நிகழ்வுகளும் நடக்காத நிலையில் சிங்களப்படையினர் துப்பாக்கிச்சூடு நடத்தியது ஏன்? என்பதை புரிந்து கொள்ள முடியவில்லை. இந்த தாக்குதலின் பின்னணியில் ஏதோ சதி இருப்பதை மட்டும் யூகிக்க முடிகிறது.


1980-ம் ஆண்டுகளின் தொடக்கம் முதல் 2011-ம் ஆண்டு வரை சிங்களப்படையினர் நடத்திய தாக்குதலில் 800 க்கும் மேற்பட்ட தமிழக மீனவர்கள் கொல்லப்பட்டுள்ளனர். எனினும், 2011-ம் ஆண்டுக்குப் பிறகு தமிழக மீனவர்கள் மீது துப்பாக்கிச்சுடு நடத்தப்படுவதில்லை. மாறாக, தமிழக மீனவர்களை கைது செய்து, அவர்களின் படகுகளை பறிமுதல் செய்வதையும் இலங்கை அரசு வாடிக்கையாகக் கொண்டிருக்கிறது. கைது செய்யப்படும் மீனவர்களை 3 மாதங்களுக்கு பிறகு விடுதலை செய்யும் போதிலும், அவர்களின் படகுகளை திருப்பித்தர இலங்கை அரசு மறுத்து வருகிறது. இன்றைய நிலையில் கூட தமிழக மீனவர்களுக்கு சொந்தமான நூற்றுக்கும் மேற்பட்ட மீன்பிடி படகுகள் சிங்கள அரசின் பாதுகாப்பில் உள்ளன. அவற்றை விடுவிக்க இலங்கை அரசு மறுக்கிறது.

இந்த பிரச்னைகளுக்கு தீர்வு காணும் நோக்குடன் இரு நாட்டு வெளியுறவுத்துறை அமைச்சர்கள்  இடையிலான பேச்சுக்கள் கடந்த 5-ம் தேதி டெல்லியில் நடைபெற்றன. இந்த பேச்சுக்குப் பிறகு செய்தியாளர்களிடம் பேசிய இலங்கை வெளியுறவுத் துறை அமைச்சர் மங்கள சமரவீரா, 'தமிழ்நாட்டு மீனவர்கள் எல்லை தாண்டி வந்து மீன்பிடித்தாலும் அவர்கள் மீது இனி எந்த தாக்குதலும் நடத்தப்படாது' என்று உறுதி அளித்தார். தொடர்ந்து நடைபெற்ற மீனவர்கள் பிரச்னைக்கான இந்திய - இலங்கை கூட்டுப்பணிக்குழு கூட்டத்திலும் இதே நிலைப்பாட்டை இலங்கை அமைச்சர் தெரிவித்தார். மேலும், இரு நாட்டு மீனவர்களின் பிரச்னைகளுக்கு தீர்வு காண்பது, கைது செய்யப்பட்ட மீனவர்களையும், அவர்களின் படகுகளையும் விடுவிப்பது, மீனவர்களை எல்லை தாண்டி மீன்பிடிக்க அனுமதிப்பது  ஆகியவற்றுக்கான நடவடிக்கைகளை மேற்கொள்ள இரு நாட்டு அமைச்சர்களும் முடிவு செய்தனர்.

மீனவர்கள் பிரச்னையை தீர்ப்பதற்காக இரு நாட்டு அரசுகளும் எடுத்து வரும் நடவடிக்கைகளை சீர்குலைப்பதற்காகவே, இலங்கை அமைச்சரின் வாக்குறுதியையும் மீறி தமிழக மீனவர்கள் மீது சிங்களப்படையினர் தாக்குதல் நடத்தியிருப்பதாக தோன்றுகிறது. பாகிஸ்தானைப் போலவே சிங்கள ராணுவமும் பேரினவாதிகளின் கட்டுப்பாட்டுக்குள் சென்று விட்ட நிலையில், மீனவர்கள் பிரச்னை தீரக்கூடாது என்பதற்காக இலங்கை கடற்படையினர் இவ்வாறு செய்திருப்பதாகக் கூறப்படுகிறது. அதுமட்டுமின்றி, இந்தத் தாக்குதல் இந்திய அரசின் இறையான்மை மீது நடத்தப்பட்ட தாக்குதலாகும். இத்தகைய தாக்குதல்கள் தொடர அனுமதிக்கப்பட்டால் அது மிகமோசமான விளைவுகளை ஏற்படுத்தும். எனவே, இந்தியாவுக்கான இலங்கை தூதரை அழைத்து இந்தியாவின்  கண்டனத்தையும், எச்சரிக்கையையும் தெரிவிக்க வேண்டும். அதுமட்டுமின்றி, இத்தாக்குதலுக்கு காரணமான இலங்கை சிங்களப்படையினர் மீது இந்திய தண்டனைச் சட்டத்தின் கீழ் வழக்குப்பதிவு செய்து, இண்டர்போல் உதவியுடன் கைது செய்யவும் மத்திய அரசு நடவடிக்கை எடுக்க வேண்டும். சிங்களைப் படையினரின் தாக்குதலில் காயமடைந்து புதுவை ஜிப்மர் மருத்துவமனையில் மருத்துவம் பெற்று வரும் மீனவர்கள் அரவிந்த், தினேஷ் ஆகியோருக்கு தலா ரூ.5 லட்சம் நிதி உதவியை மத்திய அரசு வழங்க வேண்டும்" என்றும் கூறியுள்ளார்.

எடிட்டர் சாய்ஸ்

ஜெர்சி மாடுகள், பிரேசில் காபி, மருத்துவமனை உறுதி! ஜெயலலிதா பற்றி தோழியின் நினைவலைகள்
placeholder

அதே மாதிரி ஜெயலலிதா தன்னுடைய 10 வயதில் சிவாஜி கணேசன் முன்னிலையில் மயிலாப்பூரில் செய்த நடன அரங்கேற்றப் படங்கள் முதல் அதற்குப் பிறகான அவரது சின்ன வயசுப் படங்களை நாங்கள் தொகுத்திருந்தோம். அதை 2012 ம் ஆண்டு, எனக்கு அவரை சந்திக்கும் வாய்ப்புக் கிடைத்த போது கொடுத்தேன். அதைப் பார்த்து ரொம்ப சந்தோஷமாகிட்டாங்க. அந்தப் படத் தொகுப்பை, தன்னோட ஹேண்ட் பேக்ல வச்சுக்கிட்டாங்க. பத்திரமா வைத்துக் கொள்வதாகவும் சொன்னாங்க. சினிமாக்காரங்க என்றால் ஈஸியாக அணுகலாம் என்கிற திரையை உடைத்து, அவங்க தனி ரூட்டைப் போட்டு, அதை மத்தவங்க ஃபாலோ பண்ற அளவுக்கு வாழ்ந்து காட்டினாங்க. குறிப்பா, சினிமா விழாக்கள், நிகழ்ச்சிகளுக்கு போக மாட்டாங்க. 

அம்மாவிடமிருந்து போன் வந்தால்...!? - உருகும் வீணை காயத்ரி
placeholder

''சமீபத்தில் கொலை மிரட்டல் விட்டப் பையனால் அம்மாவை சந்திக்க வேண்டிய சூழ்நிலை ஏற்பட்டது. கடந்த ஜூலை 27-ம் தேதி சி.எம் ஆபீஸ்ல இருந்து போன் வந்தது. அம்மா உங்களை உடனே வரச்சொன்னதா சொன்னாங்க. நான் கொஞ்சமும் யோசிக்காமல் போய் நின்னேன். பொதுவாகவே நானும், அவங்களும்தான் தனியாகத்தான் பேசிப்போம். ஆனா, அன்றைக்கு, எல்லா அதிகாரிகளும், இருந்தாங்க. அவங்க முன்னாடி, 'எப்படி இருக்கீங்க' என கேட்டார். நான் பதில் சொல்லிவிட்டு, 'நவம்பர் மாதத்தோடு என்னோட டர்ன் முடியுது' என சொன்னேன். இதற்கு அவர், எல்லோருடைய முன்னிலையிலும், அடுத்த மூன்று வருஷத்துக்கும் நீங்களே துணை வேந்தரா இருங்க என சொல்லிவிட்டு, அவருக்கு பின்னால் இருக்கும் எல்லோரையும் பார்த்து மறுபடியும்  இதையே சொன்னார். அப்போதுதான் அவர்கிட்ட, 'நான் உங்களை சந்திக்க இரண்டு வருஷமாக முயற்சி செய்துட்டு இருந்தேன். இந்த கொலை மிரட்டல் காரணமாகத்தான் உங்களை சந்திக்கிற வாய்ப்பு கிடைச்சிருக்கு, நான் தனி மனுஷியாக இசை பல்கலைக்கழகத்தை நடத்தி வருகிறேன்' என சொன்னேன். உடனே, சம்பந்தப்பட்டவர்களை அழைத்து, அவங்களுக்குத் தேவையான எல்லா உதவிகளையும் செய்து கொடுங்க என சொன்னார்.  'அடுத்த முறைப் பார்க்கும்போது உங்க முகத்துல சிரிப்பை மட்டும் தான் பார்க்கணும்' என ஆறுதல் சொன்னாங்க. அந்த வார்த்தை இன்னும் என் காதில் கேட்டுட்டே இருக்கு. அதுதான் நான் அவங்களை கடைசியாகப் பார்த்தது.  அதற்குப் பிறகு அவரை பார்க்க முடியவில்லை. அவர் சொன்னது போல அதற்கான வேலைகள் நடந்து கொண்டிருக்கும்போதே அம்மா மருத்துவமனையில் அனுமதிக்கப்பட்டுட்டாங்க. நான் இப்போ அடுத்த ஆர்டருக்காக காத்திட்டு இருக்கேன். இன்னும் ஆர்டர் என் கைக்கு வரவில்லை''

MUST READ