Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

தருமபுரி திவ்யாவைச் சந்தித்த உடுமலை கௌசல்யா - ஃபேஸ்புக்கில் உருக்கமான பதிவு!

தமிழகம், அந்த இரண்டு மரணங்களையும் அத்தனை எளிதாக மறந்திருக்காது. கடந்த 2013-ம் ஆண்டு, தருமபுரியில் அட்டவணைப் பிரிவைச் சேர்ந்த இளவரசன், மர்மமான முறையில் ரயில்வே தண்டவாளத்தில் இறந்துகிடந்தார். அவரிடம் இருந்து பிரிக்கப்பட்ட அவரது மனைவி திவ்யாவின் குடும்பத்துக்கும் அவருக்கும் இடையில், சட்ட ரீதியாக வாதங்கள் நடந்துவந்த நிலையில், மர்மமான முறையில் இளவரசன் இறந்தார். இது கொலை அல்ல தற்கொலைதான் என உயர்நீதிமன்றம் தீர்ப்பளித்தது.

கவுசல்யா

கடந்த ஆண்டு மார்ச் மாதம் 13-ம் தேதியன்று, உடுமலை மத்தியப் பேருந்துநிலையம் எதிரில், இருசக்கர வாகனத்தில் வந்த மூன்று பேர், கௌசல்யா மற்றும் சங்கரை, பட்டப்பகலில் அரிவாளால் சரமாரியாக வெட்டினர். கண்காணிப்புக் கேமராவில் பதிவான இந்தச் சம்பவம், தமிழகத்தையே அதிர்ச்சிக்கு உள்ளாக்கியது. ரத்த வெள்ளத்தில் மிதந்த சங்கர், உயிரிழந்தார். கௌசல்யா சிகிச்சைக்குப் பிறகு மீண்டு வந்தார். வேறு சமூகத்தைச் சேர்ந்தவரைக் காதலித்துத் திருமணம்செய்த ஒரே காரணத்துக்காக, கௌசல்யாவின் பெற்றோரே கூலிப்படையை ஏவி கொலைசெய்தது, பொதுமக்களிடையே அதிர்ச்சியை ஏற்படுத்தியது.

இந்த நிலையில்... கௌசல்யா, இளவரசியைச் சந்தித்ததுகுறித்து தனது ஃபேஸ்புக் பக்கத்தில் உருக்கமான பதிவு ஒன்றை எழுதியிருக்கிறார். கௌசல்யா அதில், "இன்று, என்னை அறிமுகமில்லாத ஒரு தோழரை, அவங்க வீட்டுக்குப் போய் சந்திச்சேன். ஆனா, அவங்களப்பத்தி எனக்கு நெறையா அறிமுகமிருக்குது. அந்தத் தோழரை சந்திச்சுப் பேசுற வரைக்கும், அவங்கமேல இருந்த 'எண்ணம்' வேற. எங்களுக்கு முன்னாடி தமிழ்நாடே ஒட்டுமொத்தமா, அந்தக் கொடூர நிகழ்ச்சியத் திரும்பிப் பாத்தாங்க. ரெண்டு பேரு, மனசுக்குப் புடுச்சவங்கள காதலிச்சதுக்காக!

மணக்கோலத்தில் சங்கர் மற்றும் கவுசல்யா

எங்க சாதிப் பொண்ணை காதலிச்சுட்டான்னு, தன்னோட ஊர்ல இருக்கற, தாழ்த்தப்பட்ட மக்கள் குடியிருக்கிற, 300-க்கும் மேற்பட்ட வீடுகளைக் கொழுத்துனாங்க. கலவரம் நடந்துச்சு. ஏராளமான பொதுமக்கள் அதுல பாதிக்கப்பட்டாங்க. இவங்களுக்கான வழக்கு நீதிமன்றத்துல நடந்துட்டு இருக்கும்போதே, இவங்க ரெண்டுபேரையும் பிரிச்சு வச்சுட்டாங்க. அவங்களுடைய, காதலனும் "மர்மமான" முறையில...

ஆனா, இன்னைக்கு அவங்கள சந்திச்சுப் பேசனதுக்குப் பிறகு, அவங்கமேல ஏற்பட்ட மரியாதைங்கிறது வேற... ஆமாம். நான், "திவ்யா இளவரசனை" சந்தித்தேன். அவங்களும், அவங்க அம்மாவும் மட்டுந்தான் அந்த வீட்டுல இருக்காங்க. இப்ப கல்லூரிக்கு போய்ட்டு, வந்துட்டு இருக்காங்க. வீட்டவிட்டு வெளில எங்கேயுமே வருவதில்லை. அக்கம், பக்கம் உள்ளவங்க "எல்லாரும்" அவங்களோட ஒவ்வொரு அசைவையும், "இந்த நிமிசம் வரைக்கும்" கண்ணு காது வச்சு பேசிக்கிட்டுதான் இருக்காங்கங்கிறதால!

ஒரு பொட்டு வச்சுக்கிட்டு சாதரணமா வெளில வந்தாக்கூட, "இவளுக்கென்ன பழசெல்லாம் மறந்துட்டு நல்லாதான் இருக்கா" ன்னு அவங்க வீட்ட சுத்தி உள்ளவங்க சொல்றாங்க. இப்படி, நிறைய விசயத்துல அவங்க மனசளவுல பாதிக்கப்பட்டிருக்காங்க. அதனால, வீட்டுக்கு வெளில நடக்கற செய்தி எதுவும் அந்த தோழருக்கு தெரியறது இல்ல. அவங்ககிட்ட நான் ரொம்ப நேரமெல்லாம் பேசறதுக்கு வாய்ப்பு கிடைக்கல.

அவங்களால மனசுவிட்டும் எங்கிட்ட பேசமுடியல. அவங்க அம்மா பக்கத்துலேயே நின்னுட்டு இருந்ததாலன்னு நான் புரிஞ்சுக்கிட்டேன். கிடைச்ச நேரத்துல பேசிக்கிட்டு இருக்கும்போது, நான் ஒரு கேள்வி கேட்டேன். "உங்களால எப்படி இயல்பா இருக்க முடியுது?"னு . அதுக்கு அவங்க "நான் ரசித்து ரசித்து காதலித்த ஒருவனின் நினைவையும், நிகழ்வையும் என்னால் எப்படி
எளிமையாக மறந்துவிட முடியும்"னு சொன்னாங்க" எனப் பதிவிட்டிருக்கிறார்.

Advertisement
Advertisement
Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement
[X] Close