Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

‘இனி யாரும் தினகரனை ஆதரிக்க வேண்டாம்!’ - திவாகரனின் ‘திடீர்’ உற்சாகம் #VikatanExclusive

நடராசன்-திவாகரன்

அ.தி.மு.கவின் இரண்டு அணிகளும் இணைவதில் சசிகலாவின் தம்பி திவாகரன் உள்பட குடும்பத்தினர் பலரும் மகிழ்ச்சியாக உள்ளனர். 'அமைச்சர்கள் அனைவரும் ஒன்று திரண்டு சரியான முடிவை எடுத்துள்ளனர். அம்மாவின் ஆட்சியைத் தொண்டர்கள் தொடர வேண்டும் என்பதுதான் எங்களின் விருப்பம்' எனவும் அதிர வைக்கின்றனர்.

தமிழக முதல்வராக இருந்த ஜெயலலிதா உடல்நலக் குறைவு காரணமாக, அப்போலோ மருத்துவமனையில் அனுமதிக்கப்பட்ட நாளில் இருந்தே மருத்துவமனையின் இரண்டாவது மாடியை கட்டுப்பாட்டுக்குள் கொண்டு வந்தது திவாகரன் குடும்பம். மருத்துவமனை வாசலில் நின்றபடியே, நிர்வாகிகளுக்கு உத்தரவிடுவது என வலம் வந்தார் திவாகரன். ஜெயலலிதாவின் மருத்துவ சிகிச்சைக்காக வெளிநாடுகளுக்குப் பயணம் செய்தார் அவருடைய மகன் ஜெயானந்த். அவருடைய மகள் ராஜமாதங்கியும் அப்போலோவிலேயே தங்கினார். காங்கிரஸ் தலைவர் ராகுல்காந்தி, ஆளுநர் வித்யாசாகர் ராவ் உள்பட முக்கிய புள்ளிகள் ஜெயலலிதா உடல்நலனை விசாரிக்க வந்தபோதும், அவரது குடும்பமே முன்னிலை வகித்தது. ஜெயலலிதா இறந்த பிறகு, ராஜாஜி ஹாலில் திவாகரனே முன்னின்றார். ஆனால், அடுத்து வந்த நாட்களில் இந்தக் குடும்பத்தை ஓரம்கட்டிவிட்டு தினகரனும் டாக்டர்.வெங்கடேஸும் லைம் லைட்டுக்கு வந்தனர். சசிகலாவின் நடை, உடை, பாவனைகளில் மாற்றத்தைக் கொண்டு வந்தார் தினகரன்.

'இனி சசிகலா குடும்பத்தில் யாருக்கும் இடமில்லை' என டி.டி.வி. அளித்த பேட்டியால் கொந்தளித்துப் போனார் திவாகரன். 'குடும்பத்தில் உள்ளவர்களுக்கு இடம் இல்லை என்றால், இவர் எந்தக் குடும்பத்தைச் சேர்ந்தவர்? அவருக்குத் தேவையில்லாமல் அதிகாரத்தை வழங்கிவிட்டீர்கள். அவர் நம் குடும்பத்தை மட்டுமல்ல. ஆட்சியையே கவிழ்க்கப் போகிறார். தளவாய் சுந்தரத்தை வைத்துக் கொண்டு ஆடுகிறார். அமைச்சர்கள் பலரும் அதிருப்தியில் உள்ளனர்' என பெங்களூரு சிறையிலேயே சசிகலாவிடம் எடுத்துச் சொன்னார். "சசிகலாவையே ஓரம்கட்டும் அளவுக்கு தினகரனின் நடவடிக்கைகள் எல்லை மீறிப் போய்விட்டன. அவரை யாராலும் கட்டுப்படுத்த முடியவில்லை. ' அமைதியாக இருந்து காரியம் சாதிக்கலாம்' என குடும்பத்தின் மூத்தவர்கள் சொன்னதையும் கேட்காமல், தன்னைத்தானே வேட்பாளராக அறிவித்துக் கொண்டார். இதுதான் வினையாகிப் போனது" என விவரித்த சசிகலா குடும்ப உறவினர் ஒருவர், 

ஜெயானந்த் திவாகரன்

" ஜெயலலிதா இறந்த பிறகு, கட்சியைக் கட்டுப்பாட்டுக்குள் கொண்டு வருவதற்கான வேலைகளில் திவாகரன் இறங்கினார். மத்திய அரசின் நெருக்கடிகளை உணர்ந்து, ' இது ஆரியர் கட்சி அல்ல. திராவிடர் கட்சி' எனவும் ஆவேசப்பட்டார். சசிகலாவின் கணவர் நடராசனும், 'ஆமாம். நாங்கள் குடும்ப ஆட்சியை செய்வோம்' எனக் கொதித்தார். திவாகரன் கை ஓங்கும் நேரத்தில், சசிகலாவை கைப்பிடிக்குள் வைத்துக் கொண்டார் தினகரன். ' குடும்ப ஆட்சி என்று வெளியில் விமர்சனம் செய்கிறார்கள். ஆட்சி அதிகாரத்துக்குள் அவர்கள் ஜெயானந்த்தலையிடுகிறார்கள். அமைச்சர்களால் சுயமாக முடிவெடுக்க முடியவில்லை. யாருக்குக் கட்டுப்படுவது என அவர்களுக்குத் தெரியவில்லை. அவர்களை ஒதுங்கியிருக்கச் சொல்லுங்கள்' எனக் கூறிவிட்டார். சசிகலாவும், ' கார்டன் நிர்வாகத்தை வெங்கடேஷும் கட்சி நிர்வாகத்தை தினகரனும் கவனித்துக் கொள்ளட்டும்' எனக் கூறிவிட்டே சிறை சென்றார். இதனை திவாகரன் தரப்பினர் ரசிக்கவில்லை.

முதல்வராக எடப்பாடி பழனிசாமி பதவியேற்கும்போதும், ஆளுநர் வித்யாசாகர் ராவை தனியே சந்தித்தார் திவாகரன். ' தங்களால்தான் விவகாரம் எளிதாக முடிந்தது' என டி.டி.விக்கு சுட்டிக் காட்டினர். இதன்பின்னரும் திவாகரன் சம்பந்தியான போலீஸ் அதிகாரி ஜெயச்சந்திரனை கரூருக்கு இடமாற்றம் செய்து குடும்ப உறவுகளின் கோபத்தை சம்பாதித்தார். 'இதற்கு மேலும் தினகரனை வளர்த்துவிட்டால், அனைவருக்கும் ஆபத்து' என்று உணர்ந்ததால்தான், இணைப்பு முயற்சிகளுக்கு அவரும் ஆதரவு தெரிவித்தார்.

சசிகலாவின் அண்ணன் மகன் மகாதேவன் இறந்தபோது, தினகரனையும் திவாகரனையும் அழைத்து சமசரம் பேசினார் நடராசன். 'நீங்கள் ஒற்றுமையாக இருக்கவில்லையென்றால், எல்லாம் நம் கையைவிட்டுப் போய்விடும். அமைதியாக இருங்கள்' என வலியுறுத்தினார். இந்த சமசரத்துக்கு தினகரன் உடன்படவில்லை. எதிர்பார்த்தது போலவே, ஆட்சியும் கட்சியும் கையைவிட்டுப் போய்விட்டது. இதனால் திவாகரன் தரப்புக்கு எந்த இழப்பும் இல்லை" என்றார் விரிவாக. 

அ.தி.மு.கவின் இரண்டு அணிகளும் இணைவதை வரவேற்று கருத்து தெரிவித்திருந்தார் திவாகரன் மகன் ஜெயானந்த். இதுகுறித்து அவருடைய விளக்கத்தை அறிய தொடர்பு கொண்டோம். "தொண்டை வலி அதிகமாக இருப்பதால், அவரால் பேச முடியவில்லை" என விவரித்த அவருடைய உதவியாளர், "முன்னாள் முதல்வர் அம்மாவின் உழைப்பால் உயர்ந்த கட்சி இது. கழகத்தின் மூத்தவர்களும் தொண்டர்களும் இணைந்து கட்சியை வழிநடத்த வேண்டும் என்பதுதான் திவாகரனின் விருப்பம். இப்படியொரு முடிவை நாங்களும் வரவேற்கிறோம். கட்சி உடையாமல் காக்க இது ஒன்றுதான் ஒரே வழி" என்றார். 

- ஆ.விஜயானந்த்

Advertisement
Advertisement
Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement
[X] Close