Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

ரூ.450 கோடியும் 2,000 பிஇ இடங்களும் வீணாகும் ஆபத்து! ராமதாஸ் எச்சரிக்கை

அரசின் அபத்தங்களால் 2000 பொறியியல் சேர்க்கை இடங்கள் வீணாகும் ஆபத்து இருப்பதாகக் கூறியுள்ள பாமக நிறுவனர் ராமதாஸ், அண்ணா பல்கலைக்கழகத்தில் இடங்கள் காலியானால் அதைத் தகுதியானவர்களைக் கொண்டு நிரப்ப வேண்டும் என்று கேட்டுக்கொண்டுள்ளார்.

இது தொடர்பாக அவர் இன்று வெளியிட்டுள்ள அறிக்கையில், "மருத்துவப் படிப்பு மாணவர் சேர்க்கைக்கான நீட் தேர்வு விவகாரத்தில் தமிழக அரசு செய்த அபத்தங்கள் மற்றும் குளறுபடிகளால் பொறியியல், கால்நடை அறிவியல், வேளாண் அறிவியல் படிப்புகளுக்கான மாணவர் சேர்க்கை இடங்கள் யாருக்கும் பயன்படாமல் காலியாகக் கிடக்கும் ஆபத்து ஏற்பட்டுள்ளது. அண்ணா பல்கலைக்கழக மாணவர் சேர்க்கைப் பிரிவு வெளியிட்டுள்ள அறிவிப்பு இதை உறுதி செய்கிறது.

தமிழ்நாட்டில் மருத்துவப் படிப்புக்கான கலந்தாய்வை நடத்தி முடித்த பிறகுதான் பொறியியல் உள்ளிட்ட படிப்புகளுக்குக் கலந்தாய்வு நடத்தப்படும். இதுதான் காலம்காலமாக கடைபிடிக்கப்படும் நடைமுறையாகும். ஆனால், மருத்துவ மாணவர் சேர்க்கைக்கான நீட் தேர்விலிருந்து தமிழகத்திற்கு விலக்குக் கேட்டு தமிழக சட்டப்பேரவையில் நிறைவேற்றப்பட்ட இரு மசோதாக்கள் மீது மத்திய அரசு எந்தவித முடிவும் எடுக்காததால் மருத்துவக் கலந்தாய்வு எப்போது தொடங்கும் என்பதை இதுவரை கணிக்க முடியவில்லை.  இதனால் பொறியியல் உள்ளிட்ட பிற படிப்புகளைப் பயிலத் திட்டமிட்டுள்ள மாணவர்கள் எவ்வகையிலும் பாதிக்கப்பட்டு விடக்கூடாது என்ற எண்ணத்தில், விளைவுகளைச் சிந்தித்துப் பார்க்காமல் அப்படிப்புகளுக்குக் கலந்தாய்வு நடத்தப்பட்டதுதான் இப்போது பலரின் கல்வி வாய்ப்புகளைப் பறிக்கும் சிக்கலாக மாறியுள்ளது.

மருத்துவப் படிப்புக்கான கலந்தாய்வு 12-ம் வகுப்பு மதிப்பெண் அடிப்படையில் நடக்குமா, நீட் மதிப்பெண் அடிப்படையில் நடக்குமா என்பது தெரியாததால், அனைத்து மாணவர்களும் குறைந்தபட்ச கல்வி வாய்ப்பை உறுதி செய்து கொள்வதற்காகப் பொறியியல், கால்நடை அறிவியல், வேளாண் அறிவியல் ஆகிய பாடப்பிரிவுகளில் சேர்ந்துள்ளனர். மருத்துவப் படிப்புக்கான மாணவர் சேர்க்கை எந்த அடிப்படையில் நடந்தாலும், அதில் சேரும் மாணவர்களில் 99 விழுக்காட்டினர் இவற்றில் ஏதேனும் ஒன்றில் ஏற்கெனவே சேர்ந்தவர்களாகத்தான் இருப்பர். அதனால் மருத்துவக் கலந்தாய்வு நிறைவடையும்போது, முன்னணி பொறியியல் கல்லூரிகளில் 2000 இடங்களும், கால்நடை அறிவியல் மற்றும் வேளாண்மை அறிவியல் படிப்புகளில் 1000 இடங்களும் காலியாவதற்கு வாய்ப்புகள் உள்ளன. இந்த இடங்கள் அனைத்தையும் அதற்கு அடுத்த நிலையில் உள்ள மாணவர்களைக் கொண்டு நிரப்புவதுதான் சரியானதாக இருக்கும். ஆனால், அண்ணா பல்கலைக்கழகம் மற்றும் அரசு பொறியியல் கல்லூரிகளில் பயிலும் மாணவர்கள் எவரேனும் மருத்துவப் படிப்பில் சேர்ந்தால் அதனால் ஏற்படும் காலியிடங்கள் நிரப்பப்படாது; அவை காலியாகவே இருக்கும் என்று அண்ணா பல்கலைக்கழகத்தின் மாணவர் சேர்க்கை செயலர் இந்துமதி நாளிதழ் ஒன்றுக்கு அளித்த நேர்காணலில் தெரிவித்துள்ளார். அதேநேரத்தில் தனியார் கல்லூரிகளில் இவ்வாறு ஏற்படும் காலியிடங்களைக் கல்லூரி நிர்வாகங்கள் நிரப்பிக்கொள்ளலாம் என்று அறிவிக்கப்பட்டிருக்கிறது. இது மிகவும் மோசமான அறிவிப்பு ஆகும். இது கடுமையாகக் கண்டிக்கத்தக்கதும் கூட.

மருத்துவப் படிப்பில் சேரும் பொறியியல் உள்ளிட்ட பிற படிப்புகளைப் பயிலும் மாணவர்கள் பெரும்பாலும் அரசு கல்லூரிகளில் படிப்பவர்களாகத்தான் இருப்பார்கள். உதாரணமாக பொறியியல் மாணவர்கள்  2000 பேர் மருத்துவப் படிப்பில் சேருவதாக வைத்துக் கொண்டால், அவர்கள் 1800 பேர் அண்ணா பல்கலைக்கழகம் மற்றும் அரசு பொறியியல் கல்லூரிகளில் படித்தவர்களாக இருப்பர். மீதமுள்ளவர்கள் புகழ்பெற்ற தனியார் மருத்துவக் கல்லூரிகளில் படித்தவர்களாக இருப்பர். தமிழக அரசின் முடிவால் அண்ணா பல்கலைக்கழகத்திலும், பிற அரசு பொறியியல் கல்லூரிகளிலும் 1800 இடங்கள் நிரப்பப்படாமல் வீணாகும். அண்ணா பல்கலையில் ஒரு பொறியாளரை உருவாக்குவதற்காக ரூ.25 லட்சம் மக்களின் வரிப்பணம் செலவிடப்படுகிறது. 1800 இடங்கள் நிரப்பப்படாமல் இருந்தால் ரூ.450 கோடி வரிப்பணம் வீணாகும். அண்ணா பல்கலைக்கழகத்தில் இடங்கள் காலியானால் அதைத் தகுதியானவர்களைக் கொண்டு நிரப்புவதுதான் முறை. அதை விடுத்து காலியிடங்களை அப்படியே வீணாக்குவது முறையல்ல. வேளாண்மை கல்லூரிகளின் சிக்கல் வித்தியாசமானது. முதல் கட்ட கலந்தாய்வில் அதிக மதிப்பெண் பெற்ற மாணவர்கள் பலர் அரசுக் கல்லூரிகளில் இடம் கிடைக்காமல் தனியார்க் கல்லூரிகளில் சேர்ந்துள்ளனர்.  மருத்துவப்படிப்பில் சேர்ந்த மாணவர்கள் விலகும்போது ஏற்படும் காலியிடங்களை நிரப்ப இரண்டாம் கட்ட கலந்தாய்வு நடக்கும். ஆனால், அதில் அதிக மதிப்பெண் எடுத்து தனியார் கல்லூரிகளில் பயிலும் மாணவர்கள் பங்கேற்க முடியாது. மாறாக அவர்களை விடக் குறைந்த மதிப்பெண் எடுத்து, இதுவரை எந்தக் கல்லூரியிலும் சேராதவர்கள் இரண்டாம் கட்ட கலந்தாய்வில் கலந்துகொண்டு அரசுக் கல்லூரிகளில் சேர்ந்து இலவசமாகப் படிப்பார்கள். ஆனால், அதிக மதிப்பெண் எடுத்தவர்களோ தனியார்க் கல்லூரிகளில் லட்சக்கணக்கில் பணம் செலுத்திப் படிக்க வேண்டும். இது எந்த வகையான சமூக நீதி?

இந்தப் பிரச்னைகள் அனைத்துக்கும் காரணம் மருத்துவப் படிப்புக்கு முன்பாக மற்ற படிப்புகளுக்கு மாணவர் சேர்க்கை கலந்தாய்வை நடத்தியதுதான். இது தவறான அணுகுமுறை; இதனால் தேவையற்ற குழப்பங்கள் ஏற்படும் என்று 23.06.2017 அன்று வெளியிட்ட அறிக்கையில் எச்சரித்திருந்தேன். அதை தமிழக அரசு பொருட்படுத்தாததுதான் அனைத்துச் சிக்கல்களுக்கும் காரணமாகும். தமிழக அரசின் தவறான முடிவால் மாணவர்கள் பாதிக்கப்படுவதை அனுமதிக்க முடியாது. எனவே, மருத்துவப் படிப்பில் மாணவர்கள் சேருவதால் ஏற்படும் காலியிடங்களை அதற்கு அடுத்த நிலையில் உள்ள மாணவர்களைக் கொண்டு நிரப்ப வேண்டும். இது மிகவும் நீண்ட நடைமுறை என்றாலும் தவிர்க்க முடியாததாகும். எனவே, ஒரு மாணவர் சேர்க்கை இடம் கூட வீணாகாமல் இருப்பதை அரசு உறுதி செய்ய வேண்டும்" என்று கேட்டுக்கொண்டுள்ளார்.

Advertisement
Advertisement
Advertisement

எடிட்டர் சாய்ஸ்

“மாட்டின் மீதான அக்கறை, சிசுக்கள் மீது கிடையாதா?!” நெஞ்சு பொறுக்குதில்லையே #GorakhpurTragedy
Advertisement

MUST READ

Advertisement
[X] Close