Vikatan.com

www.vikatan.com would like to send you push notifications.

Notifications can be turned off anytime from browser settings.

தாடி வைத்த அப்பாவும்...தங்க மீன் கண்ணம்மாவும் - தூரிகைகளில் விளையாடும் ஸ்நெஷானா சோஸ்!

ப்பாக்கள்...வாழ்நாள் முழுக்க குழந்தைகளை இதயத்தில் சுமப்பதால், கருவில் சுமக்கும் அம்மாக்களுக்கு இணையானவர்கள்...

அதுவும் எல்லா தந்தைகளுக்குமே பெண் குழந்தைகள் என்றால், செல்லமோ செல்லம். அவர்கள்தான் அப்பாக்களின் வாழ்க்கை என்னும் கடலில் நீந்தும் ‘தங்க மீன்கள்'. திருமணத்திற்கு முன்பு வரை ஆண்கள் இவர்களை பெண்களாக பார்த்திருக்கலாம். ஆனால், ஒரு பெண்குழந்தை பிறந்த பிறகு அப்பாக்களாக மாறும் ஆண்களுக்கு இந்த பெயர்கள் எல்லாமே தங்கள் மகளின் பிரதிபிம்பம்தான்.

அப்படிப்பட்ட அன்போவியமான அப்பாக்களுக்கும், அவர்களின் செல்லக்குட்டி மகள்களுக்கும் இடையிலான உறவினை ஓவியப் பாணியில் வரிசைப்படுத்தி அழகூட்டி வருகின்றார் ஸ்நெஷானா சோஸ் என்னும் பெண்மணி. சமூக வலைதளமான ஃபேஸ்புக் மற்றும் இன்ஸ்டாகிராமில், இவருடைய அப்பா - மகள் ஆத்மார்த்தமான பாசப்பிணைப்பின் சித்திரங்கள், அந்த உறவிற்கு இன்னும் கொஞ்சம் வலு சேர்க்கின்றன. 

 
 
ஸ்நெஷானாவின் கற்பனையில், ஒரு குயில் குஞ்சு அளவில் இருக்கும் குழந்தைக்காக அந்த குண்டு அப்பா முழுப்படுக்கையையும் தியாகம் செய்துவிட்டு, இத்துணூண்டு இடத்தில் தூங்குகின்றார். மகளை தலையில் தூக்கி வைத்து ஊரையே வலம் வருகின்றார், தன்னுடைய தொப்பை வயிற்றில் குட்டிப் பாப்பாவை தூங்க வைக்கின்றார்.
 
அவரின் செல்லக் கரடிக்காக, குட்டிக் கரடி பொம்மைகளைக் கழுவிக் கொடுக்கின்றார்.  அவர்கள் இருவரும் ஒரு தனி உலகில் வாசம் செய்கின்றனர். மகளோடு சேர்ந்து செஃப்பாய் மாறி, சமையல் செய்கிறார். தன் கண்ணம்மாவிற்கு பொம்மலாட்டம் காட்டி மகிழ்விக்கின்றார். 
 
குட்டி, குட்டி குறும்புத்தனத்துடன் அப்பா-மகளின் லூட்டியை தூரிகையில் வண்ணக்கலவைகளால் குழைத்துள்ளார் சோஸ். இழையோடும் அப்பா-மகள் அன்பின் அழகியலை காட்டும் இந்த ஓவியங்கள், சமூக வலைதளப் பக்கங்களில் மகள்களைப் பெற்ற அனைவராலும் பெரிதும் ரசிக்கப்பட்டு வருகின்றது.
 
அப்பாக்கள் ராஜ்ஜியம்!
 
-பா.விஜயலட்சுமி
 

எடிட்டர் சாய்ஸ்

MUST READ