Vikatan.com

www.vikatan.com would like to send you push notifications.

Notifications can be turned off anytime from browser settings.

வியக்க வைக்கும் சூரிய மண்டல மாதிரி: யூடியூப் (வீடியோ)

சூரிய மண்டலம் எல்லோருக்கும் தெரிந்தது தான்.ஆனால் உண்மையில் சூரிய மண்டலம் எத்தனை பிரம்மாண்டமானது, அதில் நம்முடைய பூமி எத்தனை சிறியது என்பதை புரிந்து கொள்ள வேண்டும் என்றால் அமெரிக்க இயக்குனர்கள் வைலி ஓவர்ஸ்டிரீட் மற்றும் அலெக்ஸ் போரோஷ் உருவாக்கியுள்ள சூரிய மண்டல மாதிரியை நீங்கள் பார்க்க வேண்டும்.

இவர்கள் இருவரும் இணைந்து, சூரிய மண்டலத்தின் பரப்பிற்கு நிகரான அளவில் உருவாக்கப்பட்ட முதல் மாதிரியை உருவாக்கி இருக்கின்றனர்.இந்த மாதிரியும் சரி, இது உருவான விதத்தை விவரிக்கும் யூடியூப் வீடியோவும் வியக்க வைக்கிறது.

சூரிய மண்டலத்தில் பூமி உள்ளிட்ட கோள்களின் இருப்பிடத்தை உணர்த்தும் எண்ணற்ற படங்களை நாம் பார்த்திருக்கிறோம். அவை எல்லாமே உத்தேசமானவையே தவிர துல்லியமானவை அல்ல; அதாவது கோள்களின் அமைப்பையும் இருப்பிடத்தையும் அவை சித்தரிக்கின்றனவே தவிர, அவற்றுக்கு இடையே உள்ள தொலைவை உணர்த்துவதில்லை.


உதாரணமாக, இந்த படங்களில் பூமிக்கு மிக அருகில் அதன் நிலவான சந்திரன் சிறியதாக இடம் பெற்றிருக்கும். ஆனால், பூமிக்கும் ,சந்திரனுக்கும் இடையிலான உண்மையான தொலைவை கணக்கில் எடுத்துக்கொண்டு அதற்கேற்ப அவற்றின் இடைவெளியை உணர்த்த முயன்றால் பூமியின் இடத்தில் இருந்து சந்திரனை வெகு தூரத்தை காண்பிக்க வேண்டும். இப்படி சூரியன் உள்ளிட்ட ஒவ்வொரு கோளையும் அவற்றின் அளவு மற்றும் அவற்றுக்கு இடையிலான தொலைவுக்கு ஏற்ப வரைபடத்தில் காண்பிக்க முற்பட்டால் ஒன்று அவை வரைபடத்தில் குறிப்பிட முடியாத அளவுக்கு  மிகப்பெரியதாக ஆகிவிடும்;அல்லது கண்ணுக்குத்தெரியாத அளவுக்கு கடுகினும் சிறியதாகி விடும்.

ஆக, பூமி உள்ளிட்ட கோள்களை அவற்றின் நிகரான அளவுக்கு ஏற்ற வகையில் சுருக்கி காண்பிக்க கூடிய வரைபடமே சூரிய மண்டலத்தின் சரியான மாதிரியாக இருக்கும். இத்தகைய மாதிரி இதுவரை உருவாக்கப்படவில்லை.

இந்த மாதிரியை தான் ,வைலி ஓவர்ஸ்டிரீட் மற்றும் அலெக்ஸ் போரோஷ்  உருவாக்கி காட்டியுள்ளனர். சூரிய மண்டலத்தின் சரியான மாதிரியை பார்க்க வேண்டும் என்றால் அதை உருவாக்குவது தவிர வேறு வழியில்லை என்று குறிப்பிட்டபடி வைலி ஓவர்ஸ்டிரீட் இந்த முயற்சியை தனது வீடியோவில் விவரிக்கிறார்.

இவர்கள் உருவாக்கிய மாதிரி காகிதத்தில் இல்லை. அமெரிக்காவின் நெவேடா பாலைவனப்பகுதியில் அமைந்துள்ளது. ஏனெனில் காகிதத்தில் எல்லாம் சூரிய மண்டலத்தை குறிப்பால்தான் உணர்த்த முடியும். அந்த பிரம்மாண்டத்தை அப்படியே சுருக்கி, மனித கண்களுக்கு புரியும் வகையில் காட்ட வேண்டும் என்றால் 7 மைல் பரப்பிலான இடம் தேவை.



அதனால் தான் பாலைவனத்தை தேர்வு செய்தனர். இந்த இடத்தில் நடுவே சூரியனை வைத்து, அதைச்சுற்றி ஒவ்வொரு கோளாக இடம்பெற வைத்துள்ளனர்.

இதில் கவனிக்க வேண்டிய விஷயம் என்ன என்றால், இந்த மாதிரியில் சூரியனின் அளவு பெரிய பலூன் அளவில் இருக்கிறது என்றால் பூமியின் அளவு சின்ன கோலி குண்டு அளவில்தான் இருக்கிறது. வியாழன் கிரகம் ஒரு பெரிய அளவு தர்ப்பூசணி போல இருக்கிறது.

கோள்களின் சுற்றுப்பாதையை வரைவதற்காக காரில் வட்டமிட்டு அதற்கான பாதையை உருவாக்கியுள்ளனர். இதற்காக காரின் பின்னே ஒரு கேனில் விளக்கு வெளிச்சத்தை கொண்டு படம் பிடித்திருக்கின்றனர். ( வீடியோவில், இரவு நேரத்தில் சூரிய மண்டலம் உருவாகும் காட்சி பிரமிக்க வைக்கிறது).

இந்த வீடியோ முழுவதையும் பார்க்கும் போது ஏழு மைல் பரப்பிலான இடத்தில் சுற்றுப்பாதைகளில் சூரியன், பூமி, வியாழன், நெப்டியூன் ( புளோட்டோ இல்லை) கோள்களை பார்க்கும் போது கோலி குண்டு அளவிலான பூமி விண்வெளியில் பூமியின் இடம் எத்தனை சிறியது என சிந்திக்க வைக்கும்.
வீடியோவின் நடுவே இளைஞர் ஓவரிஸ்டிரீட்,  ஒவ்வொரு கோளாக பொருத்திக்கொண்டிருக்கும் போது, உலகம் என் பாக்கெட்டில்தான் எங்காவது இருக்க வேண்டும் என நகைச்சுவயாக குறிப்பிடுவது ரசிக்கும்படி இருக்கிறது.

இந்த வீடியோ ஃபேஸ்புக் மற்றும் யூடியூப்பில் வெளியிடப்பட்டு லட்சக்கணக்கானோரால் பார்த்து ரசிக்கப்பட்டு வருகிறது. அந்த வீடியோ...



- சைபர்சிம்மன்

எடிட்டர் சாய்ஸ்

MUST READ