Vikatan.com

www.vikatan.com would like to send you push notifications.

Notifications can be turned off anytime from browser settings.

சிரியாவில் அல்-கொய்தா சிறை மீது ரஷ்யா வான்வழி தாக்குதல்... 57 பேர் பலி!

பெய்ரூட்: சிரியாவில் உள்ள அல்-கொய்தா சிறை மீது ரஷ்யா நடத்திய வான்வழி தாக்குதலில் பொதுமக்கள், தீவிரவாதிகள் உள்ளிட்ட 57 பேர் பலியாகி உள்ளனர் என்று மனித உரிமைகள் கண்காணிப்பகம் தெரிவித்து உள்ளது.

சிரியாவில் கடந்த 2011-ம் ஆண்டு அரசுக்கு எதிரான போராட்டம் முற்றியபோது முதல் மோதல் வெடித்தது, இதனையடுத்து போர் தொடர்ந்து நடைபெற்று வருகிறது. இந்த போரில் இதுவரை பலர் உயிரிழந்து உள்ளனர்.

கடந்த செப்டம்பர் 30-ம் தேதியில் இருந்து ரஷ்யா, சிரியாவில் உள்ள ஐ.எஸ். தீவிரவாதிகள் மற்றும் பிற தீவிரவாத இயக்கங்கள் மீது வான்வழி தாக்குதல் நடத்தி வருகிறது. சிரியாவில் அல்-நுஸ்ரா மற்றும் ஐ.எஸ். இரண்டு தீவிரவாத இயக்கங்களும் ஒன்றுக்கு ஒன்று எதிரானது. இந்த இயக்கங்கள் இடையேயும் சிரியாவில் சண்டை தொடர்ந்து நடைபெற்று வருகிறது.

அல்-நுஸ்ரா தீவிரவாத இயக்கம், ஜிகாதிகள் அல்லாது சிரியாவில் அரசுக்கு எதிராக போராடும் கிளர்ச்சியார்களுடன் தொடர்பு கொண்டு உள்ளது. அல்-நுஸ்ரா தீவிரவாத இயக்கம், ஐ.எஸ். தீவிரவாதத்திற்கு முற்றிலும் எதிரானது.

இந்நிலையில், சிரியாவின் வடமேற்கு இட்லிப் மாகாணத்தில் பரபரப்பான மார்க்கெட் பகுதி அருகே உள்ள அல்-கொய்தா தீவிரவாத அமைப்பின் சிரிய நாட்டு கிளையான அல்-நுஸ்ரா முன்னணி சிறையின் மீது ரஷ்யா வான்வழி தாக்குதல் நடத்தியது. இத்தாக்குதலில் 21 பொதுமக்கள், 29 தீவிரவாதிகள் மற்றும் 7 கைதிகள் பலியாகினர் என்று மனித உரிமைகள் கண்காணிப்பகம் தெரிவித்து உள்ளது.

மேலும், மாரத் அல்-நுமானில் ரஷ்யா தாக்குதல் நடத்திய கட்டடத்தில் தீவிரவாதிகள் நீதிமன்றம் மற்றும் சிறை உள்ளது. ரஷ்யா நடத்திய தாக்குதலில் பலர் காயம் அடைந்து உள்ளனர் என்றும், அவர்களில் பலரது நிலை மிகவும் கவலைக்கிடமாக உள்ளது என்றும் அது தெரிவித்து உள்ளது.

எடிட்டர் சாய்ஸ்