Vikatan.com

www.vikatan.com would like to send you push notifications.

Notifications can be turned off anytime from browser settings.

சாப்ளினின் சிரிப்புக்கு அமெரிக்காவின் குட்பை!

போராட்டங்களும் கூக்குரல்களும் என ஓங்கிக் குரல்கொடுத்து அரசைக் கேள்வி கேட்பவர்கள் மத்தியிலே மௌனமும் ஆட்டுவிக்க முடியும் என நிரூபித்த மாபெரும் கலைஞர் சார்லி சாப்ளின். உரையாடல் வழியாகத்தான் மனிதர்களைச் சிரிக்கவைக்க முடியும் என்கிற இன்றைய நிலையில் தன் முகபாவங்களாலேயே மனிதர்களுக்குள் மகிழ்ச்சியை முளைவிடச் செய்தவர். அனைவரையும் சிரிக்கவைத்த சாப்ளினை, 40 காலங்கள் தன்னிடம் வாழ்ந்த அந்தப் பெரும்கலைஞனை அமெரிக்கா தன் நாட்டுக்குள் நுழைய விடாமல் அனுமதி மறுத்த தினம் இன்று!

நாடே கொண்டாடிய ஒருவனை அமெரிக்கா தடை செய்யக் காரணம் என்ன?
தன் படமான ‘லைம்லைட்’ விளம்பர வேலைகளுக்காக பிரிட்டன் சென்று திரும்பிய சாப்ளினை எந்தவித விசாரணையும் இல்லாமல் நுழையவிடாமல் தடுத்தது அந்த நாட்டு அரசு. பின்னாளில் அதற்காகக் கூறப்பட்ட காரணங்கள் பல. அவர், 40 ஆண்டுகள் அங்கே தங்கியிருந்தாலும் அமெரிக்கக் குடியுரிமை பெறுவதற்காக அவர், எந்தவித நடவடிக்கையும் எடுக்கவில்லை எனக் கூறப்பட்டது. மறுபுறம், தன் படங்களின் வழியே அவர் கம்யூனிஸத்தைப் பரப்ப முயன்றார் என்கிற குற்றச்சாட்டு வைக்கப்பட்டது. ஆனால், ரசிகர்களின் பார்வையில் மனிதநேயத்துக்கும் சமத்துவத்துக்காக மட்டுமே அவர் தொடர்ந்து குரல்கொடுத்து வந்தார். மேலும் ‘தி கிரேட் டிக்டேட்டர்’ என்கிற தன் படத்தின் வழியாக அதுவரை தான் ஏற்றிருந்த நகைச்சுவையாளர் என்கிற பிம்பத்தை உடைத்து மக்களைச் சிந்திக்கச் செய்யும் வகையில் வசனங்களை அந்தப் படத்தில் ஆங்காங்கே திணித்திருந்தார் எனப்பட்டது. அதுபோலவே, அந்தப் படத்தின் கடைசி நிமிட வசனங்கள் சினிமா வரலாற்றில் இன்றுவரை பேசப்படும் ஒன்று.

அமெரிக்கா புறக்கணித்த சாப்ளினை பிரிட்டன் இருகரம் நீட்டி வரவேற்றுக்கொண்டது. அதன்பிறகு, தனது இறுதிக்காலம் முடிய பிரிட்டனிலேயே கழித்தார் சாப்ளின். அவரை, எந்த வகையிலும் விசாரிக்காமல் புறந்தள்ளியது ஒருவேளை, அமெரிக்காவை சங்கடப்படுத்தியிருக்கலாம். ‘தன் நாட்டுக் குடிமகன் இல்லை’ என்று தான் ஒதுக்கிய சாப்ளினை 20 வருடங்கள் கழித்து, அதாவது, 1972-ல் மீண்டும் அவரை அழைத்து, அவருக்கு வாழ்நாள் சாதனைக்கான ஆஸ்கார் விருது வழங்கி கெளரவித்தது. தன்னை வேண்டாம் என்று ஒதுக்கிய அமெரிக்காவிடம் அவருக்கு பேசுவதற்கு ஒன்றும் இருக்கவில்லை, கண்ணீரைத் தவிர. ஆனால், அங்கே பார்வையாளர்களில் குழுமியிருந்த அனைவரும் சுமார் 12 நிமிடங்கள் அவருக்காக எழுந்து நின்று கெளரவித்தனர். அமெரிக்க ஆஸ்கார் வரலாற்றில் எந்த ஒரு கலைஞனுக்கும் கிடைத்த நீண்ட நிமிட கெளரவம் இன்றுவரை அதுவே.


- ஐஷ்வர்யா

எடிட்டர் சாய்ஸ்

MUST READ