Vikatan.com

www.vikatan.com would like to send you push notifications.

Notifications can be turned off anytime from browser settings.

இல்லத்தரசிகளே... ஒவ்வொரு நாளும் உங்களால்தான் இனிமையாகுகிறது... #MorningMotivation

 

திருமண வீடுகள், பூங்கா, தியேட்டர் போன்ற இடங்களில், நண்பர்கள், 'என்ன செய்கிறீர்கள்?" எனக் கேட்கும்போது, 'ஹவுஸ் வொய்ஃப்தான்' எனத் தயங்கிக்கொண்டே சொல்லும் காலம் மாறிப்போய்விட்டது. தன்னம்பிக்கையுடன், 'ஹோம் மேக்கர்' எனும் சொல்லும் காலத்தில் வாழ்கிறோம். குடும்பத்தினரின் ஒவ்வொரு நாளையும் இனிமையாக்க உங்களால் மட்டுமே முடியும். வழக்கமான வேலைத் திட்டங்களைக் கொஞ்சம் மாற்றி அமைத்தால் கூடுதல் மகிழ்ச்சியுடன் நாளைக் கழிக்கலாமே. அதற்கான சில ஆலோசனைகள் உங்களுக்காக..

 

குழந்தைகள் தானாகவே செய்தித்தாள் வாசிக்க:

காலையில் அநேகமாக நீங்கள்தான் முதல் எழுவீர்கள். பால் பாக்கெட்டோடு, செய்தித்தாளை எடுத்து வரவும் செய்வீர்கள். செய்தித்தாள் ஆண்களுக்கு மட்டுமல்ல... உங்களுக்கும்தான். செய்தித்தாளை நீங்களும் வாசியுங்கள். அதில் உங்களின் பிள்ளைகள் படிக்க வேண்டிய பகுதிகளைச் சுற்றி, பூனைப்போல, எலியைப் போல அவுட் லைன் வரையுங்கள்.

பிள்ளைகள் எழுந்து, பல் துலக்கி வந்ததும், 'இந்தக் காபியைக் குடித்துக்கொண்டே, பூனைக்குள்ள ஒரு செய்தி இருக்கு படியேன்' எனச் சொல்லும்போது, ஆர்வத்துடன் படிப்பார்கள். காபியுடன் சேர்ந்து, செய்திகளும் அவர்களுக்குள் செல்லும். செய்தித்தாள் படிக்கும் பழக்கமும் உருவாகும்.

 

வெங்காயம் உரிப்பதில் பங்கு பிரிப்போம்:

காலையில் டிபன் தயாரிக்கும் வேலைகளை எல்லோரும் பங்கிட்டுக் கொள்வதில் தயக்கம் காட்டாதீர்கள். டிவியில் நியூஸ் பார்த்துக்கொண்டிருக்கும் கணவரிடம் வெங்காயத்தை உரிக்கவோ, காய்கறிகளை நறுக்கவோ கொடுங்கள். இதனால் 'இன்று என்ன சமையல்' என்பதை யூகிக்க வைக்கும். தனக்கு கொஞ்சம்கூட பிடிக்காதது என்றால் முன்கூட்டியே சொல்லி, மாற்றிச் செய்ய உதவும்.

இப்படி வேலைகளைப் பங்கிடும்போது உங்களுக்கு என்று ஒதுக்க நேரம் கிடைக்கும். அதில் பிள்ளைகளோடு சேர்ந்து, உடற்பயிற்சி அல்லது யோகாசனம் போன்றவற்றைச் செய்யலாம். குடும்பத்தின் ஆரோக்கியத்தின் பட்டியலில் முதலில் இருப்பது உங்களின் உடல் ஆரோக்கியம்தான்.

மெல்லிசையால் நிறையும் வீடு:

வீட்டில் மெல்லிய ஒலியில் இனிமையான பாடல்களை இசைக்க விடுங்கள். இது அனைவருக்கும் நல்ல மனநிலையைத் தரும். உங்களுக்கு ஆர்வமிருந்தால் அந்தப் பாடலை பாடிக்கொண்டே வேலைகளைச் செய்யுங்கள். உங்களைப் பார்த்து மற்றவர்களுக்கு இந்த நல்லப் பழக்கம் தொற்றிக்கொள்ளும்.  

 

ஆப்பிள் தோசை:

குழந்தைகளைப் பற்றிய பெரிய புகாரே சரியாக சாப்பிடுவதில்லை என்பதுதான். அதற்குத் தீர்வை உருவாக்கலாம். அவர்கள் சாப்பிடும் தட்டுகள் ஆப்பிள், மாம்பழம் உள்ளிட்ட பல வடிவங்களில் கிடைக்கின்றன. எனவே அவற்றை வாங்கி, இன்றைக்கு ஆப்பிளில் சாப்பிடுகிறயா.. மாம்பழத்தில் சாப்பிடுகிறாயா.. எனக் கேட்கும்போது குழந்தைகளின் சாப்பிடும் விருப்பம் அதிகரிக்கும்.

மறதிக்கு குட் பை:

மறதி என்பதை எவராலுமே தவிர்க்க முடியாது. முந்தைய அலுவலகம் செல்லும்போது கணவர், பள்ளி செல்லும் பிள்ளைகள் எதையெல்லாம் மறந்தார்கள் என்பதை சின்ன நோட்டில் குறிப்பெடுத்து வையுங்கள். அதை அடுத்த நாள் காலையில் அவர்களுக்கு நினைவூட்டுங்கள். தினமும் மறந்தால்... காலையில் காபி கொடுக்கும்போது, நேற்று மறந்த பொருளின் முதல் எழுத்தைச் சொல்லி கண்டுபிடிக்கச் சொல்லுங்கள். முடியாவிட்டால் குளித்து வந்ததும் அடுத்த எழுத்தைச் சொல்லுங்கள். இப்படி அதை ஒரு விளையாட்டுப் போல செய்யும்போது மறந்துபோகமாட்டார்கள்.

 

லஞ்ச் பேக்கில் ஒரு ஸ்வீட் மேஜிக்:

பிள்ளைகளுக்கு, மதிய உணவை மீதம் வைக்காமல் சாப்பிடுவதைப் பழக்கப் படுத்துங்கள். அதற்காக, டிபன் பாக்ஸில் உணவை வைப்பீர்கள் அல்லவா... அதன் உணவின் அடியில் ஏதேனும் சிறிய அளவில் இனிப்பை, பிள்ளைகளுக்குத் தெரியாமல் வைத்துவிடுங்கள். மாலையில் உணவு முழுவதும் சாப்பிட்டாயா எனக் கேட்டால், உண்மையைச் சொன்னால் அந்த இனிப்பு பற்றி சொல்வார்கள். ஒருவேளை, சாப்பிடவில்லை என்றதும் அட்வைஸ் மழை பொழிந்திட வேண்டாம். ஏன் சாப்பிடவில்லை என்ற உண்மையான காரணத்தைத் தேடி சரிசெய்யுங்கள்.

 

தினந்தோறும் புதுப்புது உற்சாகம்:

மாலையில், பள்ளி மற்றும் அலுவலகம் முடிந்து சோர்வுடன் கணவன் மற்றும் பிள்ளைகள் வருவார்கள். நீங்களும் வீட்டு வேலைகளை முடித்தும் சோர்வாகவே இருப்பீர்கள். எல்லோருக்கும் தங்களை உற்சாகப் படுத்திக்கொள்ள வேண்டியிருக்கும். அதற்காக, பாடல்களை இசைக்க விட்டு நடனம் ஆடலாம். சார்ட்டில் ஒருவர் ஓவியம் வரைய ஆரம்பிக்க, மற்றொருவர் அதைத் தொடர்ந்து வரையலாம். இப்படி வீட்டினர் எல்லோரும் வரைந்துமுடித்ததும் பார்த்தால் வித்தியாசமான ஓவியமாக இருக்கும் அல்லது குறைந்தபட்சம் வாய்விட்டு சிரிக்கும் விதத்திலாவது இருக்கும். தினந்தோறும் இப்படி ஏதேனும் புதிதுபுதிதாக செய்ய வைத்தால் இன்று என்ன செய்யப் போகிறோம் என்று தெரிந்துகொள்ளும் ஆவலே சோம்பலை உதறச் செய்துவிடும். விடுமுறை நாட்களில் பிள்ளைகளின் நண்பர்களை வர வழைத்து, விளையாட்டு, கதைச் சொல்லல் போன்றவற்றையும் செய்யலாம். இது பிள்ளைகளுக்கு இடையே நல்ல உறவை மேம்படுத்தும்.

டி.விக்கு வெளியே விவாதம்:

டி.வி பார்க்கும்போதும், எல்லோருக்கும் பிடித்த சேனல் சிறிது நேரம் பயனுள்ள சேனல் சிறிது நேரம் என மாற்றி மாற்றி வைத்து, அந்த நிகழ்ச்சியின் சாதக, பாதங்களை உரையாடச் செய்யுங்கள்.

காலையில் எத்தனை மணிக்கு எழுந்தால், அடுத்த நாள் வேலைகள் சரியாக இருக்கும் என ஒரு டைம் டேபிள் போட்டு, வீட்டில் ஓர் ஓரத்தில் மாட்டி வையுங்கள்.

 

தயக்கம் வேண்டாம்:

என்ன இது பெண்கள் என்றவுடனே... வீட்டினைக் கவனித்துக்கொள்ளும் ஆலோசனைகள் தானா என்று யோசிக்க வேண்டாம். குடும்பத்தின் வளர்ச்சியில் இது முதன்மையான பணி. அதனால் தயக்கமின்றி செய்யுங்கள். எந்த இடத்திலும் சுய அடையாளத்தை இழக்காமல் இருக்கவும் செய்யுங்கள். உங்களுக்குள் இருக்கும் திறமைகளை எதன் பொருட்டும் இழந்துவிடாமல் இவற்றைச் செய்யத் திட்டமிடுங்கள்.  

உங்களின் அக்கறையாலும் அன்பாலும் எல்லா நாட்களையும் இனிமையானதாக மாற்றுங்கள்.

- வி.எஸ்.சரவணன்.

எடிட்டர் சாய்ஸ்

MUST READ