Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

தன் கடிதத்தால் அமெரிக்க அதிபரையே கலங்கவைத்த சிறுவன்!

அமெரிக்கஅமெரிக்க அதிபர் ஒபாமாவை கலங்கவைத்த  ஆறு வயது சிறுவனின் கடிதம், வைரலாகப் பரவிவருகிறது. அந்த கடிதம் எதற்காக எழுதப்பட்டது தெரியுமா? சிரியாவில் கடந்த பல ஆண்டுகளாக உள்நாட்டுப் போர் நிலவி வருவது அனைவரும் அறிந்ததே. சிரியாவின் வடக்கு மாநிலத்தில் உள்ள அலெப்போ நகரம் கிளர்ச்சியாளர்கள் வசம் சிக்கியுள்ளது. அவர்களிடம் இருந்து அந்நகரை மீட்க அவ்வப்போது அரசின் விமானப்படைகள் தாக்குதல் நடத்தி வருகின்றன. இதனால் அலெப்போ நகரம் எப்போதும் போர்க்களமாகக் காட்சியளிக்கிறது.

இந்நிலையில் இங்குள்ள குவாட்ரிஜ் என்ற இடத்தில் கடந்த ஆகஸ்ட் மாதம் வான்வழித் தாக்குதல் நடத்தப்பட்டது. இத்தாக்குதலில் கட்டடம் ஒன்று இடிந்து தரைமட்டமானது. அந்தக் கட்டடத்தில் மீட்பு பணிகள் நடைபெற்றபோது, இடிபாடுகளில் சிக்கியிருந்த ஐந்து வயதுச் சிறுவன் ஓம்ரான் தக்னீஷை இடிபாடுகளில் இருந்து மீட்டெடுத்தனர்.

ஓம்ரான் தன் தலையில் ரத்தக் காயங்களுடனும், உடல் முழுக்கத் தூசியாலும் போர்த்தப்பட்ட புகைப்படம், இணையத்தில் வைரலாகப் பரவி உலகத்தையே மிரளவைத்தது. சிகிச்சைக்காக ஆம்புலன்ஸில் அமரவைக்கப்பட்டபோது,  தனக்கு என்ன நேர்ந்தது என்று அறியாமல் தன் தலையில் இருந்து வழியும் ரத்தத்தை அவன் கையால் துடைக்கும் வீடியோ காட்சியும் உலக மக்களின் நெஞ்சை உலுக்கியது.

இந்தக் காட்சிகள் பெரியவர்களை மட்டும் அல்ல, ஆறு வயது அமெரிக்கச் சிறுவனான அலெக்ஸையும் கதிகலங்கவைத்தது, மற்றவர்களைப்போல 'அய்யோ பாவம்' என்று சில நொடிகள் வருத்தப்பட்டுவிட்டு அடுத்த வேலையைப் பார்க்காமல், அலெக்‌ஸ் உடனடியாக ஒபாமாவுக்கு ஒரு கடிதம் எழுதினான். சிரியா போரில் பாதிக்கப்பட்ட சிறுவனான ஓம்ரானை அமெரிக்காவுக்கு அழைத்துவர அனுமதிக்க வேண்டும் என்று அந்தக் கடிதத்தில் குறிப்பிட்டான்.

'நீங்கள் அனுமதித்தால் சிரியாவில் இருந்து ஓம்ரானை அழைத்துவந்து எங்கள் குடும்பத்தில் ஒருவனாகச் சேர்த்துகொள்வோம். என் சகோதரனாக எங்கள் வீட்டிலேயே அவன் வளரட்டும். என் தங்கை அவனுக்காக மின்மினிப் பூச்சி மற்றும் பட்டாம்பூச்சி பிடித்துத்தருவாள். நான் படிக்கும் பள்ளியிலேயே அவனையும் சேர்ப்பேன். அங்கு படிக்கும் மற்றொரு சிரியாவைச் சேர்ந்த சிறுவனுக்கு இவனை அறிமுகம் செய்து வைப்பேன். நாங்கள் ஒன்றாக விளையாடுவோம், பிறந்தநாள் விழாக்களை கொண்டாடி மகிழ்வோம். ஓம்ரான் தன் மொழியை எங்களுக்குக் கற்பிப்பான். நாங்கள் எங்கள் பள்ளியில் படிக்கும் ஜப்பான் சிறுவனுக்கு ஆங்கிலம் கற்பித்ததுபோல ஓம்ரானுக்கும் கற்பிப்போம்!'

இப்படியாக, தன் கிறுக்கல் கையெழுத்தில் அலெக்ஸ் எழுதியிருந்த நீண்ட கடிதத்தை கடந்த செப்டம்பர் மாதம் 20-ம் தேதி ஐக்கியநாடுகள் அகதிகளுக்கான உச்சி மாநாட்டில் ஒபாமா படித்துக்காட்டினார். அலெக்ஸ் எழுதிய கடிதத்தின் வரிகள் சபையினரை மட்டும் அல்லாமல் ஒபாமாவையும் கண்கலங்கவைத்தது. கடிதத்தை வாசித்து முடித்தபோது அரங்கமே கைத்தட்டலில் அதிர்ந்தது.

'இந்தச் சிறுவயதிலேயே அலெக்ஸ் கொண்டுள்ள மனிதநேயத்தைப் பார்த்து மற்றவர்களும் கற்றுக்கொள்ளவேண்டும். மனிதன் எப்படி இருக்க வேண்டும் என்று இந்தக் கடிதம் எனக்குப் பாடம் கற்பித்துள்ளது' என்று தன் பேச்சை முடித்தார் ஒபாமா. தன் மனதை உருகச்செய்த அலெக்ஸை நவம்பர் 10-ம் தேதி வெள்ளை மாளிகைக்கு வரவழைத்தார். அப்போது அலெக்ஸின் கரங்களைப் பிடித்து அன்புடன் வரவேற்ற ஒபாமா, 'நீ மிகவும் தயாளகுணம் படைத்தவன், மற்ற உயிர்கள் மீது அன்பு செலுத்துபவன், உனது மனிதநேயத்தைக் கண்டு நான் மிகவும் பெருமைப்படுகிறேன்' என்று பாராட்டி வாழ்த்தினார்.

- என்.மல்லிகார்ஜுனா

Advertisement
Advertisement
Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement
[X] Close