Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

வெள்ளை நாட்டில் மாடலிங்கில் சாதிக்கும் கறுப்பு ராணி #QueenOfDark #NyakimGatwech

Nyakim Gatwech

கறுப்பு நிறத்தை விரும்புவோர் எண்ணிக்கை குறைவாகவே இருக்கக்கூடும். தொலைக்காட்சிகளில் வரும் ஏராளமான முகப்பூச்சு விளம்பரங்கள் ஒளிபரப்பாவதில் இருந்தே இதை நாம் யூகிக்கலாம். தங்களின் கறுப்பு நிறத்தை மேக்கப் பொருள்களைப் பயன்படுத்தி சிவப்பாக முயற்சி செய்துவரும் இன்றைய சூழலில் கறுப்பு நிறத்தையே தனது அடையாளமாகக் கொண்டு புகழ்பெற்ற மாடலாக வலம் வருகிறார் தெற்கு சூடான் நாட்டைச் சேர்ந்த நயகிம் கெட்வெச்  (Nyakim Gatwech). 24 வயதாகும் நயகிம் கெட்வெச்சை இன்ஸ்டாகிராமில் ஃபாலோ செய்பவர்களின் எண்ணிக்கை இரண்டு லட்சத்தைக் கடந்துவிட்டது. 

’ஒரு நாள் உபர் டிரைவர் என்னிடம். 'பத்தாயிரம் டாலர் கொடுத்து ஏன் இப்படி உங்களது தோலில் நிறத்தை மாற்றிக்கொண்டீர்கள்?' என்று கேட்டார்; அதற்கு, நான் சிரித்துக்கொண்டே 'அப்படி ஒருபோதும் செய்ய மாட்டேன்; எனது தோலின் நிறம் ஆசிர்வதிக்கப்பட்டது' என்று கூறினேன்.’ என அவர் இன்ஸ்டாகிராமில் பதிவிட்ட பிறகுதான் அவரை ஃபாலோ செய்பவர்களின் எண்ணிக்கை பல மடங்கு அதிகரிக்கத்தொடங்கியதாம்.

நயகிம் கெட்வெச்சின் புகைப்படங்களுக்கும் நேர்மையான பதிவிற்கும் இவரின் ரசிகர்கள் ‘குயின் ஆஃப் தி டார்க்’ என்கிற பட்டப்பெயரைச் சூட்டியிருக்கிறார்கள். என்னுடைய புகைப்படங்களைப் பார்த்து யார் என்ன கூறினாலும் எனக்குக் கவலையில்லை; நான் என்னை விரும்புகிறேன்; என் கறுப்பு நிறத் தோலை விரும்புகிறேன்; பெரும்பான்மையான மக்களிடமிருந்து விலகி நான் வித்தியாசமாக காட்சியளிக்கிறேன் என்று தன் கருத்தைப் பதிவு செய்து பலரின் புருவங்களை வியப்பில் உயர்த்தச் செய்கிறார்.

Nyakim Gatwech

நயகிம் கெட்வெச் முதலில் எத்தினோப்பியாவிலும் பின்னர் கென்யாவிலும் அகதிகள் முகாமில் அகதியாக இருந்துள்ளார். அதன் பின்னர், அமெரிக்காவுக்குப் புலம் பெயர்ந்துள்ளார். அவர் அமெரிக்கா வருவதற்குள்ளான இடைப்பட்ட காலத்தில் அவரின் இரண்டு தங்கைகளையும் இழந்துள்ளார். இவர் எத்தினோப்பியா மற்றும் கென்யாவில் இருக்கும்போது நிறம் தொடர்பாக எவ்விதப் பகுபாட்டையும் உணரவில்லையாம். ஆனால், இடைநிலை கல்விப் பயில்வதற்காக அமெரிக்காவிற்குச் சென்றபோதுதான் இவருக்கு நிறப் பாகுபாடு பார்ப்பது தெரிய வந்திருக்கிறது. அங்கு இவருடன் பயின்ற பலரும் இவரைக் கேலி செய்து, வித்தியாசமாகப் பார்த்துள்ளனர்.

நயகிம் கெட்வெச் தற்போது, இவரது கறுப்பு நிறத்தைக் கொண்டு அனைத்து மாடல்களுக்கும் சவாலான போட்டியாளராக இருக்கிறார். இவர் மற்றவர்களையும் விட வேறுபட்ட விதத்தில் புகைப்படம் எடுத்து அதைப் பதிவிடுவதால் அனைவரின் பார்வையும் இவர் பக்கம் திரும்பியுள்ளது.

இவர் தனது பட்டப்படிப்பை முடித்து விட்டு மாடலிங் துறையைத் தேர்வு செய்த போதிலும், தொடக்கப்பள்ளி ஆசிரியராக வேண்டும் என்பதுதான் இவரின் ஆசையாம். தன்னைப் போன்று நிராகரிக்கப்பட்ட தன் இனத்தைச் சேர்ந்தவர்களுக்கு அவரால் முடிந்த உதவியைச் செய்வதற்கு ஒருபோதும் யோசிக்க மாட்டேன் என்றும் பதிவிட்டுள்ளார். இவர் மாடலிங் துறைக்கு வந்ததே சுவாரஸ்யமான விஷயம். ஒரு நாள், இவரை மளிகைக் கடையில் பார்த்த ஒருவர், நீங்கள் ஏன் மாடலிங் துறையைத் தேர்வு செய்யக் கூடாது என்று கூறியுள்ளார். அப்போது இவர் மாடலிங்னா என்ன..? அந்த வேலைக்கு எப்படி அப்ளை பண்ணனும்..? என்று சிந்தித்ததாகக் கூறியிருக்கிறார். அப்படி, மாடலிங் பற்றி எவ்வித தெளிவும் இல்லாதவர் இன்று, தனது தன்னம்பிக்கையால் மாடலிங் துறையில் முத்திரை பதித்து வருகிறார். 

‘கறுப்பு தைரியமானது, கறுப்பு அழகானது, கறுப்பு தங்கம் போன்றது“  என்று நிறவேற்றுமை பார்ப்பவர்களுக்குத் தனது பதிவுகளால் பதில் அளிக்கிறார் 'கறுப்பு' ராணி நயகிம் கெட்வெச்.

உங்கள் கருத்தைப் பதிவு செய்யுங்கள்

Advertisement
Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement
[X] Close