Vikatan.com

www.vikatan.com would like to send you push notifications.

Notifications can be turned off anytime from browser settings.

நாணயம் விகடன் - ட்விட்டர் கேள்வி-பதில்!

கட்டட விதிமுறைகள் தொடர்பான சந்தேகங்களுக்கு பதில் அளிக்கிறார் டாக்டர்.குமார், நிர்வாக இயக்குநர், நவீன் ஹவுஸிங் (முன்னாள் சேர்மன், கிரடாய் - தமிழ்நாடு).

1. பில்டர்களிடமிருந்து என்னென்ன கட்டட விதிமுறை ஆவணங்களை  கேட்டு வாங்க வேண்டும்?  முதலில் அப்ரூவ்ட் பிளான், பிளானிங் பர்மிட் / பில்டிங் பர்மிட், முடிவுற்ற கட்டிடமாக இருந்தால் கம்ப்ளீஷன் சர்டிஃபிகேட் போன்றவைகளை வாங்க வேண்டும். இது தவிர நிலம் குறித்த ஆவணங்களை பெற வேண்டும். உதாரணமாக  கிரய பத்திரம் (சேல் டீட்), தாய் பத்திரம், வில்லங்கச் சான்றிதழ், பட்டா, போன்றவைகளை சரி பார்த்துக் கொள்வது நல்லது .

2. ரியல் எஸ்டேட் கட்டட விதிமுறைகளை எப்படி தெரிந்துக் கொள்வது? எதாவது வெப்சைட் உள்ளதா? விதிமுறைகள் நகரத்துக்கு நகரம் மாறுபடுமா?

சென்னையை பொறுத்தவரை, டெவலப்மென்ட் ரெகுலேஷன்ஸ் எனப்படும் விதிமுறைகள் சிஎம்டிஏ வால் புத்தக வடிவில் வெளியிடப்பட்டுள்ளது. இது குறித்து http://www.cmdachennai.gov.in/Volume2_English_PDF/DR-English.pdf என்கிற லிங்கில் சென்று தெரிந்து கொள்ளலாம். தமிழ்நாட்டின் மற்ற நகரங்களுக்கு டிடிசிபி ஏறக்குறைய மேற்கண்ட விதிகளை பின்பற்றுகிறது. இருப்பினும் சில விதிகள் மாறுபட்டிருக்கின்றன.

3. பில்டர் கட்டட விதிமுறைகளை பின்பற்றியிருக்கிறார இல்லையா என்பதை எப்படிதெரிந்துக் கொள்வது?
கட்டடம் அல்லது வீட்டை வாங்கும் முன் அந்த வீட்டின் பிளான், அப்ரூவ்ட் பிளான் படி இருக்கிறதா என்று சரி பார்த்து வாங்க வேண்டும். நாம் எந்த தளத்தை வாங்குகிறோமே அந்த தளம் கட்டுவதற்கு அனுமதி அளிக்கப்பட்டிருக்கிறதா என்பதை முதலில் உறுதி செய்து கொள்ளுங்கள். கட்டடம் கட்டப்படும் போதும், அப்ரூவ்ட் பிளான் படி கட்டப்படுகிறதா என்பதை உறுதி செய்து கொள்ள வேண்டும். ஒப்பிட தெரியாதவர்கள், அது பற்றி அறிந்த இன்ஜினியர்களின் உதவியை நாடலாம். முடிவுற்ற கட்டடம் என்றால் கம்ப்ளீஷன் சர்டிஃபிகேட் வழங்கப்பட்டிருக்கிறதா என்பதையும் கவனிக்க வேண்டும்.

4. சென்னை நகருக்கு குறைந்தபட்சம் எத்தனை சதுர அடி மனை இருந்தால், வீடு கட்ட சிஎம்டிஏ அனுமதி தரும்? 
குறைந்தபட்சம் 80 சதுர மீட்டர் மனை தேவை. கன்டினியஸ் பில்டிங் ஏரியா எனப்படும் இடங்களில் 50 சதுர மீட்டர் இருந்தால் போதுமானது. வாங்கும் மனைக்கு பொது சாலை வசதி அல்லது பொதுச் சாலையிலிருந்து அணுகுப் பாதை இருக்க வேண்டும். வாங்கும் மனைக்கு மனைப் பிரிவு (Layout) ஒப்புதலோ அல்லது சப் டிவிஷன்  அப்ரூவல், இருப்பதாக பார்த்து வாங்க வேண்டும்.

5. வளர்ச்சி கட்டுப்பாட்டு விதிமுறைகள் (டிசிஆர்) என்றால் என்ன?
நகர் ஊரமைப்பு (Town and country planning) சட்டத்தின் கீழ் சென்னை போன்ற நகரங்களுக்கு கட்டிடம் மற்றும் நில மேம்பாடு குறித்து ஏர்படுத்தப்பட்டுள்ள விதிமுறைகளுக்கு டிசிஆர் என்று பெயர். 

 

6. வீடு கட்ட வாங்கிய அப்ரூவல் பிளான் எத்தனை ஆண்டுகளுக்கு செல்லுபடியாகும்?
மூன்று ஆண்டுகளுக்கு செல்லுபடியாகும். ஒரு வேளை கட்டடப் பணி முடிவடையவில்லை என்றால், உங்கள் திட்ட அனுமதியை மீண்டும் புதுப்பித்துக் கொள்ளலாம்.


8. வீடு கட்ட அப்ரூவல் பிளானுக்கு விண்ணப்பிக்கும் போது சமர்பிக்க வேண்டிய ஆவணங்கள் என்னென்ன?

கிரயப் பத்திரம் (சேல் டீட்), தாய் பத்திரம், பட்டா, வில்லங்கச் சான்றிதழ் போன்ற நிலம் சார்ந்த ஆவணங்கள்; வருவாய்த் துறையினர் வழங்கும் சான்றிதழ்களான பட்டா, சிட்டா முதலானவைகள்; திட்டத்திற்கான வரை படங்கள்; விண்ணப்பப் படிவங்கள் முதலியவைகளை சமர்பிக்க வேண்டும்.

9. கார்பெட் ஏரியா, பிளிந்த் ஏரியா, பில்டப் ஏரியா, சூப்பர் பில்டப் ஏரியா இடையான விகிதம் எவ்வளவாக இருந்தால் சரியாக இருக்கும்?

உண்மையில் இவை திட்டத்திற்கு திட்டம் மாறுபடும். பொதுவாக கார்பெட் ஏரியா 75 சதவிகிதத்திற்கு மேலிருந்தால் நல்லது. பிளிந்த் ஏரியா என்பது கார்பெட் ஏரியா உடன் சுவர்களின் அளவை (சுமார் 10%) சேர்த்தால் வருவது. இவை இரண்டுடன் காமன் ஏரியா எனப்படும் பொதுவான கட்டிட பகுதிகளை (உதாரணம் படிக்கட்டுகள், காரிடார்கள்,  வாட்ச்மேன் ரூம், என்ட்ரன்ஸ் லாபி, அமெனிட்டி ரூம்ஸ் போன்றவைகள்) சேர்த்தால் பில்ட் அப் ஏரியா வரும். சாதாரணமாக 15% காமன் ஏரியா இருக்கும், ஆனால் இவை திட்டத்திற்கு திட்டம் மாறுபடும். எனவே கார்பெட் ஏரியா, வால் ஏரியா, பிளிந்த் ஏரியா, காமன் ஏரியா, பில்ட் அப் ஏரியா, சேலபிள் ஏரியா இவற்றின் அளவுகளை தெரிந்து கொண்டு சதுர அடிக்கான விலைகளை ஒப்பிடுவது விவேகம். வெறும் சதுர அடி விலைகளை மட்டும் ஒப்பிடுவது விவேகமாகாது. 

 
10. என் பக்கத்து வீட்டில் ஜன்னலை திறந்தால் என் வீட்டு சுவரில் இடிக்கிறது. இந்த வீட்டுக்காரர் மீது சிஎம்டிஏ-ல் புகார் கொடுக்க முடியுமா?
இப்படி விதிமுறைகளுக்கு புறம்பாக கட்டடங்கள் கட்டப்படும் பொழுதே உங்கள் மறுப்பை புதிதாக வீடு கட்டுபவரிடம் தெரிவிக்கலாம். அப்படி தெரிவித்தும் அவர் திருத்திக் கொள்ளவில்லை என்றால் சிறிய கட்டிடங்களுக்கு சென்னை மாநகராட்சி அல்லது உள்ளாட்சி அமைப்புகளிடமும், அடுக்கு மாடி கட்டிடங்களுக்கு சிஎம்டிஏ அல்லது டிடிசிபி இடமும் முறையிடலாம்.

11. கட்ட அனுமதிக்கு லஞ்சம் கேட்கும் சிஎம்டிஏ / டிடிசிபி அதிகாரிகள் மீது யாரிடம் புகார் கொடுக்க வேண்டும்? 
சிஎம்டிஏ வலைதளம் கீழ்கண்ட வழிமுறைகளை கூறுகிறது. 
புகார் தெரிவிக்க : 
ceocmda@tn.gov.in என்கிற மின்னஞ்சல் மூலம், முதன்மை ஊழல் ஒழிப்பு அதிகாரிக்கு புகார் தெரிவிக்கலாம்.

12. நான் வாங்கிய அடுக்குமாடி குடியிருப்பில் எனக்கு கொடுக்கப்பட்டிருக்கும் யூடிஎஸ் அளவு சரிதானா என்பதை எப்படி உறுதிப்படுத்திக் கொள்வது?
பொதுவாக, மொத்த கட்டிட பரப்பில் உங்கள் வீடு எந்த விகிதத்தில் இருக்கிறதோ, ஏறத்தாழ அதே விகிதத்தில் மொத்த நிலத்தில் உங்கள் யூடிஎஸ் அளவு இருக்க வேண்டும். 
[ஃப்ளாட் சைஸ் ÷ மொத்த பில்ட் அப் ஏரியா (எல்லா ஃப்ளாட்களையும் சேர்த்து)] × கட்டிடம் அமைந்திருக்கு நிலத்தின் பரப்பு.

13. ரூ. 25 லட்சம் விலையுள்ள ஃபிளாட் புக் செய்துள்ளேன். இதற்கு பதிவு மற்றும் முத்திரைக் கட்டணம் எவ்வளவு செலுத்த வேண்டும்?
இந்த விலையை நிலத்திற்கான விலையாகவும், கட்டிடத்திற்கான விலையாகவும் பிரிக்க வேண்டும். நிலத்தின் விலைக்கான முத்திரைக் கட்டணம் 7%, பதிவுக் கட்டணம் 1%. கட்டிடத்தின் விலைக்கான முத்திரை மற்றும் பதிவுக் கட்டணம் மொத்தம் 2 சதவிகிதம். தற்சமயம் பதிவாளர் அலுவலகத்தில் கட்டிட விலையுடன் சேவை வரி, உள்கட்டமைப்பு கட்டணம் போன்றவைகளையும் கட்டிட விலையில் சேர்க்குமாறு அறிவுறுத்தப்படுகிறது.

 

 

 

 

 

 

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP

MUST READ