Vikatan.com

www.vikatan.com would like to send you push notifications.

Notifications can be turned off anytime from browser settings.

புதிய தொடர்: ஃப்யூச்சர்ஸ் அண்ட் ஆப்ஷன்ஸ்

டெரிவேட்டிவ் டிரேடிங் (Derivative Trading)
 
1. டெரிவேட்டிவ் - ஓர் அறிமுகம்
 
- எம்.பி. பாண்டிகுமார், இணை பேராசிரியர், LIBA
 
ஃப்யூச்சர்ஸ் அண்ட் ஆப்ஷன்ஸ் (சுருக்கமாக F & O) பற்றி இன்றைக்கு பலரும் பேச ஆரம்பித்திருக்கிறார்கள். பங்குச் சந்தையின் போக்கை நிர்ணயிக்கும் முக்கியமான விஷயங்களில் ஒன்றாக இருக்கிறது இந்த எஃப் அண்ட் ஓ. பங்குச் சந்தையில் ஒரு நாளில் பரிவர்த்தனை ஆகும் பங்குகளின் மதிப்பைப் போல, பல ஆயிரம் மடங்கு அதிக மதிப்பில் எஃப் அண்ட் ஓ-வில் வர்த்தகம் ஆகிறது. 
 
இந்த அளவுக்கு முக்கியமானதொரு வர்த்தகக் கருவியாக இருக்கும் இந்த எஃப் அண்ட் ஓ பற்றி விளக்கமாக எடுத்துச் சொல்ல பல புத்தகங்கள் தமிழில் இல்லை. அதனாலேயே இந்த வர்த்தகக் கருவி பற்றி பலருக்கும் அரைகுறையான புரிதலே இருக்கிறது.
 
இந்த அரைகுறை புரிதலுடன் சிலர் அதில் இறங்கி வர்த்தகம் செய்யத் தொடங்கிவிடுகிறார்கள். இப்படி வர்த்தகம் செய்யும் ஆரம்பத்தில் கிடைக்கும் குருட்டு அதிர்ஷ்டத்தால் ஓரளவு லாபம் சம்பாதித்துவிட, பிற்பாடு மேலும் மேலும் இதில் பணம் போட ஆரம்பித்துவிடுகிறார்கள். 
 
குருட்டு அதிர்ஷ்டம் எப்போதும் ஒரு லாபம் சம்பாதித்துத் தருமா என்ன! எனவே, பணத்தை இழக்க ஆரம்பிக்கிறார்கள். இப்படி ஆழம் தெரியாமல் காலை விட்ட சிலர், பலத்த நஷ்டம் கண்டிருக்கிறார்கள். இது மாதிரியானவர்கள் கொங்கு மண்டலத்தில் அதிகம் இருப்பது விநோதமான விஷயம்.
ஆனால், எஃப் அண்ட் ஓ என்பது பரபரப்பான விளையாடும் பனிச்சறுக்கு விளையாட்டு.
இந்த விளையாட்டை விளையாட அதன் சட்ட திட்டங்கள், நெளிவு சுளிவுகள் ஒருவருக்கு அத்துப்படியாக இருக்க வேண்டும். எஃப் அண்ட் ஓவின் விதிமுறைகளை நன்கு தெரிந்துகொண்டு செய்யும்பட்சத்தில் லாபம் சம்பாதிக்க வாய்ப்புண்டு.  
 
சரி, எஃப் அண்ட் ஓ-வைப் பற்றி விளக்கமாகப் பார்க்கும்முன், டெரிவேட்டிவ் என்றால் என்ன என்று பார்த்துவிடுவோம். 
 
டெரிவேட்டிவ் என்றால் என்ன? எங்கு நம் அன்றாட வாழ்கையில் அது பயன்படுகிறது? அதன் பயன்பாடுகள் என்ன?
 
டெரிவேட்டிவ் என்றால்...?
 
வாங்குபவருக்கும் விற்பவர்க்கும் இடையே எதிர்காலத்தில் குறிப்பிட்ட விலையில், குறிப்பிட்ட பொருட்களின் எண்ணிக்கையில், குறிப்பிட்ட தேதியில் வாங்க மற்றும் விற்க ஏற்படும் ஒப்பந்தமே ‘டெரிவேட்டிவ்’ (Derivative) என்று அழைக்கப்படுகிறது. தமிழில் இதை ‘முன்பேர வர்த்தகம்’ என்று அழைக்கிறார்கள்.
 
எந்தவொரு டெரிவேட்டிவ் ஒப்பந்தமும் அதற்குரிய அடிப்படை சொத்து அல்லது சொத்துகளை கொண்டுதான் வடிவமைக்கப்படுகிறது. அவ்வாறு ஒப்பந்தம் வடிவமைக்கப் பெறும்போது  அடிப்படை சொத்து என்பது உற்பத்திப் பொருளாகவோ அல்லது விளைபொருளாகவோ (Agri) அல்லது விலை மதிக்கமுடியாத உலோகமாகவோ (Gold, Silver etc) அல்லது நிதி நிலை ஒப்பந்தமாகவோ அல்லது பங்குச் சந்தையின் இண்டெக்ஸாகவோகூட இருக்கலாம்.
 
அடிப்படை சொத்து கொண்டு வடிவமைக்க பெரும் எந்தவொரு டெரிவேட்டிவ் ஒப்பந்தமும் படைப்பாற்றலுக்கு வானமே எல்லை என்பதை நிலைநிறுத்துகிறது.
 
எதற்காக டெரிவேட்டிவ்? 
 
டெரிவேட்டிவ் ஒப்பந்தமானது விலையேற்றம் மற்றும் விலையிறக்கத்தினால் ஏற்படக்கூடிய நஷ்டங்களை வாங்குவோருக்கும் விற்பவர்க்கும் மத்தியில் சமன் செய்ய தேவைப்படுகிறது. சுருக்கமாக சொல்ல வேண்டும் என்றால், வாங்குபவர் அல்லது விற்பவரின் ரிஸ்கைக் குறைக்க உதவுகிறது. 
 
எந்த வகையான ரிஸ்கைக் குறைக்க உதவுகிறது என்கிற கேள்வி உங்களுக்கு அடுத்து எழுகிறதல்லவா? இந்தக் கேள்விக்கு உங்களுக்கு பதில் தெரிய வேண்டும் என்றால், முதலில் ரிஸ்க் என்றால் என்ன என்பது பற்றி புரிந்துகொள்ள வேண்டும்.
 
ரிஸ்க் என்றால்...?
 
ரிஸ்க் என்றால் பொதுவாக மாற்றத்தினால் ஏற்படக்கூடிய பாதிப்பு அல்லது ஆபத்து என்று பொருள். விலை மாற்றத்தினால் ஏற்படக்கூடிய எந்தவொரு பாதிப்பு ப்ரைஸ் ரிஸ்க் (Price risk) என்று கருதபடுகிறது.
எதிர்காலத்தில் வாங்க மற்றும் விற்க செய்யும்போது எத்தகைய மாற்றம் மற்றும் என்ன பாதிப்பு ஏற்படும் என்று எதிர்பார்க்கப்படுகிறது என்பதை முதலில் பார்ப்போம். 
 
முதலாக, எதிர்பார்ப்பது விலை மாற்றம் (Price Change). இந்த விலை மாற்றம் என்பது ஒன்று விலையேற்றமாகவோ அல்லது விலையிறக்கமாகவோ இருக்கலாம். இவை யாவும் சந்தையின் எதிர்கால தேவை (Demand) மற்றும் வழங்கலை (Supply) பொறுத்து அமைவது என்பது யாவரும் அறிந்ததே. 
ஆனால், சந்தையின் எதிர்கால தேவை மற்றும் வழங்கல் எப்படி இருக்கும் என்று கண்டறிவது யாராலும் முடியாத காரியமாகும்.
 
உதாரணமாக, 10 கிராம் தங்கத்தின் விலை வருகிற ஆகஸ்ட் மாதம் 1-ம் தேதி அன்று என்னவாக இருக்கும் என்று யாராவது மிகத் துல்லியமாக அனுமானிக்க முடியுமா? 
 
முடியாது. காரணம், நம் அனைவருக்கும் எதிர்காலத் தேவையும் மற்றும் வழங்கலையும் மிகத் துல்லியமாக யூகிக்க முடியாத காரணத்தினால், டெரிவேட்டிவ் ஒப்பந்தத்தின் தேவையை சார்ந்து இருக்கவேண்டியுள்ளது.
 
எப்போது பயன்படுகிறது?
 
விலை என்பது ஒரு பொருளை எதிர்காலத்தில் வாங்கவோ அல்லது விற்கவோ உதவும் ஒரு இன்றியமையாத காரணியாகும். எப்போதெல்லாம் விலையின் போக்கு எப்படி இருக்கும் என்று தெரியாமல் இருக்கிறதோ, அப்போதெல்லாம் டெரிவேட்டிவ் ஒப்பந்தம் இறுதி விலையில் வாங்க மற்றும் விற்க நிர்ணயம் செய்ய பயன்படுகிறது.
 
இருவகை டெரிவேட்டிவ்!
 
டெரிவேட்டிவ் ஒப்பந்தத்தை பொதுவாக இருவகைகளாகப் பிரிக்கலாம்.  
ஓவர் தி கவுன்ட்டர் டெரிவேட்டிவ் (Over the Counter): தனிப்பட்ட இரு நபர்களுக்கிடையே பிரத்யேகமாக வடிவமைக்கப்படுகிற டெரிவேட்டிவ் ஒப்பந்தங்கள் இவை.
 
எக்ஸ்சேஞ்சில் வர்த்தகமாகும் டெரிவேட்டிவ் ஒப்பந்தம்: எக்ஸ்சேஞ்சின் கட்டுபாடுகளுக்கு உட்பட்டு செயல்படும் டெரிவேட்டிவ் ஒப்பந்தங்கள் இவை.
 
டெரிவேட்டிவ் ஒப்பந்தமானது வெவ்வேறு பரிணாமங்களில் வெவ்வேறு நோக்கங்களை அடைவதற்கு வடிவமைக்கப்பட்டுள்ளது.
 
டெரிவேட்டிவ்-ல் முன்னோக்கிய ஒப்பந்தம் (Forward Contract), எக்ஸ்சேஞ்ச் முன்னோக்கிய ஒப்பந்தம் (Future Contract), அழைப்புரிமை எக்ஸ்சேஞ்ச் முன்னோக்கிய ஒப்பந்தம் (Option Contract) என பல வகை உண்டு. 
 
இவற்றை உதாரணங்களுடன் பார்ப்போம்.
 
உதாரணம் 1:
 
கிருஷ்ணன் என்பவர் ஒரு டிரேடர். இவர் நடத்தும் பேக்கரிக்கு 1,000 கிலோ சர்க்கரை ஆகஸ்ட் 1-ஆம் தேதிக்கு தேவைப்படுகிறது. தன் தேவையை உணர்ந்த கிருஷ்ணன், எதிர்காலத்தில் ஏற்படபோகிற விலையேற்றத்தை எண்ணி அஞ்சுகிறார்.
 
இதற்கிடையில் சுந்தரலட்சுமி சர்க்கரை ஆலையின் விற்பனை மேலாளரை சந்தித்து பேசும்போது, அவர்களால் ஆகஸ்ட் 1-ஆம் தேதி அன்று 1,000 கிலோ சர்க்கரை வழங்க முடியும் என்று உறுதியாக சொல்கிறார். அதே நேரத்தில், ஆலையின் மேலாளர், கிருஷ்ணனை ஒரு ஒப்பந்தத்துக்கு அழைக்கிறார்.
 
இதற்கு இசைவு தெரிவித்த கிருஷ்ணன், 1,000 கிலோ சர்க்கரை ஆகஸ்ட் 1-ஆம் தேதி அன்று ஒரு கிலோவுக்கு ரூ.45 வீதம் கொடுத்து வாங்கிக்கொள்ள சுந்தரலட்சுமி சர்க்கரை ஆலையுடன் முன்னோக்கிய ஒப்பந்தம் (Forward contract) செய்துகொள்ள ஒப்புக்கொள்கிறார்.
 
ஆகஸ்ட் 1-ஆம் தேதியும் பிறக்கிறது. சந்தை நிலவரப்படி 1 கிலோ சர்க்கரை ரூ.46-ஆக இருக்கிறது. எவ்வளவு விலை கொடுத்து கிருஷ்ணன் 1,000 கிலோ சர்க்கரையை வாங்க வேண்டும்? 
 
முன்னோக்கிய ஒப்பந்தத்தின்படி, கிருஷ்ணன் ரூ.45,000 கொடுத்து 1,000 கிலோ சர்க்கரையை சுந்தரலட்சுமி சர்க்கரை ஆலையிடமிருந்து வாங்குகிறார். அதாவது, இந்த ஒப்பந்தத்தமானது சர்க்கரை விலையேற்றத்தினால் ஏற்படக்கூடிய நஷ்டங்களிலிருந்து கிருஷ்ணனைப் பாதுகாப்பதுடன், சுந்தரலட்சுமி சர்க்கரை ஆலைக்கு எதிர்பார்த்த விலையில் விற்கவும் வகை செய்து தருகிறது.
 
நன்கு கூர்ந்து கவனிக்கும்போது, சுந்தரலட்சுமி சர்க்கரை ஆலையால் ஒரு கிலோ சர்க்கரையை ரூ.46-க்கு விற்க முடியாமல், ஒப்பந்த விலையிலேயே, அதாவது ரூ.45-க்கே விற்கவேண்டிய நிர்பந்தத்துக்கு ஆளாகிறது.
 
மேற்கூறிய உதாரணத்தினால், நாம் தெரிந்துகொள்வது என்னவென்றால், முன்னோக்கிய ஒப்பந்தத்தின் (Forward Derivative) மூலமாக வர்த்தகம் செய்யும்போது வாங்குபவரும் மற்றும் விற்பவரும் ஒருவருக்கொருவர் கடமைக்குட்பட்டுள்ளனர் என்பதே. 
 
எதற்காக இந்த முன்னோக்கிய ஒப்பந்தமானது உலகளவில் ஏகோபித்த வரவை பெற்றுள்ளது? இதற்கு சில காரணங்கள் உள்ளன. அந்தக் காரணங்களை ஒவ்வொன்றாக சொல்கிறேன்.
 
காரணம்-1
 
1990-க்கு முந்தைய கால வர்த்தகம் என்பது இரு நாடுகள் சம்பந்தப்பட்ட வர்த்தகமாதலால், எதிர்காலத் தேவையையும் மற்றும் வழங்கலையும் ஓரளவுக்கு அனுமானிக்க முடிகிறது. 90-க்குபின், வர்த்தக உலகமயமாக்கலின் காரணத்தினால் எதிர்கால விலையைத் தீர்மானிக்க எண்ணிலடங்கா காரணிகளை கருத்தில்கொள்வது மிகவும் கடினம்.
 
இந்தக் காலகட்டத்தில் ஒவ்வொரு நிறுவனமும் தன்னை நிலைநிறுத்தி கொள்ள மற்றும் சாதித்துக் காட்ட குறைந்த விலையில் கொள்முதல் செய்து அதிக லாபம் முதலீட்டாளர்களுக்கு ஈட்டுவது மிகக் கடினமாகும். அதனால் என்னவோ ஒவ்வொரு நிறுவனமும் டெரிவேட்டிவ் ஒப்பந்தத்தை நாடவேண்டியுள்ளது.
 
காரணம்-2
 
முதலீட்டின் மதிப்பினை தனிநபர் மற்றும் நிறுவன முதலீட்டாளர்கள் விலை பாதிப்பிலிருந்து காப்பாற்றுவது மிகவும் முக்கியமானதாகும். அவ்வாறாக அதன் மதிப்பினைக் காப்பாற்ற இன்றைய காலகட்டத்தில் வெவ்வேறு வகையான டெரிவேட்டிவ் ஒப்பந்தங்கள் சந்தையில் கிடைப்பதால், பங்குச் சந்தையில் முதலீட்டு அளவு (Investment volume) ஒவ்வொரு வருடத்திலும் ஏறுமுகமாகவே இருக்கிறது.
 
இதெல்லாம் சரி, ஏதோ பிசினஸ் செய்கிற இரண்டு  நிறுவனங்கள் போட்டுக் கொள்ளும் ஒப்பந்தம் போலல்லவா இந்த டெரிவேட்டிவ் ஒப்பந்தம் இருக்கிறது என்றுதானே நீங்கள் நினைக்கிறீர்கள்? உண்மையில் நம் அன்றாட வாழ்வில் டெரிவேட்டிவ் ஒப்பந்தத்தின் பயன்பாடு அதிகமாகவே இருக்கிறது.
 
எப்படி என்பதை அடுத்த வெள்ளிக்கிழமை அன்று வெளியாகும் அத்தியாயத்தில் சொல்கிறேன்.   
 
விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP

MUST READ