Vikatan.com

www.vikatan.com would like to send you push notifications.

Notifications can be turned off anytime from browser settings.

நாணயம் விகடன் - ட்விட்டர் கேள்வி-பதில்!

ஓய்வுக்கால திட்டமிடல் தொடர்பான  சந்தேகங்களுக்கு, இன்று (ஜூலை 8, 2015) நாணயம் விகடன் ட்விட்டரில் ஹோலிஸ்டிக் இன்வெஸ்ட்மென்ட் பிளானர்ஸ் இயக்குநர் கே.ராமலிங்கம் பதில் அளித்தார்.

உங்களின் சந்தேகங்களை உங்களது ட்விட்டர் கணக்கிலிருந்து @nanayamvikatan  உங்கள் கேள்வி #AskNV என்று ட்விட் செய்து பதில் பெறலாம்.

 

 

 

 

 

 

 

 

 

 

 


1. என் வயது 65. என் மருத்துவ செலவுகள் அதிகமாக இருக்கிறது. இப்போது மெடிக்ளெய்ம் பாலிசி எடுத்துக்கொள்ளலாமா, எவ்வளவு  செலவாகும்?

மூத்த குடிமக்களுக்கு என பிரத்யேகமாக மெடிக்ளெய்ம் பாலிசிகள் உள்ளன. அதில் உங்களுக்குத் தேவையானதைத் தேர்வு செய்துகொள்ளலாம். குறைந்தபட்ச காப்பீட்டுத் தொகை 2 லட்சம் ரூபாய் இருப்பது உகந்தது. நீங்கள் செலுத்த வேண்டிய ஆண்டு பிரீமியம் ரூ.10,000 முதல் ரூ.20,000 வரை இருக்கக்கூடும்.

2. என் வயது 47. தற்போதைய மாத செலவு ரூ.50,000. ஓய்வுக்காலத்துக்காக கார்பஸ் தொகை எனக்கு எவ்வளவு தேவைப்படும், மாதம் எவ்வளவு சேமிக்க வேண்டும்?

நீங்கள் ஓய்வுபெறும் வயதைக் குறிப்பிடவில்லை. நீங்கள் 60 வயதில் ஓய்வுபெறுவதானால் 13 வருடம் கழித்து மாதம் 1,35,000 ரூபாய்த் தேவைப்படும். நீங்கள் 13 வருடம் கழித்து ஓய்வுபெறும் போது ரூபாய் 3,60,94,377 கிடைக்கும்.  உங்கள் ஓய்வுக்கால தேவைக்கான நிதியாக இருக்க வேண்டும்.

இந்த ஓய்வுக்கால நிதியைச் சேமிக்க, ரூபாய் 1,00,000 மாதாமாதம் ஆண்டுக்கு 12% வருமானம் தரக் கூடிய பங்குச் சந்தை சார்ந்த மியூச்சுவல் ஃபண்ட் திட்டங்களில் முதலீடு செய்ய வேண்டும்.

உங்களால் மாதம் ஒரு லட்சம் ரூபாய் முதலீடு செய்ய முடியவில்லை எனில், இப்போது, உங்களால் சேமிக்க முடியும் தொகையை மியூச்சுவல் ஃபண்டில் முதலீடு செய்யலாம். அதன் பிறகு கொஞ்சம் கொஞ்சமாக முதலீட்டுத்  தொகையை  அதிகரித்துக் கொள்ளலாம்.

மேலும், கூடுதலாகக் கிடைக்கும் தொகை (போனஸ், வேறு முதலீடுகள் மூலமாக வரும் வருமானம்) ஆகியவற்றை ஓய்வுக்காலத்துக்காக முதலீடு செய்யலாம்.

3. ஓய்வுக்காலத்தில் என்னென்ன செலவுகள் வரும்? என்னென்ன முதலீடுகள் செய்ய வேண்டும்? மெடிக்ளெய்ம் தொகை எவ்வளவு இருக்க வேண்டும்?

ஓய்வுக்காலத்தில் பெரும்பாலும் அன்றாடத் தேவைக்கானச் செலவுகள், போக்குவரத்து செலவு, மருத்துவச் செலவு மற்றும் விஷேச நாட்களில் அன்பளிப்புகள் வழங்குவதற்கானச் செலவுகள் பெரும்பாலும் ஏற்படும்.
 
இந்தவகையான செலவுகளைப் பட்டியலிட்டு வருடத்திற்கு எவ்வளவு பணம் தேவையோ அதை மாதாமாதமோ அல்லது மூன்று மாதங்களுக்கு ஒருமுறையோ வருமானம் தரக்கூடிய முதலீடுகளில் முதலீடு செய்ய வேண்டும்.

மெடிக்ளெய்ம் தொகை குறைந்தபட்சம் ரூ.2 லட்சம் இருக்குமாறு இன்ஷூரன்ஸ் பாலிசி எடுத்துக் கொள்வது நல்லது. இதுபோக, மெடிக்ளெய்ம் பாலிசியில் க்ளெய்ம் செய்ய முடியாத நோய்களுக்கு அல்லது சின்ன சின்ன மருத்துவ தேவைகளை நிறைவேற்றிக்கொள்வதற்குத் தேவையான பணத்தை தனியாகச் சேமித்து வைத்துக்கொள்வது அவசியம்.

4. என் வயது 30. தற்போது குடும்பச் செலவு 25 ஆயிரம் ரூபாய். என்னுடைய ஓய்வுகாலச் செலவுகளைச் சமாளிக்க எவ்வளவு தொகை தேவைப்படும். அதற்கு எதில் முதலீடு செய்ய வேண்டும்?

நீங்கள் ஓய்வுபெறும் வயதைக் குறிப்பிடவில்லை. பொதுவாக 58 வயதில் ஓய்வுபெறுவதானால் அடுத்த 30 வருடங்கள் கழித்து மாதம் 2,15,677 ரூபாய் தேவைப்படும்.?
நீங்கள் 28 வருடம் கழித்து ஓய்வுபெறும்போது ரூபாய், 6,12,54,153 உங்கள் ஓய்வுக்கால நிதியாக இருக்க வேண்டும்.

இதற்கு ஒவ்வொரு மாதமும் ரூ.14,625 யை 15 சதவிகிதம் வருமானம் தரக்கூடிய  பங்குச் சந்தைச் சார்ந்த மியூச்சுவல் ஃபண்ட் திட்டங்களில் முதலீடு செய்ய வேண்டும்.

5. மூத்த குடிமக்களுக்கு வருமான வரிச் சலுகை அளிக்கும் திட்டங்கள் குறித்து விளக்க முடியுமா?

மூத்த குடிமக்களுக்கு என பிரத்யேகமாக வருமான வரிச் சலுகை அளிப்பது மூத்த குடிமக்கள் வைப்பு நிதி மட்டுமே. இதில் 5 வருடம் முதலீடு செய்ய வேண்டும். ஆண்டுக்கு 9.25% வட்டி வழங்கப்படும்.

இதுதவிர, மூத்தகுடிமக்கள் எடுக்கும் மெடிக்கல் இன்ஷூரன்ஸ் திட்டங்களுக்கு ரூபாய் 20,000 வரை 80 D பிரிவின் கீழ் வரிவிலக்குப் பெறலாம்.

6. ஓய்வுக்காலத் தேவைகளுக்காக பிஎஃப்-ல் மாதம் ரூ. 2 ஆயிரத்தை முதலீடு செய்து வருகிறேன். இன்னும் கூடுதலாக மாதம் ரூ. 2 ஆயிரம் சேமிக்க முடியும். இந்தத் தொகையை பிஎஃப்-ல் முதலீடு செய்யலாமா அல்லது வேறு வகையில் முதலீடு செய்யலாமா?

நீங்கள் பிஎஃப்-ல் முதலீடு செய்வது சரியான முதலீடுதான் என்றாலும், அனைத்து சேமிப்பையும் ஒரே முதலீட்டில் செய்வது உகந்ததாக இருக்காது. நீங்கள் மேற்கொண்டு முதலீடு செய்யும் 2000 ரூபாயை பங்குச் சந்தை சார்ந்த மியூச்சுவல் ஃபண்ட் திட்டங்களில் முதலீடு செய்வது உகந்ததாக இருக்கும்.


7. என் வயது 28. வேலைக்குச் சேர்ந்து 2 ஆண்டுகளாகிறது. என் அடிப்படை சம்பளம் இப்போது 30,000 (பேசிக் + டிஏ சேர்ந்து). எனக்கு ஆண்டுக்கு 10% சம்பள உயர்வு கிடைக்கும். பிஎஃப் பணத்தை இடையில் எடுக்கவில்லை என்றால், என் 58 வயதில் கிடைக்கும் தொகை தோராயமாக  எவ்வளவு இருக்கும். இது என் ஓய்வுக்கால செலவுகளை ஈடுகட்டுமா?

உங்கள் பிஎஃப் தொகை மாதம் 3,600 ரூபாய் எனில், 10% ஆண்டு உயர்வுடன் சேர்த்து உங்கள் 58-வது வயதில் 1,75,00,000 ரூபாய் கிடைக்கும்.

8. வேலைக்குச் சேர்ந்தது முதல் (என் வயது 25 வயது) மாதம் 2,000 ரூபாய் ஆர்டி போட்டு, அதனை எஃப்டியாக மாற்றி வருகிறேன். என் 60 வயதில் இந்தத் தொகை, செலவுகளுக்கு போதுமா?

உங்களின் வயது 25 என்பதால் பங்கு சார்ந்த மியூச்சுவல் ஃபண்ட் திட்டங்களுக்கு மாறுவது நல்ல முடிவாக இருக்கும்.  ஆர்டியில் மாதம் 2 ஆயிரம் ரூபாய் முதலீடு செய்யும்போது, 8.5%  வருமானம் கிடைத்தால் உங்களின் 60 வயதில் 48.02 லட்சம்    ரூபாய் கிடைக்க வாய்ப்புள்ளது. இந்தத் தொகையை ஃபிக்ஸட் டெபாசிட்டில் முதலீடு செய்யும்போது உங்களுக்கு மாதாமாதம் 34 ஆயிரம் ரூபாய் கிடைக்கும்.

அதே ரூ. 2 ஆயிரத்தை பங்கு சார்ந்த மியூச்சுவல் ஃபண்ட் திட்டங்களில் முதலீடு செய்யும்போது, ஆண்டுக்கு 15% உங்களுக்கு 2.25 கோடி ரூபாய் கிடைக்கும். இந்தத் தொகையை ஃபிக்ஸட் டெபாசிட்டில் முதலீடு செய்யும்போது உங்களுக்கு மாதாமாதம் 1.59 லட்சம்  ரூபாய் கிடைக்கும்.

 

9. என்பிஎஸ் திட்டத்தின் வருமானம் எப்படி உள்ளது?
 

இந்தத் திட்டம் 2004-ம் ஆண்டு ஆரம்பிக்கப்பட்டது. இதில் முதலீட்டுக்கான வருமானமானது கடந்த வருடம் 13 சதவிகிதமாக இருந்தது. ஆனால், இதை ஓர் அளவுகோலாக எடுத்துக்கொள்ள முடியாது. ஏனெனில், இந்தத்  திட்டம் ஸ்திரத்தன்மை அடைய இன்னும் சிறிது காலம் ஆகும். அதுவரை ஓய்வுக்கால தேவைகளுக்காக முழுவதும் என்பிஎஸ் திட்டத்தை மட்டும் நம்பி இருக்காமல், வேறு முதலீட்டுத் திட்டங்களிலும் முதலீடு செய்வது நல்லது.

 

 

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP

MUST READ