Vikatan.com

www.vikatan.com would like to send you push notifications.

Notifications can be turned off anytime from browser settings.

சரியாக திட்டமிட்டால்... இலக்குகளை எளிதாக அடையலாம்!

விஷாலாட்சி ஒரு மென்பொருள் நிறுவனத்தில் வேலை செய்கிறார். அவருடைய வயது 30. குழந்தைக்கு வயது 5. இவர் ஒருவரே குடும்பத்தை கவனிக்கவேண்டிய சூழல். இந்த நிலையில் நம்மிடம் நிதி ஆலோசனை கேட்டு வந்திருந்தார். இவரின் விவரங்களை சென்னையில் உள்ள ஃபார்ச்சூன் பிளானர்ஸ்  (www.fortuneplanners.com) நிறுவனத்தின் உரிமையாளர் மற்றும் நிதி ஆலோசகருமான பி.பத்மநாபனிடம் கொடுத்து நிதி ஆலோசனை வழங்கச் சொல்லி கேட்டிருந்தோம். அவர் வழங்கிய நிதி ஆலோசனை விவரங்கள் இனி...

"தனி ஒரு மனுஷியாக நின்று தனது குடும்பத்தை நடத்தி வருகிறார் விசாலாட்சி. அதற்கு என்னுடைய மனமார்ந்த பாராட்டுக்கள். தற்போதைய நிலையில் இவருடைய குழந்தைக்கான இதர செலவு மற்றும் மருத்துவச் செலவுக்காக மாதம் 11,000 ரூபாய் ஒதுக்க வேண்டியுள்ளது, இது தவிர குழந்தையின் கல்விச் செலவுக்காக வருடத்திற்கு ரூ.15,000 ரூபாய் ஆகிறது என்றார். மேலும் யுலீப் (ULIP) இன்சூரன்ஸ் திட்டத்திற்கென வருடத்திற்கு ரூ.25,000 செலுத்தவேண்டும். மேலும் சுகன்யா சம்ருதிக்கு வருடத்திற்கு ரூ.12,000. மேலே குறிப்பிட்ட இன்ஷூரன்ஸ் மற்றும் குடும்பச் செலவு  எல்லாம் போக, தற்போது இவரால் மாதம் 10,000 வரை சேமிக்க முடியும்.

உடனே செய்ய வேண்டியது!

இதுவரை இவர் லைப் இன்சூரன்ஸ் பாலிசியோ அல்லது மெடிக்கல் இன்சூரன்ஸ் பாலிசியோ எடுக்கவில்லை. இவர் ஒருவரை நம்பித்தான் குடும்பமே இருக்கிறது எனவே இதை உடனடியாக எடுக்கவேண்டும். இவரின் ஆண்டு சம்பளத்திலிருந்து 15 மடங்கு அளவுக்கு டேர்ம் இன்ஷூரன்ஸ் எடுத்துக் கொள்ளலாம். தற்போது சேமிக்கும் ஆர்டி பணத்தை தொடர்ந்து சேமித்து அதை டேர்ம் மற்றும் ஹெல்த் இன்ஷூரன்ஸ் பாலிசிக்காக வருடா வருடம் பயன்படுத்திக் கொள்ள வேண்டும்.
இப்போது வேலை பார்க்கும் இடத்தில் நான்கு லட்சம் வரை மெடிக்கல் இன்சூரன்ஸ் கிடைக்கிறது. தனியார் நிறு்வனங்களில் வேலை பார்ப்பவர்கள் நிறுவனத்தை மட்டும் நம்பி இருக்காமல் அவர்களுக்கென தனியாக மெடிக்கல் இன்சூரன்ஸ் எடுத்துகொள்வது நல்லது.

கல்விக்கான முதலீடு!

இவருடைய பெண் குழந்தையின் கல்விக்கு இன்னும் 13 வருடத்தில் இன்று தேவைப்படக்கூடிய 10 லட்சம், 28 லட்சம் என 8% பணவீக்கத்தில் உயர்ந்து விடும். அதே சமயம் மாதா மாதம் 6,000 சேமித்தால், 13 வருடத்தில் 15% கூட்டு வட்டியில் அந்த 28 லட்சம் மியூட்சுவல் ஃபண்ட் முதலீட்டின் மூலம் ஈட்டி விட முடியும். அல்லது மியூச்சுவல் ஃபண்ட் நிறுவனங்களின் ஸ்டெப்-அப் முதலீட்டு ஆப்ஸன் மூலம் கல்விக்காக 4,000 ரூபாய் முதலீட்டை ஆரம்பித்து வருடா வருடம் 10% முதலீட்டை அதிகப்படுத்து வந்தாலே இந்த பணத்தை ஈட்டிவிட முடியும்.  

திருமண முதலீடு!
பெண்ணின் திருமணம் 25 வயது என எடுத்துகொண்டால் இன்று தேவைப்படக்கூடிய திருமண செலவு 15 லட்சம், 20 வருடத்தில் 74 லட்சம் என   8% பணவீக்கத்தில் உயர்ந்து விடும். அதற்கு 4,000 மீதி பணத்துடன் சுகன்யா சம்ருத்தி பணத்தையும் சேர்த்து 5,000 சேமித்தால் 20 வருடத்தில், 15% கூட்டு வட்டியில் 75 லட்சம் கிடைத்துவிடும். மாறாக மியூச்சுவல் ஃபண்ட் ஸ்டெப்-அப் ஆப்ஸன் மூலம் தற்போது 3,000 ரூபாயை ஆரம்பித்து, வருடா வருடம் 10% தொகையை அதிகரித்துக் கொண்டே போனால் திருமணத் தேவையின்போது 83 லட்சம் ரூபாயை ஈட்டிவிட முடியும்.

ஓய்வுகால முதலீடு!
ரூ. 3,000-ஐ ஓய்வுகாலத்துக்காக முதலீடு செய்தால் 20 வருடத்தில் ஏறக்குறைய ஒரு கோடி ஆகி விடும். இன்று அவருடைய மாதாந்திர செலவு 20,000 அது 8% பணவீக்கத்தில் 98,000 ஆகிவிடும். முதலீட்டின் மூலம் கிடைக்கும் பணம் மற்றும் மற்றும் அவருடைய பிஎஃப் பணம் அவருடைய ஓய்வு காலத்திற்கு போதுமானதாக இருக்கும்.

இப்போதைக்கு செய்யக் கூடாதது!
வீடு வாங்க வேண்டும் என்கிற ஆசை எல்லோருக்கும் இருக்கிறது. ஆனால் அந்த வீட்டை நேரமறிந்து வாங்குவது நல்லது. இப்போதைக்கு விஷாலாட்சிக்கு முக்கியமான தேவைகள் இருப்பதால் வீடு வாங்கும் ஆசையை தள்ளிப்போடலாம். உயர் பதவி மற்றும் வருமானம் அதிகமாகும் போது அதை பற்றி சிந்திக்கலாம்.

ஒருவர் எவ்வளவு பணம் சம்பாதிக்கிறார் என்பது முக்கியமில்லை. அதில் எவ்வளவு சேமித்து அதை எவ்வாறு பெருக்கி கொள்கிறார் என்பது முக்கியம். எல்லோரும் வெறும் வாய் வார்த்தைக்காக “இது கஷ்டப்பட்டு சேமித்த பணம்” என்று சொல்வதை விட உண்மையாகவே அதற்கு மதிப்பு கொடுத்து முதலீடு செய்தால் அது நமக்கு நல்ல வருமானத்தை ஈட்டித் தரும்" என்றார் தெளிவாக.
 

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP

MUST READ